Yohana 10
10
Ageca kwoŋ jakwath rombo
1“Adieri awaco riwin, ŋata kidonji i dier sidwol rombo gi dhiot, to idho gi yuthenge man, meno go jakwo kendo jamahembi. 2Ŋata donjo gi dhiot meno a jakwath rombo. 3Jakur dhiot yawo rigo, rombo jowinjo dwonde aka go lwoŋo rombo pere gi nyingi gin aka wodho jo woko. 4K'otieko wodho jo woko, telo jo, to joluwo go, rupiri joŋeyo dwonde. 5Jokibino luwo ŋatiman, jobino ŋwec jowoeye bongi ŋato ayino, rupiri jokuya dwonde.”
6Yesu owaco rijo ageca me, to jok'oniaŋ gima go owaco no. 7Yesu odoko owaco ni, “Adieri awaco riwin, Aŋat'abedo dhiot pa rombo. 8Joman je ma jotelo yuwiyan jobedo jokwo kendo jomahembi; to rombo k'owinjo jo. 9Aŋat'abedo dhiot. Moro je ma donjo gi bongan bino both; go bino donjo to wok, to nwaŋo lum m'oloth. 10Jakwo bino nyaka kwalo, neko kodi nyeko woko. An abino nike jowolimi kwo, aka kwo ma gibe.”
11“Aŋat'abedo jakwath maber. Jakwath maber yeyo tho ri rombo pere. 12Jatic acula kibedi won rombo, ka oneno arara bino, weyo jo to ringo, to arara kwanyo rombo to kedho jo woko. 13Go ringo rupiri go jatic acula, aka kidew kwoŋ rombo. 14#Mat 11:27; Luk 10:22An a jakwath maber. Aŋeyo rombo paran, 15aka bende joŋeyan paka Baba oŋeyan, aka abende aŋeyo go, aka ayeyo tho ri rombo. 16An gi rombo man ma jongoye i sidwol me. Aripo kelo jo bende; jobino winjo dwondan, aka jobino lokere sidwol acel kodi jakwath acel.”
17“Baba omaran rupiri ayeyo bolo woko kwo paran, rumacen to doko anwaŋo kendo. 18Ongoye ŋata kwanyo kwoŋan kwo me. Awon arwenyo woko gi mito paran. Anitie gi meni ma rwenyo go woko, kendo anitie gi meni ma dwoko go. Me gima Baba ooran timo.”
19Tiakirok odoko obedo i dier Joyuda ro wac me. 20Jomathoth kwoŋ jo jowaco ni, “Go nitie gi jwogi! Neko omako! Wiwinjo luwo pere raŋo?” 21To joman jowaco ni, “Ŋata nigi jwogi kinyal luwo ama! Jwogi bende dinyal botho joma waŋ gin otho?”
Joyuda jokwero Yesu
22I hongo no ndir otundo ma kalima ma lonyirok ruwaŋ Were, m'obedo i Ot pa Were i Yerusalem; i ndir no pe oyido oŋico piny. 23Yesu oyido wotho i kalikondi pa Solomon i Ot pa Were, to 24Joyuda jocokere jothoko go kenyo to jowaco rigo ni, “Ilaweyo wan i kiganagana kiri keraŋo? Waci riwan kamaler ka in a Kristo.” 25Yesu odwoko ni, “Atieko waco riwin, to wikimiti yeyo. Tic ma atimo i nyingi Baba ama luwo ran; 26to wikibino yeyo rupiri wingoye i rombo paran. 27Rombo paran winjo dwondan; aŋeyo jo, aka joluwan. 28Amiyo jo kwo makirum, aka jokibino tho; ongoye moro ma bino mayan jo. 29Baba m'omiyan jo dwoŋ loyo ji je, aka ongoye nyatoro manyalo kwanyo jo woko i cingi Baba. 30Aka wan kodi Baba wabedo acel.”
31Gikenyo Joyuda odoko jokwanyo telin ma goyo gine go. 32Yesu owaco rijo ni, “Atieko timo tic mabeyo madit m'owok bongi Baba; onyo mene kwoŋ jo ma wimito goyan'iye gi telin?” 33#Jolevi 24:16Joyuda jodwoko ni, “Wakimiti goyin ro tic mabeyo m'itimo, to ro luwo gima k'otire kwoŋ Were, rupiri in idhano aka ikethere lwoŋirok ni ibedo Were!” 34Yesu odwoko ni, “Kere k'ondiki i Cik mewin wegi nike Were owaco ni, ‘Wibedo werin?’ 35Ka Were olwoŋo jom'okel rijo wac pere ni werin (aka gim'ondiki kiwire), 36onyo winowaci ri ŋata Were ooro i piny ni go luwo gima k'otire kwoŋ Were ni rupiri awaco ni abedo Wod Were? 37Ere onyo wikiri wiyey k'inen akitim tic pa Baba. 38To k'inen atimo gigipiny ago, kada nende wikiyeyan, yey win kada nyaka tic no aka winoŋey kicutho ni Baba nitie i an aka anitie i go.”
39Gikenyo odoko jotemo mako Yesu to budho jo. 40#Yoh 1:28Yesu odoko ogik ocewere i Yordan to por loka yu kama yado Yohana batis'iye ji to bedo kenyo. 41Ji madit jobino bonge aka jowaco ni, “Yohana k'otimo gir'aura moro, to gima go owaco kwoŋ jame je obedo adieri.” 42Aka ji kweth joyeyo go kenyo.
Currently Selected:
Yohana 10: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
