Luka 15

Lisheese lilyakoraana

(Mat 18.12-14)

1 # Luk 5.29,30 Lutweela babusanisi be kumusolo ni baboonaki biitsa ambi khurekeeresa Yezu. 2Ne Bafarisaayo ni baleekeli be Kamakaambila ka Musa, beŋuluŋuunya nga baloma bari, “Umusaani uyu, akaanila baboonaki, lundi walya ni nabo.”

3Shikila Yezu abakanikhila lusimo luno ari: 4“Mundu shiina mus'iinywe, n'aba ni kamasheese keewe shitoondo shitweela, ne khwakoraanakho litweela, ukhanyala walekha iko kamakhumi syeenda na syeenda mu kyeewa, watsya nga aweentsa lisheese litweela ilyo lilikoraanile, khukhwoolesa n'alinyoola? 5N'enga walinyoolile, ekhoya walisuta khumayi keewe. 6N'enga wolile ingo, alaanga basaale ni babesanwa beewe, nga abaloma ari, ‘Ni mwiitse khwikhoyele atweela, lwekhuba nanyoolile lisheese lyase abe lilyakoraanile.’

7“Mbaboolela ndi musaambo niyo ndweela, ilibayo kumwikhoyo mukali mwikulu, lw'omwonaki mutweela uwibiiyisa, khuminyisa ibo kamakhumi syeenda na syeenda balayi, babakhakhila khukhwibiiyisa ta.”

Lusimo lwe nusu iyakoraana

8Aryo Yezu wababoolela lusimo lulundi ari: “Namwe mukhasi shiina n'aba ni tsinusu tseewe liikhumi, ne wakosakho ndweela, ukhaburusa itaala, weeya intsu, waheentsela ilala bulayi, khukhwoolesa n'akinyoola? 9N'enga wakinyoolile, alaanga basaale ni babesanwa beewe atweela, nga abaloma ari, ‘Ni mwiitse khwikhoyele atweela, lwekhuba nanyoolile inusu yase abe iyakoraanile.’ 10Mbaboolela ndi, ni musaambo niyo ndweela, bamalayika ba Wele bekhoya lwooyo, umwonaki mutweela uwibiiyisa.”

Paapa uwookesanisa shiisa

11Yezu weloosela ni lusimo lulundi nga aloma ari: “Abawo umusaani mutweela, uwaba ni basooleli beewe babili. 12Umuro waloma paapawe ari, ‘Paapa, n'umbe kumukabo kwe bibiindu byase.’ Aryo paapawe wabakabananisamo bibiindu byeesi abe ali ni nabyo mu bulamu bweewe.

13“Lwanyuma lwe bifukhu bikyeekhe biri, umuro tsana wabusilisa bibiindu byeewe byoosi byeesi aba nabyo, wataala watsya mu shiibala she aleeyi. Ibweeneyo, wasalanisilayo bibiindu byeewe musaambo imbi. 14Ulwo n'amala khusalanisa bibiindu byoosi, intsala ingali yaakwa mu shiibala isho shoosi, aryo warakikha khutaambataamba. 15Kila atsya khuraambila mutweela khu baandu be mu shiibala isho, naye uwamusiindikha mu maayilo keewe khuutsya khuliisa tsimbiitsi. 16Nga ali iyo, wakana ari khali aliile khu makhobola keesi tsimbiitsi tsalilakho, n'enga mbaawo uwamuwakho khakhaandu khoosi ta.

17“Lwanyuma weyambaasa umweene nga aloma ari, ‘Baraambi ba paapa wase boosi bali ni bye khuulya bikali. Ne bona ise ingana khufwila ano intsala! 18Kane ise ninyukhe ano intsye isi paapa imulome ndi, paapa ise nayonaka isi Wele mwikulu, n'isi iwe. 19Sinakhila lundi khulaangibwa umwaana woowo ta. N'umbirise ise nga mutweela khu baraambi boowo.’

20“Ni abweene awo, wenyukha warakikha lukyeendo khukhwiila isi paapawe. Ne aba nga ashiili aleeyikho n'ingo, paapawe wamubona, wamuwambila shiisa, wamutimayo, wamukwa mu shifuba. 21Umusooleli tsana waaloma paapawe ari, ‘Paapa, ise naayonaka isi Wele mwikulu, n'isi iwe. Sinakhila luundi khulaangiwa umwaana woowo ta.’

22“Ne paapawe waloma babakaanisi beewe ari ‘Yuubakho! Reera khaangu ingubo ifuura bulayi mu mukwarise. Mu mukwarise intsiyi khu lwala lweewe, ni bilaalo mu bikyele byeewe. 23Lwanyuma mutsye mureere ikhaafu inere mukisale. Khakhulye, khwikhoye! 24Lwekhuba umwaana wase yuno, abeele waafwa, ne ana ari, ali mulamu, abeele wakoraana, ne ana ari watuyikhaane.’ Nashiryo, baarakikha khuulya ni khukhwikhoya.

25“Bino biba biryo, umusoleeli weewe umukhulu aba s'ali ingo ta, nga ali mu mukuunda. Ne n'aba nga akobola, nga ali ambi ni ntsu, wawulila kimyeenya kiyiliimba, ni khushiina. 26Kila alaanga mutweela khu bakaanisi, wamureeba ari, ‘Makhuuwa shiina ano?’ 27Umwakaanisi wamwiilamo ari, ‘Wandaayo wakoboole, ni paapawo wamwiriire ikhaafu inere, lwekhuba wakoboole nga mulamu, lundi umulayi.’

28“Wandaaye umukhulu yuno wakhalala naabi, wekaana ni khukhwinjila mu ntsu. Kila paapawe arura ibulafu, wamwikontselela ari enjile mu ntsu. 29Ne niye waloma paapawe ari, ‘Bona kimiiko kino kyoosi tsana, ise imbeele nga ikhuraambila iwe nga sikhuminyaalilakho byeesi undakila na khafwiiti khoosi ta. Ne mbaawo sheesi wambakho akhaba ni khameeme khari, nase nikhoyakho ni basaale baase ta. 30Ne bona umwaana woowo yuno, uwatsya wonakisila bibiindu bye mu bulamu bwoowo byoosi khu bamalaaya, n'akoboole ingo, iwe wamwiirira ikhaafu inere.’ 31Paapawe wamwiilamo ari, ‘Mwana wase, iwe uli ano ni nase tsindaalo tsoosi, na buli shitweela shoosi sheesi indi nasho shishoowo. 32Nashiryo, abe shikhwakhila ifwe khuteekha kamayiiya khwikhoye, lwekhuba wandaayo yuno abeele wafwa, ne ana ari mulamu, abeele wakoraana, ne ana ari watuyikhaane.’ ”

Currently Selected:

Luka 15: LCE

Highlight

Copy