Yohana 13

Yezu asiinga bikyele bye baleekelwa beewe

1Kamayiiya ke Khubirakho kaaba nga kashiili khwoola ta, Yezu abe wamanyile ari isaawa yeewe iye khurura mu shiibala muno atsye isi Paapa weewe, yoolile. Lwanyuma khulwe khukana babaandu beewe babaaba mu shiibala, aryo khu mbuka yino Yezu wabokesela ilala khukana khweewe khukhwitsufu.

2Sitaani aba nga wamalile khaale khukhwinjila mu mwoyo kwa Yuda Isikalyoti, umwaana uwa Simoni, ari alye mu Yezu luwomelo.

3Baryo ni baaba nga balikho balya she shiilo, ni Yezu nga wamanyile ari Paapa weewe wamuweele byoosi mu mikhono kyeewe, ate nga wayama isi Wele, lundi nga akobolayo isi Wele; 4wenyukha khu shikabilo she biilyo, wiyabulamo tsingubo tseewe tsye khu ngaaki, wabukula i tawulo wibowa mu shikuute. 5Lwanyuma watsukha kameetsi mu besani, warakikha khusiinga baleekelwa beewe bikyele, ni khubisiimulila i tawulo isi ebowa mu shikuute.

6Ne n'ola khu Simoni Petero, Petero wamureeba ari, “Umukasya, iwe usiinge ise bikyele?”

7Yezu wilamo ari, “Sheesi ise ndi khukhola, iwe s'unyala khushimanya ari ta. Ne kane ushimanye lwanyuma.”

8Petero wamuloma ari, “Taawe, iwe singene usiinge bikyele byase nakhafwiiti khari ta!”

Yezu wamwiilamo ari, “Nikhakhusiinga iwe bikyele, uba s'uli ni kumukabo ni nase ta.” 9Simoni Petero wiilamo ari, “Nashiryo, Umukasya, akhuba bikyele byase byonyene ta, ne ni kamakhono kaase, ni kumurwe nakwo.”

10Yezu wamuloma ari, “Umuundu uba wamalile khukhwisiinga, sishimukanisa khukhwisiinga lundi ta. Akhali khusiinga bikyele byonyene. Umweene yeesi aba ali umumiliwu. Ni nanywe muli bamiliwu, ne si muli mweesi ta.” 11Khulwekhuba Yezu amanya uyo wutsya khumulyamo luwomelo. Ni khulwe ilomo iyo kila aloma ari mweesi si muli bamiliwu ta.

12 # Luk 22.27 Aryo Yezu n'amala khubasiinga bikyele, wakwaara tsingubo tseewe, wekhala asi lundi. Wabareeba ari, “Mwamanyile sheesi ise naama khubakholela? 13Inywe munaanga ise muri Umuleekeli, nalundi muri Umukasya. Muli batuufu khuloma muryo, khulwekhuba isho nisho sheesi ise ndi. 14Ne noola ise ubeele Umukasya wenywe, nalundi Umuleekeli wenywe, nabasiingile inywe bikyele, nanywe muryo mwaakha khusiingana bikyele, mwenyene na mwenyene. 15Khulwekhuba nabaweele she khubonelakho, nio nanywe mukhole nga ise n'ishikholele khus'inywe. 16#Mat 10.24; Luk 6.40; Yoh 15.20Ilala, ilala, umwakaanisi s'afuura umukoosi weewe bukhulu ta. Namwe umurume s'afuura uyo umurumaane bukhulu ta. 17Ni mumanye muri, singa mumanya bibiindu bino nalundi mwabitsiilakho, muba muli ni khabi.

18 # Zab 41.9 “S'indi khuloma khwinywe mweesitsana ta, akhali ise namanyile abo beesi narobola. Ne iliwo bibyaronebwa bikhosefu bibiili ni khukhwolelela, bibiiloma biri, ‘Uyo ukabanana ni nase biilyo, umweene uyo niye ukalukha khuuba umusiku wase.’ 19Imbaboolela shino ari nga shishiili khubawo ta, ne ni shilibawo, akile mufukiilile muri ise niye umweene. 20#Mat 10.40; Mrk 9.37; Luk 9.48; 10.16Ilala imbaboolela ndi, uyo uwakaanila umuundu isi ise ndumana, aba wantsakaaniile ise. Ni nooyo uwuntsakaanila ise, aba wakaaniile uyo uwandumana ise.”

Yezu akanikha khu biwamba khu mulyamo luwomelo

(Mat 26.20-25; Mrk 14.17-21; Luk 22.21-23)

21Yezu n'amala khuloma aryo, wiyembelela mu mwoyo kweewe, kila aloma lubuula ari, “Ilala mbaboolela ndi, mutweela khwinywe atsya khundyamo luwomelo.”

22Mu khwiyanga khukali, baleekelwa balolana. Khulwekhuba si bamanya bulayi naanu esi Yezu alomakho ta. 23Ne mutweela khu baleekelwa beewe, uyo isi Yezu akana naabi, aba wikhaale nga uwililile khu Yezu. 24Simoni Petero wamumesela, wamuloma ari, “N'umureebe akhuboolele ifwe naanu esi alomakho.” 25Naye wesyeenda ambi ni Yezu, wamureeba ari, “Umukasya, naanu umweene?”

26Yezu wiilamo ari, “Uyo esi kane imbe kumukaati kuno nga namalile khukusiikha mu shibuumba.” Nga Yezu wamalile khusiikha kumukaati mu shibuumba, wakubukula, wakuwa Yuda Isikalyoti, umwaana uwa Simoni. 27Ne Yuda n'amala khuulya kumukaati, Sitaani wamwingilamo. Yezu wamuloma ari, “Sheesi ukana khukhola, n'ushikhole khaangu.” 28Ne mbaawo na mutweela khuubo babaaba bekhaale nga balya, uwamanya shilomo isho sheesi Yezu alomela Yuda ta. 29Ne lwekhuba Yuda aba nga niye uwamba iwootswa iye tsinusu, bambaasa bari manya Yezu alikho amuloma ari atsye akule byeesi bakana bye khu mayiiya. Namwe bari manya atsye awekho bataambi khakhaandu. 30Aryo Yuda n'amala khuulya kumukaati warura ibulafu. Abe antsye bwaba mushilo.

Likaambila lishaakha

31Nga Yuda wamalile khurura ibulafu, Yezu waloma ari, “Ari Umwaana w'Omuundu wafumisiwile. Lundi khubirira mu niye, Wele afumisibwe. 32Ne Wele n'afumisibwa khubirira mu Mwana, Wele naye afumisa Umwaana khubirira mu niye. Nalundi khangu akho, alimufumisa. 33#Yoh 7.34Baana baase, mu mbuka ifwiiti iri, ndi ni nanywe, ne lwanyuma muli meentsa, ne ndi nga ni naboolela Bayudaaya, nanywe mbaboolela ari ndyo ndi, esi intsya, simunyala khukhwiitsayo ta. 34#Yoh 15.12,17; 1 Yoh 3.23; 2 Yoh 1.5Imbawa likaambila lishaakha: Ni mukanane mwenyene na mwenyene. Nga ise ni nabakana inywe, muryo nanywe mwakha mukanane. 35Mu khukanana mwenyene na mwenyene, nimwo mweesi babaandu boosi balibamanya bari muli baleekelwa baase.”

Yezu akanikha khu khwikaana khwa Petero

(Mat 26.31-35; Mrk 14.27-31; Luk 22.31-34)

36Simoni Petero wareeba Yezu ari, “Umukasya, wutsya ena?” Yezu wamwiilamo ari, “Isi intsya, s'unyala wanondakho ari ta. Ne ulinoondakho lwanyuma.”

37Petero wamureeba lundi ari, “Umukasya, lwashiina s'inyala nakhuloondakho ari? Kane ise imbaaneyo bulamu bwase khulwoowo.” 38Lwanyuma Yezu wamureeba ari, “Ilala, kane uwaneyo bulamu bwoowo khulwase? Ilala, ilala, ikhuboolela ndi, itwaya kane ibe nga ishiili khukholyookha ta, iwe kane ube nga wantsikaanile ise kimilundi kitaru.”

Currently Selected:

Yohana 13: LCE

Highlight

Copy