Yohana 14

Yezu niye Kumukhoosi kukuutsya isi Paapa

1Yezu wiloosela waloma ari, “Mukhaba ni khukhwiyembelela mu myoyo kyenywe ta. Ni mufukiilile mu Wele, ni nase ni mufukiililemo. 2Muntsu ya Paapa wase mulimo biifwo bikali. Ni nase ndi khuutsya khubaŋoonaŋoonela shifwo. Shino shiba shishikhali shiryo ta, khali ise s'imbaboolele inywe ta. 3Ne n'imba nga namalile khubaŋoonaŋoonela shifwo, indikobola lundi imbayile isi ise ndi, nio isi ise ndi ni nanywe mube ibweene iyo. 4Inywe mwamanya intsila itsya mu shifwo mweesi ise ndikho ntsya.”

5Tomasi wamureeba ari, “Umukasya, sikhwamanyile ni mu shifwo mweesi ulikho wutsya ta, khunyala khuryeena khwamanya intsila?”

6 # Baru 3.13,14 Yezu wamwiilamo ari, “Ise niye intsila, nalundi niye bwa ŋali, nalundi niye bulamu. Mbaawo umuundu uwiitsa isi Paapa ta, khurusakho nga abirira mus'iise.”

7Yezu weloosela ari, “Ne ari nga ni muumanyile ise, kane mumanye Paapa wase naye. Ni khukhwaama ari mwamumanyile, nalundi mwamuboone.”

8Filipo wamuloma ari, “Umukasya, iwe n'ukhwokese Paapa, ifwe isho kane shikhumale.”

9Yezu wamukobolamo ari, “Filipo, nabeele ni nanywe khumala imbuka yino yoosi, ne ni khukhwoola ari iwe ushiili khukhumanya ise ta? Uwumbona ise, aba waboone Paapa, khulwashiina kila uloma uri khwokesane Paapa? 10Filipo, iwe s'ufukiilila uri ise ndi mu Paapa, ni Paapa naye ali mus'iise ta? Bilomo byeesi imbaboolela inywe, simbaboolela khulwe bunyala bubwase ta; ne khulwe bunyala bwa Paapa uwikhala mus'iise, waraamba kimilimo kyeewe umweene. 11Ni mufukiilile nga naalomile ndi ise ndi mu Paapa, ni Paapa naye ali mus'iise. Ne noola abe si shili khulwe isho ta, ni mufukiilile khulwe kimilimo kimyeene kyeesi ikhola. 12Ilala, ilala, imbaboolela ndi uyo uwufukiilila ise, naye alikhola kimilimo nikyo mitweela nga kyeesi ise ikhola, ilala alikhola ni kimilimo kikifuurakho ano bukhulu, khulwekhuba indikho intsya isi Paapa. 13Buli shoosi shoosi sheesi kane muloombatsake mu lisiina lyase, indishikhola, nio shiriifwa sha Paapa shibonekhele mu Mwana. 14Ni mulinoomba shishiindu shoosi mu lisiina lyase, indishikhola.”

Yezu asuubisa Umwoyo Umukhosefu

15 # Makh 6.18 Yezu weloosela ari, “Ni muba nga mungana ise, kane mulondelelatsake kamakaambila kaase. 16Ni nase kane inoombe Paapa, ni naye alibawa Umuyeeti ukuundi, ulibatsaka ni nanywe bifukhu byoosi. 17Umweene uyo niye Umwoyo uwa ŋali, isi shiibala shikhanyala khukhwakaanila ta, khulwekhuba shiibala seshimubona namwe sishamumanya ta. Ne inywe mwamumanya khulwekhuba amenya mus'iinywe, akhaabe mus'iinywe.

18“Ise s'indibalekha inywe khuuba bafuubi ta; indikobola isi muli. 19Ne mu mbuka ifwiiti, shiibala sikane shimbone ta, ne inywe kane mumbone. Khulwekhuba ise ndi umulamu, ni nanywe muliba balamu. 20Khu shifukhu isho, inywe mulimanya muri ise ndi mu Paapa wase, ni nanywe muli mus'iise, ni nase ndi mus'iinywe. 21#Makh 6.12,18; Sir 4.14Uyo umanyile kamakaambila kaase, wakawamba, aba uyo niye uwungana ise. Ni n'oyo uwungana ise, naye alikanibwa ni Paapa wase. Ni nase ndi mukana, niyokesanise is'ali.”

22Ne Yuda ukuundi, ukhali Isikalyoti ta, wareeba Yezu ari, “Umukasya, shiina kila wutsya khukhwiyokesanisa isi ifwe, ne akhuba isi shiibala ta?”

23Yezu wamukobolamo ari, “Umuundu yeesi uwungana ise, kane awambe shilomo shase. Ni Paapa wase kane akane umuundu uyo, nalundi kane khwiitse is'ali, khumenye mu bulamu bweewe. 24Ne umuundu ukhangana ise ta, s'awaamba bilomo byase ta. Shilomo sheesi muwulila seshili shishase ta, akhali shili sha Paapa uwandumana ise.

25“Bilomo bino nabibabooleele nga ishiili ni nanywe. 26Ne Umuyeeti, nga niye Umwoyo Umukhosefu, isi Paapa alyakaanisa mu lisiina lyase, alibaleekela inywe bibiindu byoosi. Nalundi alibashebusa ibyo byoosi byeesi imbabooleele. 27Lukoosi nilwo lwesi imbalekheele; lukoosi lwase lulweene nilwo lweesi imbaweele. Ise s'imbawa lukoosi nga shiibala ni shibawa ta. Kimyoyo kyenywe kikheyembelela namwe kikharya ta. 28Mwambulile nga noma ndi, ‘Indikho intsya, nalundi ndi indikobola isi muli.’ Muba nga mumungana, khali mwekhoyele, khulwekhuba indikho ntsya isi Paapa. Khulwekhuba Paapa ali umukhulu khukhufuura ise. 29Ari nababooleele nga shino shishiili khubawo ta, nio akile nga shetsile khukholikha, mufukiilile. 30Ise shinyala ari nakanikha ni nanywe imbuka ingali ta, khulwekhuba umuwuli uwe shiibala shino alikho etsa. Ne ise s'andikho bunyala bwoositsana taawe. 31Ne shiibala shili ni khumanya shili ise ingana Paapa, shishikila ikhola nga Paapa n'anomela. Ni mwinyukhe khurure ano khutsye.”

Currently Selected:

Yohana 14: LCE

Highlight

Copy