Buraambi 6
6
Khurobola Badikoni Musaafu
1Mu bifukhu ibyo, bukali bwe baleekelwa ni bweloosela, Bayudaaya babakanikha Luyonaani beŋuluŋuunya isi ba Heburaniya. Lwekhuba banamulekhwa be mwituuli lye Bayonaani babebililatsaka mu khukaba biilyo khwa busheele. 2Baryo kila baarume liikhumi na babili balaanga lituuli lyoosi lye baleekelwa atweela, babaloma bari, “Sishili shilayi ifwe khulekha khuboolela shilomo sha Wele khweela mubye khukhwakaanisa bye khulya ta. 3Nashiryo be buulebe, ni mwirobolemo babaandu musaafu babaali balayi, babetsuule Umwoyo Umukhosefu ni kamakhula, beesi kane khure khu mulimo kuno. 4Ne ifwe kane khurabilatsake mu khuloomba, ni mu khuboolela shilomo sha Wele.”
5Shishambaaso isho shasiimibwa ni lituuli lyoosi. Baryo barobola Sitefano, umusaani uwetsula khufukiilila n'Umwoyo Umukhosefu. Barobola ni Filipo, Purukolo, Nikanoli, Timoni, Pamena, ni Nikolawo uwama i Antiyoki, uwashuukha winjila mu Shiyudaaya. 6Bareera babaandu bano babara mu moni tse baarume, babaloombela, babarakho kamakhono kaawe.
7Shiryo shilomo sha Wele sheloosela, ni bukali bwe baleekelwa mu Yerusalemu bweloosela lukali naabi, ni basaayi bakali busa balondelela khufukiilila khuno.
Khuwambibwa khwa Sitefano
8Aryo Sitefano, umusaani uwetsusibwa ni bubweela bwa Wele ni kamaani, wakholatsaka bye khukhwiyaangisa bikali, ni bubonelo bukali mu baandu. 9Ne abawo lituuli lye babaandu babaandi bentsu iye khukhwisaayilamo lilaangibwa bari Balekhuule (nga ni balaangiwatsaka). Mubweenemwo mwabamo Bayudaaya babaaba be Kurene, nibe Alekizandereya, ni babaandi babaama mu bisiintsa bye Kilikiya, ni Asiya. Bano boosi benyukha bakhaandisana ni Sitefano. 10Ne nga si banyala khukhaandisa khufuura Sitefano ta, lwe kamakyesi n'Umwoyo uwamulomesatsaka aryo.
11Baryo mushimoonyo busa, basuluusa babaandu babaandi khuloma bari, “Khwawuliile Sitefano nga akanikha bilomo bibifwotsola Musa ni Wele.”
12Baryo musaambo iyo basokosana babaandu ni basakhulu, ni baleekeli be kamakaambila ka Musa, beetsa bawamba Sitefano, bamuyila mu lukhobo lukhulu lwe Bayudaaya. 13Bareera bajulisi tsana be bubeeyi babaloma bari, “Umusaaniyu busheele afwotsola shiifwo shino shikhosefu, ni kamakaambila ka Musa. 14Lwekhuba khwamuwuliile niye nga aloma ari, ‘Yezu uyu uwe Nazareti, alifuniaka Lisaayilo Likhulu lino, lundi ashuuse bye tsisaambo tseefwe byeesi khwaweebwa ni Musa.’ ”
15Ibo boosi babaaba bekhaale mu lukhobo lukhulu, bawunguusa tsimoni tsaawe khu Sitefano, babona nga mu moni mweewe mufwana nga mwa malayika.
Currently Selected:
Buraambi 6: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
