Yohana 13
13
Yesu lwoko tiendi jofonjirok pere
1Mafodi ndelo ma kalima ma Kadho, k'otundo, Yesu oniaŋ nike hongo pere otundo ma eye i piny wokidhi bongi Bamere. Paka ndir je go oyido omaro jopere i piny ka, omaro jo kiri i gike.
2Yesu kodi jofonjirok pere oyido jonitie dhower othieno. Aka jwogi oyido otieko ketho paro ma camo ri Yesu sereko i cuny Yuda wod pa Simon Iskariot. 3Yesu oŋeyo ni Bamere otieko ketho gimoro je i cinge; go oŋeyo nike owok bongi Were aka onyo go kidho gik bongi Were. 4Riameno Yesu oay dhower, olunyo nanga pere ma woko, to tweyo taulo i piere. 5Gikenyo okonjo pi moro i besen, to cako lwoko tiendi jofonjirok pere, to yweyo gi taulo ma piere. 6Munyo otundo bongi Simon Petero, Simon openjo go ni, “Rwoth, onyo ikidho lwoko tiendan?” 7To Yesu odwoko ni, “Pama fodi ikuya gim'atimo, to ibino ŋeyo rumacen.” 8Ana Petero, “Ikibino lwoko tiendan kada mathin.” Yesu odwoko ni, “K'akilwoko tiendin meno kere ikinitie kanyacel kodan.” 9Simon Petero odwoko ni, “Rwoth onyo ikir'ilwok nyaka tiendan kende, to lwoki ran kiri cingan gi wiyan bende!” 10Yesu owaco ni, “Moro je m'otieko lwoki meno otieko lony kwoŋe gipi aka kiyeny lwoki kendo, mitere wolwoki tiende won kende. Wijoje wilony, kwanyo woko ŋat'acel.” 11(Yesu onwaŋo otieko ŋeyo ŋata kidho camo rigo sereko, am'omiyo owaco ni, “Wijoje wilony, kwanyo woko ŋat'acel.”)
12 #
Luk 22:27
Munyo go otieko lwoko tiendi jo, oruko nanga pere ma woko to gik i kabedo pere dhower. Go openjo ni, “Wiŋeyo dwoŋ gim'awok timo riwin? 13Wilwoŋan ni Jafonji kodi Rwoth, aka witire, kole abedo ameno. 14Onyo paka an ma bedo Rwoth mewin odoko Jafonji mewin, awok lwoko tiendi win, wibende wiripo lwoko tiendi jowoti win. 15Amiyo win ranen, ŋey wibende witim gim'awok timo riwin. 16Adieri awaco riwin, ongoye ŋeca maloyo rwoth pere gi dwoŋ, kendo ongoye jamikwenda madwoŋ loyo ŋat'ooro go. 17Paka pama onyo wiŋeyo gigipiny me, ka witimo ameno wibino limo silwany!”
18 #
Zab 41:10
“Akiluw kwoŋ wijoje; aŋeyo jom'ayero. To Ndiko Maleŋ ripo timere ma waco ni, ‘Ŋat'ocemo kodan owire ran marac.’ 19Awaco riwin gime pama mafodi k'otimere, aka k'otimere wibino yeyo ni, ‘An ago’. 20Adieri awaco riwin, moro je ma jolo nyatoro ma aoro, meno bende jolan aka ŋata jolan, meno bende jolo ŋat'ooran.”
Yesu luwo kwoŋ camo rigo sereko ma fodi k'otimere
(Mat 26:20-25; Mar 14:17-21; Luk 22:21-23)
21Munyo Yesu otieko waco gime, ocako winjo rem i cunye to luwo kamaler ni, “Adieri awaco riwin, ŋat'acel kwoŋ win kidho camo ran sereko.” 22Jofonjirok joŋiyere waŋ, munyo jodhier swa kwoŋ ŋata go oyido waco. 23Acel kwoŋ jofonjirok ma Yesu omaro, onwaŋo bende obedo kabuti Yesu. 24Simon Petero ogwelo ŋato aka owaco ni, “Penji go ŋata go luwo kwoŋe.” 25Gikenyo jafonjirok no ocore cegin to thenere kwoŋ Yesu to penjo ni, “Manago ŋa, Rwoth?” 26Yesu odwoko ni, “Ŋat'abino pilo mugat i acero t'amiyo go meno a ŋata go.” Gikenyo go okwanyo mugat, opilo, to miyo Yuda, wod pa Simon Iskariot. 27Tekin Yuda jolo mugat no, Sitan odonjo kwoŋe. Yesu owaco rigo ni, “Kwaki timo gim'iyiko timo!” 28Ongoye dhano kwoŋ jom'oyido jonitie dhower no m'oniaŋ gim'omiyo Yesu owaco rigo ameno. 29Paka Yuda am'oyido jamigowa, jofonjirok megi joparo ni Yesu owaco rigo ni wokidhi wonyewi gima jomito ma kalima, kosa ni womiy jocandi gimoro. 30Tekin Yuda jolo mugat no, owok woko mayot; aka piny oyido otieko yutho.
Or manyen
31Munyo Yuda otieko kadho, Yesu owaco ni, “Pama Wod Dhano onyo otieko limo dwoŋ, aka Were bende onyo otieko limo dwoŋ i go. 32K'inen Were onyo otieko limo dwoŋ i go, meno Were won gipi ama bino miyo Wode dwoŋ, aka bino timo ameno mayot. 33Nyithindho paran, fodi abino bedo ye gi win hongo macek. Wibino rangan, aka bende awaco riwin gim'atieko waco ri Joyuda ni, ‘Wikinyal tundo kama akidh'iye.’ 34#Yoh 15:12,17; 1 Yoh 3:23; 2 Yoh 1:5Amiyo win or manyen ni, mare win. Paka atieko maro win apaka bende wiripo mare. 35Ka kisi dhano omaro nyawote, meno aka ji je jobino ŋeyo nike wijofonjirok paran.”
Yesu luwo kicutho kwoŋ kwedirok pa Petero
(Mat 26:31-35; Mar 14:27-31; Luk 22:31-34)
36Simon Petero openjo ni, “Rwoth, ikidho kune?” Ana Yesu, “Wikinyal luwan kam'akidh'iye gi pama; to rumacen aka wibino luwan.” 37Petero openjo ni, “Rwoth, raŋo ma akinyali luwin pama? An ayikere kiri tho rin!” 38Yesu odwoko ni, “Iyikere adieri tho ran? Adieri awaco rin, kafodi wod gweno k'okoko, ibino kwedirok kwoŋan didek.”
Currently Selected:
Yohana 13: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
