Buraambi 9

Khushuusibwa khwa Saulo

(Bur 22.6-16; 26.12-18)

1Ne Saulo aba nga ashiloosela khukhwambaasa bye khuriisariisa ni khukhwiira baleekelwa b'Omukasya Watsya isi umusaayi ufuura bukhulu, 2ari amuwe burone bwe khuyila mu ntsu tsye khukhwisaayilamo i Damasiko, nio bari nga wanyooleleyo babaandu be Ntsila, basaani namwe bakhasi anyale khubawaamba abareere i Yerusalemu nga babowe.

3Aryo n'aba nga atsya, nga ali ambi khukhwoola i Damasiko, khaangukho buwanga bwarura mwikulu bwamumulikha tsimbeka tsoosi. 4Waakwa asi wawulila likono nga limuloma liri, “Saulo! Saulo, lwashiina iwe ungubyeenga ise?”

5Kila Saulo wamureeba ari, “Iwe naanu, Umukasya?”

Likono lyamwiilamo liri, “Ise Yezu isi iwe ukubyeenga. 6Ne ari ni winyukhe utsye mu shiriimba, isi kane bakhuboolele bibikhwakhila iwe khukhola nga ni bili.”

7Ne basaani babaaba bakyeenda ni Saulo beema, nga beyaanga busa. Lwekhuba baawulila likono, n'enga si babonakho umuundu yeesi ta. 8Aryo Saulo wenyukha asi, wakhakakho khumoka tsimoni tseewe, ne walekha khunyala khubonakho shishiindu shoosi ta. Baryo bamuwamba kumukhono bamureera i Damasiko. 9Wamala bifukhu bitaru nga s'abona nalundi nga s'alya namwe nga s'anywakho shishiindu shoosi ta.

10Ne mu Damasiko mwabamo umuleekelwa mutweela ulaangiwa Ananiya. Umukasya wamulaanga mu khubonekhelwa, wamuloma ari, “Ananiya.”

Naye Ananiya wamwiilamo ari, “Ise niy'oyu, Umukasya.”

11Umukasya wamuloma ari, “Yinyukha utsye khu mukhoosi kwe shiriimba kukulaangibwa Kumukolole, mu ntsu ya Yuda, ureebe bakhwokyese umuundu ulaangibwa Saulo uwe Taruso. Ari uli khuloomba. 12Mu khubonekhelwa khweewe waboone umuundu ulaangibwa Ananiya nga enjila is'ali, amurekho kamakhono keewe, nio anyale khubona lundi.”

13Ananiya welamo ari, “Umukasya, babaandu bakali bayimboolela bibiindu bibiwaamba khu musaani yuno, ni bukosi bweesi akholatsakile khu bakhosefu boowo mu Yerusalemu. 14Ni na ano wetsile ni bunyala khukhwaama isi basaayi bakhulu khuwamba ibo boosi babakhwisaaya iwe.”

15Ne Umukasya waloma Ananiya ari, “N'utsye, lwekhuba umusaani yuno ise samweene naamuroboole khuyila lisiina lyase isi Banaambo, n'isi bayiinga baawe, nalundi n'isi babaandu ba Isiraeli. 16Nase samweene indimwokesanisa bikali bibilimwakhila khutaambisibwa lwe lisiina lyase.”

17Ananiya aryo watsya, wenjila mu ntsu mweesi Saulo aba, wamurakho kamakhono, wamuloma ari, “Uwe buulebe Saulo, Umukasya Yezu umweene, uwakhubonekhela khu ntsila nga uli khukhwiitsa ino, wandumile ise bari nio ubimbukhe tsimoni ubone, lundi witsusiwe n'Umwoyo Umukhosefu.” 18#Tob 11.13-15Khaangukho bibiindu bibifwaana nga kamabaambu byaakwa khukhwaama khu moni tsa Saulo, wabona lundi. Aryo wenyukha wabatisibwa. 19Ne lwanyuma nga wamalile khuulyakho biilyo, wiilamo kamaani.

Saulo aboolela Kamakhuuwa Kamalayi mu Damasiko

Saulo wamala bifukhu bikalikho nga ali ni baleekelwa be mu Damasiko. 20Khaangukho watsya mu ntsu tsye khukhwisaayilamo nga aboola ari, “Yezu ali Umwaana uwa Wele.”

21Ne boosi babamuwulila nga aloma beyaanga busa nga baloma bari, “Oyu s'ali niye umusaani uwabiyila babaandu babesaaya Yezu mu Yerusalemu? Nalundi abe si shili isho nisho shishamureera ino khubawaamba, abayile nga babowe isi basaayi bakhulu?”

22Ne Saulo niye welooselela ilala khuuba ni kamaani nga awandalasa Bayudaaya babamenyatsaka mu Damasiko ari, Yezu niye Kristu. 23#2 Kor 11.32,33Nga bifukhu bikalikho byabirirewo, Bayudaaya baboolanila bonyene bari bamwiire. 24Ne Saulo wamanya byeesi baateesa. Baryo baliindatsakila khu milyango kye shiriimba shiilo ni kumuusi bari manya bamuwambilise bamwiire. 25Ne shiilo shitweela, baleekelwa beewe bamuyila, bamurusila mu mwanya kwe khwitikiiyi, bamwikhisilamo nga bamureere mu muyayi.

Saulo nga ali mu Yerusalemu

26Ne Saulo nga wolele mu Yerusalemu, wakhakakho ari etubaase ni baleekelwa, ne nibo boosi bamurya, nga si bafukiilisa bari naye ali umuleekelwa ta. 27Ne Balunaba wamuyila, wamureera isi baarume. Aryo wabanoonosela ilala ari Saulo abona Umukasya khu mukhoosi kwe Damasiko, lundi ari Umukasya akanikha ni naye. Nalundi wabanoonosela nga Saulo n'aboolela Kamakhuuwa Kamalayi mu lisiina lya Yezu ni kamaani mu Damasiko, nga s'alikho ni khuurya ta. 28Aryo Saulo wakyeendatsakila atweela ni nabo mu Yerusalemu, nga akanikha khu lisiina ly'Omukasya ni liefu likali. 29Nalundi wakanikha ni kamaani kamakali, nga akhaandisana ni Bayudaaya babakanikha Luyonaani, ne nibo bakhakakho khumwiira. 30Ne be buulebe ni bashimanyakho baryo, bamwikhisa i Kayisaliya, bamurumana i Taruso.

31Ulwo babaandu babafukiilila mu Yezu babaaba mu Yuda mwoosi ni mu Galilaaya, ni mu Samariya, bafunakho mbuka iye lukoosi. Beloosela khuuba bakali, nga bakyeendela mu khwisamo Umukasya shiriifwa ni mu khwikhoyesebwa khw'Omwoyo Umukhosefu, bafukiilisi beloosela khuuba bakali.

Petero nga ali mu Lida ni Yopa

32Petero n'aba nga akyeendakyeenda buli andu, lutweela watsya wakyeniyilakho babaandu bakhosefu ba Wele abe babamenya mu Lida. 33Ibweeneyo wanyoolayo umusaani ulaangiwa bari Ayinasi uwakataala nga abe wamala khu bulili kimiiko shinaane. 34Petero wamuloma ari, “Ayinasi, Yezu Kristu akhuwonesa. Yinyukha wiyalile bulili bwoowo.” Lubaluba Ayinasi wenyukha. 35Babaandu boosi babamenya mu bifwo bibilaangibwa Lida ni Saloni ni bamubona, bashuukha bafukiilisa mu Mukasya.

36Ne mu Yopa mwabamo umuleekelwa umukhasi lisiina lyeewe bari Tabisa, lilimanyisa liri Dorukasi, uwawanatsakayo imbuka yeewe khukhola bilayi ni khuyeeta bataambi. 37Mu bifukhu ibyo, bulwaale bwamuwamba wafwa. Ne ni baamala khusiinga kumulaambo kweewe, bakwalisa mu shiseenge she khungaaki. 38Ne lwekhuba Lida shaba ambi ni Yopa, baryo baleekelwa ni baawulila bari Petero ali mu Lida, bamurumanila babaandu babili baatsya khumwikontselela bari, “Yuubakho, wiitse isi khuli.” 39Petero wenyukha watsya ni nabo. Ne nga woleleyo, bamuyila mu shiseenge tsana she khungaaki. Banamulekhwa boosi bemikha bamwibotokhelela nga balila, nga bamwokesa tsingubo ni bikwaaro bibindi byeesi Dorukasi aruungatsaka nga ashiili mulamu ni nabo.

40Petero wabarusa boosi ibulafu, wafukhama asi, waloomba, lwanyuma washuukha walomela kumulaambo ari, “Tabisa yinyukha.” Aryo Tabisa wenyusa tsimoni wamoka, ne n'abona Petero wenyukha wekhala. 41Petero wayila kumukhono kweewe, wamwinyusa weema. Lwanyuma Petero walaanga babaandu bakhosefu ba Wele, ni banamulekhwa, wabamwakaanisa nga umulamu. 42Shino shamanyikhana mu Yopa mwoosi, ni babaandu bakali bafukiilila mu Mukasya. 43Aryo Petero wamenyayo bifukhu bikali mu Yopa, mu ntsu ya Simoni abe uwala kamahaafu.

Currently Selected:

Buraambi 9: LCE

Highlight

Copy