Mariko 14

Luwomelo lwe khukhwiira Yezu

(Mat 26.1-5; Luk 22.1-2; Yoh 11.45-53)

1 # Luky 12.1-27 Khu mbuka yino yaba nga itaambayo bifukhu bibili khukhwoola khu Mayiiya ke Khubirakho, ni Kamayiiya ke Kimikaati kikikhalimo kamamela ta. Abe basaayi bakhulu ni baleekeli be Kamakaambila ka Musa balikho baweentsa kumukhoosi kwe khuwamba Yezu mu shimoonyo busa, bamwiire. 2Khulwekhuba abe bakhalilewo nga baloma bari, “Khukhashikhola mu bifukhu bye kamayiiya ta, khulwekhuba babaandu banyala khurakikhisawo shisaayumba.”

Yezu bamuwakha kamafura i Besaniya

(Mat 26.6-13; Yoh 12.1-8)

3 # Luk 7.37,38 Imbuka ni yoola nga Yezu ali i Besaniya mu ntsu iya Simoni, uwabakho ni bikeenge. Nga alikho alya, abawo umukhasi uwetsa ni kamafura ke khukhwihakha kakawunya bulayi nga kali mu kyupa. Kamafura kano kaaba ke bukusi bwe angaaki naabi. Umukhasi uyo wekula ikyupa iyo, watsukha kamafura khu murwe kwa Yezu. 4Shino shakila batweela khu bakyeni babaabawo bakhalala, kila baloma bari, “Khulwa shiina kila kamafura kano konakisibwile karyo? 5Khulwekhuba khali bakakulisilemo tsi dinari#14.5 Idinari indweela abe ili nga kumukheemba kwesi umuundu afuna nga waraambile kimilimo shifukhu shibuufu. tsitsifuurisa bitoondo bitaru, batsikabila bataambi.” Kila bekiitsa umukhasi uwakhola shino.

6Ne Yezu wabaloma ari, “Ni mumulekhe abe; shiina kila mumutaambisa? Wakholele ise shishiindu shilayi naabi. 7#Maka 15.11Khulwekhuba bataambi busheele bali ni nanywe. Na buli lwesi mukanila khubayeeta, munyala mwabayeeta. Ne ise busheele singene imbatsaka ni nanywe ta. 8Wakholile sheesi abe akhiile khukhola; nga atsukha kamafura kano kakawunya bulayi khu mubili kwase nga bakurekekhela khu kusiikha. 9Ilala imbaboolela ndi, buli osi esi bakhalaangilile Kamakhuuwa Kamalayi mu shiibala shoosi, sheesi akholile balishikukuula, nga shili she khumushebulila.”

Yuda afukiilisana ni basaayi bakhulu

(Mat 26.14-16; Luk 22.3-6)

10Yuda Isikalyoti, uwaba mutweela khu baarume liikhumi na babili, watsya isi basaayi bakhulu nga aweentsa isaambo iye khulyamo Yezu luwomelo. 11Ni bawulila byeesi Yuda abaloma, bekhoya, bamulomela khumuwa tsinusu. Ni khukhwamila abweene awo, Yuda wananikha khuweentsa kumukhoosi kwe khulyamo Yezu luwomelo.

Yezu alya ni baleekelwa beewe

(Mat 26.17-25; Luk 22.7-14,21-23; Yoh 13.21-30)

12Shaba shifukhu shishinyoowa she Kamayiiya ke Kimikaati kikikhalimo kamamela ta, lwesi beerira kamasheese, khushebulilakho Kamayiiya ke Khubirakho kakanyoowa. Kila baleekelwa ba Yezu bamureeba bari, “Ukana khutsye khurengekharengekhele waheena isi ukana khuliila Kamayiiya ke Khubirakho?”

13Warumana babili khu baleekelwa beewe nga abaloma ari, “Ni mutsye mu shiriimba, kane mwakanane umusaani nga wasutile isoongwe iye kameetsi. Ni mumulondekho. 14Muntsu yoosi yeesi kane engilemo, mulome umwene uwe mu ntsu iyo muri, ‘Umuleekeli wefwe wakhurumanile ari ukhwokese shiseenge sheesi bakyeni baliilamo kamayiiya, khushiŋoone, etse aliilemo Kamayiiya ke Khubirakho ni baleekelwa beewe.’ 15Kane abokese shiseenge she khungaaki shikali, shishiilimo bibikanibwa byoosi. Ni murengekharengekhe mu bweene umwo.”

16Baleekelwa baatsya mu shiriimba, banyoola buli shitweela shili nga Yezu n'abalomela. Baryo barengekharengekha Kamayiiya ke Khubirakho.

17Antsye ni bwelabula, Yezu wetsa ni baleekelwa beewe liikhumi na babili. 18#Zab 41.9Ni baaba nga bali khu shikabilo she biilyo balikho balya, Yezu waloma ari, “Ilala, imbaboolela indi mutweela khus'inywe, uli khulya ni nase ali khuutsya khukhundyamo luwomelo.”

19Kumutaambo kwananikha khubawamba. Kila buli mutweela tweela bareeba Yezu bari, “Manya ulikho umanyisa uri ise?”

20Yezu wabelamo ari, “Ali mutweela khus'inywe liikhumi na babili, uyo uli khusiikha mu sowani iye tsinyenyi atweela ni nase. 21Khulwekhuba Umwaana w'Omuundu alikho atsya khufwa nga bibyaronebwa bikhosefu ni biloma. Ne shili she kumutaambo isi uyo utsya khumulyamo luwomelo. Manya shandibeele shilayi umuundu uyo alekha khuba nga wasaalikha ta.”

She shiilo sh'Omukasya

(Mat 26.26-30; Luk 22.14-20; 1 Kor 11.23-25)

22Ni baaba nga balikho balya, Yezu waabukula kumukaati, wakuloombela tsikhabi, wakumenyulamo, wakubawa, nga aloma ari, “Amba; kuno kuli kumubili kwase.”

23Lwanyuma waabukula shikopo shishiilimo iviini, nga wamalile khu kiloombela ikhabi, wabawa boosi bashinywakho. 24#Luky 24.8 Yer 31.31-34Wabaloma ari, “Kano niko kamafuki kaase, ke indakaano imbya, kakatsutsukha khulwe babaandu bakali. 25Ilala, mbaboolela nywe ndi s'indinywakho iviini iye kumusabibu lundi ta, khukhwolisa shifukhu sheesi ndikinywa nga ili mbya mu Buyiinga bwa Wele.”

26Ni baamala khukhwiimba kumweenya kumukhosefu, barura baatsya khu lukiingi lwa Zeyituni.

Yezu akanikha khu khwikaana khwa Petero

(Mat 26.31-35; Luk 22.31-34; Yoh 13.36-38)

27 # Zek 13.7 Yezu walomela baleekelwa beewe ari, “Inywe mweesi kane muntsilukhe. Khulwekhuba bibyaronebwa bikhosefu biloma biri, ‘Indiira umwaayi uwe kamasheese, shino shikile kamasheese kasalanile.’ 28#Mat 28.16Ne ni ndilamusibwa khukhwaama mu bafu, indi benyoowa inywe khutsya i Galilaaya.”

29Petero wamuloma ari, “Abe boosi bakhelukha bakhulekhawo, ise s'ingane nilukhe ikhulekhewo ta.”

30Yezu wamuloma ari, “Ilala, ikhuboolela ndi mu shilo sha luno, nga ingokho ishiili khukholyookha khabili ta, kane ube wantsikaanile tsifuunda tsitaru.”

31Ne Petero welamo nga ashikumisa ari, “Abe akhaba noola khufwa ni nawe, kane ifwe, ne singane ikhwikaane ta.” Ni baleekelwa babaramile nabo buli mutweela waloma shitweela sheene isho.

Yezu nga aloomba i Getesemane

(Mat 26.36-46; Luk 22.39-46)

32Lwanyuma Yezu ni baleekelwa beewe baatsya mu shifwo shishilaangibwa shiri Getesemane. Yezu wabalomela ari, “Ise indi khuutsya khuloomba, inywe ni mwikhale ano.”

33Walaanga Petero, Yakobo ni Yohana, watsya ni nabo. Warakikha khuuba ni khukhwiyembelela, nga ali ni kumutaambo kumukali. 34Kila abalomela ari, “Kumwoyo kwase kwetsuule bibyambaaso bye kumutaambo, kukunyala kwantsira nakhuntsira. Ni murame ano, nga muli meeso.”

35Yezu wakyeenda welooselayo ibweeni khakyeekhe, wafukhama asi khu masikamo, waloomba ari, noola abe shinyalikha khali bibiindu bino sibimukholikhilekho ta. 36Waloma ari, “Abba, Paapa, mbaawo shishiindu shishinyala shakhukhaasa iwe ta; n'undusekho shikopo shino. Ne shikhaba nga ise ni nandikanile ta, akhali khashibe nga iwe n'ukana.”

37Yezu n'akobola wanyoola nga baleekelwa balikho bakona. Wareeba Petero ali, “Simoni, ulikho ukona? S'unyala wekhala meeso khumala akhaba inyaanga indweela yonyene ta? 38Ni murame meeso nga muloomba muri ilekhe khubawo shoosi shishibakhakilisa ta; khulwekhuba akhaba nga ilala kumwoyo kukana, ne kumubili kuli kumutoro.”

39Yezu welayo lundi watsya waloomba, nga araambisa bilomo nibyo bitweela. 40Wakobola lundi, wanyoola nga balikho bakona, khulwekhuba abe liilo lyabaminyile; kwaluno balekha ni khumanya she khumwiilamo ta.

41Yezu n'akobola kumulundi kukukhola khataru, wabareeba ari, “Inywe mushiikona nalundi mushiwumula? Lyeesi mukonilekho limala; inyaanga yoolile yeesi Umwaana w'Omuundu batsya khumuwanayo mu makhono ke baboonaki. 42Ni mwinyukhe, mwitse khutsye, uyo uwundilemo luwomelo ali ambi akana khwoola ano.”

Yezu bamuwamba

(Mat 26.47-56; Luk 22.47-53; Yoh 18.3-12)

43Khaangu'kho, Yezu n'aba nga ashikanikha, Yuda uwaba mutweela khu baleekelwa liikhumi na babili, wola. Aba nga ali ni lituuli lye babaandu nga bali ni bibyooki, ni tsilungu. Bano baaba nga baama isi basaayi bakhulu, ni baleekeli be kamakaambila ka Musa nga bali atweela ni basakhulu. 44Yuda yaba wabaweele khabonelo nga aloma ari, “Umuundu yeesi ise kane ingwe mu shifuba aba niye umwene uyo; ni mumuwambe mumuyile nga mwamulindile bulayi.”

45Yuda n'ola watsya burereefu isi Yezu, wamuloma ari, “Umuleekeli!” Wakwa Yezu mu shifuba. 46Babaandu beesi Yuda etsa ni nabo bakwa khu Yezu bamuwamba bamuyila nga umubowe.

47Ne mutweela khuubo babaaba bemikhile awo, watsowolayo lurima, wakhalakho khukhuru khw'omwakaanisi w'omusaayi ufuura bukhulu.

48Yezu wareeba lituuli lilyabawo ilyo ari, “Shiina kila mwiitsa ni bibyooki ni tsilungu khukhumaamba ise, mwafwana nga babaatsya khuwamba umwiifwi? 49#Luk 19.47; 21.37Bifukhu byoositsana nabatsaka ni nanywe nga indeekela mu Lisaayilo Likhulu, ne simwamamba ta. Ne lekha bino bikholikhe nio bibyaronebwa bikhosefu byoolelesebwe.”

50Abweene awo baleekelwa ba Yezu bamwantsukha, batima baatsya.

51Abawo umusoleeli mutweela uwabaloondakho nga bayila Yezu. Abe umusoleeli yuno webowele busa ingubo iyareremukha. Bari bakhakakho khumuwamba, 52watima bukhuna watsya, wabalekhela ingubo.

Lukhobo luwotsisa Yezu

(Mat 26.57-68; Luk 22.54-55,63-71; Yoh 18.13-14,19-24)

53Bawamba Yezu bamuyila w'omusaayi ufuura bukhulu, abe isi basaayi bakhulu boosi, ni basakhulu ni baleekeli be Kamakaambila ka Musa babusaane. 54Petero aba wabaloondilekho nga ali aleeyikho, khukhwolisa mu lwanyi lw'omusaayi ufuura bukhulu. Watsya wekhala ni baliindi, nga alikho oora kumulilo.

55Ari basaayi bakhulu ni be mu lukhobo boosi, baweentsa bujulisi bubutsuntsumilisa Yezu, bari nio bamukhalile kwe khufwa, ne balekha khu bunyoola ta. 56Khulwekhuba iliwo babaandu bakali babawayo bujulisi, ne abe bujulisi bwaabwe sibuwambakana ta.

57Abawo batweela babawayo bujulisi bwe bubeeyi nga bamukanikhakho bari, 58#Yoh 2.19“Khwawulila nga umusaani yuno aloma ari, ‘Ise ikhafuniake Lisaayilo Likhulu ilyo lilyombakhibwa ni kamakhono ke babaandu, nio nga abirirewo bifukhu bitaru, nombakhe lilindi, lilikhombekhebwa ni kamakhono ke babaandu ta.’ ” 59Ne shitweela busa, abe bujulisi bwaabwe sibuwambakana ta.

60Umusaayi ufuura bukhulu wenyukha wema akari abwe, kila areeba Yezu ari, “Ne iwe wamwene uloma uri shiina? S'unyala welamo khwibyo byeesi balikho bakhuwabila ta?” 61Ne Yezu warama nga wasilile busa, walekha khukhwilamo ta. Umusaayi ufuura bukhulu wamureeba shireebo shishindi ari, “Iwe uli niye Kristu, Umwaana uwa Wele uwe Shiriifwa?” 62#Dan 7.13Yezu welamo ari,

“Ise indi Kristu;

nalundi mulibona Umwaana w'Omuundu

nga wekhaale khu mukhono kumulayi kwe Bunyala,

nalundi nga etsila mu mafuumbi ke mu ngaaki.”

63Abweene awo, umusaayi ufuura bukhulu wonuula tsingubo tseewe, nga aloma ari, “Bujulisi shiina bubundi bweesi khushiweentsa? 64#Lev 24.16Mwabeene mwawuliile khufwotsola khweewe, khwesi elanjilamo umwene khuuba Wele. Inywe mukhalawo muri shiina?” Boosi bamukhalila kumusaango bari akhiile khufwa. 65Abawo batweela babarakikha khumufuutsakho kamare, babaandi bamubiimbilila mu moni, bamukhupa, nga bamuloma bari, “Khola buŋoosi uboole ukhupile.” Basilikhale bamuwamba bamukhupa bifuusi.

Petero ekaana Yezu

(Mat 26.69-75; Luk 22.56-62; Yoh 18.15-18,25-27)

66Ne Petero n'aba nga ashiili mu lwanyi, mutweela khu bakhaana nga ali umwakaanisi uw'omusaayi ufuura bukhulu, wetsa. 67N'abona Petero nga oora kumulilo, wamulolelela, kila amuloma ari, “Akhaba ni nawe ubeele ni Yezu uwama i Nazareti.”

68Ne Petero wekaana nga aloma ari, “Byeesi ulikho uloma, ise s'imbimanya namwe s'imbitekela ta.” Kila Petero akyeenda arurawo atsya ambi ni shilibwa. Ingokho yakholookha.

69Umukhaana umwakaanisi tsana wabona Petero lundi, kila arakikha khulomela abo abe babemikhile ambi ari, “Umusaani yuno ali mutweela khu baandu abo.”

70Indi lundi Petero wekaana.

Nga abirirewo imbuka ifwiiti iri, batweela khu baandu babaaba bemikhile awo, baloma Petero bari, “Ilala nawe uli ni khuuba nga uli mutweela khu baandu abo; khulwekhuba uli umu Galilaaya.”

71Kumulundi kuno Petero warakikha khukhwikaana ni khukhwitsuba, nga aloma ari, “Ise simanya umusaani isi mulikho mukanikhakho uyuno ta.”

72Khaangukho, ingokho yakholookha kumulundi kukukhola khabili. Petero washebulila nga Yezu n'amulomela ari, “Nga ingokho ishiili khukholyookha khabili, iwe kane ube wantsikaanile kimilundi kitaru.” Petero warundukha walila kamasika.

Currently Selected:

Mariko 14: LCE

Highlight

Copy