Buraambi 13

Umwoyo Umukhosefu arobola Balunaba ni Saulo

1Mu bafukiilisi be Antiyoki mwabamo baŋoosi ni baleekeli, nga mu nibo mulimo Balunaba, Simeoni abe ulaangiwa Nigeli, ni Lusiyo uwe Kurene, ni Manaeni uwaba umusaale w'omuwuli Herode atweela ni Saulo. 2Ni baaba nga besaaya Umukasya nalundi nga babuya ntsala Umwoyo Umukhosefu waloma ari, “Ngana mundoborere Balunaba ni Saulo, babe baburaawa lwe buraambi bweesi imbalaangiile khukhola.” 3Ne lwanyuma ni baamala khubuya ntsala ni khuloomba, babarakho kamakhono kaawe babarumana.

4Umwoyo Umukhosefu nga wabarumanile, batsya beekha i Selukiya, ni khukhwaama ibweeneyo baselengela i Kupulo. 5Ne ni boola i Salamisi, baleekelayo shilomo sha Wele mu ntsu tsye khukhwisaayilamo tse Bayudaaya. Yohana#13.5 Abe lisiina lyeewe liliindi bari Mariko. aba ni nabo nga abayeetakho. 6Baryo bakyeenda khu shikelemeesi she Kupulo shoosi, khukhwoola ni Pafosi, isi banyoola umuundu umufumu. Umuundu yuno aba Umuyudaaya nga elaanga khuuba umuŋoosi, nga lisiina lyeewe bari Umwaana-Wa-Yezu. 7Umufumu yuno aba musaale wa gafana Serugiyo Paulo umukhulu we shikelemeesi isho, uwaba umusaani we kamakhula naabi. Serugiyo yuno walaanga Balunaba ni Saulo nga akana khuwulila shilomo sha Wele. 8Ne umufumu yuno nga niye Elimasi (lisiina lyeewe limanyisa liryo mu Luyonaani), wabakhaandisa naabi, nga akana khukoraanisa gafana yuno alekhe khufukiilila shilomo sha Wele ta. 9Ne Saulo abe lundi ulaangibwa bari Paulo, wetsusibwa n'Umwoyo Umukhosefu, wamulolelela wamwomiisilakho tsimoni. 10Kila aloma ari, “Iwe uli umwaana wa Sitaani, uli umusiku we shishiindu shoosi shishiili shikhosefu, wayitsula bubeeyi ni khukhola buubi! Ulyakamisa liina khuboraanisa kimikhoosi kimikwalaafu ky'Omukasya? 11Bona aluno ari, kumukhono kw'Omukasya kunakhukhupa, kukhwikyelise umubofu. Unekyela umubofu nga s'ubona inyaanga ta.” Lubaluba, lubookha ni bibilima bya muwamba tsimoni, wabubuuka busa nga aweentsa umuundu umuwamba khu mukhono amuraangilile. 12Ne gafana n'abona byoosi bibyakholekha, wekyela umufukiilisi mu Kristu, lwekhuba eyaanga naabi khuleekela khw'Omukasya nga ni khuli.

Paulo ni Balunaba nga bali mu Antiyoki

13Paulo ni babaandu beesi aba ni nabo, baama i Pafosi, bambukha inyaantsa baatsya i Peruga shiriimba shishiili mu Panfiliya. Ne Yohana abe lisiina lyeewe lilindi bari Mariko wabalekhela ibweeneyo wakobolayo i Yerusalemu. 14Babaramile belooselayo khukhwaama i Peruga, khukhwoolesa ni boola i Antiyoki shishiili mu Pisidiya. Ne shifukhu sha Sabato ni shoola, baatsya mu ntsu iye khukhwisaayilamo, bekhala asi. 15Lwanyuma lwe khusoma khukhwaama mu bibyaronebwa mu makaambila ka Musa ni mu baŋoosi, baraangilisi be ntsu ye khukhwisaayilamo, bakaanisa burume isi baarume bari, “Be buulebe, noola muliyo ni shilomo shoosi shishisamo kamaani, ni mwiitse mukanikhe.”

16Paulo wenyukha weema, wenyusa kumukhono kweewe wabasilisa waloma ari: “Ba Isiraeli bashaase ni nanywe Banaambo babesaaya Wele mweesi ni mundekeerese. 17#Luky 1.7 Luky 12.51Wele we babaandu ba Isiraeli arobola bakuuka beefwe khaalekho. Nga bashiili mu bukulwa mu liloba lye ba Misiri, Wele abatsowesa khuuba babaandu bakali naabi. Ni khulwe kamaani keewe kamakali abarusayo mu linaambo ilyo. 18#Bala 14.34; Maka 1.31Khumala kimiiko kamakhumi kane, abekhaliliikha nga bali mu mubiimbi. 19#Maka 7.1 Yos 14.1Khulwawe, Wele ahesa kamanaambo musaafu mu shiibala sha Kanani, wabawa nibo liiswa ilyo nga busikha bwaabwe. 20#Baka 2.16 1 Sam 3.20Nalundi lwanyuma lwe kimiiko bitoondo bine ni kamakhumi karaano, Wele wabarobolela bakayi khuuba bawuli baawe khukhwolesa khu muboolo kwa Samweli umuŋoosi.

21 # 1 Sam 8.5 1 Sam 10.21 “Lwanyuma baloomba bari Wele abawe umuyiinga. Kila Wele abawa Saulo umwaana wa Kiishi, uwaba uwe mu shikuuka sha Benyamini uwaba umuyiinga wawe khumala kimiiko kamakhumi kane. 22#1 Sam 13.14 1 Sam 16.12; Zab 89.20Ne Wele n'amala khurusawo Saulo, wesawo Daudi khuuba umuyiinga waabwe. Ni Wele wamulomakho ari, ‘Nanyoolile Daudi umwaana wa Yese nga niye uli ni kumwoyo nga kukwase kumweene, niye ukana akhole byeesi ise ingana.’ 23Khukhwaama mwisaaye ly'omweeneyo, Wele warereera babaandu ba Isiraeli umuwonesi nga niye Yezu, nga n'abalomela. 24#Mrk 1.4; Luk 3.3Nga Yezu ashiili khwiitsa ta, Yohana akukuula khubatisibwa khwe khukhwibiiyisa bibyonako isi babaandu ba Isiraeli boosi. 25#Yoh 1.20 Mat 3.11; Mrk 1.7; Luk 3.16; Yoh 1.27Ne Yohana nga atsya khumalilisa buraambi bweewe aloma ari, ‘Iseese muntsambaasilisa khuuba naanu? Iseese siindi niye isi mwambasilisa khuuba uyo isi mwaliindilila ta. Ne akhali ndi lwanyuma lwase, iliyo uli khukhwiitsa isi ise ikhaakhila ni khukangulula bilaalo bye mu bikyele byeewe ta.’

26“Be buulebe, ba Isiraeli bashaase, babaana beenda ya Ibulayimu ni Banaambo babaarya Wele, shilomo shino she buwonesi shakhwakaanisibwa ifwe. 27Lwekhuba babaandu babamenya mu Yerusalemu ni bawuli baawe, si bamanya nga niye umuwonesi ta, namwe si bamanya bilomo bye baŋoosi bibisomebwa khu buli shifukhu sha Sabato ta. Shikila nibo boolelesa bilomo bino nga bamukhalila kumusaango kwe khuufwa. 28#Mat 27.22,23; Mrk 15.13,14; Luk 23.21-23; Yoh 19.15Ikhaba nga si banyoola ilomo yoosi imwiriisa ta, ne baloomba Pilato khumwiira. 29#Mat 27.57-61; Mrk 15.42-47; Luk 23.50-56; Yoh 19.38-42Ne ni baamala khukhwolelesa ibyo byoosi abe bibyamulomebwakho, bamuwanulayo khukhwaama khu musalaba bamwalisa mu ŋani. 30Ne Wele wamulamusa khukhwaama mu bafu. 31#Bur 1.3Ne khumala bifukhu bikalikho busa waba nga abonekhela ibo boosi babeetsa ni naye i Yerusalemu khukhwaama i Galilaaya. Bano ari nibo bajulisi beewe isi babaandu.

32 # Zab 2.7 “Ni nafwe ari khuli ano khubareerera inywe kamakhuuwa kamalayi kakaloma kari, byeesi Wele alomela bakuuka beefwe, 33ari wabyoolelesela ifwe babaana baawe, nga enyusa Yezu khukhwaama mu bafu. Nalundi nga ni shalomebwa mu Zabuli ye khabili shiri,

‘Iwe uli Umwaana wase,

shaleelo nekyelile Paapawo.’

34 # Isay 55.3 “Nilwe khukhwokesanisila ilala ari amulamusa khukhwaama mu bafu, nga s'anyala welayo khubola ta, waloma ari, ‘Indikhuwa tsikhabi tsikhosefu tseesi nalomela Daudi nalundi tsa ŋali.’ 35#Zab 16.10Nga makiboole n'ashilomela mu shisiintsa shishiindi she Zabuli ari,

‘Iwe s'ulilekha umukhosefu woowo abolele mu ŋani ta.’

36“Lwekhuba nga Daudi n'amala khukhwakaanisa mu muboolo kweewe nga Wele n'akana, afwa, wasiikhiwa isi bakuuka beewe, aryo wabola. 37Ne uyo isi Wele alamusa khukhwaama mu bafu s'abola ta.

38“Nashiryo be buulebe, ba Isiraeli bashaase, mwakha mushimanye muri, khubirira mu mweene uyo, ifwe khulaangilila shishiyakhilo she bibyonako isi muli. 39Nalundi shili ndi lwe khubirira mu niye, buli mutweela ufukiilila arusibwakho ibyo byoosi abe byeesi kamakaambila ka Musa kakhanyala karusawo ta. 40Ni nashiryo, ni mwiliinde nio buubi bubwalomekhakho ni baŋoosi bulekhe khuboolakho ta. Shino shalomekha shiri,

41 # Habk 1.5 ‘Bona inywe babaali ni khulekelesa, kane mwiyaange nalundi muwele,

lwekhuba ise ikhola buraambi buno mu bifukhu byeenywe,

buraambi buno bweesi mukhalifukiilisa ta,

akhaba nga umuundu washibaboolele.’ ”

42Ne Paulo ni Balunaba ni baaba nga barura ibulafu we ntsu iye khukhwisaayilamo, babaandu babekoontselela bari bakobole lundi bababoolelekho bilomo bino khu shifukhu sha Sabato shishilakho. 43Ne babaandu boosi ni baamala khusalanila khukhwaama muntsu iye khukhwisaayilamo, Bayudaaya bakali busa ni Banaambo babashuukha bekyela bafukiilisi mu khwisaaya Wele nga Bayudaaya, baloondelela Paulo ni Balunaba. Baarume bano babakhupilisa khukhwiloosela khuwandalalila mu bweela bwa Wele.

44Khu shifukhu sha Sabato shishelakho, babaandu boosi mu shiriimba beetsa khuwulila shilomo sha Wele. 45Ne Bayudaaya ni baabona wanamundu, libuba lyabawamba, bakhaandisa byeesi Paulo aloma, nalundi bamufwotsola. 46Ne Paulo ni Balunaba balomela angaaki nga si barya ta bari, “Abe shakhiile khunyoowa khuboolela shilomo sha Wele isi inywe. Ne khukhwaama ni mushikaanile, mwekhaliile mwabeene kumusaango khukhwokesanisa muri bulamu bubukhawawo sibubakhila inywe ta. Ari ifwe kane khubalekhe inywe khwiile isi Banaambo. 47#Isay 42.6; 49.6Lwekhuba Umukasya umweene wakhulakila ifwe ari,

‘Inywe nabareerewo khuuba buwaanga isi Banaambo,

nio munyalise khuyila buwonesi buli andu osi mu shiibala.’ ”

48Banaambo ni bawulila shino, bekhoya nalundi babuyila shilomo sha Wele. Bakali naabi khu nibo babarobolebwa khufuna bulamu bukhawawo ta, bekyela bafukiilisi. 49Shiryo shilomo sh'Omukasya shasalanisibwa mu shiriimba isho shoosi. 50Ne Bayudaaya bakhonjelesa batweela khu besaayi babaaba bakhasi babamanyikhaane, ni basaani babamanyikhaane mu shiriimba, khurakikha khukubyeenga Paulo ni Balunaba. Baryo babatimisa khurura mu shiriimba shaawe. 51#Mat 10.14; Mrk 6.11; Luk 9.5; 10.11Baryo Paulo ni Balunaba babasisakulila lufuumbi lwe mu bikyele byaawe nga khabonelo khe khubekaana nabo, baatsya i Ikoniyo. 52Baleekelwa betsusibwa kumwikhoyo n'Umwoyo Umukhosefu.

Currently Selected:

Buraambi 13: LCE

Highlight

Copy