Buraambi 8

1Ni Saulo abawo, wafukiilisana ni nabo khukhwiiribwa khweewe.

Saulo akubyeenga bafukiilisi ba Kristu

Ni khu shifukhu sheenesho, abawo khukubyeengebwa khukali isi bafukiilisi ba Kristu mu Yerusalemu. Ibo boosi babaaba bafukiilisi basalanisibwila mu byaalo bye Yuda, ni mu Samariya, akhali baarume bonyene nibo babaarama. 2Babaandu babesaaya Wele basiikha Sitefano, lundi bamulilila lukali. 3#Bur 22.4,5; 26.9-11Ne Saulo wakhakakho khubona ari ahesa bafukiilisi ba Kristu, nga enjila mu buli intsu, nakhweesamo bafukiilisi, basaani ni bakhasi, wabara mu mapuusu.

Filipo aboolela Kamakhuuwa Kamalayi mu Samariya

4Ari bafukiilisi ibo babasalanisibwila osi osi baatsya nga baboolela shilomo sha Wele. 5Filipo watsya mu shiriimba shikhulu she mu Samariya, waboolelayo bibiwaamba khu Kristu. 6Kamatuuli ke babaandu ni kawulila Filipo, nalundi ni kabona bye kamakaanga byeesi akhola, bamurekeeresa ni kumwoyo mutweela. 7Bakali khu nibo bababamo kimisaambwa kimibi kyabaruramo, nga kililila angaaki, ni babaandi babakataala, ni baleme, bawonesebwa. 8Aryo abawo kumwikhoyo mukali mu shiriimba isho.

Simoni umufumu

9Abawo umusaani mutweela lisiina lyeewe bari Simoni, uwaba nga akholatsaka bye bufumu mu shiriimba, nalundi nga wayiyangisa be linaambo lya Samariya boosi, nga aloma ari niye umuundu umukhulu naabi. 10Babaandu boosi khukhwaama khu we asi khukhwoola khu we angaaki baamurekeelesatsaka naabi, nga baloma bari, “Umusaani yuno niye kamaani ka Wele kakalaangibwa kamaani kamakhulu.” 11Bamurekeelesatsaka baryo lwekhuba mu mbuka ndeeyi abeeyangisatsaka lwe khukhola bye bufumu byeewe. 12Ne babaandu ni baamala khufukiilila kamakhuuwa kamalayi ke Buyiinga bwa Wele, ni lisiina lya Yezu Kristu byeesi Filipo ababoolela, boosi babatisibwa, basaani ni bakhasi beene. 13Ni Simoni mweene naye wafukiilila, nga wamalile khubatisibwa, wabetsaka atweela ni Filipo. Aryo nga wabonatsakile bye khubonelakho ni bye kamakaanga bikali bibyaba bikholebwa ni baarume, welaliila busa.

14Baryo baarume babaaba mu Yerusalemu nga bawuliile bari babaandu be Samariya bafukiiliile shilomo sha Wele, babarumanila Petero ni Yohana. 15Ne bano ni boolayo, babaloombela bari bafukiilisi bafune Umwoyo Umukhosefu, 16lwekhuba Umwoyo aba ashiili khubeekhakho na mutweela khu nibo ta, ne baaba babatisibwa busa mu lisiina ly'Omukasya Yezu. 17Lwanyuma Petero ni Yohana babarakho kamakhono kaawe, bafuna Umwoyo Umukhosefu. 18Ne Simoni tsana uwaba umufumu n'abona ari Umwoyo Umukhosefu abaweebwa lwe khureewakho kamakhono ke baarume, wabawa tsinusu, 19nga aloma ari, “Nase ni muumbe kamaani kano, nio nase buli mundu isi kane indatsakekho kamakhono kaase, afune Umwoyo Umukhosefu.”

20Ne Petero wamwiilamo ari, “Iwe wamweene ni tsinusu tsoowo ni muhele, lwekhuba wambaasa uri kane ukule shiwaanwa sha Wele nga uraambisa tsinusu! 21Iwe s'uli ni bufunisi namwe ni kumukabo mu bwakaanisi buno ta, lwekhuba kumwoyo kwoowo shikuli kumukwalaafu mu moni tsa Wele ta. 22Aso ni wibiiyise buubi bwoowo buno, uloombe Umukasya, nio manya nga shinyalikha akhwiyakhile shishambaaso shino shishiili mu mwoyo kwoowo. 23Lwekhuba ise imbona nga iwe uli ni libuba libiririfu, lundi uli umubowe we bubwonaki.”

24Aryo Simoni tsana naye welamo ari, “Inywe ni munoombele isi Umukasya, nio bilomo bino byeesi mulomele bilekhe khukhukholekhakho na shitweela ta.”

25Baryo Simoni Petero ni Yohana ni baamala khumanyisa ni khuboolela shilomo sh'Omukasya, bakobolayo i Yerusalemu, nga baboolela Kamakhuuwa Kamalayi mu byaalo bikali bye mu Samariya.

Filipo n'umu Esiyopiya

26Malayika w'Omukasya waloma Filipo ari, “Yinyukha utsye wikhilile imwaalo we shiibala khukhwoola khu ntsila iyikhilila khukhwaama i Yerusalemu, khuutsya i Gaza, intsila iye kumubiimbi.” 27Aryo Filipo wenyukha, watsya. Ne n'aba nga atsya, wakanana umusaani umu Esiyopiya umwomole. Aba umuundu umukhulu, nga niye umukhulu we libikhilo lye tsinusu mu buyiinga bwa Kandake, umuyiinga umukhasi uwe Esiyopiya. Umusaani yuno aba wetsile i Yerusalemu khukhwisaaya. 28Ne n'aba nga akobolayo ingo, nga wikhaale mu likaali lyeewe lyeesi tsifalaasi tsikhweesa, aba asoma mu shitabo sh'omuŋoosi Yisaaya. 29Umwoyo waloma Filipo ari, “N'utsye isi likaali ilyo, ube ambi ni nalyo.” 30Filipo watima, watsya ambi ni likaali, wawulila umusaani nga asoma mu shitabo sha Yisaaya umuŋoosi. Filipo wamureeba ari, “Byeesi usoma uli khubitekeela?” 31Umwomole watsana wamwiilamo ari, “Inyala indyeena khubitekeela khurusakho nga iliwo umuundu uli khukhusontsoola?” Aryo walaanga Filipo ari aniine ekhale ni naye mu likaali.

32 # Isay 53.7,8 Shisiintsa sheesi umwomole aba ali khusoma khukhwaama mu byaronebwa bikhosefu nisho shino,

“Aayiliwa nga lisheese ni liyilibwa khukhwiiribwa,

nga khasheese ni khakhaniaaka ta nga bakhabekakho bubwooya,

naye aryo s'aloma ilomo yoosi ta.

33Bamubirisa buubi, balekha khumwokyesanisa bwa ŋali ta.

Naanu unyala wasontsoola bibiwaamba khu shikuuka sheewe?

Lwekhuba bulamu bweewe bwarusibwa khu shiibala.”

34Kila umwomole areeba Filipo ari, “Nakhwikontseleele imboolele, naanu isi umuŋoosi alomakho bilomo bino? Elomakho umweene namwe aloma khu mundu ukuundi busa?” 35Kila Filipo warakikhila khu byaronebwa bikhosefu byeene bino, wamuboolela kamakhuuwa kamalayi kakawamba khu Yezu. 36Ne ni baaba nga bali khu ntsila batsya, boola mu shiifwo shishiilimo kameetsi, umwomole waloma ari, “Bona kameetsi, shiina ndi shishindobesa khubatisibwa?” 37Filipo wamuloma ari, “Noola ufukiilila ni kumwoyo kwoowo kwoosi, unyala wabatisibwa.” Naye umwomole wamwiilamo ari, “Ifukiilila ndi Yezu Kristu niye Umwaana uwa Wele.”

38Aryo umwomole walakila likaali khukhwiimikha. Niye ni Filipo boombi beekha mu meetsi, Filipo wamubatisa. 39Ne ni baama mu meetsi, Umwoyo w'Omukasya khaangukho wayila Filipo. Umwomole walekha khumubonakho lundi ta, ne weloosela ni lukyeendo lweewe nga ekhoya. 40Ne Filipo lwanyuma wabonekhela mu Azoto, wabira mu biriimba byoosi nga aboolela kamakhuuwa kamalayi khukhwolesa n'ola i Kayisaliya.

Currently Selected:

Buraambi 8: LCE

Highlight

Copy