Luka 21

Mic pa citho moro

(Mar 12:41-44)

1Yesu otiŋo waŋe malo to neno munyo ji jobolo mic pajo i kakan ma Ot pa Were. 2Aka oneno citho moro ma jacandi tektek bende bol'iye dome ario. 3Gikenyo owaco ni, “Adieri awaco riwin, citho ma jacandi me obolo mic maloyo apa joman je. 4Ato joman jokelo mic ma wok kwoŋ ŋaŋo pajo ma jokano; to go, kada jacandi rigo, omiyo gimoro je ma d'okwo gine.”

Yesu luwo kwoŋ kedho woko Ot pa Were

(Mat 24:1-2; Mar 13:1-2)

5Joman kwoŋ jo oyido joluwo kwoŋ Ot pa Were, paka neno maŋon gi telin mere kodi mic m'icwayo ri Were manitie i iye. Yesu owaco ni, 6“Kwoŋ gima wineno me je, hongo bino tundo m'ongoye tele kad'acel ka m'ibino weyo wi nyawote ma k'okedhi woko.”

Teko kodi acanda ma bino

(Mat 24:3-14; Mar 13:3-13)

7Gikenyo jopenjo Yesu ni, “Jafonji, gime bino timere keraŋo? Kendo aŋo m'onyuth ni ndir otundo ri gino ma timirok?”

8Yesu owaco ni, “Kure win moro wokiri wowondi win; kwoŋbedo ji mathoth jolabino i nyingan ka jowaco ni, ‘An ago!’ Kendo ni, ‘Ndiri ago otundo!’ Wikiri wiluw jo. 9Lworo wokiri womaki win ka wiwinjo ji luwo kwoŋ lweny kodi gwenyirok pa ji kwoŋ adhum; gigipiny ma pameno ripo kutho timirok, to meno kinyuthi ni gigipiny bino mayot.” 10Go omedo waco ni, “Piny acel bino lwenyo gi man, ker acel gi man, yengirok pa piny madongo bino bedo, kec kodi tho bino bedo kisi kamoro je. 11Musisi madongo, kec kodi two nundu i kabedo m'opokere, aka bino bedo gigipiny ma bwoko ji tektek kodi ranyuth madongo ma wok i polo bino timere.”

12“Mafodi gigipiny me je k'otimere, ibino mako win to icando win; ibino tero win i kalamo pa Joyuda kodi i jiera; ibino tero win i waŋ kerin kodi jodhum ro nyingan. 13Me bino bedo hongo mewin ma tito Wac Manyen Maber ri jono. 14#Luk 12:11-12Kethi win paro me i cuny win, ni wikiri wikwakere rango radwok mewin wegi. 15Kole abino miyo win wac kodi rieko ma ongoye jakwor mewin ma bino ciro kosa kwero gima wiwaco. 16Kiri jonywol mewin, wutmin win, wade mewin, gi merin mewin je jobino kwedo win; jobino neko jomegi kwoŋ win. 17Dhano je bino mon kodi win ro wac paran. 18To ongoye kada ye wiy win acel ma bino rwenyo. 19Ciri win matek, kole me apaka wibino botho kwo mewin.”

Yesu luwo kwoŋ rerok pa Yerusalem

(Mat 24:15-21; Mar 13:14-19)

20“Ka wineno lwak jolweny jothoko Yerusalem, gikenyo wibino ŋeyo nike ilareyo woko go mayot. 21Gikenyo joma nitie i Yuda joworingi wi gote; joma nitie i tindi no jowoeye woko, aka joma nitie woko ma tindi kiri jowodonji i tindi. 22#Hos 9:7Kole me obedo, ndelo ma gir'acula m'amiyo gimoro je ma Ndiko Maleŋ oluwo kwoŋe wotimere. 23Kidamba madwoŋ bino bedo ri mon ma joyac kodi megi nyithindho maŋic i hongo no! Litho madwoŋ swa bino bedo i piny me, aka Were bino kigaga tektek gi ji me. 24Ibino neko jo g'abor, t'itero jo paka ŋecin i piny moro je, aka Jopath jobino wotho wi Yerusalem cuka ndir ma dhum pajo orum kicutho.”

Bino pa Wod Dhano

(Mat 24:29-31; Mar 13:24-27)

25“Ranyuth bino bedo i waŋceŋ, i dwe, i micalin i piny, aka piny je jobino rem m'ongoye geno, munyo jolworo kitula gi derino ma mor pa wakawaka. 26Ji jobino bwok to cuny gin tho gi lworo munyo jokuro gima bino i piny gipi: Rupiri meni man polo bino yengere. 27#Dan 7:13; Meny 1:7Gikenyo nyaka ji jobino neno Wod Dhano munyo loro wi pondeponde gi meni kodi dwoŋ m'oasere. 28Ka gigipiny me cako timirok, cungi win, witiŋ waŋ win malo rupiri both mewin ocore cegin.”

Fonji kwoŋ makuyu

(Mat 24:32-35; Mar 13:28-31)

29Gikenyo Yesu oluwo iy'ageca ni, “Poyi win makuyu kodi yen man je. 30Ka wineno boke mere ocako lothi, wiŋeyo ni ceŋ cegin liel. 31Am'omiyo bende ka wineno gigipiny me timere, ŋey win ni Ker pa Were cegin bino.”

32“Adieri awaco riwin, luse ji ma ndir me jok'otho jorum mafodi gigipiny me je k'otimere. 33Polo gi piny bino rumo woko to wac paran kilarumo.”

Gwokirok mitere

34“To gwokere win, cuny win wokiri wopoŋ awanya ma piny gi mero gi rembo ma kwo me, rupiri ndelo no nyalo coro win pa bwo m'ociki gine win. 35Kole Ndelo no bino tundo ri ji je man piny gipi p'apormalo. 36Kendo kure win aka wikway noknok nike wibedi gi meni ma ciro gigipiny ma bino timere me je to wicungo i nyim Wod Dhano.”

37 # Luk 19:47 Yesu ocowo ndelo moro munyo fonjo i Ot pa Were, to i dier wor go oyido omaro wok woko to bedo wi Got Oliv. 38Aka odikin maŋic, ji je oyido jokidho bonge i Ot pa Were winjo fonji pere.

Currently Selected:

Luka 21: DHOPE

Highlight

Copy