Buraambi 5

Ananiya ni Safira

1Ne abawo umusaani mutweela, lisiina lyeewe Ananiya, n'umukhasi weewe Safira, bakulisa liiswa lyaawe. 2Wabukulakho tsinusu tsindala watsibiikha, n'umukhasi weewe nga washimanyilekho, ne tsitsiramile watsiyila isi baarume. 3Petero wamuloma ari, “Ananiya, shiina kila Sitaani akhwitsuulemo mu mwoyo kwoowo woola ni khuwoombesa Umwoyo Umukhosefu nga uramisakho shisiintsa she tsinusu tsitsamile mu liiswa? 4Abe nga liiswa ni lishiili khukulisibwa ta, shilyaba nga lilyoowo? Abe akhaba nga ni lyakulisibwile, sishabeele khuusi iwe khukhola sheesi abe ukana? Ne lwashiina kila wambaasile shishiindu nga shino mu mwoyo kwoowo? Iwe siwawoombesele babaandu ta, ne wawoombesele Wele.” 5#Sus 1.55Aryo Ananiya nga n'awulila bilomo bino, welima asi kumubwi, wasumbukha. Ni khuurya khukali khwawamba ibo boosi babashiwulilakho. 6Basooleli benyukha bamubowa mu ngubo, bamurusa ibulafu baatsya bamusiikha.

7Lwanyuma lwe khubirawo tsisaawa nga tsitaru, umukhasi weewe naye woola, n'enga siwamanyile bibibelewo ta. 8Kila Petero wamureeba naye ari, “Imboolele khubone, tsinusu tsino tsonyene nitso tsitsamile mukhukulisa liiswa?”

Umukhasi uyo naye welamo ari, “Ee, ni tsinyene itso.”

9Ne Petero wamuloma ari, “Shiina kila iwe n'umuseetsa woowo mufukiilisaane khukhakilisa Umwoyo w'Omukasya? Khekhuboolele, bikyele byaabo babaama khusiikha umuseetsa woowo byoolile amulyaango, ni nawe banakhusuta bakhuruse.” 10Khaangukho, naye welima asi kumubwi mu bikyele bya Petero, wasumbukha. Basooleli baatsya khwinjila mu ntsu banyoola nga wasumbukhile khaale, bamusuta bamurusa ibulafu, baatsya bamusiikha andulo isi umuseetsa weewe. 11Khuurya khukali khwakwawo mu bafukiilisi mu Kristu boosi, ni khuusi ibo boosi babaawulila bibiindu bino.

Bye kamakaanga ni bibiyaangisa bikali

12Ari bibiyaangisa ni bye kamakaanga bikali, byakholebwatsaka mu baandu, nga bibirira mu makhono ke baarume. Abe bafukiilisi boosi babusaanile mwitikiiyi lililaangibwa lya Solomoni. 13Khu baandu babaramile, mbaawo na mutweela uwe sungula khubetubaasakho ta. Ne babaandu boosi bakanikhatsaka khu baarume bibiindu bilayi byonyene. 14Wanamundu we bafukiilisi nga mulimo basaani ni bakhasi, beloosela khukhwitubaasatsaka khu Mukasya, khuminyisakho tsifuunda tsindaayi. 15Bano boosi boola ni khusuta batsiina baawe khubara khu ntsila, nga babaalisa khu bulili ni khu masisinwe, bari nio uri Petero abira, shishiniini sheewe sholekho khu balala. 16Kamatuuli ke babaandu kabusana khukhwaama mu biriimba bibibotokhelele Yerusalemu, nga bareera batsiina ni naabo abe babataambisibwa ni kimisaambwa kimibi. Abo boosi bawonesebwa.

Baarume bakubyeengebwa

17Lwanyuma Umusaayi ufuura bukhulu wenyukha, nga ali atweela ni be mwituuli lye Basadukaayo boosi, nga betsuule likoko, 18baryo bawamba baarume babekalila mwipuusu lye babaandu babusheele. 19Ne mu shilo malayika w'Omukasya wabekulilawo lulwiitsi lwe lipuusu wabarusa antsye, kila abaloma ari, 20“Ni mutsye mwimikhe mu Lisaayilo Likhulu, muboolele babaandu bilomo byoosi bye bulamu buno.” 21Baarume ni bawulila shino, baatsya benjila mu Lisaayilo Likhulu kumutikhinyi, barakikha khuleekela.

Ne Umusaayi ufuura bukhulu n'ola, atweela ni naabo babaaba ni naye, wekhasa lukhobo nga lulimo baraangilisi ba Isiraeli boosi. Kila barumanisa mwipuusu bari babareerere babowe tsana. 22Ne basilikhale babaatsya ni boolayo, balekha khunyoola babowe tsana nga bali mwipuusu ta. Kila belayo baboolela bakhulu bari, 23“Khunyoolele nga lipuusu likhomekhe bulayi bubweene, ni babaaliinda nga beemile khu mulyaango, ne ni khulomile khuri khwikulawo, khwalekha khunyoola umuundu yeesi mukari ta.”

24Aryo umusilikhale umukhulu uwe Lisaayilo Likhulu ni basaayi bakhulu ni bawulila bilomo bino, byabeyangisa naabi, nga bekanakana byeesi bibiindu bino sheesi bimanyisa. 25Abweenewo, umuundu mutweela weetsa wababoolela ari, “Bona babaandu beesi mwareere mwipuusu anaari bali mu Lisaayilo Likhulu balikho baleekela babaandu.” 26Khaangukho umusilikhale umukhulu we Lisaayilo Likhulu, ni basilikhale beewe baatsya babareera, nga si baraambisa kamaani ta, lwekhuba abe bariire bari babaandu banyala khubakhupa kamabaale.

27Ne ni baamala khubareera, babemisa akari mu lukhobo. Umusaayi ufuura bukhulu wabareeba, 28#Mat 27.25nga aloma ari, “Ifwe khwabakhonyakilile khulekha khuleekela mu Lisiina lino ta. Ne bona inywe mwetsusile Yerusalemu ni khuleekela khweenywe, nalundi mukana khukhubowa khuusi ifwe khuufwa khw'omusaani yuno.”

29Kila Petero ni baarume belamo bari, “Khwandyakhiile khuwulila Wele, ne shiili babaandu ta. 30Wele uwe bakuuka beefwe uwalamusa Yezu khukhwaama mu bafu, isi inywe mweera nga mumutsaangilila khu musalaba kwe kusaala. 31Wele wamuniinisa khuuba khu mukhono kweewe kumulayi nga umuraangilisi nalundi Umuwonesi, ari nio babaandu be mu Isiraeli bafune khukhwibiiyisa ni khukhwiyakhilwa bibyonako byaabwe. 32Ni nafwe khuli bajulisi be bibiindu bino, ne shiili ifwe fwenyene ta, ne n'Umwoyo Umukhosefu isi Wele amalile khuuwa ibo babamuwulila niye.”

33Ne be mu lukhobo ni bawulila bino, byabatsiina naabi bakana beere baarume. 34Ne Umufarisaayo mutweela, uwaba abe mutweela khube mu lukhobo lweene, uwalaangiwa Gamalieli, naye uwaba umuleekeli we kamakaambila ka Musa, nalundi abe isi babaandu besamo naabi shiriifwa, weema khu ngaaki, walakila ari baarume barusiwe ibulafu khakyeekhe. 35Kila Gamalieli tsana alomela be mu lukhobo ari, “Inywe babaandu ba Isiraeli, muli ni khukhwitsililisa naabi isaambo yeesi mubirisamo babaandu bano. 36Lwekhuba mu mbuka ibirire ifwiiti iri, Tewudasi enyukha asi, weyila nga niye umuundu we angaaki naabi. Ni babaandu baboola nga bitoondo bine bamwitubaasakho. Ne ni eribwa, ibo boosi abe babamuloondelela, basalanisibwa, byaweela awo biryo. 37Lwanyuma lwooyo abawo Yuda uwama i Galilaaya, naye uwenyukha asi mu bifukhu bye khuubala babaandu naye wabakho ni babaandu babamuloondelela. Naye aryo wahela, ni naabo abe babamuloondelela boosi basalanila. 38Nashiryo, ni n'ebyo bibiliwo aluno ari ise imbaloma ndi, ni murure khu baandu bano mubalekhe babe. Lwekhuba noola inengekharengekha yino, namwe kimilimo kyaawe kino kili kye babaandu busa, kane kikhasikhane. 39#2 Mak 7.19Ne noola byeesi bakhola bya Wele, singene munyalise khubaakamisa ta. Lukana mwinyoola muri mulikho musoolanisa Wele.”

40Baryo bayila kamakyesi keewe keesi abawa. Balaanga baarume bakobola mukari, babakhupa tsiinga, nalundi babareewula khulekha khukanikha mu Lisiina lya Yezu lundi ta. Babalekhuula baatsya. 41Baarume barura mu lukhobo, nga bekhoya lwekhuba babona nga she lisuno khubirisibwa buubi khulwe Lisiina lya Yezu. 42Nabuli shifukhu Baarume baaba mu Lisaayilo Likhulu ni mungo tsaabwe nga beloosela khukhwilwatsa Kamakhuuwa Kamalayi kakawamba khu Yezu nga niye Kristu.

Currently Selected:

Buraambi 5: LCE

Highlight

Copy