Yohana 11

Tho pa Lazaro

1 # Luk 10:38-39 Dhano m'ilwoŋo ni Lazaro, ma Bethania oyido two. Me obedo tindi ma Maria kodi Marita, nyamin go, oyido jobed'iye. 2#Yoh 12:3(Maria me ama ndir moro oolo mo maŋwe kur i tiendi Rwoth to yweyo gi ye wiye; aka ama Lazaro, omin go, oyido two.) 3Nyimere no jodhiro wac ri Yesu ni, “Rwoth, mere perin m'imaro two.” 4Munyo Yesu owinjo, owaco ni, “Two pa Lazaro kilacowere gi tho; gime otimere ma nyutho dwoŋ pa Were, aka nyaka wobedi nger ma Wod Were ripo lim'iye dwoŋ.”

5Yesu oyido omaro Marita gi nyamin, kodi Lazaro. 6To kada munyo go owinjo wac ni Lazaro two, omedo bedo kam'oyido niye ndelo ario man. 7Gikenyo nyaka go owaco ri jofonjirok pere ni, “Weyi wagiki win Yuda kendo.” 8Jofonjirok jodwoko ni, “Jafonji kole nyaka okadho hongo macek won cuka Joyuda jomiti goyin gi telin, ama odoko onyo iyiko gik yukorago?” 9Yesu owaco ni, “Ndelo nitie gi sawa apar g'ario, k'ameno? Ka dhano wotho odieceŋ, kicer, rupiri go neno lero. 10To ka go owotho wor, cer, rupiri lero ongoye.” 11Yesu omedo waco ni, “Mere mawan Lazaro nindo, t'abino kidho cewo go.” 12Jofonjirok jowaco ni, “Rwoth, ka go nindo bino bedo maber.” 13To wac pa Yesu dwoŋ mere oyido ni Lazaro otieko tho, to joparo nike go waco nindo ma ndir je. 14Gikenyo Yesu owaco rijo kamaler ni, “Lazaro otieko tho; 15to ri bero mewin asangala nike onwaŋo angoye yukoro aka ŋey wiyey. Ere weyi wakidhi win bonge.” 16Toma (m'ilwoŋo ni Rut) owaco ri jofonjirok wadi ni, “Weyi wajoje wakidhi watho kanyacel gine!”

17Munyo Yesu otundo, onwaŋo ni Lazaro oyido otieko bedo ndelo aŋwen i bur. 18Bethania onwaŋo kirom mayiro ario wok Yerusalem 19aka Joyuda mathoth onwaŋo jobino limo Marita kodi Maria gi kweyo cuny jo i teko pajo ma tho p'omin jo.

20Munyo Marita owinjo ni Yesu bino, owok woko romo gine; to Maria odoŋ peco. 21Marita owaco ri Yesu ni, “Rwoth bedi ceŋino ibedi ka, di omin an k'otho.” 22T'aŋeyo ni kada pama Were bino miyin gimoro je m'ikwayo go. 23Yesu owaco rigo ni, “Omin in lacerino.” 24Go odwoko ni, “Aŋeyo ni go bino cerino i ndelo ma rumacen.” 25Yesu owaco rigo ni, “Aŋat'abedo kisukina kodi kwo; ŋata yeyan bino kwo, kada go otho; 26aka ŋata kwo aka yeyan kilatho. Iyeyo gime?” 27Go odwoko ni, “Ey, Rwoth! Ayeyo nike in i Kristo, Wod Were, m'oyido genere ni labino i piny ka.”

Yesu ywak

28Munyo Marita otieko waco gime, ogik peco lwoŋo Maria nyamin go nyaliŋliŋ. Owaco rigo ni, “Jafonji obino aka lwoŋin.” 29Munyo Maria owinjo gime, oay malo to redo kidho romo gine. 30[Yesu oyido fodi k'otundo loka no, to oyido nitie kama Marita orom'iye gine]. 31Joyuda m'onwaŋo jonitie i ot gi Maria m'oyido jokweyo cuny go i teko pere munyo joneno go oay malo to rure woko, joluwo go. Joparo nike oyido go kidho dho kaliel ywak.

32Munyo Maria otundo kama Yesu niye to neno go, opodho piny dho tiende, to waco ni, “Rwoth, bedi ceŋino oyido ibedi ka, d'omin an k'otho!” 33Munyo Yesu oneno go ywak, aka Joyuda ma jobino gine bende joywak, geregere omako go, aka owinjo malith swa i cunye. 34Openjo jo ni, “Wiyiko go kune?” Jodwoko ni, “Rwoth biye neni.” 35Yesu oywaki. 36Gikenyo Joyuda jowaco ni, “Neni paka onwaŋo omaro go!” 37To jomegi kwoŋ jo jowaco ni, “Ŋat'obotho kiri waŋ dhano m'oyido otho raŋo ma di go k'ogeŋo tho pa jame?”

Yesu cerino Lazaro

38Geregere odoko omako Yesu to kidho dho kaliel, m'onwaŋo obedo ŋungu m'ocul dhoke gi tele. 39Yesu omiyo jo or ni, “Kwany win woko tele!” Marita nyamin jatho, odwoko ni, “Rwoth, kole pama onyo go ŋwe marac; cuka yik go onyo me ndelo mar'aŋwen!” 40Yesu owaco rigo ni, “Akiwaco rin nike ibino neno dwoŋ pa Were k'iyeyo?” 41Gikenyo joŋilo woko tele. Yesu oŋiyo malo to waco ni, “Baba, afoyin ni iwinjan. 42Aŋeyo ni ndir je iwinjan, t'awaco ama ma bero pa ji man ka, ŋey jowoyey ni iŋat'ioran.” 43Munyo otieko waco gime, okoko gi dwonde ma malo ni, “Lazaro, woki!” 44Ŋat'otho no owok m'otwey cinge gi tiende gi nangin, kareno nanga man oboy gine waŋe. Yesu owaco rijo ni, “Gony win go, aka wiwey wowothi.”

Yuda camo sereko ri Yesu

(Mat 26:1-5; Mar 14:1-2; Luk 22:1-2)

45Joyuda mathoth m'oyido jobino limo Maria joneno gima Yesu otimo, to joyeyo go. 46To joman kwoŋ jo jogik bongi Jofarisayo to jowaco rijo gima Yesu otimo. 47Ameno Jofarisayo kodi jotel pa jocway ri Were i wi migam joromo kodi jopido to jowaco ni, “Watim win aŋo? Neni paka jame onyo timo gir'aura madit! 48Ka wayeyo go omedere gi tic me, ji je jobino yeyo go, aka rwodhe ma Roma jobino ay to joŋinyo woko Ot pa Were gi riemo woko nono mawan gipi!” 49Ŋat'acel kwoŋ jo ma nyinge Kaifas, m'oyido a jadwoŋ pa jocway ri Were i wi migam i oro no owaco ni, “Wikuya gimoro kad'acel! 50Wikiniaŋ ni ber riwin ka ŋat'acel otho ri ji je, loyo nono gipi rerok woko?” 51Iy'adieri, go k'owaco gime i paro pere won; kwanyo woko paka go oyido jadwoŋ pa jocway ri Were i wi migam i oro no, go otuco mikwenda ma wok bongi Were nike Yesu cegin tho ri Joyuda je. 52Aka ki ri Joyuda kende, to ma coko kanyacel nyithindho pa Were ma jokele iye je. 53Am'omiyo wok i ndelo no kadho malo jotimo can ma neko Yesu. 54Riameno Yesu k'owotho kamaler kendo i Yuda, to oeye to kidho kamoro macegin gi thim, i tindi m'ilwoŋo ni Efrayim. Kenyo ama go obed'iye gi jofonjirok pere.

55Kalima pa Joyuda ma Kadho, oyido nicegin, aka ji mathoth jowok thenge gi thenge jokidho Yerusalem, timo kula ma lonyo delkwoŋ gin mafodi kalima no k'otundo. 56Jo oyido jorango Yesu, aka munyo jocokere i Ot pa Were, wegi jopenjere ni, “Wiparo nedi? Kosa go k'obin i kalima?” 57Jotel pa jocway ri Were i wi migam kodi Jofarisayo oyido jotieko wodho or ni ka moro nitie m'oneno kama Yesu niye ripo dhiro wac, ŋey jowomaki go.

Currently Selected:

Yohana 11: DHOPE

Highlight

Copy