Luka 17
17
Khukoranisa babaandi
(Mat 18.6-7,21-22; Mrk 9.42)
1Yezu waloma baleekelwa beewe ari, “Bibiindu bibikhongelesa babaandu wakila boneka, bili ni khubawo, ne kumutaambo kwamunyoolile uyo ubireera. 2Ne shandiminyisile bulayi, umuundu uyo khubowebwa lusisi luboofu mu milo, atuumibwa mu nyaantsa, khufuurisa niye khureerera mutweela khu bakyeekhe bano khukhwoneka. 3#Mat 18.15Nashiryo ni mwiliinde mwabeene, noola wandaayo wonakile, mwikiitse, ne noola webiiyisile, mwiyakhile. 4Ne noola wonakile is'uli tsifuunda musaafu mu shifukhu sheene shitweela, ne buli fuunda weetsa is'uli, nga aloma ari, ‘Nebiiyisile,’ wakha khumwiyakhila.”
Kamaani ke khufukiilila
5Baarume baloma Umukasya bari, “Iwe n'ukhulooselekho ifwe khufukiilila khweefwe.”
6Umukasya wabaloma ari, “Muba nga mubeele ni khufukiilila khukyeekhe nga khamiitso kaladaali, abe munyala mwalomela kusaala kuno muri, ‘Syuukha, utsye, wibyaale mu nyaantsa.’ Nakwo kwandibawulile.”
Kumulimo kw'omwakaanisi
7Yezu weloosela ari, “Naanu mwiinywe unyala khuuba n'umwakaanisi ulimisa, namwe uwayisa kamasheese; ne n'ama mu nimilo, unyala wamuloma ari, ‘Yikhala asi ulye ta?’ 8S'anyala wamuloma ari, ‘Inengekharengekhele biilyo, wibowe, wiŋooneŋoone untsakaanise she khulya, imale khuulya ni khuunywa, ne lwanyuma nio nawe ulye lundi unywe?’ 9Niye anyala khusiima umwakaanisi lwekhuba wakholele shamulomele khukhola? 10Ni nanywe muryo, nga mwamalile khukhola byoosi byeesi babalomile khukhola, mulome muri, ‘Ifwe khuli babakaanisi busa babakhandyakhiile ta, khwakholile busa shishikhwakhila khukhola.’ ”
Yezu awonesa basaani liikhumi be bikeenge
11Yezu n'aba nga atsya i Yerusalemu, wabirira khu lwakha luluuli akari a Samariya ni Galilaaya. 12Ne n'aba nga enjila mu shaalo shitweela, basaani liikhumi be bikeenge bamwakaanana, bemikha aleeyikho, 13bayokesela angaaki nga baloma bari, “Yezu! Musakhulu! Khuwaambile shiisa!”
14 #
Lev 14.1-32
Yezu n'ababona, wabaloma ari, “Ni mutsye, mwiyokesane isi basaayi.” Ne ni baaba nga batsya, bawonesebwa.
15Ne mutweela khu nibo n'abona ari wawonesebwele, washuukha, wakobolayo, nga ayokesela angaaki, nga aruuya Wele. 16Wamayo, wakwa asi ebikyele bya Yezu, wamusiima. Umweene yuno aba Umusamariya.
17Yezu wareeba ari, “Sibabeele liikhumi babawonesebwele? Ne syeenda bali lwaheena? 18Sibabonekhakho na mutweela khukobola, baruuye Wele, akhali umuutswa yuno?” 19Lwanyuma Yezu wamuloma ari, “Yinyukha utsye, khufukiilila khwoowo khwakhuwonesele.”
Khukhwiitsa khwe Buyiinga bwa Wele
(Mat 24.23-28,37-41)
20Shifukhu shitweela, nga Bafarisaayo bareebile Yezu bari Buyiinga bwa Wele bwiitsa liina, Yezu wabelamo ari, “Buyiinga bwa Wele sibwiitsa nga bweyokeselele ta. 21Namwe babaandu khuloma bari, ‘Bona ubushi,’ namwe bari, ‘Bona ubwoshi’ ta. Lwekhuba Buyiinga bwa Wele buli mus'iinywe.”
22Lwanyuma waloma baleekelwa beewe ari, “Imbuka ilyoola isi mulikanila khubona shitweela khu shifukhu sh'Omwaana w'Omuundu, ne si mulishibonakho ta. 23Babaandu baliloma bari, ‘Bona uyo,’ namwe bari, ‘Bona ali ano.’ Mukhatsyayo nga mutima khubaloondakho ta. 24Lwekhuba nga khumulikha ni khumweekhamweekha ni khukhosesa likulu, khukhwaama khu luwande lutweela khukhwoola khu luwande lulundi, n'Umwaana w'Omuundu naye aliba aryo khu shifukhu sheewe. 25Ne khunyoowa akhila khutaambisibwa naabi, nalundi ni babaandu be kumuboolo kuno bamwikaane.
26 #
Rak 6.5-8
“Nga ni shaba mu bifukhu bya Nowa, shiryo nga ni shiliiba mu bifukhu ibyo by'Omwana w'Omuundu. 27#Rak 7.6-24Babaandu baaba nga balya, nga banywa, nga bakhwa, lundi nga bakhwalikha, khukhwoolesa khu shifukhu khweesi Nowa enjilila mu lyaato. Lwanyuma kameetsi ketsula, kasalasala, kabahesa boosi.
28 #
Rak 18.20—19.25
“Shikhaabe shiryo nga ni shaba khu bifukhu bya Loti. Babaandu baaba nga balya, nga banywa, nga bakulisa, nga bakula, nga babyaala, nga bombekha. 29Ne khu shifukhu khweesi Loti arurira mu Sodoma, kumulilo ni bunoro byalakala khukhwaama mwikulu, byabahesa boosi.
30“Shiliiba shiryo khu shifukhu khweesi Umwaana w'Omuundu alibonekhelakho. 31#Mat 24.17,18; Mrk 13.15,16Khu shifukhu isho, umuundu yeesi uliba khu ntsu khu ngaaki, ne bibiindu byeewe nga bili mu ntsu mukari, akheekha khuutsya khubirusamo ta. Shitweela ni nooyo uliba ibulafu mu nimilo, akhakobolayo ingo ta. 32#Rak 19.26Ni mukhebulile bibyakholekha khu mukha Loti. 33#Mat 10.39; 16.25; Mrk 8.35; Luk 9.24; Yoh 12.25Buli mundu yeesi ukhakakho khuwonesa bulamu bweewe, alibufwilwa. Ni nooyo yeesi ufwilwa bulamu bweewe, alibuwonesa. 34Imbaboolela ndi mu shilo sheenesho, babaandu babili baliba bakonele khu bulili butweela, mutweela aliyilibwa, ne ukuundi alilekhebwa. 35Bakhasi babili baliba nga basyeera atweela khu lusisi, mutweela aliyilibwa, ne ukuundi alilekhebwa. 36Basaani babili baliba mu nimilo, mutweela aliyilibwa, ne ukuundi alilekhebwa.”
37Baleekelwa bamureeba bari, “Umukasya, ne bilikholekha waheena?”
Yezu wabelamo ari, “Ahaba kumulaambo, abweenewo, nio esi tsingosya tsibusanila.”
Currently Selected:
Luka 17: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
