Buraambi 12

Khubowebwa khwa Petero

1Mu bifukhu byeen'ebyo, umuyiinga Herode warakikha khukhola buubi khu batweela be lituuli lye bafukiilisi. 2Wawamba lurima, weera Yakobo wandaaye wa Yohana. 3Ne n'abona ari shino Bayudaaya bashisiimile, watsya mu moni khuwamba ni Petero naye. Bino byakholekha mu bifukhu bye kamayiiya ke kimikaati kikikhasiila ta. 4#Luky 12.1-27Nga Herode wamalile khuwamba Petero, wamura mwipuusu, wamurakho basilikhale khumuliinda nga baraambisa tsimbalo tsya bane khu bane, nga shitsiililwa sheewe shili shiri lwanyuma lwe Kamayiiya ke Khubirakho, amureere mu moni tse babaandu. 5Ne Petero n'aba nga ali umubowe mu mapuusu, bafukiilisi mu Yezu babelelela naabi khumuloombela isi Wele.

Khulekhuulibwa khwa Petero

6Ne mu shilo nio bushe Petero areerebwe wa Herode khumukhalila kumusaango, abe alikho akona akari e basilikhale babili, nga bamuboyile ni kiminyololo kibili, babaaliindila ibulafu nabo nga bebuliile khwipuusu. 7Lubaluba, malayika w'Omukasya wabonekha, buwaanga bwamulikha mwipuusu mukari, wakhupakakho Petero mu mbafu, wamusisimusa, nga aloma ari, “Yinyukha khaangu.” Khaangukho kiminyololo kyaama khu makhono keewe kyaakwa. 8Malayika wamulomela ari, “Yibowa lukhoba lwoowo, nalundi ukware bilaalo byoowo.” Petero wakhola aryo. Malayika wamulomela lundi ari, “Kwaara tsingubo tsoowo, unondekho.” 9Petero wamuloondakho warura ibulafu. Ne walekha khumanya ari abe byeesi malayika alikho akhola bya ŋali ta, nga ambaasa ari alikho aroora. 10Ni bamala khubira khu baliindi babanyoowa, ni babakhola khabili boola khu shilibwa nga shili she shishuuma. Shilibwa shino nisho shishiitsya mu shiriimba. Shilibwa shino shisheene sheyikulawo shonyene busa, barura ibulafu, bakyeenda lukyeendo luleeyikho. Lubaluba, malayika wamwawukhanakho.

11Lwanyuma Petero kamakyesi kamukobolamo waloma ari, “Ari namanyiile ilala ndi Umukasya warumanile malayika weewe khukhumusa ise khukhwaama mu mikhono kya Herode, ni khukhwaama mwiibyo byoosi abe byeesi Bayudaaya bambaasa khukhukhola khus'ise.”

12Aryo Petero n'amanya shino, wakyeendaka khaangu watsya mu ntsu ya Mariya, maayi wa Yohana, abe ulaangiwa lilindi ari Mariko. Ibweeneyo abe bakali khu bafukiilisi babusanileyo balikho baloomba. 13Petero n'akhoonyaka khu lwiitsi lwe bulafu, umwakaanisi umukhaana ulaangiwa Roda weetsa khukhwikulawo kumulyaango. 14Ne n'amanya ari likono lyeesi awulila liri lya Petero, khulwe kumwikhoyo kumukali walekha khukhwikulawo kumulyaango ta, ne watima busa welayo wababoolela babaramile ari Petero wemikhile antsye khu lwiitsi. 15Kila nibo bamuloma bari, “Iwe wakwiile tsintsoli.” Ne Roda niye walobelakho nga ababoolela ari shili sha ŋali. Lwanyuma be mu ntsu kila baloma bari, “Uyo ali malayika weewe busa.”

16Ne Petero weloosela khukhonyaka. Ne ni bekulawo lulwiitsi babona nga niye, basamilila busa. 17Petero wasuta kumukhono kweewe angaaki nga abaloma basile. Lwanyuma wabasontsoola byoosi, nga Umukasya n'amurusile mwipuusu. Wabaloma ari “Ni mutsye muboolelekho Yakobo ni be buulebe babaandi shishiindu shino.” Aryo Petero wabawukhanakho, watsya mu shifwo shishiindi.

18Ni bwasha kumutikhinyi, abawo khutumbuukha khukali akari mu basilikhale khulwe khutakhawo khwa Petero mwipuusu. 19Herode walakila ari bawentselese naabi Petero. Ne ni balekha khumunyoola ta, wareebelesa naabi basilikhale, walakila ari beeribwe.

Lwanyumakho Herode wenyukha khukhwaama i Yuda, watsya khumenyakho i Kayisaliya.

Khuufwa khwa Herode

20 # 2 Mak 9.5-28 Abe Herode wakhalalila naabi babaandu be Tulo ni Sidoni. Nga banyooyile khukhola busaale ni Bulaseto umusoleeli umukhulu uwe mu ntsu y'omuyiinga, baatsya mu bukali isi Herode, nga baloomba bari abeyakhile abewo lukoosi. Baakhola shino lwekhuba abe shisiintsa shaawe shamisa biilyo mu shiibala sh'omuyiinga. 21Shifukhu abe sheesi baafukiilisanakho ni shoola, Herode wakwaara bikwaaro bye buyiinga, wekhala khu shitsoloŋo she khukhalilakho kimisaango, wabakanikhayo. 22Kila babaandu bayokesela angaaki bari, “Likono ilyo shilili ly'omundu ta, ne njeeba wele uli khukhukanikhayo isi ifwe.” 23Lubaluba, malayika w'Omukasya wakhupa Herode asi lwekhuba abe siwesilemo Wele shiriifwa ta. Tsinyeende tsamulya wafwa nakhufwa.

24Ne shilomo sha Wele sheloosela khutsowa ni khubalaaha. 25Ni Balunaba ni Saulo ni bamalilisa kumulimo kwawe, bakobolayo i Yerusalemu, nga batsya ni Yohana, abe ulaangibwa lisiina lilindi ari Mariko.

Currently Selected:

Buraambi 12: LCE

Highlight

Copy