Luka 7

Yesu botho ŋeca pa jatic madwoŋ ma Roma

(Mat 8:5-13)

1Munyo Yesu ocowo waco gima go oyido yenyo ji jowowinji, okidho Kapernaum. 2Jasirikale ma Jaroma moro onwaŋo nitie gi jatic pere m'omaro swa, aka onwaŋo two tektek macegin gi tho. 3Munyo owinjo kwoŋ Yesu, ooro jotel pa Joyuda moro bonge kwayo go nike wobin wobothi jatic pere no. 4Munyo jotundo bongi Yesu joywakere rigo swa ka jowaco ni, “Ripo itimi ri jame kony, 5rupiri go omaro nono mawan, aka otieko kiri geto riwan kalamo pa Joyuda.” 6Gikenyo Yesu okadho gi jo aka munyo oriko peco, jasirikale no ooro merin pere bonge waco rigo ni, “Rwoth, ikir'icandere, kole kiripi ran k'idonjo i ot paran. 7Aka meno am'omiyo awon akitiŋere bino bongin, to luw nyaka wac acel kende, to jatic paran bedo maber. 8Kole nitie joma dhuman, aka abende adhumo jolweny man. K'awaco ri acel ni, ‘Kadhi.’ To go kadho, aka ri man ni, ‘Biye ka.’ To go bino; kendo k'awaco ri jatic paran ni, ‘Tim gimanyo.’ To go timo.” 9Munyo Yesu owinjo wac me, ouro swa, to wire neno lwak ji, to waco ri joma luwo go ni, “Awaco riwin, kada i Isiraili gipi fodi akinwaŋo kiti yeyo me.” 10Aka munyo jomikwenda jogik i ot, jonwaŋo jatic no olama.

Yesu cerino wod pa citho

11Rumacen mayot, Yesu okidho i tindi m'ilwoŋo ni Nayin, kama jofonjirok pere kodi lwak ji madwoŋ jokwaŋ'iye go. 12Munyo oriko waŋkac ma tindi no, oneno otiŋ ŋat'otho m'obedo wod pa citho moro, aka manago onwaŋo obedo nyathi acel no won kende. Lwak ji ma tindi oyido jowotho gi dhako no kanyacel. 13Munyo Rwoth oneno dheno, wor omako go gine, to waco ni, “Ikir'iywak.” 14Gikenyo go okidho to ketho cinge kwoŋ kitanda pa jatho, to jom'otiŋo jocungo; to waco ni, “Jayac, awaco rin, ay malo.” 15Ŋat'otho oay obedo to cako luwo, to Yesu dwoko go i cingi yokimere. 16Dhano je obwok to pako Were munyo jowaco ni, “Jatuci wac Were madwoŋ omenyere i dier wan: Were oliewo ji pere.” 17Wac m'otimere kwoŋe me onyay i Yuda gipi kodi iy'adec m'othoko kenyo.

Jomikwenda pa Yohana Jakibatisa

(Mat 11:2-19)

18Jofonjirok pa Yohana jowaco ri Yohana gigipiny me je. Aka munyo Yohana olwoŋo jofonjirok pere ario, 19odhiro jo bongi Rwoth penjo go ni, “In a ŋata Yohana owaco ni labino kosa fodi wakur ŋatiman?” 20Aka munyo jono jobino bonge jowaco ni, “Yohana odhiro wan bongin ka penjin nike, in a ŋata ripo bino, kosa wakur ŋatiman?” 21I hongo no Yesu obotho jotwo mathoth, thoyamo kodi cuny m'ocido, aka ji mathoth m'onwaŋo waŋ gin otho joneno. 22#Isa 35:5,6; Isa 61:1Riameno odwoko jo ni, “Kidhi wiwaci ri Yohana gima witieko neno gi winjo: Joma waŋ gin otho joneno, jom'oŋol jowotho, jodhowo kwoŋ gin lony, joma ithi gin otho jowinjo, jom'otho jocerino, jocandi ifonjo jo Wac Manyen Maber. 23Aka jasilwany a ŋata kiteran marac.”

24Munyo jomikwenda pa Yohana jotieko kadho, Yesu ocako luwo gi lwak ji kwoŋ Yohana ka waco ni, “Onwaŋo wikidho neno aŋo i thim? Midole ma koyo yengo? Aŋo won m'onwaŋo wikidho neno? Dhano m'oruko nangin mabeyo? 25Neni win, kole joma rukere ma noro aka jocemo maber jonwaŋere i diedipo pa kere ayin. 26To onwaŋo wikidho neno aŋo won? Jatuci wac Were? Adieri awaco riwin, go loyo kiri jatuci wac Were! 27#Mal 3:1Me a ŋat'ondiki kwoŋe ni, ‘Neni, adhiro rin jamikwenda paran yuwiyin, ma bino kutho yiko rin royo.’ 28Awaco riwin, kwoŋ joma mon onywolo je ongoye maloyo Yohana gi dwoŋ; to kucel kiri ŋatathin loyo i Ker pa Were, je loyo go gi dwoŋ.”

29 # Mat 21:32; Luk 3:12 (Munyo ji je kodi jocoki misolo jowinjo go, joyere gi wac pa Were rupiri Yohana obatisa jo. 30To Jofarisayo kodi Jondiko jocayo atoŋa pa Were rijo wegi, omiyo jokwero Yohana obatisa jo.)

31“Anopima ji ma pama kodi aŋo, kosa jocale aŋo? 32Jocale nyithindho ma jobedo i katale. Aka kweth acel koko ri man ni, ‘Kole wakudho riwin madundo, to wikimielo; wawero wer ywak to wikiywaki!’ 33Yohana Jakibatisa obino ma riyo kec aka kimedhi, to wiwaco ni, ‘Go nigi jwogi kwoŋe!’ 34Onyo Wod Dhano obino ma cemo aka oro gir'amadha to wiwaco ni, ‘Neni ŋato jaworo, odoko jamadhi vini, aka mere pa jocoki misolo kodi joreco!’ 35To kad'ameno ji je ma joyeyo rieko pa Were jotero paka otire.”

Yesu i ot pa Simon Jafarisayo

36Jafarisayo acel olwoŋo Yesu cemo peco pere. Munyo Yesu otundo peco pa Jafarisayo no to bedo dhower, 37#Mat 26:7; Mar 14:3; Yoh 12:3dhako moro odonjo, m'onwaŋo odakana swa i tindi. Munyo go owinjo ni Yesu cemo i ot pa Jafarisayo no, obino gi cupa mo maŋwe kur, 38to cungo yuŋeye dho ka tiende munyo ywak, to cako oyo pigi waŋe i tiendi Yesu, to yweyo gi ye wiye; to cwiyo tiende, to wiro gi mo maŋwe kur. 39Munyo Jafarisayo m'olwoŋo Yesu oneno ameno, won owaco kende ni, “Bedi ŋati me bedi jatuci wac Were adieri, kole d'oŋeyo kiti dhako ma geyo go me, paka go jareco” 40Gikenyo Yesu ogamo dhoke ka waco ni, “Simon, nitie gim'amito waco rin.” Anago ni, “Jafonji, waci ran.” 41“Jal moro oyido nigi jobanjin pere ario; ŋat'acel obedo gi banja pere ma siringi miya abic, ŋatiman piero abic. 42Munyo culo pesa no odhiero jo, jalo ocwako joje. K'ameno, ŋa kwoŋ jono ma bino maro go loyo?” 43Simon odwoko ni, “Aparo ni ŋata go ocwako banja madwoŋ loyo.” Yesu odwoko ni, “Itundo.” 44Gikenyo Yesu owire oŋiyo dhako no, to waco ni, “Simon, ineno dhako me? Adonjo i ot perin, to ikimiyan kada pi ma lwoko tiendan, to go owok lwoko tiendan gi pigi waŋe, aka oyweyo kiri gi ye wiye. 45Ikicwiyo lemban, to go k'oweyo cwiyo tiendan cuka nende adonji ka. 46Ikiwiro mo i wiyan, to neni go owok wiro tiendan gi mo maŋwe kur. 47Am'omiyo awaco rin, mar m'oasere ma go onyutho omiyo reco pere madit otiek cwako rigo. Ato ŋat'ocwaki rigo manok ama nyutho mar manok.” 48Gikenyo Yesu owaco ri dhako no ni, “Reco perin otiek cwako rin.” 49Gikenyo joman m'onwaŋo jobedo i dhower jocako waco kendi gin ni, “Me ŋa ma bende cwako reco?” 50To Yesu owaco ri dhako no ni, “Yeyo perin otieko bothin; kadhi i siem.”

Currently Selected:

Luka 7: DHOPE

Highlight

Copy