Buraambi 15

Lukhobo lulwaba i Yerusalemu

1 # Lev 12.3 Aabawo babaandu babaandi babeekha khukhwaama i Yuda, nga baleekela be buulebe bari, “Akhali khukhwinjila imbalu, khulondekhana ni saambo iya Musa nga n'ili, simunyala khuwonesebwa ta.” 2Shino shareera khukhaandisana akari abwe ni Paulo ni Balunaba imbuka ndeeyi. Nashiryo lwanyuma lwayo shakhalibwawo shiri Paulo ni Balunaba tsana ni babaandu babaandi khukhwaama i Antiyoki batsye i Yerusalemu isi baarume ni bakhulu khulwe lomo yino.

3Baryo bafukiilisi babarumana khuutsya nga babirira i Foyinisiya ni Samariya nga baboolela bibiwaamba khu khushuukha khwe Banaambo khukhwikyela babafukiilila mu Wele. 4Ne ni boola i Yerusalemu, bafukiilisi ni baarume ni bakhulu babaandi babakaanila. Baryo bababoolela ibyo byoosi byeesi Wele akhola khubirira mu nibo. 5Ne batweela khu bafukiilisi, babaaba batweela khu be mwituuli lye Bafarisaayo, benyukha baloma bari, “Shakhiile Banaambo benjile imbalu, nalundi bali ni khulondelela ibyo byoosi byeesi kamakaambila ka Musa kaloma.”

6Baarume ni bakhulu babaandi babusana atweela khubona nga ilomo yino n'ili. 7#Bur 10.1-43Lwanyuma lwe tsinganikha tsingali, Petero weema khu ngaaki waloma ari, “Be buulebe, inywe mwamanya nga khukhwaama khaale, Wele andobola ise khukhwaama mwiinywe ari imboolele Banaambo shilomo she kamakhuuwa kamalayi nio akile bafukiilile. 8#Bur 2.4; 10.44Ne Wele umanyile kimyoyo kye babaandu okesana bujulisi nga awa Banaambo Umwoyo Umukhosefu, musaambo ndweela nga n'akhuwa ifwe. 9Niye s'arawo lulwakha akari efwe ni nabo ta, ne njeeba khulwe khufukiilila khwaabwe, niye abasiingakho bibyonako khu myoyo kyaabwe. 10Ari shiina shisheene shishikila mwakhakilisa Wele nga mwityukhisa baleekelwa bano babashuukha shisutwa sheesi bakuuka beefwe namwe ifwe fwabeene khukhanyala khusuta ta. 11Lwekhuba ifwe khufukiilila khuri, nafwe nga nibo ni bali, khuliwonesebwa khubirira mu bweela bw'Omukasya Yezu.”

12Lituuli lye babaandu basila busa nga barekeeresa Paulo ni Balunaba nga babasontsoola bubonelo ni bye kamakaanga byeesi Wele akhola mu Banaambo khubirira mu nibo.

13Ne ni baamala khukanikha, Yakobo welamo ari, “Be buulebe ni mundekeerese. 14Simoni wasontsoolile isaambo yeesi Wele akyeniyilamo Banaambo, ari nio arobolemo ibo babeewe. 15Shino shiwambakana ni bilomo bye baŋoosi nga bibyaronebwa ni biloma biri,

16 # Amos 9.11,12 ‘Lwanyuma lwa bino indikobola,

khukhwombekha bushaakha

intsu ya Daudi iyakwa.

Indyombekha bibyaanyi bye intsu iyo,

injimise lundi.

17Nio akile babaandu babaramilewo boosi

baweentse Umukasya,

ni Banaambo boosi babalaangibwa

lisiina lyase,

18babasubizibwa kimiboolo kye khaalekho.’

19“Nashiryo, ise khukhalawo khwase khuli ndi, khukhashikhola shaaba shihangafu isi Banaambo babekyelile bafukiilisi mu Wele ta. 20#Luky 34.15-17 Lev 18.6-23 Lev 17.10-16Ne akhali ndi kane khubaronele khuri bakhehambatsakila mu biindu bye mbikho nga khukhwisaaya bibuumbe ta, namwe mu bye buyeyani ta, namwe balekhe khulya inyama iye shishaayo shishikokibwile busa ta, ni khulekha khulya kamalasile ta. 21Lwekhuba khukhwaama mu miboolo kimikhale, iliwo babaleekela kamakaambila ka Musa mu buli shiriimba. Nalundi kamakaambila kano kasomebwa mu ntsu tsye khukhwisaayilamo khu buli shifukhu sha Sabato.”

Lukhobo luronela Banaambo babafukiilila

22Lwanyuma baarume ni bakhulu, atweela ni babafukiilila boosi bashibona nga shili shilayi khurobola babaandu khukhwaama mu beene, babarumane khuutsya i Antiyoki, atweela ni Paulo, ni Balunaba. Baryo barobola Yuda uwalaangiwa Balusaba, ni Silasi, babaaba babaandu bakhulu mu lituuli lye be buulebe. 23Babaronela burume bubuloma buri: “Ifwe baarume ni bakhulu, babandaayeenywe, khubaronela inywe balebe babaali Banaambo, be mu Antiyoki, ni Siriya, ni Kilikiya. Khwabasheesile.

24“Khwawuliile bari iliwo babaandu batweela babaama isi ifwe babataambisile naabi bibyambaaso byeenywe, akhaba nga ifwe sikhwabarumana ta. 25Nashiryo ifwe khwashiboone nga shilayi, lwanyuma lwe khufukiilisana mu lukhobo, khurobolayo babaandu khubasindikhe isi muli, nga bali atweela ni bakanwa beefwe Balunaba ni Paulo. 26Nibo bali babaandu babewaanayo bulamu bwaabwe khulw'Omukasya weefwe Yezu Kristu. 27Nashiryo ifwe khwabarumaniile Yuda ni Silasi, khuri babakanikhile ni kumunwa ibyo byoosi byeesi khubaroneele. 28Lwekhuba shabonekhele nga shilayi isi Umwoyo Umukhosefu, ni isi ifwe, khulekha khubatwiikha inywe busiro bwoosi ta, khurusakho khukhola ibyo bibikanibwa bino: 29Inywe mulekhe khukhwiwambatsakila mwiibyo byeesi basaayila bifwaani, nalundi mukhalya kamalasile ta. Ni shishiindi mukhalya inyama iye shishaayo shishikokibwile busa ta, nalundi mulekhe bye buyeyani. Ne ni kane mwiliindatsake bibyeene ibyo kane mube mwakholile bulayi.”

30Basaani bano babarumanibwa baatsya boola i Antiyoki. Nga bamalile khubusanisa lituuli lye babaandu atweela, babawambisa burone bwatsana. 31Ne ni babusoma, bekhoya naabi khulwe khukhwisibwamo kamaani. 32Lwekhuba Yuda ni Silasi babeene baaba baŋoosi, besamo be buulebe kamaani, nga babakanikhayo nalundi nga babawandalasa. 33Ne ni bamenyayo khumalakho imbuka, be buulebe babasibula mu lukoosi belayo isi ibo bababarumana. 34Akhaba nga Silasi abona ari shamwakhila khumenya ibweene iyo. 35Ne Paulo ni Balunaba nga bali atweela ni babaandi swa busa, barama mu Antiyoki, nga baleekela nalundi nga baboolela shilomo sh'Omukasya.

Paulo ni Balunaba bawukhana

36Nga bifukhu byabirirewo, Paulo walomela Balunaba ari “Yinyukha, khwileyo khukyeniyile be buulebe mu buli shiriimba mweesi khwaboolela shilomo sh'Omukasya khubone nga ni bali.” 37Ne Balunaba wakana naabi khuutsya ni Yohana uwalaangibwa Mariko. 38#Bur 13.13Ne Paulo walekha khushibona nga shilayi khuutsya ni naye ta, lwekhuba Yohana Mariko yuno abatitukhakho nga bali i Panfiliya, walekha khutsya ni nabo khu buraambi ta. 39Aryo abawo khukhaandisana khukali akari abwe, khukhwolisa ni bawukhana. Balunaba watsya ni Mariko, bambukha i Kupulo. 40Ne Paulo warobola Silasi baatsya, lwanyuma be buulebe khubaloombela bubweela bw'Omukasya. 41Aryo Paulo watsya nga abirira i Siriya, ni Kilikiya, nga esamo bafukiilisi kamaani.

Currently Selected:

Buraambi 15: LCE

Highlight

Copy