Luka 16
16
Lusimo lw'omubiikhi Umukyesi
1Yezu waloma baleekelwa beewe ari: “Abawo umusaani umuyindifu mutweela, uwaba n'umubiikhi we bibiindu byeewe. Babaandu bamuwabayo bari, umubiikhi uyu asalanisaka busa bibiindu byeewe. 2Kila umusaani umuyindifu alaanga umubiikhi uyu, wamureeba ari, ‘Shiina shino sheesi imbulila khwiiwe? Balilila khaangu bibiindu byase byeesi ubeele ulolelela, lwekhuba s'unyala weloosela khuuba umubiikhi lundi ta.’
3“Umubiikhi tsana yuno welomela mu mwoyo kweewe ari, ‘Ari inakhola ndyeena? Lwekhuba umukoosi wase atsya khumboona khu buraambi bwase. Ise s'indi ni kamaani kakalima ta, lundi iswala khusabilisa. 4Ari namanyile sheesi intsya khukhola, niye ni kane amboone khu buraambi bwase, nio basaale baase bantsakaanile mu ntsu tsaawe.’
5“Kila umubiikhi yuno alaanga buli mutweelatweela khu baandu abe beesi umukoosi weewe abaantsa. Wareeba unyoowa ari, ‘Umukoosi wase akhubaantsa bibyoola biryeena?’ 6Welamo ari, ‘Kamatebe ke kamafura shitoondo shitweela.’ Umubiikhi kila amuloma ari, ‘Aso, amba lupapula lulikho likobi lyoowo, wikhale asi khangu, uronekho kamatebe kamakhumi karaano.’
7“Wareeba ukuundi ari, ‘Ne iwe, ubaantsibwa bibyoola biryeena?’ Uyo naye welamo ari, ‘Tsipipa shitoondo shitweela tse ŋaano.’ Lundi walomela yuno ari, ‘Aso, bukula lupapula lulikho likobi lyoowo, uronekho kamakhumi shinaane.’
8“Umukoosi waruuya umubiikhi we bibiindu byeewe yuno, uwaba abe ukhola bye bubwonaki bwe kamakyesi, lwekhuba babaandu be mu shiibala shino bakyesikyesi naabi musaambo yeesi bawambamo kumuboolo kwawe, khufuura babaandu be buwaanga. 9#Tob 4.9-11Nashiryo, ise imbaloma ndi, ni mwikwanile basaale nga muraambisa bye bubwonaki bwe buyiindifu bwe shiibala, kale ni buliwawo, munyale khusyendesebwa mu bwikhalo bubukhawawo ta. 10Uyo yeesi uba umwiyikinwa mu biindu bikyeekhe, aba umwiyikinwa ni mu bikali nabyo. Ne uyo ukhali umwiyikinwa mu biindu bikyeekhe, s'anyala khuuba umwiyikinwa mu bikali nabyo ta. 11Aso, ni mulekha khuuba babeyikinwa mu bye buyiindifu bwe shiibala, naanu unyala khubeyikina, mu bye buyiindifu bwa ŋali? 12Nalundi, ni mulekha khuuba babeyikinwa mu biindu bibiili byabeene, ne bibyandibeele bibyeenywe naanu ulibibawa?
13 #
Mat 6.24
“Mbaawo umwakaanisi unyala khukhwakaanisa bakoosi babili ta. Lwekhuba anyala wabiiyila mutweela, wakana ukuundi, namwe wahandalalila khu mutweela, waleekelesa ukuundi. Simunyala khukhwakaanisa Wele, mwakaanisa ni buyiindifu nabwo ta.”
Bilomo bya Yezu bibiindi
(Mat 11.12-13; 5.31-32; Mrk 10.11-12)
14Ne Bafarisaayo babaaba bakana naabi tsinusu, ni bawulila bino batsekhelela Yezu busa. 15Ne naye wabaloma ari, “Inywe mwabeene nibo babekhola khuuba balayi mu moni tse babaandu, ne Wele amanya kimyoyo kyeenywe. Lwekhuba babaandu sheesi bambaasa khuuba shikhulu, shiba she mbikho mu moni tsa Wele.”
16 #
Mat 11.12,13 “Kamakaambila ka Musa ni baŋoosi byaba biraamba khukhwoola khu Yohana, ne khukhwaama abweenewo, Kamakhuuwa kamalayi ke Buyiinga bwa Wele ari niko kaboolelwa, na buli mundu akhakakho khukhwinjilamo ni kamaani.
17 #
Mat 5.18
“Ne shili shaangu likulu ni shiibala khuwawo, khufuurisa kharonyesi khe nukuta ndweela iye Kamakaambila ka Musa khuwawo.
18 #
Mat 5.32; 1 Kor 7.10,11 “Buli mundu yeesi uwoona umukhasi weewe, ne wakhwa ukuundi, umuundu uyo aba wayeyaane. Ni nooyo ukhwa umukhasi uwawoonebwa n'umuseetsa weewe, naye aba wayeyaane.
Umusaani umuyindifu ni Lazaaro
19“Abawo umusaani umuyindifu mutweela, uwakwaraatsaka tsingubo tsimiliwu naabi, uwameenyatsaka mu bulamu bwe angaaki buli shifukhu. 20Ne abawo umusaani umutaambi lisiina lyeewe Lazaaro, uwekhalatsaka amulyaango kw'omuyindifu yuno, n'enga aba warundukhaka kamakoontsyo kumubili kweewe kwoosi, 21nga niye ekoomba busa khuulya khu bubuya bubwakwatsaka khukhwaama khu meetsa y'omuyindifu. Ni tsiimbwa natso nga tsiitsa tsakhombaka kamakoontsyo keewe.
22“Imbuka ni yoola umusaani umutaambi wafwa, bamalayika bamusuta bamuyila mu mbafu mwa Ibulayimu. N'umusaani umuyindifu naye wafwa, bamusiikha. 23#2 Esid 7.36; 8.59N'enga ali i makoombe mu khutaambisibwa, wenyusa tsimoni tseewe, wabona Ibulayimu, nga ali aleeyi, ni Lazaaro, nga ali mu mbafu mweewe. 24Aryo welootsela angaaki ari, ‘Wo paapa Ibulayimu, n'umambile shiisa, urumane Lazaaro, etse asiikhe lulwala lweewe mu meetsi, ambosawosekho khu lulimi lwase, lwekhuba ndi mu butsiina bukali mu mulilo kuno.’
25“Ne Ibulayimu wamwiilamo ari, ‘Mwana wase, shebulila nga iwe ni wafunatsaka bilayi byonyene nga ushiili mulamu, ni Lazaaro naye nga n'afunatsaka biibi byonyene. Ne ana ari, niye ali mu khwikhoyesebwa, ne iwe nga uli mu khutaambisibwa. 26Nalundi akari efwe ni nanywe, aliwo luumya luleeyi lulwareebwawo lukhwawukhanisamo ifwe ni nanywe, nio ilekhe khubawo ibo babakana khukhwambukha khukhwaama ino khukhwiitsa iyo ta, namwe umuundu yeesi khukhwaama iyo khukhwiitsa isi ifwe khuli ta.’
27“Shikila umusaani amwiilamo ari, ‘Kale, aso paapa, ikhwikontselela urumane Lazaaro atsye mu ntsu ya paapa wase, 28lwekhuba ndiyo ni babandaayase baraano, abareewule, nabo balekhe khwiitsa mu shifwo shino she kumutaambo ta.’
29“Ibulayimu wamwiilamo ari, ‘Bandaayo bali ni Musa, ni baŋoosi, ni babawulile babeene ibo.’
30“N'omusaani waloma ari, ‘Taawe, paapa Ibulayimu, ne umuundu mutweela khukhwaama mu bafu nga watsiileyo isi bali, balibiiyisa.’
31“Ne Ibulayimu waloma ari, ‘Noola si bawulilisa Musa, ni baŋoosi, umuundu akhaama mu bafu, si balimuwulilisa ta.’ ”
Currently Selected:
Luka 16: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
