Buraambi 7

Inganikha ya Sitefano

1Umusaayi ufuura bukhulu kila areeba Sitefano ari, “Ibyo byeesi balomile bya ŋali?” 2#Rak 12.1Sitefano welamo ari: “Be buulebe ni ba paapa, ni mundekerese. Wele uwe shiriifwa abonekhela kuuka weefwe Ibulayimu, nga ali mu Mesopotamiya, nga ashiili khuutsya khumenya mu Harani ta. 3Wele wamulomela ari, ‘Rura mu shikuuka shoowo, ni mu linaambo lyoowo, utsye mu shiibala sheesi kane ikhwokese.’

4 # Rak 11.31 Rak 12.4 “Aryo Ibulayimu warura mu shiibala she babaandu ba Kalediyani, watsya wamenya mu Harani. Ne lwanyuma paapawe nga n'amala khuufwa, Wele wamumusa khukhwaamayo wamureera khwiloba lino lyeesi inywe mumenyakho aluno ari lino. 5#Rak 12.7; 13.15; 15.18; 17.8Ne Wele s'amulomela niye ari aliyila liiloba ilyo ta, abe ikhaba shikyele shitweela shonyene ta, akhali ndi amulomela busa khulimuwa niye ni lisaaye lyeewe, akhaba nga saaba n'umwaana ta. 6#Rak 15.13,14Ne Wele waloma ari, ‘Lisaaye lyoowo liliba liliitswa mu shiibala she babaandu babaandi, babaalibawambilila mu bukulwa nga bababirisa buubi, khumala kimiiko bitoondo bine. 7#Luky 3.12Ne ise indikhalila kumusaango linaambo ilyo lyeesi baliraambila mu bukulwa. Ne ndi lwanyuma balirurayo beetse bantsisaayile mu shifwo shino.’ 8#Rak 17.10-14 Rak 21.2-4 Rak 25.26 Rak 29.31—35.18Kila Wele akhola ni Ibulayimu indakaano ye khukhwinjila imbalu. Aryo Ibulayimu wasaala Isaaka, yeesi akheba khu shifukhu she shinaane. Isaaka naye wasaala Yakobo, ni Yakobo naye wasaala bakuuka bakhulu liikhumi na babili.

9 # Rak 37.11 Rak 37.28 Rak 39.2,21 “Khulwe libuba, bakuuka bano bawamba Yozefu bamukulisa mu Misiri, ne Wele aba ni naye. 10#Rak 41.39-41Wamuwonesa khukhwaama mu mitaambo kyoosi kyeesi abiramo. Aryo wamuwa bubwiyikino ni kamakhula mu moni tsa Farawo, umuyiinga we Misiri. Aryo Farawo wamwikyelisa gafana uwe Misiri, ni khuuba umubiikhi we bibiindu bye ntsu yeewe yoosi.

11 # Rak 42.1,2 “Lwanyuma akwawo intsala mu Misiri ni mu Kanani mwoosi, yareera kumutaambo kumukali, ni bakuuka beefwe balekha khuuba ni she khuulya ta. 12Ne Yakobo n'awulila ari mu Misiri iliyo biilyo, warumanayo bakuuka beefwe kumulundi kukwanyoowa. 13#Rak 45.1 Rak 45.16Ne ni belayo kumulundi kukukhola khabili, Yozefu webuula isi babandaaye, ni Farawo naye wamanya beenda ya Yozefu. 14#Rak 45.9,10,17,18 Rak 46.27Kila Yozefu arumanisa ari batsye bamulaangile paapawe Yakobo khukhwiitsa, ni balebe beewe boosi, nga atweela bali babaandu kamakhumi musaafu na baraano. 15#Rak 46.1-7 Rak 49.33Yakobo wenyukha weekha khumenya i Misiri. Aryo niye ni bakuuka beefwe ni baafwa, 16#Rak 23.3-16; 33.19; 50.7-13; Yos 24.32babasuta babesayo i Sekemu, babasiikha mu ŋani yeesi Ibulayimu akula khukhwaama khu basooleli ba Hamoli mu Sekemu, nga abawa tsinusu.

17 # Luky 1.7,8 “Ne imbuka ni yaba ambi khukhwoola khu sheesi Wele asuubisa Ibulayimu, babaandu bano babalaaha, lundi betsula mu Misiri, 18khukhwolisa umuyiinga ukuundi ukhamanya Yozefu ta, n'etsa mu buwuli mu Misiri. 19#Luky 1.10,11 Luky 1.22Umuyiinga uyu wabirisa babaandu beefwe buubi naabi, shino shahanyiinya bakuuka beefwe khumwaata ni babaana baabwe baŋaalye bari bakhaba balamu ta.

20 # Luky 2.2 “Mu mbuka nyeneyo, Musa wasaalikha, nga abonekha bulayi naabi mu moni tsa Wele. Aryo wabiikhibwa mungo mwa paapawe khumala kimyeesi kitaru. 21#Luky 2.3-10Ne n'atuumibwa, umukhaana wa Farawo wamwangala, wamulela, wamutsowesa wafwaana nga umwaana weewe. 22Musa bamuleekela mu makhula koosi ke ba Misiri, nalundi waba umuundu uwe angaaki mu bilomo ni mu buraambi bweewe.

23 # Luky 2.11-15 “Ne Musa aryo n'olesa kimiiko kye bukhulu kamakhumi kane, wafuna shishambaaso mu mwoyo kweewe she khukyeniyilakho babandaayeewe, babaana ba Isiraeli. 24Musa n'abona mutweela khu ba Isiraeli abirisibwa buubi, wayeeta uyo isi baaba babirisa buubi, welihaasa nga akhupa umu Misiri, wamwiira. 25Shino Musa ashikhola nga ambaasa ari babandaayeewe bamanyile bari Wele alikho abawa nibo buwonesi khubirira mu niye, ne khana yaba si bashimanyile ta. 26Khu shifukhu shishelakho, Musa wanyoola ba Isiraeli babeene nga balikho basoolana, wakhakakho khurerawo lukoosi nga aloma ari, ‘Inywe mumubeele babandaayeenywe, mumuli be munda ndweela, shiina kila mubirisana buubi muryo?’ 27Ne uyo uwaba nga alikho abirisa buubi uwashe, wasiindikha Musa andulo nga aloma ari, ‘Naanu ukhureerewo iwe khuuba nga umuwuli lundi umukayi akari efwe? 28Ukana khukhuntsira ise nga ni weerire umu Misiri ingoloobe?’ 29#Luky 18.3,4Musa naawula shino, welukha watsya, wekyela nga umukyendaani busa mu shiibala sha Midiyani. Nibweeneyo, niyo yeesi asaalila babaana beewe basiinde babili.

30 # Luky 3.1-10 “Ne lwanyuma nga abirirewo kimiiko kamakhumi kane, Musa nga ali mu mubiimbi khu lukiingi Sinaayi, malayika wamubonekhela mu shitsakha she kamawa nga shaaburukha. 31Ne Musa n'abona shino, washiyaanga naabi, wesyeenda ambi khushofwaasa, ne likono ly'Omukasya lyeetsa nga liloma liri, 32‘Ise niye Wele we bakuuka boowo, Wele wa Ibulayimu, nalundi uwa Isaaka, nalundi uwa Yakobo.’ Khulweesho, Musa warya naabi, walekha khulolayo ta.

33“Lwanyuma Umukasya wamuloma ari, ‘Yifuula bilaalo khukhwaama mu bikyele byoowo, lwekhuba shiifwo sheesi wemilemo shili shiifwo shikhosefu. 34Ise naboone kumutaambo kwe babaandu baase babaali mu Misiri, nalundi nawulile khukhwilootsa khwawe, ari nekhile asi khubawonesa. Nashiryo, ari yiitsa, ngana khukhurumana i Misiri.’

35 # Luky 2.14 “Musa uwatsana yuno isi ba Isiraeli baloba, nga baloma bari, ‘Naanu ukhureerewo nga umuwuli nalundi umukayi?’ Wele amurumana nga umukayi lundi umuwonesi, nga abirira mu malayika isi abona mu shitsakha she kamawa nga shaburukha kumulilo. 36#Luky 7.3 Luky 14.21 Bala 14.33Musa yuno warusa ba Isiraeli i Misiri, lwanyuma lwe khukhola bye kamakaanga ni bibiyaangisa mu Misiri, ni khu Nyaantsa Imbesemu, ni mu mubiimbi, khumala kimiiko kamakhumi kane.

37 # Maka 18.15,18 “Oyuno niye Musa tsana uwalomela ba Isiraeli ari, ‘Wele alirobola umuŋoosi khukhwaama mu bandaayeenywe, nga n'andobora ise.’ 38#Luky 19.1—20.17; Maka 5.1-33Oyuno niye uwaba mu lubuusano lulwaba mu mubiimbi ni malayika uwakanikha is'ali khu lukiingi Sinaayi, nalundi atweela ni bakuuka beefwe. Niye uwawambisibwa bilomo bye bulamu khukhuwa ifwe.

39“Ne bakuuka beefwe balekha khumurekeeresa niye ta, bamwiisa andulo, kimyoyo kyaabwe kyaaba nga kikana khukhwilayo i Misiri, 40#Luky 32.1nga baloma Aroni bari, ‘N'ukhubuumbileyo ba wele bakhuraangilile ifwe, lwekhuba Musa uyu uwakhurusa ifwe mu liloba lye i Misiri, sikhumanya oba wakholile aryeena ta.’ 41#Luky 32.2-6Ni mu mbuka nyeneyo, babuumbayo imoosi, bawanayo isaayilo nga besaaya shibuumbe shaawe, nalundi bekhoya bari bakholile kumulimo kumulayi. 42#Amos 5.25-27Ne Wele walekha khubenaanayo ta, wabawa liye lye mwikulu ari balisaaye. Nga ni sharonebwa mu burone bwe baŋoosi shiri,

‘Inywe babaandu ba Isiraeli, simwawanayo isi ise tsisaayilo ni biwaanwa byeenywe,

mu miiko kamakhumi kane kyeesi mwamala mu mubiimbi ta.

43Akhali ndi mwasuta iweema ya wele Moloki khu mabeka keenywe,

ni inieniesi nga niyo shifwani sha wele Refani,

nga ibyo nibyo bifwaani byeesi mwabuumba khukhwisaaya.

Nashiryo kane imbayile mu bubowe mu shifwo she aleeyi khuminyisa Babuloni.’

44 # Luky 25.9,40 “Bakuuka beefwe baaba ni weema iye bujulisi mu mubiimbi, musaambo isi uyo uwalomela Musa n'amuloomba khukikhola, khulondekhana ni saambo yeesi abe akibonamo. 45#Yos 3.14-17Bakuuka beefwe nabo basuta iweema iyo nga bali ni Yoshwa, nga bamalile khusoolanisa nalundi khufuura kamanaambo keesi Wele atimisa karura mu shifwo isho nga bakuuka beefwe ni beetsa. Bakuuka beefwe baraambisa iweema yino khukhwolesa khu mbuka ya Daudi uwaba nga ali umuyiinga. 46#2 Sam 7.1-16; 1 Kim 17.1-14Daudi niye asiimibwa mu moni tsa Wele aryo waloomba khukhwombakhela Wele e khumenya. 47#1 Bay 6.1-38; 2 Kim 3.1-17Ne Solomoni niye uwamwombakhila Wele intsu.

48“Ne bona Wele Uli Angaaki Lukali s'amenya mu ntsu tsitsombekhewa ni kamakhono ke babaandu ta. Nga umuŋoosi n'aloma ari,

49 # Isay 66.1,2 ‘Likulu nilyo shitsoloŋo she buyiinga bwase, ni shiibala nisho sheesi ise inaambisakho bikyele byase.’

Kila Umukasya areeba ari,

‘Intsu shiina isi kane inywe muntsombakhile ise,

namwe shifwo shiina sheesi ise inawolelamo?

50Shikuli kumukhono kwase nikwo kukwakhola bibiindu bino byoosi ta?’

51 # Isay 63.10 “Inywe nga muli babaandu be kimirwe kimiboofu, beesi bakhakheba mu myoyo ni mu maru ta, inywe babakhaandisa Umwoyo Umukhosefu busheele. Nga bakuuka beenywe ni bakhola ni nanywe mukhola muryo. 52Muŋoosi shiina isi bakuuka beenywe bakhakubyeenga ta? Nalundi beeratsaka ibo babakukuula khukhwiitsa khw'Omukhosefu nga bushiili, uyo yeesi inywe mwalyamo luwomelo mwamwiira. 53Inywe beesi malayika baawa kamakaambila, ne shitweela busa mwaloba khukalondelela ta.”

Sitefano bamukhupa kamabaale

54Ne ni bawulila bilomo bya Sitefano bino, bakhalala naabi, beelya kiminwa khu lweewe. 55Ne Sitefano nga wetsusibwile n'Umwoyo Umukhosefu, walolelela mu ngaaki mwikulu, wabona shiriifwa sha Wele, ni Yezu nga wemikhile khu mukhono kumulayi kwa Wele. 56Sitefano kila aloma ari, “Bona, naboone likulu nga lyabikuliwile, n'Umwaana w'Omuundu wemikhile khu mukhono kumulayi kwa Wele.”

57Ne nibo bayokesela angaaki ni kamakono kamakali, bekala kamaru kaawe, boosi batima bamuweelakho kumulundi mutweela. 58Lwanyuma bamusiindikhilisa, bamurusa ibulafu we shiriimba, bamukhupa kamabaale. Bajulisi baara tsingubo tsaawe asi e bikyele by'omusoleeli mutweela, ulaangibwa bari Saulo.

59Ne ni baaba nga bamukhupa kamabaale, Sitefano mweene waloomba ari, “Umukasya Yezu, yakaanila kumwoyo kwase.” 60Wafukhamila asi welootsa ni likono lye angaaki ari, “Umukasya, ukhabakhalila kumusaango khulwe shishonako shino ta.” Ne n'amala khuloma aryo, wafwa na khufwa.

Currently Selected:

Buraambi 7: LCE

Highlight

Copy