Yohana 12

Yezu bamuwakha Kamafura nga ali i Besaniya

(Mat 26.6-13; Mrk 14.3-9)

1Ni byaba nga byaramileyo bifukhu bisesaba khukhwoola khu Mayiiya ke Khubirakho, Yezu woola i Besaniya, esi alamusila Lazaaro khukhwaama mu khufwa. 2Bakhalabana, bamuteekhelayo she shiilo. Maliza niye uwakaanisayo she khulya isho. Lazaaro aba mutweela khu baaba khu shikabilo she biilyo.

3 # Luk 7.37,38 Lwanyuma Mariya wabukula ikyupa iye kamafura kakawunya bulayi, ke bukusi bwe angaaki, wakahakha khu bikyele bya Yezu. Wabisiimulila litsuune lyeewe. Intsu yoosi yetsula khuwunya bulayi khwe kamafura ako.

4Ne mutweela khu baleekelwa ba Yezu ulaangibwa Yuda Isikalyoti, uwaba atsya khulyamo Yezu luwomelo, lwanyuma waloma ari, 5“Khulwashiina kila kamafura kano kakhakulisibwilemo tsidinari nga bitoondo bitaru, batsikabila bataambi?” 6Yuda s'aloma aryo bari khulwekhuba abe enaanayo isi bataambi ta, ne khulwekhuba aba umwiifwi. Niye uwasutatsaka iwootswa, ate nga ebaatsaka tsinusu tsitsakwatsakamo.

7Yezu waloma ari, “Ni mumulekhe abe. Lekha ebiikhile kamafura ako, khulwe shifukhu she khusiikhibwa khwase. 8#Maka 15.11Babaandu bataambi muli ni nabo busheele, ne si muli ni nase tsindaalo tsoosi ta.”

Luwomelo lwe khukhwiira Lazaaro

9Nga ibyo bili biryo, lituuli lye Bayudaaya lyamanya liri Yezu ali i Besaniya. Betsayo, ne akhuba ndi khulwa Yezu yenyene ta, ne ni khubona khu Lazaaro isi Yezu alamusa khukhwaama mu bafu. 10Baryo Basaayi bakhulu bakhala kamakyesi ke khukhwiira Lazaaro naye. 11Khulwekhuba Bayudaaya bakali baaba batsya isi Yezu nga bamufukiilila, nalundi khulwa Lazaaro.

Yezu enjila mu Yerusalemu ni lubuyi

(Mat 21.1-11; Mrk 11.1-11; Luk 19.28-40)

12Ne shifukhu shishelakho, kutuuli kwe babaandu babaaba beetsile khu mayiiya, ni bawulila bari Yezu ali khu ntsila etsa i Yerusalemu, 13#Zab 118.25,26; 1 Mak 13.51bakhongola tsisakya tsye kamashendu baatsya khumwakaanila nga balomela angaaki bari, “Hosana, ali ni tsikhabi uyo uwiitsa mu lisiina ly'Omukasya. Wele awe Umuyiinga wa Isiraeli tsikhabi.”

14Yezu wanyoola ipunda imoosi, wakikhalakho, nga ni sharonebwa mu byaronebwa bikhosefu shiri,

15 # Zek 9.9 “Mukharya ta, inywe babaandu be mu Sayuuni;

Bona Umuyiinga wenywe alikho etsa

nga wikhaale khu sikilya imoosi.”

16Mu khunyoowa baleekelwa beewe balekha khumanya shino ta; ne lwanyuma nga Yezu wamalile khuweebwa shiriifwa, ulwo bashebulila bari bibiindu bino byaronebwa nga biwamba khu niye. Nalundi nga bino byoosi byakholebwa khu niye. 17Ni lituuli lye babaandu bababawo ni naye nga enyusa Lazaaro mu ŋani lundi wamulamusa khukhwaama mu bafu, baboola ibyo byoosi byeesi baabona nalundi byeesi baawulila. 18Babaandu bakali khulwekhuba baaba bawuliile bari Yezu wakholile she kamakaanga shino, baryo baatsya khumwakaanila. 19Bafarisaayo baloma bonyene na bonyene bari, “Ni mubone, mbaawo sheesi khulikho khunyala khukhola ta! Lola shiibala shoosi shilikhumulondelela.”

Bayonaani baweentsa Yezu

20Mu baandu babeetsa khu mayiiya khukhwisaaya, mwabamo balala Bayonaani. 21Nibo beetsa isi Filipo, uwaba uwama i Besusaida, mu Galilaaya, bamuloomba bari, “Musakhulu, khukana khubona Yezu.” 22Filipo naye watsya waboolelakho Andereya. Baryo boombi lwanyuma baatsya baboolela Yezu. 23Lwanyuma Yezu welamo ari, “Isaawa yoolele isi Umwaana w'Omuundu ashiile khufumisibwilamo. 24Ilala, ilala, imbaboolela ndi, imiitso ye iŋaano ni khakwa mwiloba yafwa ta, irama nga ili imiitso indweela yonyene. Ne n'imela, isaala bumiitso bukali. 25#Mat 10.39; 16.25; Mrk 8.35; Luk 9.24; 17.33Umuundu yeesi ukana bulamu bweewe, alibufwilwa. Ne umuundu ubiyila bulamu bweewe mu shiibala shino, alibwibiikhila anyoole bulamu bubukhawawo ta. 26Umuundu yeesi uli umwakaanisi wase, ashiile khukhunondelela ise. Ni nase isi ndi, umwakaanisi wase naye niyo isi aliba. Uyo yeesi uli umwakaanisi wase, Paapa alimuwa shiriifwa.”

Yezu akanikha khubiwamba khu khufwa khweewe

27Yezu weloosela ari, “Ari kumwoyo kwase kweyembelele. Ne ari inome shiina? Inome ndi Paapa n'umbonese mu saawa yino? Ne taawe, shino nisho shishandeera khukhwoola khu saawa yino. 28Paapa, n'ufumise lisiina lyoowo.”

Lwanyuma likono lyama mwikulu nga liloma liri, “Nalifumisile khaale, nalundi indilifumisa.” 29Ne babaandu bababawo nga beemilewo ni bawulila likono, baloma bari, “Ibeele khukuula khwe ifula.” Ne babaandi baloma bari, “Malayika ama khukanikha ni naye.”

30Yezu wilamo ari, “Likono ilyo likanikhile khulwenywe, ne akhuba khulwase ta. 31Ari imbuka niyo yino, iye khukhalila shiibala shino kumusaango. Umuwuli uwe shiibala shino anatimisibwa arusibwe ibulafu. 32Ne nase n'indiniinisibwa angaaki khurura khu shiibala, indihaaya babaandu boosi imbare isi samweene.” 33Shino ashiloma nga okesanisa khuufwa khwa saambo shiina khwesi alifwamo.

34 # Zab 110.4; Isay 9.7; Ezek 37.25; Dan 7.14 Lituuli lyelamo liri, “Ifwe khwawulila mu makaambila keefwe khuri Kristu alibawo bifukhu byoosi. Ne iwe shiina shikhulomesa shiri Umwaana w'Omuundu ashiile khuniinisibwa angaaki? Umwaana w'Omuundu yuno, niye naanu?”

35Yezu wabelamo ari, “Buwanga mushiili ni nabwo, ne mu mbuka injeekhe. Ni mukyende nga mushiili ni buwaanga, nga shishiilima shishiili khubawamba ta. Umuundu ukyendela mu shilima s'amanya esi atsya ta. 36Nga mushiili ni buwaanga ni mufukiilile buwaanga, nio manya mube babaana be buwaanga.” Yezu n'amala khukanikha bino, warurawo watsya wabebisakho.

Khulekha khufukiilila khwe Bayudaaya

37Akhaba nga Yezu akhola bye kamakaanga bikali biryo mu moni tsye Bayudaaya, si bamufukiililamo ta. 38#Isay 53.1Shino shaba nga sholelesa bibyaronebwa mu muŋoosi Yisaaya shiri,

“Umukasya, naanu uwafukiilila burume bweefwe?

Nalundi, kumukhono kwa Wele kwe kamaani kwabimbulilwa khu naanu?”

39Ni khulwe ilomo yino, si baanyala khufukiilila ta, khulwekhuba Yisaaya waloma ahandi ari,

40 # Isay 6.10 “Wele wababofwasa tsimoni tsaawe.

Nalundi wakhola kimyoyo kyabwe khuuba kimihandalafu,

nio balekhe khubona ni tsimoni tsaawe ta,

namwe nio balekhe khumanya ni kimyoyo kyaawe ta,

khulwekhuba beetsa khushuukha,

ise nabawonesa.”

41Yisaaya aloma aryo lwekhuba abona shiriifwa sha Yezu; aryo wamukanikhakho. 42Ni batweela khu baraangilisi bamufukiililamo, ne khulwe khuurya Bafarisaayo, balekha khubuula ta, bari lukana beetsa khubekalawo khutsya mu ntsu iye khukhwisaayilamo. 43Khulwekhuba bakana shiriifwa shabwe khukhwaama mu baandu, khufuurisa khukhwaama isi Wele.

44Lwanyuma Yezu walomela angaaki ari, “Umuundu n'afukiilila mus'iise, s'afukiilila ise senyene ta, ne aba afukiilila ni nooyo uwanduma. 45Uyo uwunondelela ise, abona uyo uwanduma. 46Ise nayiitsa mu shiibala nga buwaanga, nio buli mundu uwufukiilila ise alekhe khurama mu shilima ta. 47Ne isi umuundu yeesi uwulila bilomo byase, ne walekha khubitsiilakho ta, ise s'imukhalila kumusaango ta. Lwekhuba ise shineetsa khukhalila shiibala kumusaango ta, ne njeeba khushiwonesa. 48Umuundu yeesi uwuuntsikaana ise, walekha khufukiilila bilomo byase ta, ali n'umukhalila kumusaango. Shilomo shase shisheene sheesi naloma nisho shishiilimukhalila kumusaango khu shifukhu shishakamayo. 49Ise s'inganikha khulwe bunyala bwase ta, ne Paapa umweene uwandumana niye uwundakila byeesi naakha khuloma; n'isaambo iye khubilomamo. 50Ni nase namanya ndi kamakaambila keewe niko bulamu bubukhawawo ta. Byeesi Paapa andumana khukanikha, nibyo bibyeene byeesi inganikha.”

Currently Selected:

Yohana 12: LCE

Highlight

Copy