Luka 20
20
Penji kwoŋ meni pa Yesu
(Mat 21:23-27; Mar 11:27-33)
1Ndelo moro munyo Yesu oyido nitie i Ot pa Were fonjo ji aka luwo kwoŋ Wac Manyen Maber, jotel pa jocway ri Were i wi migam kodi Jondiko kanyacel gi jotel pa ji jobino, 2to jopenjo go ni, “Waci riwan, meni aŋo m'initie gine ma timo gigipiny me, kosa ŋa m'omiyin meni ma timo gigipiny me?” 3Yesu odwoko jo ni, “Weyi abende apenji win penji moro. Waci ran win, 4meni pa Yohana ma miyo batisimo owok bongi Were kosa bongi dhano?” 5Gikenyo wegi jocako piem kendi gin ni, “Wawaci nedi? Ka wanowaci ni owok bongi Were, go bino waco ni, ‘To raŋo ma wikiyeyo Yohana?’ 6Odoko ka wanowaci ni, ‘Owoki bongi dhano.’ Ji gibe jobino goyo wan gi telin, rupiri joŋeyo ni Yohana oyido obedo jatuci wac Were.” 7Riameno jowaco ni, “Wakuya kama meni no owok'iye.” 8Aka Yesu owaco rijo ni, “Am'omiyo abende ak'owaci riwin kam'anwaŋ'iye meni m'atimo gine gigipiny me.”
Ageca kwoŋ jokur ndelo vini
(Mat 21:33-46; Mar 12:1-12)
9 #
Isa 5:1
Gikenyo Yesu oluwo ri ji iy'ageca ama: “Dhano moro opidho ndelo vini to ketho i cingi jokur, to kadho wiloka ma hongo mabor. 10Munyo ndir otundo ma fono vini, ooro ŋeca pere bongi jokur nike jowolimi rigo gim'onyak megi. To jokur jogoyo ŋeca no ayino to joriemo go to dok gi cinge nono. 11To go odoko ooro ŋeca man, ma bende jokur jogoyo, jotimo go kicar, to joriemo go to dok gi cinge nono. 12To go odoko ooro ŋeca mar'adek; ma jokur joketho kwoŋe poyo bende, to jobolo go woko koro. 13Gikenyo won ndelo vini owaco ni, ‘Anotim aŋo? Abino oro wodan won m'amaro; adieri jobino miyo go dwoŋ!’ 14To munyo jokur joneno go, jowaco wegi kendi gin ni, ‘Me won a musika pa won ndelo. Weyi waneki aka ndelo vini wodoŋ mawan!’ 15Gikenyo jobolo go woko ma ndelo vini to joneko go.”
“Onyo wiparo ni aŋo ma won ndelo vini otim ri jokur me? 16Go bino dwoko to neko woko jono, to ketho ndelo vini i cingi jokur man.” Munyo ji jowinjo gime jowaco ni, “Gino wokiri wobedi ameno kada mathin!” 17#Zab 118:22Yesu oneno jo to penjo ni, “Aŋo ma ndiko nyutho ka waco ama.”
“Kole tele won ma jogeto jocayo ni bukony
am'olokere tele ma thielo kindi ot?”
18“Moro je m'opodhi wi tele no bino ŋinyere woko; aka ka tele no opodhi kwoŋ moro, bino dhiŋo go woko.”
Penji kwoŋ culo misolo
(Mat 22:15-22; Mar 12:13-17)
19Jondiko kodi jotel pa jocway ri Were i wi migam jotemo mako Yesu i hongo no won, rupiri joŋeyo nike oyido luwo iy'ageca kwoŋ jo; to jolworo ji. 20Riameno jodwaro hongo ma ripo, to jodhiro jopendo moro ri Yesu, ma jorendere pa ji mabeyo, ŋey jowomaki wac m'okom m'owaci, nyaka jowoosa go bongi jor'adhum kodi Gavana. 21Jopendo me jopenjo Yesu ni, “Jafonji, waŋeyo nike gim'iwaco kodi gim'ifonjo otire, kendo ikidew kwoŋ dwoŋ pa dhano moro je, to ifonjo adieri kwoŋ gima Were mito ri dhano timo. 22Onyo waci riwan, Cik mawan yeyo wan goyo misolo ri Kayisar kosa be?” 23To Yesu oneno apondi pajo, to waco rijo ni, 24“Nyuthan win nusu moro. Cal pa ŋa kodi nyingi ŋa manitie kwoŋe?” 25Jodwoko ni, “Apa Kayisar.” Aka Yesu odwoko ni, “Ere ka ameno, miy win Kayisar gipa Kayisar, aka wimiy Were bende gipa Were.” 26Jok'onyalo mako go i gimoro m'owaco i dier ji kenyo, to joliŋ munyo jodhier ayin ro dwoki pere no.
Penji kwoŋ cerino pa jom'otho
(Mat 22:23-33; Mar 12:18-27)
27 #
Tim 23:8
Josadukayo moro, joma waco ni cerino pa jom'otho ongoye, jocore bongi Yesu to jobolo rigo penji ni, 28#Cik 25:5 “Jafonji, Musa cango ondiko riwan ni k'omin nyatoro otho ma bu nyathi aka cege fodi nitie, jalo ripo lunjo ciliendi omin no wolimi rigo gine nyithindho. 29Onyo cango obedo wutmere abirio: Okayo pajo onywomo dhako, to tho ma bu nyithindho. 30Gikenyo omin mar'ario bende olunjo dhako no, 31gi mar'adek; aka wutmere abirio no je jobedo gi dheno, to jotho ma jok'oweyo nyithindho. 32Rumacen to dhako no bende tho. 33Onyo i ndelo ma jom'otho jocerin'iye, dheno obedi apa ŋa? Ato wutmere abirio no je jobedo gine!”
34Yesu odwoko ni, “Cwo gi mon ma ndir me jonywomere, 35to ji m'ibino yeyo jo donjo i kwo ma ndir ma bino ka ji jocerino, jok'onywomere. 36Ato kareno jokinyal tho kendo, rupiri jocale jomalaika. Aka jobedo nyithindho pa Were, rupiri otiek cerino jo kwoŋ jom'otho. 37#Wok 3:6Kole kiri Musa bende onyutho ni jom'otho ibino cerino jo i wac m'owaco kwoŋ dudi ma waŋ munyo luwo kwoŋ Rwoth ni go obedo Were pa Abraham, Were pa Isaka, gi Were pa Yakobo. 38Dwoŋ mere nike go obedo Were pa jomakwo, makiweno apa jom'otho, ato joje jokwo i go.” 39Gikenyo Jondiko moro joluwo malo ni, “Jafonji, meno dwoki maber!” 40Ato odoko jok'otemo penjo Yesu penji moro kendo.
Penji kwoŋ Kristo
(Mat 22:41-46; Mar 12:35-37)
41To Yesu owaco rijo ni, nyalere nedi waco ni Kristo obedo nyakwar Daudi? 42#Zab 110:1Kole Daudi won owaco i kitawo ma Zabuli ni,
Rwoth owaco ri Rwoth paran ni,
Bedi yu cingan maracuc,
43cuka anoloki jokwor perin kor kasik
m'inyono gi tiendin.
44Kole Daudi olwoŋo go ni Rwoth. To go nyalo nedi kendo bedo nyakwar Daudi?
Yesu gwoko ji kwoŋ Jondiko
(Mat 23:1-36; Mar 12:38-40)
45Munyo lwak ji je jociko ithi gin winjo go, Yesu owaco ri jofonjirok pere ni, 46“Kure win kwoŋ Jondiko, ma jomito nyumo kamoro je gi ruk maboyo, aka joyenyo ni womothi jo i katale ma mitan gi lworo; joyero kabedo ma malo i kalamo pa Joyuda gi kabedo maloyo bero i kalima; 47jodiyo mon tho to jomayo jo gigipiny ma pecin pajo aka jorendere gi kwayo maboyo. Jobino limo gir'acula madwoŋ loyo!”
Currently Selected:
Luka 20: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
