Mariko 1

Yohana Umubatisa aleekela babaandu

(Mat 3.1-12; Luk 3.1-18; Yoh 1.19-28)

1Khuno nikhwo khurakikha khwe Kamakhuuwa Kamalayi, kakawamba khu Yezu Kristu, Umwaana uwa Wele. 2#Mal 3.1Kaarakikha nga ni shanyoowa khuronebwa mu shitabo sha Yisaaya umuŋoosi shiri,

“Bona, ise indirumana umurume wase, ukhakhunyoowe iwe ibweeni woowo,

khukhuŋoonaŋoonela iwe intsila yoowo.

3 # Isay 40.3 Iliyo likono ly'oyo ukukuulila angaaki mu mubiimbi ari,

‘Ni muŋoone kumukhoosi kw'Omukasya

nalundi ni mukwalaase tsintsila tseesi atsya khukyendelakho.’ ”

4Yohana Umubatisa abonekhela mu mubiimbi nga abatisa babaandu, nalundi nga akukuula ari babaandu bafune khubatisibwa khwe khukhwibiiyisa bibyonako nio akile beyakhilwe bibyonako byaabwe.

5Kila babaandu bakali khukhwaama mu Yuda ni khukhwaama mu shiriimba she Yerusalemu, baatsya khurekeeresa byeesi Yohana aba nga aloma. Nga beetsile isi Yohana, bebiiyisa bibyonako byabwe, aryo naye wababatisila mu luutsi Yorudaani.

6 # 2 Bay 1.8 Yohana Umubatisa akwaraatsaka tsingubo tseesi baanaba khukhwaama mu bwoya bwe iŋamya, nalundi abe ebowa kumusipi kwe lukhoba mu shikuute. Biilyo byeewe byaba tsisike ni bubuushi bwe intsukhi iye mwirome.

7Yohana akukuula burume bweewe nga aloma ari, “Iliyo umuundu uli khukhwiitsa inyuma wase, uli uwe angaaki khukhuminyisakho ise. Ni nase sinakhila khukhwinama asi nakangulula lukhoba lwe bilaalo byeewe ta. 8Ise imbabatisa inywe ni kameetsi, ne uyo niye alibabatisa inywe n'Umwoyo Umukhosefu.”

Khubatisibwa ni khukhakibwa khwa Yezu

(Mat 3.13—4.11; Luk 3.21-22; 4.1-13)

9Mu bifukhu byeene ibyo, Yezu wetsa nga ama mu shisiintsa she Nazareti, shishaba mu Galilaaya. Yohana Umubatisa wamubatisila mu luutsi Yorudaani. 10Khaangukho Yezu n'aama mu meetsi, wabona likulu nga lyabayuukhile, n'Umwoyo Umukhosefu nga afwana nga liwuusi, nga amwikhakho. 11#Rak 22.2; Zab 2.7; Isay 42.1; Mat 3.17; 12.18; Mrk 9.7; Luk 3.22Likono lyarura mwikulu nga liloma liri, “Iwe niye Umwaana wase yeesi ise ingana naabi. Ise ikhwikhoyela iwe naabi.”

12Kamaani k'Omwoyo Umukhosefu kakila waatsya mu mubiimbi. 13Wamenya mu mubiimbi khumala bifukhu kamakhumi kane, nga Sitaani amukhakilisa; wabaatsaka ni tsisolo tse mwirome, ni bamalayika baaba nga bamuyeetatsaka.

Yezu arobola babaaba baloba tsinyeeni

(Mat 4.12-22; Luk 4.14-15; 5.1-11)

14Lwanyuma nga bamalile khuwamba Yohana Umubatisa ni khumubowa mu mapuusu, Yezu watsya i Galilaaya nga aleekela babaandu kamakhuuwa kamalayi, kakaama isi Wele, 15#Mat 3.2nga aloma ari, “Isaawa inyene yoolele, ni Buyiinga bwa Wele bwolile ambi. Ni mwibiiyise bibyonako byenywe, nalundi mufukiilile Kamakhuuwa Kamalayi.”

16Yezu n'aba nga abira khu ndulo khwe inyaantsa isi balaanga bari Galilaaya, wabona Simoni ni yaaya weewe Andereya. Baaba balikho baraambisa butiimba khuwamba tsinyeeni, khulwekhuba baaba balobi be tsinyeeni. 17Kila Yezu abaloma ari, “Ni mwiitse munondelele ise, ni nase indibakalusa mwikyele babareera babaandu isi ise indi.” 18Khaangukho balekha butiimba bwaabwe, baloondelela Yezu.

19Yezu n'elooselayo iburaangisi khafwiiti, wabona be buulebe babili Yakobo ni Yohana, nga boombi bali babaana ba Zebedaayo. Baaba bali mu likhoŋolo nga baŋoonaŋoona butiimba bwaabwe. 20Khaangukho Yezu wabalaanga. Baryo balekha paapa waabwe Zebedaayo nga ali mu likhoŋolo ni baraambi, nibo baloondelela Yezu.

Umusaani uwabakho kumusaambwa kumubi

(Luk 4.31-37)

21Yezu ni baleekelwa beewe belooselayo iburaangisi, boola mu shiriimba shishilaangibwa shiri Kaperunaumu. Ne shifukhu sha Sabato ni shoola, Yezu wenjila mu ntsu iye khukhwisaayilamo waleekela babaandu shilomo sha Wele. 22#Mat 7.28,29Babaandu babaaba bamurekeeresa beyaanga naabi indeekela yeewe, khulwekhuba niye aleekela nga okesanisa bunyala, walekha khuuba nga baleekeli be kamakaambila ka Musa ta. 23Khaangukho, abawo umuundu uwabakho shisaambwa shiibi, uwenjila mu ntsu tsana iye khukhwisaayilamo. 24Kila umuundu tsana walilila angaaki nga aloma ari, “Iwe Yezu uwe Nazareti, ifwe ukhufunaana shiina? Iwe wetsile khukhuhesa ifwe khuwewo? Ise nakhumanyile iwe! Iwe uli Umukhosefu uwama isi Wele.”

25Yezu wakhookhela shisaambwa shiibi shatsana nga aloma ari, “Sila busa! Rura khu musaani uyu!”

26Shisaambwa shiibi tsana shakhola umusaani uyo wabalikha, shalila ni likono lye angaaki, lwanyuma shamururakho.

27Babaandu boosi beyaanga, belomela bonyene na bonyene bari, “Shiina shino? Khuno khuleekela khushaakha abe khweesi khushiili khubonatsakakho ta! Umuundu yuno ali ni bunyala bwe khulakila akhaba ni kimisaambwa kimibi kyamuwulila?”

28Ni abweene awo lubuyi luluwamba khu Yezu lwamalatana mu byaalo bibibotokheleele Galilaaya.

Yezu awonesa babaandu bakali

(Mat 8.14-17; Luk 4.38-41)

29Khaangukho, Yezu nga ali atweela ni baleekelwa beewe, nga nibo Yakobo ni Yohana, warura mu ntsu iye khukhwisaayilamo, baatsya benjila mu ntsu iya Simoni ni Andereya. 30Banyoola nga maayi umumasaala, uwa Simoni nga ali umutsiina, abe wakonele asi khulwe kamayima. Khaangu baboolela Yezu khu mulwaale yuno. 31Kila Yezu atsya isi umutsiina, amuwamba kumukhono amwinyusa. Ni kamayima kawona, ari uyo uwaba umutsiina tsana waba niye ubakholela she khulya.

32Ni angoloobe awo nga inyaanga yakwiile, bareerera Yezu babaandu boosi babaaba nga bali batsiina, ni naabo babaaba bawambibwa ni kimisaambwa kimibi. 33Babaandu be mu shiriimba boosi babusanila i mulyaango kwe intsu yeesi abamo. 34Yezu wawonesa babaandu bakali babaaba batsiina be tsindwale tse tsisaambo tsingali, nalundi wawoona khu baandu bakali kimisaambwa kimibi, nga s'akifukiilila kyaloma n'ilomo ta, khulwekhuba abe kyamumanya.

Yezu aleekela mu Galilaaya

(Luk 4.42-44)

35Ne mamiliimili khu shifukhu shishelakho, nga antsye ashiili amali, Yezu wenyukha warura mu ntsu watsya. Watsya mu shifo shishitalile shonyene nga mbaamo babaandu ta, waloombelayo. 36Kila Simoni ni baashe beesi aba ni nabo baatsya nga baweentsa Yezu. 37Ne ni baamunyoola bamuloma bari, “Buli mundu alikho akhuweentsa.”

38Yezu wabelamo ari, “Khayo khutsye mu biriimba bibindi bibiili ambi ano, nio inyalise khuleekela ibweene iyo nayo kamakhuuwa kamalayi; khulwekhuba shino nisho sheesi ise netsilila.” 39#Mat 4.23; 9.35Aryo watsya nga ebotokhelela mu Galilaaya mwoosi, nga aleekela mu ntsu tsye khukhwisaayilamo, nalundi nga awoona kimisaambwa kimibi khukhwaama khu baandu.

Yezu awonesa umusaani uwaba ni bikeenge

(Mat 8.1-4; Luk 5.12-16)

40Abawo umusaani uwaba ni bikeenge uweetsa isi Yezu, wafukhama asi, wamwikontselela, nga aloma ari, “Noola ukana, unyala khukhumpyeluusa.”

41Yezu wamuwambila shiisa, wenyusa kumukhono kweewe, wamutiilakho, nga aloma ari, “Ee, ingana upyeluukhe! N'upyeluukhe.” 42Lubaluba, bikeenge byarura khu musaani, waaba nga wapyeluukhile.

43Wangu Yezu wamusiibula khuutsya, 44#Lev 14.1-32ne nga amukhonyakilila ari, “Ukhaboolelakho umuundu yeesi shishiindu shoosi ta! Ne akhali n'utsye wiyokesanise isi umusaayi, akhwimenielese. Lwanyuma, khukhwokesanisa babaandu uli wawonisibwile, uwaneyo shiwaanwa she khupyeluusibwa, nga Musa n'alakila.”

45Ne umusaani uyo n'arurawo waatsya, wasalanisa tsilomo tsino buli andu osi. Shino shakila Yezu walekha khutsya mu shiriimba shoosi lubuula ta; ne akhali warama mu mubiimbi; ni babaandu babaama mu bisiintsa bibikhali bitweela ta, baatsya is'ali.

Currently Selected:

Mariko 1: LCE

Highlight

Copy