Luka 22
22
Can ma neko Yesu
(Mat 26:1-5; Mar 14:1-2; Yoh 11:45-53)
1 #
Wok 12:1-27
Gikenyo kalima ma mugat ma buthow, m'ilwoŋo ni ma Kadho, oyido ocore cegin. 2Jotel pa jocway ri Were i wi migam kodi Jondiko onwaŋo jotemo rango royo ma neko Yesu, to oyido jolworo ji.
Yuda yeyo camo sereko ri Yesu
(Mat 26:14-16; Mar 14:10-11)
3Gikenyo Sitan odonjo i Yuda, m'ilwoŋo ni Iskariot, m'onwaŋo obedo acel kwoŋ jofonjirok apar g'ario. 4Ameno Yuda okadho to luwo kodi jotel pa jocway ri Were i wi migam kodi jotel pa jolweny ma Ot pa Were kwoŋ yo ma go d'onyalo ketho gine Yesu i cingi jo. 5Josangala to joyeyo miyo go pesa. 6Yuda oyeyo to cako rango hongo maber ma ketho Yesu i cingi jo ma ji madit jongoye cegin.
Yesu yikere camo Kalima ma Kadho
(Mat 26:17-25; Mar 14:12-21; Yoh 13:21-30)
7Ndelo ma camo mugat ma buthow, m'inek'iye rombo ma wote ma nyaka ay m'icowere gine i kalima ma Kadho otundo. 8Riameno Yesu ooro Petero gi Yohana gi wac me: “Kidhi wiyiki cemo mawan m'othieno ma kalima ma Kadho wacam.” 9Jopenjo ni, “Iyenyo wayiki yukune?” 10Go odwoko ni, “Panen win, ka witieko donjo i tindi, ŋatimoro m'otiŋo dak pi bino romo gi win. Wiluw go kiri i ot ma go odonj'iye. 11Aka wiwaci ri won ot no ni, jafonji penjin ni nikune ot wendo ma an kodi jofonjirok paran wanocam'iye Kalima ma Kadho? 12Go bino nyutho win ot malac man malo, kama winoyik'iye gimoro je.” 13Jokidho aka jonwaŋo gimoro je paka Yesu owaco rijo, to joyiko cemo m'othieno ma kalima ma Kadho kenyo.
Cemo pa Rwoth M'othieno
(Mat 26:26-30; Mar 14:22-26; 1 Kor 11:23-25)
14Munyo hongo otundo, Yesu obedo dhower gi jomoor pere. 15Aka owaco rijo ni, “Onwaŋo awanya camo gi win Kalima ma Kadho me mafodi akicandere. 16Ato awaco riwin, ak'odoko acami cemo kendo cuka gigipiny otimere paka ripo i Ker pa Were.” 17Gikenyo okwanyo kikopo, oketho Were walwa, to waco ni, “Joli win gime wimadhi giman'iye wijoje, 18rupiri awaco riwin, wok gunyo ni akibino madho vini kendo cuka Ker pa Were obin.” 19Gikenyo okwanyo mugat, oketho Were walwa, oturo, to miyo jo jowocami, munyo waco ni, [“Me delkwoŋan m'omiy win. Tim win ameno noknok ma poyan”]. 20#Yer 31:31-34I yo acel no bende, omiyo jo kikopo, munyo cemo m'othieno orumo, ka waco ni, “Kikopo me obedo cikirok manyen m'oridhi gi remo paran ma bino oy riwin. 21#Zab 41:10To neni win, ŋata camo ran sereko nitie dhower ka kodan! 22Kole Wod Dhano bino tho paka Were oyiko; to kidamba madwoŋ bino bedo ri ŋat'osita go!” 23To jocako penjirok wegi kendi gin ni ŋa kwoŋ jo ma d'otimo gino.
Piem kwoŋ ŋatadwoŋ loyo
24 #
Mat 18:1; Mar 9:34; Luk 9:46 Piem owok i dier jofonjirok ni ŋa kwoŋ jo ama woter paka nigi dwoŋ loyo wadi. 25Yesu owaco rijo ni, “Kerin ma piny ka jodhumo ji pajo gi mbaka, aka joma jodhum joyenyo ni woker jo ni jokony pa ji. 26#Mat 23:11; Mar 9:35 #Mat 20:25-27; Mar 10:42-44To me k'apaka nitie gi win; kucel, ŋata loyo dwoŋ i dier win ripo lokere pa ŋatathin loyo, aka jatel ripo bedo paka jatic ri wadi. 27#Yoh 13:12-15Kere ŋa maloyo dwoŋ; ŋata bedo piny cemo, kosa ŋata poko cemo? Ki ŋata bedo piny be? To kole an abedo i dier win paka jatic mewin. 28Witieko bedo kodan i hongo ma teko paran je, 29to paka Baba omiyan Ker, abende abino timo riwin ameno. 30#Mat 19:28Wibino cemo gi oro gir'amadha dhower paran i Ker paran, to wibedo wi kombere ma Ker munyo withumo banjin ri nonin apar g'ario ma Isiraili.”
Yesu luwo kwoŋ kwedirok pa Petero
(Mat 26:31-35; Mar 14:27-31; Yoh 13:36-38)
31“Simon, Simon, panen! Sitan oridho ri Were ni yenyo win, ŋey woyeki win pa nyingi kal. 32To atieko kwayo riwin, nike yeyo mewin wokiri worum woko. Aka k'itieko gik bongan, imiy wutmin in meni.” 33Petero odwoko ni, “Rwoth, ayere kidho i twec kendo kada tho kodin!” 34Yesu odwoko go ni, “Awaco rin, Petero, wod gweno k'okoki konon, cuka munyo icowo kwedirok kwoŋan didek ni ikuya an.”
Hongo ma candirok
35 #
Mat 10:9,10; Mar 6:8,9; Luk 9:3; 10:4 Gikenyo Yesu owaco rijo ni, “Munyo adhiro win woko i ndir ca ma wikitiŋo mugowa pesa, mugowa moro je kosa war, wicando ye gimoro?” Jodwoko ni: “Ongoye gima wacando.” 36Yesu omedo waco ni, “To pama ŋata nitie gi mugowa pesa kosa mugowa moro wokwany; aka ŋat'ongoye g'abor wotana kot pere wonyewi gine. 37#Isa 53:12Kole awaco riwin gime: Ndiko maleŋ waco ni, ‘Okwan go kwoŋ joreco.’ Apaka bino timere kwoŋan; ato gim'ondiki kwoŋan onyo kidho timirok.” 38Jofonjirok jowaco ni, “Panen, Rwoth, abor ario ee!” Go odwoko ni, “Meno romo.”
Yesu kwayo
(Mat 26:36-46; Mar 14:32-42)
39Yesu oay okadho wi Got olivet, paka yado oyido omaro timo, aka jofonjirok joluwo go korago. 40Munyo go otundo kenyo, owaco rijo ni, “Kway win aka ŋey wik'odonji i karatem.” 41Aka oeye bongi jo to core kama romo boro ma lowo abola, to guro conge piny to kwayo. 42Owaco ni, “Baba, ka imito, kwany woko agwata me kwoŋan. Kad'ameno, wokiri wobedi paka aŋat'amito, to gim'imito ama wotimere.” 43[Gikenyo malaika owok i polo, omenyere rigo, to miyo go meni. 44G'arama cuny madwoŋ, go omedo kwayo gi geregere; i hongo no kwok pere onwaŋo cale remo ma thon piny]. 45Munyo oay i kwayo pere, ogik bongi jofonjirok pere to nwaŋo jonindo, rupiri oyido jonyocere gi rem. 46Aka owaco rijo ni, “Raŋo winindo? Ay win wikway aka nyaka wik'odonji i karatem.”
Mako Yesu
(Mat 26:47-56; Mar 14:43-50; Yoh 18:3-11)
47Munyo Yesu fodi luwo, lwak ji otundo; Yuda, acel kwoŋ jofonjirok apar g'ario, otelo jo, aka obino bongi Yesu to podho i kore to cwiyo lembe. 48To Yesu owaco ni, “Yuda, icamo sereko ri Wod Dhano gi rendirok ni icwiyo lembe?” 49Munyo jofonjirok m'onwaŋo jonitie gi Yesu joneno gim'onwaŋo kidho timirok, jowaco ni, “Rwoth, watoŋ jo g'abor mawan?” 50Aka ŋat'acel kwoŋ jo otoŋo ŋeca pa jadwoŋ pa jocway ri Were i wi migam to codo woko ithe maracuc. 51To Yesu odwoko ni, “Gime wokiri womedere!” Aka ogeyo ithi jalo to cango.
52Gikenyo Yesu owaco ri jotel pa jocway ri Were i wi migam kodi jokur ma Ot pa Were kodi jotel pa ji m'onwaŋo jobino kenyo mako go ni, “Wibino ran g'abor g'abirin paŋini abedo jakwo? 53#Luk 19:47; 21:37Munyo abedo gi win ndelo je i Ot pa Were, wikitemo makan, to me onyo a hongo mewin kodi apa jameni ma mudho ma timo ameno.”
Petero kwedere kwoŋ Yesu
(Mat 26:57-58,69-75; Mar 14:53-54,66-72; Yoh 18:12-18,25-27)
54Gikenyo jomako Yesu to jotero go i ot pa jadwoŋ pa jocway ri Were i wi migam; aka Petero oluwo jo gi bor bor. 55Onwaŋo omoki mac moro i diedipo kenyo, to Petero bende mako oyo mac no gi jom'onwaŋo jooyo. 56Munyo acel kwoŋ jotic manyir oneno go obedo piny dho mac, oŋiyo go swa to waco ni, “Ŋatin oyido bende ni bonge!” 57To Petero kwedere ni, “Dhako me, akuya ran go!” 58Hongo macek okadho to ŋatiman neno Petero to waco ni, “In acel kwoŋ jonago!” To Petero odwoko ni, “Ojame, ki an!” 59Aka munyo sawa acel okadho, jal moro omedo waco g'amen ni, “Ongoye kiganagana ni ŋati me bende oyido nitie bonge, rupiri go bende Jagalili!” 60To Petero odwoko ni, “Ojame, akuya gim'iluwo kwoŋe!” Gikenyo won, munyo fodi go luwo, wod gweno okoko. 61Rwoth owire oŋiyo Petero, aka Petero opoyo wac pa Rwoth, paka owaco ni, “Mafodi wod gweno k'okoko konon, ibino kwedere kwoŋan didek.” 62Gikenyo Petero owok to ywak malith.
Yeto Yesu gi cwado go
(Mat 26:67-68; Mar 14:65)
63Ji m'onwaŋo jokuro Yesu joyeto go to jocwado go. 64Joboyo waŋe gi nanga aka jopenjo go ni, “Ŋat'ogoyin ŋa? Tuci riwan!” 65Aka jowaco gigipiny man madit ma yeto go.
Ikelo Yesu ruwaŋ jopido
(Mat 26:59-66; Mar 14:55-64; Yoh 18:19-24)
66Munyo piny oyawere, kitipa pa jotel pa Joyuda kodi jotel pa jocway ri Were i wi migam kodi Jondiko joromo kanyacel, t'itero Yesu i kapido pajo. 67Ana jo ni, “Waci riwan, in a Kristo?” Go odwoko jo ni, “K'awaco riwin, wik'oyey; 68aka k'apenjo win penji, wik'odwokan. 69To wok pama kadho yuwaŋe, Wod Dhano bino bedo yuracuc pa Were Majameni je.” 70Joje jopenjo ni, “Kere in i Wod Were?” Go odwoko jo ni, “Kole eno wiwaco.” 71Jowaco ni, “Odoko wayenyo wac mene kendo ma ridho gime! Kole ee wawegi watieko winjo wac m'owok i dhoke won!”
Currently Selected:
Luka 22: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
