Buraambi 14

Paulo ni Balunaba nga bali mu Ikoniyo

1Ni lwoola, Paulo ni Balunaba nga bali mu Ikoniyo, batsya mu ntsu iye khukhwisaayilamo iye Bayudaaya (nga ni bakholatsaka busheele). Bakanikha bulayi, shino shareerera lituuli likali lye Bayudaaya ni Bayonaani khufukiilila. 2Ne Bayudaaya bakhafukiilila ta, basuluusa Banaambo, bashuusa kimyoyo kyaawe, bakila babiyila bafukiilisi mu Kristu. 3Baryo Paulo ni Balunaba, bamenyayo bifukhu bikalikho, nga bakanikha ni kamaani khu Mukasya, akhali khuurya ta, nga bawayo bujulisi khu shilomo she bubweela bweewe. Nga naye Umukasya aryo nga aŋaŋasa burume bwaabwe, nga abanyalisisa khukhola bye khubonelakho, ni bye kamakaanga. 4Ne babaandu be mu shiriimba umwo bawukhanamo; balala baaba khu luwande lwe Bayudaaya, ne babaandi baaba khulwe Baarume. 5Lwanyuma abawo khukhwikuta akari e Banaambo ni Bayudaaya, bafukiilisanila atweela ni baraangilisi baabwe khukhola baarume buubi, ni khubakhupa kamabaale. 6Ne Baarume ni bashimanyakho, batitukha baatsya mu biriimba bya Likoniya bibilaangibwa Lisitura, ni Derube, ni shiibala shishiililanilewo. 7Ibweeneyo, beloosela khuboolela kamakhuuwa kamalayi.

Mu Lisitura ni Derube

8Ne mu Lisitura mwabamo umusaani uwakataala bikyele, nga umuleme khukhwaama nga n'asaalikha, nga s'akyeendatsakakho ta. 9Umusaani yuno wekhala asi warekeeresa Paulo byeesi aba akanikha. Paulo wamwomiisilakho tsimoni wamubona nga ali ni khufukiilila khukhunyala khumuwonesa. 10Wamuloma ni likono likali ari, “Yinyukha wiime bukwalaafu khu bikyele byoowo.” Umusaani wesuta, warakikha khukyenda. 11Ne lituuli lye babaandu ni baabona sheesi Paulo akholile, bayokesela angaaki mu lulimi lwe waawe Lulikoniyo bari, “Bawele bekyelile babaandu beetsile isi khuli!” 12Balaanga Balunaba bari, “Zeusi,” ni Paulo bamulaanga bari, “Herimesi,” lwekhuba niye uwafuura khukanikha. 13Ne umusaayi wa wele Zeusi, wele uwaba ni lisaayilo lyeewe abulafu we shiriimba, wareera tsiwuunwa ni bimuli amulyaango kwe shiriimba, lwekhuba niye atweela ni babaandu bakana khuwayo tsisaayilo isi baarume.

14Ne baarume Balunaba ni Paulo ni bawulila baryo, bonuulaka tsingubo tsaawe, batima baatsya isi lituuli lye babaandu, nga bayokesela angaaki bari, 15#Luky 20.11; Zab 146.6“Basaani'nywe, lwashiina mukhola bino? Nafwe khuli babaandu busa nga inywe, ne khubaboolela Kamakhuuwa Kamalayi khuri, mulekhe ibyo bikhalimo ta, mwiile isi Wele uwabuumba likulu ni shiibala, ni tsinyaantsa, ni bibiindu byoosi bibilimo. 16Mu mbuka iye khaale, Wele afukiilisa babaandu be kamanaambo koosi khukyenda mu ntsila tseesi bekanatsakila. 17Ne s'alekha khukhwiyokesana bujulisi bweewe ta, lwekhuba eyokesanatsaka mu bilayi byeewe byeesi akhola, nga abawa ifula khukhwaama mu ngaaki, ni biilyo mu biseela byabyo bibyeene. Abawa biilyo bibimala, lundi wetsusa kimyoyo kyeenywe ni kumwikhoyo.”

18Baarume bakhaba nga baloma bilomo bino, sibyanyala khukhingilila babaandu khubareerera tsisaayilo ta. 19Ne lwanyuma abawo Bayudaaya babeetsa khukhwaama i Antiyoki she mu Pisidiya ni Ikoniyo, bakhonjelesa babaandu khubiyila Paulo. Baryo bamukhupa kamabaale, bamukhuruura, bamurusa ibulafu we shiriimba, nga bambaasa bari wafwiile. 20Ne baleekelwa ni bamwibotokhelela, wenyukha asi, welayo mu shiriimba. Shifukhu shishelakho, waruramo ni Balunaba, baatsya i Derube.

Khukobolayo mu Antiyoki she mu Siriya

21Paulo ni Balunaba baboolela Kamakhuuwa kamalayi mu Derube, bakalusayo babaandu bakali khukhwikyela baleekelwa. Baryo bafuumba bakobolayo i Lisitura, Ikoniyo, ni Antiyoki; 22nga bawandalasa kimyoyo kye baleekelwa, nga bababoolela khukhwiloosela khuwandalalila mu khufukiilila. Babaleekela bari, “Ifwe shikhwakhila khubira mu bikosi bikali, nio khwinjile mu Buyiinga bwa Wele.” 23Paulo ni Balunaba babarobolela baraangilisi mu buli shifwo mumwaba bafukiilisi. Baryo mu khuloomba ni mu khubuya ntsala, babawayo mu mikhono ky'Omukasya isi bafukiililamo.

24Lwanyuma nga babirira mu Pisidiya, boola i Panfiliya. 25Ne ni baamala khuboolela shilomo sha Wele mu Peruga, beekha baatsya i Ataliya. 26Nga bali i Ataliya, bambukha lundi i Antiyoki, esi bawanibwilayo mu bweela bwa Wele, lwe buraambi bweesi baaba bamalile khukhola. 27Ne ni boola mu Antiyoki, babusanisa bafukiilisi atweela, bababoolela byoosi byeesi Wele aba wabaraambisile khukhola, nalundi ni saambo yeesi ekulawo kumulyaango kwe khufukiilila isi Banaambo. 28Baryo bamenyayo bifukhu bikalikho nga bali atweela ni baleekelwa.

Currently Selected:

Buraambi 14: LCE

Highlight

Copy