Mariko Khukhwaantsula
Khukhwaantsula
Kamakhuuwa Kamalayi nga ni Kaaronebwa ni Mariko karakikha ni kumurwe kukuloma kuri, “Kamakhuuwa Kamalayi, kakawamba khu Yezu Kristu, Umwaana uwa Wele.” Mu makhuwa kano, Yezu okesanisibwa nga umuundu uwe bunyala bukali, nalundi ukhola bibiindu bikali. Bunyala bweewe bubonekhanila mu khuleekela khweewe, ni musaambo yeesi aba ni kamaani ke khuwoona kimisaambwa kimibi, ni mu khwiyakhila babaandu bibyonako byabwe. Yezu ekanikhakho umwene nga n'ali Umwaana w'Omuundu, uwetsa khu shiibala ari awaneyo bulamu bweewe, nio akile awonese babaandu khukhwaama mu byonako byabwe.
Mariko okesanisa burereefu nalundi ni bunyindaalifu mu lukano luno luluwamba khu Yezu, nga akanikha naabi khu byeesi Yezu akhola, khuminyisa akanikha khu byeesi aloma ni byeesi aleekela. Anyoowa khukanikha mu bwiimbi bibiwaamba khu Yohana Umubatisa, ni khubatisa, ni khukhakibwa khweesi Yezu abiramo. Lwanyuma lwa bino, khangu akho umuroni yuno akanikha khu biindu bibiwaamba khu buraambi bwa Yezu, nga buli bwe khuwonesa balwaale ni khuleekela khweewe. Umuroni eloosela khukhwokesanisa ari, nga Yezu eloosela khumenya ni baloondeleli beewe, awo niwo esi beloosela khumumanya khuminyisakho, nalundi wokesanisa ari abo abe babakhaandisa Yezu naabo beloosela khumukhaandisa ni kamaani. Shisiintsa shishiseembayo shokesa bibiindu bibyakholikha mu bulamu bwa Yezu mu bifukhu bimaliilisi, ni khufuurisilakho ilala, khutsaangililiwa khu musalaba ni khulamukha khweewe khukhwaama mu bafu.
Isaambo yeesi burone buno bwakamamo kimilundi kibili, yokesana iri inyala khubawo umuundu ukuundi uwabirona, nga s'ali umuroni uwe burume buburamile bwa Mariko ta.
Inoondekhana iye bibiilimo
Khuurakikha khwe Kamakhuuwa Kamalayi (1.1-13)
Buuraambi bwa Yezu mu Galilaaya (1.14—9.50)
Khukhwaama i Galilaaya khuutsya i Yerusalemu (10.1-52)
Bifukhu bimaliilisi nga Yezu ali mu Yerusalemu (11.1—15.47)
Khulamukha khwa Yezu khukhwaama mu bafu (16.1-8)
Khubonekha khwa Yezu ni khuniina khweewe mwikulu (16.9-20)
Currently Selected:
Mariko Khukhwaantsula: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.