Luka 14

Yezu awonesa umusaani umulwaale

1Lutweela khu shifukhu sha Sabato, Yezu watsya mu ntsu y'Omufarisaayo, uwaba mutweela khu bawuli, khuulya biilyo. Ne babaandu baaba bamwilolelesa lukali. 2Abawo umusaani mutweela iburaangisi weewe uwaba wabiimba bikyele ni kamakhono keene. 3Yezu wareeba baleekeli be Kamakaambila ka Musa ni Bafarisaayo ari, “Shili shilayi khuwonesela khu shifukhu sha Sabato namwe ta?” 4Ne nibo basila busa. Kila Yezu wawamba umusaani wamuwonesa, wamulekha watsya.

5 # Mat 12.11 Lwanyuma Yezu wabareeba ari, “Naanu khwiinywe unyala khuuba n'umusoleeli weewe, namwe iyeeyi yeewe, nga shitweela khu nibyo shakwiile mwilowo, ukhanyala wabirusamo khangu akho khu shifukhu sha Sabato?”

6Ne nibo balekha khunyala khumwiilamo mu mulomo yino ta.

Yezu aleekela khu buwolu

7Lwanyuma n'abona bakyeni babalaangiwa nga berobolela biifwo bye biriifwa, wababoolela lusimo luno ari: 8#Nikh 25.6,7“Noola umuundu yeesi wakhulaangile khu mayiiya ke bukhwaale, ukhatsya wekhala khu shitsoloŋo she angaaki ta, winyoola nga inyala khubayo umuundu ukhufuura iwe shiriifwa ulaangiwile. 9Ni nooyo ubalaangile inywe mweembi, anyala weetsa wakhuloma iwe ari, ‘Sikulila yuno shiifwo shino.’ Iwe uryo ni khuswala khukali, wutsya khukhwikhala mu shifwo she nyuma. 10Ne ni baba nga bakhulaangile, tsya wikhale mu shifwo she nyuma, ni nooyo ukhulaangile kane etse is'uli, akhulome ari, ‘Mulebe, yinyukha wisyende ano mu shifwo she mu moni.’ Ni nawe kane ufune shiriifwa shikali, mu moni tse bakyeni babaandi. 11#Mat 23.12; Luk 18.14Lwekhuba buli mundu yeesi uwiniinisa, alikhisibwa asi; ni nooyo uwiyisa asi, aliniinisibwa angaaki.”

12Lwanyuma Yezu waloma umulaangile khu mayiiya ari, “N'uba wateekhele kamayiiya ke she kumuusi, namwe she ashilo shikali, ukhalaangatsaka basaale boowo, namwe babandaayo, namwe balebe boowo, namwe babesanwa boowo bayindifu ta, lwekhuba n'ukhola uryo, nabo kane bakhulaange, baryo babe nga bakhuliyila, lw'ebyo byeesi wabakholela. 13Ne n'uteekha kamayiiya, ulaangatsaka bataambi, ni babakataala, ni baleme, ni babofu, 14ni nawe uliweebwa ikhabi. Lwekhuba nibo si bali ni she khukhuliyila ta, ne Wele niye ulikhuliyila khu shifukhu she khulamukha khwe bakhosefu.”

Lusimo lwe Kamayiiya kamaboofu kameene

(Mat 22.1-10)

15Kila mutweela khuubo babekhala ni naye nga balya, n'awulila bilomo ibyo, waloma Yezu ari, “Nga ali ni khabi umuundu uyo uliba khu mayiiya mu Buyiinga bwa Wele.”

16Yezu welamo ari, “Abawo umusaani mutweela uwateekha kamayiiya kamaboofu kameene, walaanga babaandu bakali. 17Isaawa iye khurusa kamayiiya ni yoola, warumana umwakaanisi weewe mutweela, khuutsya aboolele bakyeni beewe balaange ari, ‘Ni mwiitse, lwekhuba bibiindu byoosi biŋooneŋoone khaale.’

18“Ne boosi buli mutweela warakikha khukhwisonesa. Uwanyoowa waloma ari, ‘Nakulile liiswa lyase, nakhiile khuutsya khulibona. Inoomba untsiyakhile.’ 19Ukuundi waloma ari, ‘Nakulile tsiyeeyi tsase tsiraano, indikho intsya khutsitsema. Inoomba untsiyakhile.’ 20N'ukuundi naye waloma ari, ‘Nio naama khukhwa umukhasi, ni nashiryo, sinanyalile khukhwiitsa ta.’

21“Umwakaanisi wakobolayo, waboolela umukhulu weewe bino byoosi. Umukhulu we intsu wakhalala naabi, kila aloma umwakaaanisi ari, ‘Rura wangu utsye mu mikhoosi ni mu ntsila tse mu shiriimba, ureere ano, bataambi, babakataala, ni babofu, ni baleme.’ 22Kila umwakaanisi aloma ari, ‘Musakhulu, sheesi undakiile nashikholile ne ishiliyo biifwo.’

23“Umukhulu uyo waloma umwakaanisi ari, ‘Rura utsye mu mikhoosi, ni mu ntsila tse mu byaalo, ubawanyiinye boosi beetse, nio manya intsu yase yitsule bakyeni. 24Imbaboolela ndi, mbaawo na mutweela khuubo babalaangiwa, ulikhoombakho khu mayiiya kaase ta.’ ”

Buwangafu bubuuli mu khuba umuleekelwa

(Mat 10.37-38)

25Babaandu bakali ni baaba bakyeenda ni Yezu batsya, weshebukha isi bali wabaloma boosi ari, 26#Mat 10.37“Mbaawo umuundu uwiitsa isiindi, unyala khuuba umuleekelwa wase ta, khurusakho nga wabiiyiile paapawe, ni maayiwe, umukyelemawe ni babaana, babandaaye, ni bakooko; ilala ni khutubaasakho bulamu bweewe bubweene. 27#Mat 10.38; 16.24; Mrk 8.34; Luk 9.23Ni nooyo ukhakane asute kumusalaba kweewe anondelele, s'anyala khuuba umuleekelwa wase ta. 28Lwekhuba naanu mus'iinywe ukana khukhwombekha intsu ye goroofwa, ukhanyoowa khukhwikhala asi, wabalilila bibikanibwa, ni khubona nga ali ni tsinusu tsitsimala khumalilisa intsu? 29Lwekhuba n'alekha khukhola aryo, asimama kumusiinji, kweesi akhalinyala khumalilisa intsu ta. Ni naabo babaalibona shino, balimutsekhelela, 30nga baloma bari, ‘Umusaani uyu, arakikha khukhwombekha intsu, ne bona s'anyala khumala kumulimo kweewe ta.’

31“Namwe muyiinga shiina uba nga akana khuutsya mu busoolo n'umuyiinga ukuundi, ukhanyoowa khukhwikhala asi, khubona nga oba kane anyale busoolo nga ali ni basilikhale biikana liikhumi, khusoolanisa ibo babaali bikana kamakhumi kabili? 32Ne n'abona nga s'akane anyale ta, akaanisa burume isi umuyiinga ukuundi uyo, abe esi atsya khusoolana naye, nga ashiili aleeyi, nga amuloomba abewo lukoosi. 33Musaambo niyo ndweela, mbaawo na mutweela khwiinywe, unyala khuuba umuleekelwa wase, nga wakhulekha byoosi byaali nabyo ta.”

Kumuunyu kumukhelekho

(Mat 5.13; Mrk 9.50)

34Yezu weloosela nga aloma ari: “Kumuunyu kuli kumulayi, ne kumuunyu kweene ni kuwamo itsamu, kunyala kuryeena khukobosebwamo itsamu lundi? 35Kuba sikushaakha lundi ta, bakutuuma busa, lwekhuba sikulimo kumukaso isi liiloba namwe isi isiina ta. Uyo uli ni kamaru ke khuwulila, n'awulile.”

Currently Selected:

Luka 14: LCE

Highlight

Copy