Yohana 12
12
Iwiro Yesu gi mo i Bethania
(Mat 26:6-13; Mar 14:3-9)
1Munyo fodi odoŋ ndelo aucel aka ndelo ma kalima ma Kadho wotundi, Yesu okidho Bethania, kama Lazaro, ma Yesu ocerino kwoŋ jom'otho bed'iye. 2Joyiko rigo kenyo cemo m'othieno aka Marita oyido a japok cemo kareno Lazaro obedo gi Yesu dhower. 3#Luk 7:37-38Gikenyo Maria okwanyo cupa mo maŋwe kur swa ma romo adec kilo gipi, ma nyingi yath moro aka ma welo, to olo i tiendi Yesu, to yweyo gi ye wiye. Kur pa mo no mamit otweyo ot gipi. 4Acel kwoŋ jofonjirok pa Yesu, Yuda Iskariot, ŋat'oyido lacamo rigo sereko, okwero ni, 5“Raŋo k'otana mo maŋwe kur me siringi miya adek to ipoko jocandi pesa no?” 6Go owaco ama ki kwoŋbedo go paro kwoŋ jocandi, to rupiri go oyido jakwo. Go oyido a jamigowa pesa aka onwaŋo diceŋ konyere gi pesa me. 7To Yesu waco ni, “Weyi dheno! Oyiki ni go wokan mo me cuka ndelo ma yikirok paran. 8#Cik 15:11Ndiri je wibino bedo gi jocandi, to an akibino bedo gi win ndir je.”
Camo sereko ri Lazaro
9Lwak ji madwoŋ jowinjo ni Yesu oyido nitie Bethania to jokidho kenyo; ki ro wac pa Yesu kende, to ro mito neno Lazaro bende, ma Yesu ocerino kwoŋ jom'otho. 10Ameno jotel pa jocway ri Were i wi migam jocano neko Lazaro bende; 11rupiri ro gim'otimere kwoŋe, Joyuda mathoth joweyo jotel pajo to joyeyo Yesu.
Yesu donjo Yerusalem gi dwoŋ
(Mat 21:1-11; Mar 11:1-11; Luk 19:28-40)
12Yawere mere lwak ji madwoŋ m'onwaŋo obino i kalima ma Kadho, jowinjo ni Yesu oyido bino Yerusalem. 13#Zab 118:25-26Riameno jokwanyo jangi thith to jokidho romo gine munyo jokoko ni, “Hosana! Jasilwany a ŋata bino i nyingi Rwoth! Silwany pa Were wobedi ri Kere ma Isiraili!” 14Yesu onwaŋo nyathi punda to bedo i wiye, paka Ndiko Maleŋ waco ni,
15 #
Zek 9:9
“Tindi ma Zayon, ikir'ibedi gi lworo,
kole Kere perin bino bongin,
kareno obedo wi nyathi punda.”
16Jofonjirok pere jok'oniaŋ kwoŋ gime i hongo no, to munyo Yesu otiek tiŋo malo i dwoŋ nyaka jopoyo nike ndiko owaco gime, aka ni d'otim kwoŋe gime.
17Lwak ji ma ndelago jobedo bongi Yesu i hongo ma go olwoŋ'iye Lazaro wok i kaliel aka ocerino go kwoŋ jom'otho, jomedo nyayo wac no. 18Ji kweth jokidho romo gine rupiri jowinjo nike go otimo gir'aura no. 19Gikenyo Jofarisayo wegi jowaco kendi gin ni, “Wineno, wakinyali gimoro be! Neni win paka piny gipi onyo luwo go” 20Jogris moro bende oyido jobedo megi kwoŋ joma jokidho Yerusalem lamo Were i ndir ma kalima no. 21Jobino bongi Filipo, m'oyido wok Bethsayida i Galili, to jokwayo ni, “Jadwoŋ, wamito neno Yesu.” 22Filipo okidho to waco ri Andereya, aka jario no jokidho to jowaco ri Yesu. 23Yesu odwoko jo ni, “Pama onyo hongo otundo ma miyo Wod Dhano dwoŋ. 24Adieri awaco riwin, ka nyingi kal moro k'opidhi i lowo to tho, go doŋadoŋa acel mangil. To k'otho, nyaka nywolo nyingi kal kweth. 25#Mat 10:39; 16:25; Mar 8:35; Luk 9:24; 17:33Ŋata won omaro kwo pere, bino rwenyo woko kwo; to ŋata kwero kwo pere i piny ka ama bino kuro ri kwo makirum. 26Nyatoro je ma tiyo ran ripo luwan, aka jatic paran bino bedo kam'an'iye. Aka Baba bino miyo nyatoro je ma tiyo ran dwoŋ.”
Yesu luwo kwoŋ tho pere
27“Pama cunyan raman; t'anowaci nedi? Ni, ‘Baba, bothan kwoŋ hongo me?’ To be, me a gim'omiyan atundo i hongo ma candirok me. 28Baba, miy nyingin dwoŋ.” Gikenyo dwondi jo moro oluwo wok i polo ni, “Atieko miyo nyingan dwoŋ, kendo abino medo timo ameno.”
29Lwak ji m'oyido ocungo kenyo owinjo dwondi jo no to jowaco ni manago lithkoth, aka joman jowaco ni, “Calo malaika oluwo gine!” 30To Yesu owaco rijo ni, “K'obedo ri an am'omiyo dwondi jo me oluwo, to riwin. 31Ndiri otundo ma thumo banja ri piny me; kendo jadhum ma piny me onyo ibino riemo woko. 32K'otiek tiŋan malo wok piny abino ywayo ji je bongan.” [33Ameno, go onyutho kiti tho ma go oyido kidho candirok]. 34#Zab 110:4; Isa 9:6; Eze 37:25; Dan 7:14Lwak ji odwoko ni, “Kole Cik mawan waco ni Kristo bino kwo cil gi cil. To idoko iwaco ni Wod Dhano iripo tiŋo malo nedi? Wod Dhano no a ŋa?”
35Yesu odwoko ni, “Lero no fodi nitie gi win hongo moro ye. Woth win kafodi lero no nitie gi win, ka mudho fodi k'oumo win; kole ŋata wotho i mudho kiŋey kama go com'iye. 36Yey win lero no kafodi winigine, ŋey wibedi nyithindho ma lero.” Rumacen munyo Yesu otieko waco gime okidho pondo rijo.
Kwero yeyo pa ji
37Kada Yesu oyido otieko timo ranyuth madongo me i waŋ jo, je fodi jok'oyeyo go. 38#Isa 53:1Gime otimere ama ŋey gima jatuci wac Were, Isaya, owaco wotundi i kare ni,
“Rwoth, ŋa m'oyeyo mikwenda ma wakelo? Were onyutho ŋa meni pere?”
39Riameno jok'onyalo yeyo paka Isaya odoko owaco kaman ni,
40 #
Isa 6:10
“Were oculo waŋ jo to umo paro pajo,
nike waŋ jo wokiri wonen,
paro pajo wokiri woniaŋi gimoro,
ŋey jokiri jowonyal gik bongan,
ni aboth jo.”
41Isaya owaco ama rupiri oneno dwoŋ pa Ŋato, aka oluwo kwoŋe.
42Kad'ameno, jotel pa Joyuda mathoth bende joyeyo Yesu; to paka onwaŋo jolworo Jofarisayo, jok'owaco gino nyatirtir ni aka ŋey wokiri woriem jo woko i kitipa pa jom'oyeyo pa Joyuda. 43Ato oyido jomaro foy pa ji loyo foy pa Were.
Wac pa Yesu ama thumo banja
44Gikenyo Yesu oluwo gi dwonde ma malo ni, “Nyatoro je ma yeyan kiyeyan kende to yeyo ŋat'ooran bende. 45Ŋata nenan meno neno ŋat'ooran bende. 46Abino i piny ka paka lero ŋey nyatoro je ma yeyan, wokiri wodoŋ i mudho. 47To ka moro winjo mikwenda paran aka kimaki, akithum rigo banja, Ato akibino thumo banja ri piny, to botho piny ayino. 48Nitie ŋata bino thumo banja ri nyatoro je ma kweran aka kijol fonji paran; wac m'atieko luwo ama bino bedo jathum rigo banja i ndelo ma rumacen, 49rupiri akiluwo gi meni paran won, to Baba am'ooran gim'aripo waco kodi luwo. 50Aka aŋeyo nike or pere kelo kwo makirum. Am'omiyo gim'awaco je, awaco paka Baba ooran waco.”
Currently Selected:
Yohana 12: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
