Mariko 13

Khukhwonakisibwa khwe Lisaayilo Likhulu

(Mat 24.1-2; Luk 21.5-6)

1Ne Yezu n'aba nga alikho arura mu Lisaayilo Likhulu atsya, mutweela khu baleekelwa beewe wamwokesa ari, “Umuleekeli, bona kamabaale ako nga kamiliya, ni bibyombakhe ibyo bona nga byamiliya!”

2Yezu wamwilamo nga areeba ari, “Waboone bibyombakhe biboofu ibyo? Byoosi balibyonakisa, ilekhe khubawo ni libaale na litweela lilirama nga lyemile khu lyashe ta.”

Khurakikha khwe kumutaambo

(Mat 24.3-14; Luk 21.7-19)

3Lwanyuma Yezu n'aba nga wekhaale khu lukiingi lululaangibwa luri Zeyituni, nga shanjelekha walolelele Lisaayilo Likhulu, Petero ni Yakobo, ni Yohana, ni Andereya, baatsya khumureeba mu shimoonyo. 4#2 Esid 4.51—5.19Bamureeba bari, “N'ukhuboolele, bibiindu bino byeesi ukanikhilekho, bikhakholikhe liina? Khabonelo shiina khakhalikholikha khukhwokesanisa khali bili ambi khukholikha?”

5Yezu wabaloma ari, “Ni mwiliinde, umuundu yeesi alekhe khubakoraanisa ta. 6Ilibawo bakali babaaliitsa mu lisiina lyase, nga baloma bari, ‘Ise niye Kristu,’ ni ilala balikooranisa babaandu bakali. 7Ne ni muwulila bari busoolo bwakwilewo, namwe bari busoolo bukana khukwawo, mukhaba ni khukhwiyembelela ta. Khulwekhuba bibiindu bino bili ni khunyoowa bikholekhe, ne intsakamo iba ishiili khukhwoola ta. 8Khulwekhuba buli linaambo lilisoolanisa linaambo lyashe, ni buyiinga nabwo bulisoolanisa buyiinga bwashabwe; ilibawo khuteengasibwa khwe shiibala mu bifwo bikali; ilibawo intsala ingali. Ne bino byoosi bili busa khunanikha khwe kumutaambo.

9 # Mat 10.17-20; Luk 12.11,12 “Ne muli ni khukhwiliinda mwabeene. Khulwekhuba bakhabawambe inywe babayile isi tsikhobo tsikhulu khubakhalila kimisaango; nalundi balibakhupila tsikhoba nga muli mu ntsu iye khukhwisaayilamo. Khulwekhubeela lisiina lyase, balibayila isi ba gafana ni bayiinga, khubawotsesa ni khukhwokesanisa khufukiilila khwenywe isi nibo. 10Nga bino bishiili khubawo ta, Kamakhuuwa Kamalayi kaakha khunyoowa khuboolelwa isi kamanaambo koosi. 11Ne ni babawamba babayila esi babakhala kimisaango, mukheyembelela bushiili muri kane khulome khurishiina ta. Ne ni mulome isho shoosi shishiiba shabawebwile mu nyaanga iyo, khulwekhuba Umwoyo Umukhosefu aliba niye ulikhukanikha, ne akhuba inywe ta.

12“Wandaaye ni wandaaye, buli mutweela alilyamo uwashe luwomelo, batsye bamwiire. Basaali balilyamo babaana baabwe tsimbomelo, ni babaana nabo balilyamo basaali baabwe tsimbomelo, batsye babeere. 13#Mat 10.22Babaandu balibabiiyila inywe khulwekhuba muli bafukiilisi baase. Ne umuundu yeesi ulinyindalila khukhwolisa intsakamo n'ilyoola, aliwonesebwa.”

Imbuka iye kumutaambo

(Mat 24.15-28; Luk 21.20-24)

14 # Dan 9.27; 11.31; 12.11; 1 Mak 1.54; 6.7 Yezu weloosela waloma ari, “Ne ni mulibona she mbikho shishireera khuhela, nga shili esi abe shikhaakhila khuuba ta nga ni shakanikhibwakho n'Umuŋoosi Danieli, (usoma bino ali ni khukhwimenielesa)#13.14 She kumusilo shino shinyala khuuba nga abe shitsya khuba mu shifwo shikhosefu, mu Lisaayilo Likhulu. abo babaali mu Yuda bali ni khutima belukhile mu bikiingi. 15#Luk 17.31Uyo yeesi uliba nga wekhaale khu ntsu khungaaki, akheekha asi ta, namwe akhenjila mu ntsu bari atsya khusuta bibilimo ta. 16Ni nooyo uli mu mukuunda nga alikho araamba, akhelayo ingo bari atsya khubukula ingubo ta. 17Ne bakhasi babaali bisoombo ni naabo babanuunisa babaana, baliba mu mutaambo kumukali. 18Ni muloombe muri bibiindu bino bilekhe khukwawo mu biseela bye bunyifu ta. 19#Dan 12.1; Bimb 7.14Khulwekhuba kumutaambo kukulibawo mu bifukhu ibyo, sikwabatsakawo khukhwaama nga Wele n'abuumba shiibala ta. Nalundi sikulibatsakawo lundi ta. 20Ne Umukasya alekha khukhola bifukhu ibyo byaaba bikyeekhe, khali abe mbaawo umuundu yeesi uliwonesebwa ta. Ne khulwa abo babaali ba buraawa, beesi Wele amala khurobola, bifukhu ibyo wabibombesakho.

21“Mu bifukhu ibyo, umuundu yeesi n'akhuloma iwe ari, ‘Bona Kristu ali ano,’ namwe ali, ‘Bona Kristu ali iyeyo!’ Ukhafukiilisa byeesi aloma ta. 22Khulwekhuba ba Kristu be bubeeyi ni baŋoosi be bubeeyi baliwulukha, bakhole bye kamakaanga ni bibiyaangisa, nio bakosaase babaandu. Abe shinyalikha khali bakosaasile ni barobole ba Wele. 23Ne inywe ni mwiliinde, khulwekhuba ise nababooleele bibiindu bino nga bushiili.”

Khukhwiitsa khw'Omwaana uw'omuundu

(Mat 24.29-31; Luk 21.25-28)

24 # Isay 13.10; Yow 2.10,31; 3.15; Bimb 6.12 Isay 13.10; Ezek 32.7 Yezu weloosela waloma ari, “Mu bifukhu byeene ibyo, lwanyuma lwe kumutaambo ukwo, inyaanga ilikyela imali, ni kumweesi sikuliwa buwaanga ta. 25#Isay 34.4; Bimb 6.13 Yow 2.10Tsinieniesi tsilikwa asi khukhwaama mu ngaaki, ni kamaani ke mu ngaaki kalitengasibwa. 26#Dan 7.13; Bimb 1.7Nio lwanyuma balibona Umwaana w'Omuundu nga etsila mu mafuumbi, nga etsila mu shiriifwa ni kamaani kamakali. 27Abweene awo alirumana bamalayika, khubusaasa abo babaali barobole, khukhwaama buli andu osi mu shiibala shoosi, ni khukhwolela ilala mwikulu.”

She khukhwiyika khukhwaama khu kusaala ku figi

(Mat 24.32-35; Luk 21.29-33)

28Yezu waloma lundi ari, “Ni mwiyikile khu kusaala ku Figi. N'ubona nga kusaala kuno kusisina tsisakya nalundi nga kamasaafu karakikha khurura, umanya busa uri biseela bye bukhafu bili ambi. 29Ni musaambo niyo ndweela, ni mubona nga bibiindu bino bilikho bikholikha, manya busa muri Umwaana w'Omuundu ali ambi, wolile khu shilibwa. 30Ilala imbaboolela ndi, kumuboolo kuno kutsya khuwawo, bibiindu bino bikhaabe nga byakholikhile khaale. 31Likulu ni shiibala byoosi bikhawewo, ne bilomo byase sibikhawewo na khafwiiti ta.”

Imbaawo umanya shifukhu namwe inyaanga ta

(Mat 24.36-44)

32 # Mat 24.36 Yezu weloosela waloma ari, “Imbaawo uyo yeesi umanya bye shifukhu namwe inyaanga yeesi bino bilikholikhilamo ta. Akhaba bamalayika be mwikulu, namwe Umwaana uwa Wele naye s'amanya imbuka ta, akhali Wele umwene yenyene. 33Ni nashiryo, ni mwiliinde nga mwirekekha bulayi nalundi nga muloomba, khulwekhuba si mumanya imbuka iyo iliba liina ta. 34#Luk 12.36-38Shino shili busa nga umuundu ulekha ingo nga atsya lukyeendo. Nga atsya, akabila babakaanisi beewe buli mutweela kumulimo kukweewe, walakila n'uliinda khu shilibwa khuuba umwirekefu. 35Ni musaambo niyo indweela, nanywe ni mube berekefu, khulwekhuba si mumanya imbuka yeesi umwene uwe mu ntsu alikobola ta. Anyala wakobola angoloobe, namwe mu shilo akari, namwe nga tsingokho tsikholookha, namwe kumutikhinyi nga antsye bwasheele. 36Abe akhabatundubikha busa, akhabanyoola nga mukona liilo ta. 37Sheesi imbalomela inywe, inomela ni babaandu boosi: Ni mwirekekhe!”

Currently Selected:

Mariko 13: LCE

Highlight

Copy