Mariko 3

Umusaani uwalemala kumukhono

(Mat 12.9-14; Luk 6.6-11)

1Yezu n'enjila mu ntsu iye khukhwisaayilamo kumulundi kukuundi, shanyoolikhana nga mwabamo umusaani uwaba ni kumukhono kumuleme. 2Kila Bafarisaayo balolelela Yezu nga bakana babone oba nga anyala khuwonesa umusaani uyo khu shifukhu sha Sabato namwe ta, nio bamisilekho bamuwabile kumusaango.

3Yezu walomela umusaani uwaba ni kumukhono kumuleme ari, “Yiitsa ano.” 4Kila areeba babaaba mu ntsu ye khukhwisaayilamo ari, “Khulondekhana ni kamakaambila keefwe, khu Sabato khwakhiile khukhola buulayi, namwe khukhola buubi? Khwakhiile khuwonesa bulamu bwe babaandu namwe khwakhiile khukhwiira?” Ne boosi baasila busa.

5Yezu wabalola boosi tsimoni ni lirima likali, khulwekhuba baaba ni kimyoyo kikyakakanyala. Walomela umusaani uwatsana ari, “Tsalaasa kumukhono kwoowo.” Umusaani n'akutsalaasa, kwakwalaala kwekyela kumulamu.

6Bafarisaayo ni barura antsye, baatsya bekutila atweela ni baloondeleli ba Herode, nga baweentsa kumukhoosi kwe khukhwiira Yezu.

7Yezu ni baleekelwa beewe baarura mu shifo sheene isho, beekha khu nyaantsa. Babaandu bakali babeene nga baama i Galilaaya ni mu Yuda babaloondelela. 8Ni babaandi baama i Yerusalemu, Idumea, ni babaandi babaama shanjelekha she luluutsi Yorudaani. Kamatuuli kakandi kamakali kameene ke babaandu kaama i Tulo ni Sidoni. Kamatuuli kano koosi kabusana khulwekhuba abe kawulile bibiindu byeesi abe Yezu alikho akhola. 9#Mrk 4.1; Luk 5.1-3Yezu walomela baleekelwa beewe khurengekharengekha likhoŋolo, ari nga shinyalikha ekhalemo, khulwekhuba abe babaandu beetsa khumuyindaka.

10Yezu n'aba nga wawonesele babaandu bakali, babaaba batsiina babaandi bamuloomba bari bamutilekho busa. 11Abe babaandu boosi babaaba ni kimisaambwa kimibi ni babona Yezu, abe bekhupa busa asi nga bakukuula bari, “Iwe uli Umwaana uwa Wele.” 12Ne Yezu walakila kimisaambwa kimibi ikyo khulekha khumubuula oba niye naanu ta.

Yezu arobola baarume beewe

(Mat 10.1-4; Luk 6.12-16)

13Kila Yezu akhalawo khulaanga batweela khu baloondeleli beewe, waniina ni nabo khu lukiingi. 14Aryo warobolamo liikhumi na babili, kila abalaanga ari baarume beewe, nga akana babe ni naye, nalundi ari abarumane khuutsya khulaangilila kamakhuuwa isi babaandu, 15ni bunyala bwe khutimisa kimisaambwa kimibi khukhwaama mu baandu. 16Kila arobola bano: Simoni, esi Yezu umwene atwiikha ari Petero, 17ni Yakobo atweela ni yaayawe Yohana nga boombi bali babaana ba Zebedaayo. Yezu wabatwiikha ari “Bonerigesi,” shishimanyisa shiri, “Babaana be khukuula khwe fula.” 18Warobola ni Andereya, Filipo, Batolomayo, Matayo, Tomasi, Yakobo umwaana uwa Alufayo, Tadewo, Simoni abe utsiinikhanila naabi linaambo lyeewe (Zelote), 19ni Yuda Isikalyoti, uwakelawo walya mu Yezu luwomelo.

Yezu ni Belizebuli

(Mat 12.22-32; Luk 11.14-23; 12.10)

20Yezu welayo ingo wenjila mu ntsu. Lituuli lye babaandu likali ndi lyelamo lundi lyabusana, alekha khubawo akhaba ni khabi iye khuulya biilyo ta. 21Balebe beewe ni bawulila abe bibiili khuutsya mu moni, baatsya bari bamuwambe bamukobose ingo, khulwekhuba abe babaandu balikho baloma bari, “Wonekhile kumurwe.”

22 # Mat 9.34; 10.25 Kila batweela khu baleekeli be Kamakaambila ka Musa babaama i Yerusalemu baloma bari, “Umusaani uyu alikho shisaambwa sha Belizebuli, umuraangilisi uwe kimisaambwa kimibi. Akhaba kimisaambwa kimibi akiwoona khukhwaama mu baandu nga eyeetisa kamaani ka Belizebuli.”

23Yezu walaanga babaandu bamwibotokhelela, kila arakikha khubakanikhayo nga araambisa tsisimo. Wareeba ari, “Sitaani anyala khutimisa Sitaani uwasheewe? 24Noola buyiinga bwawukhanamo burakikha khukhwisoolanisa bwonyene na bwonyene, si bulinyala bwalama ta. 25Akhaba nga babaandu be mungo mutweela bawukhanilemo, mungo umwo simunyala mwalama ta. 26Musaambo niyo indweela, singa Sitaani esoolanisa umweene nalundi weyawukhanisamo, s'alama ta; aba wolile khuhela.

27“Mbaawo umuundu unyala wafuna lundi wenjila mu ntsu y'omundu uli ni kamaani nalundi wakinjila wanuula bibiindu byeewe ta, akhali nga wanyooyile khubowa umwene mu ntsu kimikosi, nio anyalise khunuula bibiindu byeewe.”

28Weloosela ari, “Ilala, alala, imbaboolela ndi bibyonako byoosi byeesi mukhola bilibeyakhilwa akhaba khufwotsola khweesi bakhola. 29#Luk 12.10Ne uyo yeesi ufwotsola Umwoyo Umukhosefu, s'alifuna shishiyakhilo she shishonako isho ta, aba ali ni kumusaango kukukhawawo ta.” 30Yezu aloma aryo khulwekhuba abe babaandu balomile bari alikho shisaambwa shiibi.

Maayi ni babandaaye ba Yezu

(Mat 12.46-50; Luk 8.19-21)

31Maayi uwa Yezu ni babandaaye kila beetsa beema ibulafu. Barumanisa umuundu khuutsya mu ntsu abalaangile Yezu etse ibulafu. 32Kila lituuli lilyaba lyekhaale nga lyamwibotookhelele, liloma liri, “Maayi woowo ni babandaayo ni bakooko bowo bali ibulafu balikho bakhulaanga.”

33Kila Yezu areeba ari, “Maayi wase ni babandaayase nibo naanu?” 34Kila walola tsimoni webotookhelesa abo abe babamwikhaalewo waloma ari, “Maayi wase ni babandaayase nibo abashiina. 35Buli mundu ukhola sheesi Wele akana, umuundu uyo aba wandaayase, nalundi umukooko wase, nalundi aba maayi wase.”

Currently Selected:

Mariko 3: LCE

Highlight

Copy