Mariko 2

Yezu awonesa umusaani uwakataala

(Mat 9.1-8; Luk 5.17-26)

1Yezu wakobolayo i Kaperunaumu. Lwanyuma lwe bifukhu bikyeekhe biri, babaandu bawulila bari ali ingo. 2Babaandu bakali babeene beetsa mu ntsu babusana, alekha khubawo ni imbuka isi umuundu anyala abe wema, akhaba imulyaango ta.

Yezu nga abe alikho abaleekela shilomo sha Wele, 3abawo babaandu bane babeetsa nga basutile umusaani uwaba wakataala, nga ali khu lusaamba. 4Ne khulwe lituuli lye babaandu likali, balekha khunyalisa khukhwoola isi Yezu aba ta. Nashiryo baniina khu ntsu khungaaki, basambulakho abe esi Yezu emile, bekhisa umusaani tsana bamura ibweeni wa Yezu.

5Yezu n'abona nga bali ni khufukiilila khukali, walomela umusaani uwaba wakataala ari, “Mwaana wase, bibyonako byoowo byakhwiyakhiilwe.”

6Abawo batweela khu baleekeli be Kamakaambila ka Musa nga bekhaale ambi. Kila barakikha khukhwireeba mu myoyo kyaawe bari, 7“Shiina kila umusaani uyu aloma shishiindu nga shino shiri? Ambaasa ari niye ali Wele? Naanu ukuundi unyala weyakhila bibyonako akhali Wele yenyene?”

8Khaangukho, Yezu wamanya abe byeesi balikho bambaasa mu myoyo kyabwe. Kila abareeba ari, “Lwashiina kila mwambaasa bibiindu bino mu myoyo kyenywe? 9Khu biindu bibili bino shili waheena shishiili shishaangu? Khulomela umusaani uwakataala ndi, ‘Weyakhiilwe bibyonako byoowo,’ namwe khuloma ndi, ‘Yinyukha usute lusaamba bwoowo utsye ingo’? 10Ne kane imbokesanise ndi Umwaana w'Omuundu ali ni bunyala khukhwiyakhila bibyonako khu shiibala.” Kila Yezu alomela umusaani tsana ari, 11“Yinyukha khungaaki! Suta lusaamba lwoowo utsye ingo.”

12Ni abweene awo umusaani wenyukha, wasuta lusaamba lweewe, wakyeenda warura antsye nga boosi bamuloleleele, beyaanga. Kila baruuya Wele nga baloma bari, “Abe si khwabonatsakakho shishiindu nga shino shiri ta.”

Yezu alaanga Levi

(Mat 9.9-13; Luk 5.27-32)

13Yezu ndi lundi, watsya khu ndulo khwe nyaantsa isi balaanga bari Galilaaya. Lituuli lye babaandu likali lilyeene lyeetsa lyamwibotookhelela, kila arakikha khubaleekela shilomo sha Wele. 14N'aba nga alikho akyeenda abira, wabona Levi, umwaana uwa Alufayo, nga wekhaale mu shifo esi babusanisila kumusolo. Kila Yezu amuloma ari, “Inondekho.” Aryo Levi wenyukha waloonda khu Yezu.

15Lwanyuma, Yezu ni baleekelwa beewe baaba khu mayiiya mu ntsu iya Levi. Khu mayiiya ako khwabakho bababusanisa kumusolo bakali busa ni baboonaki babaandi, nga bekhaale ni Yezu ni baleekelwa beewe. Khulwekhuba nabo abe beetsile khulondelela Yezu.

16Ne batweela khu baleekeli be Kamakaambila ka Musa, baaba Bafarisaayo. Ni baabona Yezu nga wekhaale nalundi aliila atweela ni baboonaki ni bababusanisa kumusolo, bareeba baleekelwa ba Yezu bari, “Shiina kila niye alya ni bababusanisa kumusolo ni baboonaki?”

17Yezu n'awulila shino kila abalomela ari, “Babaandu babaali balamu sibekoomba khuutsya isi umukaangi ta; ne abo babaali balwaale nibo babaatsya isi umukaangi. Ise shineetsa khulaanga babaandu babaali bakhosefu khuuba baloondeleli baase ta, ne akhali ndi neetsa khulaanga abo babaali baboonaki.”

Babaandu bereeba khu khubuya intsala

(Mat 9.14-17; Luk 5.33-39)

18Baleekelwa ba Yohana Umubatisa ni Bafarisaayo abe lukana babuya intsala (nga basiiba). Kila abawo babeetsa khureeba Yezu bari, “Lwashiina baleekelwa ba Yohana Umubatisa ni be Bafarisaayo babuya intsala, ne baboowo si babuya intsala ta?”

19Yezu wabelamo ari, “Basaale b'omundu ukhweele umweha, banyala babuya intsala nga umweene ashiiliwo ni nabo? 20Ne imbuka ni yoola barusawo ukhweele yuno, nabo babuya intsala. 21Mbaawo umuundu ubukula ingubo iyakora yonuukhaka, wanabilakho shilaka she ingubo imbya ta. N'akhola aryo, shilaka shiyaakha isho shiloosela khukhwinuula ingubo iyo, ni kumwanya kweloosela khubalaaha.

22“Mbaawo umuundu unyala watsukha iviini inyana mu kungutsi#2.22 Ikungutsi ili isawu yeesi balukha khukhwaama mu lihaafu lye shishaayo namwe isolo yoosi. Bakiraambisa khusutilamo bibiindu bibikhali bitweela ta. tsingore ta. N'akhola aryo, iviini itutuba, yaraaka tsikungutsi tsingore itsyo. Nashiryo iviini inyana bakira mu kungutsi tsishiili tsimbya.”

Shireebo shishiwamba khu shifukhu sha Sabato

(Mat 12.1-8; Luk 6.1-5)

23 # Maka 23.25 Khu shifukhu shitweela shishaba sha Sabato, Yezu ni baleekelwa beewe abe balikho bakyeenda nga babira mu mikuunda kye ŋaano. Nga ni baaba bakyeenda, baleekelwa ba Yezu baaba nga baakusaka bikala bye ŋaano. 24Kila batweela khu Bafarisaayo bareeba Yezu bari, “Shiina kila baleekelwa boowo balikho bakhola baryo? Likaambila silibafukiilisa khukhola shishiindu nga shino khu Sabato ta.”

25Kila Yezu abakobolamo ari, “Inywe simwakhusomatsakakho sheesi Daudi akhola ta, nga niye ni baloondeleli beewe intsala ni yabalya? 26#Lev 24.9#1 Sam 21.1-6Imbuka iyo, Abiyasali niye uwaba umusaayi ufuura bukhulu. Daudi enjila mu ntsu ya Wele walya kimikaati abe kyeesi bamalile khuloombela tsikhabi. Abe mu makaambila basaayi bonyene nibo babakhiile khuulya kimikaati kino. Daudi akabilakho ni babaandu beesi aba ni nabo, nabo baalya.”

27Kila Yezu akamisayo ari, “Babaandu si babuumbibwa khulwe bulayi bwe shifukhu sha Sabato ta. Ne akhali ndi shifukhu sha Sabato shareewawo khulwe bulayi bwe babaandu. 28Nashiryo, Umwaana w'Omuundu ali Umukasya uwa Sabato.”

Currently Selected:

Mariko 2: LCE

Highlight

Copy