Buraambi 11

Petero ekanikhakho isi bafukiilisi be Yerusalemu

1Baarume ni bafukiilisi babaandi babaaba mu Yuda bawulila bari Banaambo nabo bafukiiliile shilomo sha Wele. 2Ne Petero n'aniina i Yerusalemu, basaani bafukiilisi mu Yezu babenjila imbalu, bamwiŋuluŋuunyila nga baloma bari, 3“Lwashiina iwe watsya mungo mwe babaandu basiinde, walya ni nabo?”

4Petero wasimama khubaboolela byoosi, shitweelatweela nga eesi byarakikha, 5nga aloma ari: “Ise naba mu shiriimba she Yopa nga indi mu khuloomba, nafuna khubonekhelwa. Mu nikhwo nabona shishiindu shiikha khukhwaama mwikulu, nga shifwana nga isuukha ingali, nga yawaambibwile khu tsisoonda tsine, sheetsa isiindi. 6Ne ni nashofwasa nabonamo tsisolo tse bikyele bine tse khu shiibala, ni tsisolo tse mwirome, ni bibyalaama asi, ni binywiinywi bye mu ngaaki. 7Lwanyuma nawulila likono linoma liri, ‘Petero yinyukha usale, ulye.’ 8Ne nase naloma ndi, ‘Taawe Umukasya, lwekhuba imbaawo shishiindu shoosi she mbikho namwe shiibi shishenjilatsakakho mu khanwa mwase ta.’ 9Ne likono lyelamo ifuunda ye khabili khukhwaama mwikulu lyaloma liri, ‘Ukhalaangatsaka byeesi Wele amala khumiliisa uri bye mbikho ta.’ 10Shino shakholebwa tsifuunda tsitaru, lwanyuma byoosi byaniinisibwa mwikulu. 11Ni mu mbuka nyeneyo, basaani bataru babarumanibwa isiindi khukhwaama i Kayisaliya boolela khu ntsu isi nabamo. 12Umwoyo wanoma khuutsya ni nabo akhali khukhwikanakana ta. Ni bafukiilisi basesaba beesi naba nabo, baatsya ni nase, khwenjila mu ntsu y'omusaani uyo. 13Naye wakhuboolela nga n'abona malayika nga wemikhile mu ntsu yeewe, amulomela ari, ‘Rumanisa i Yopa, bakhulaangile Simoni ulaangibwa Petero. 14Naye alikhureerera bubakha bubuuli khuwonesa iwe ni be mu ntsu yoowo boosi.’ 15Nase ni naba nga indakikha khukanikha, Umwoyo Umukhosefu wabekhakho nga n'akhwiikha khusiifwe makiboole. 16#Bur 1.5Abweenewo nashebulila shilomo sh'Omukasya sheesi aloma ari, ‘Yohana abatisa ni kameetsi, ne inywe mulibatisibwa n'Umwoyo Umukhosefu.’ 17Aso, Wele noola abawa nibo shiwaanwa nga sheesi akhuwa ifwe ni khwafukiilila Umukasya Yezu Kristu, abe ise niye naanu uwandyakhiile khukhabisanisa Wele?”

18Boosi ni bawulila shino, basila busa balekha khukhwiŋuluŋuunya lundi ta, ne baruuya Wele nga baloma bari, “Aso, n'isi Banaambo, Wele wabaweele khukhwibiiyisa bibyonako nio banyoole bulamu.”

Bafukiilisi be Antiyoki

19 # Bur 8.1-4 Ulwo ibo boosi khu lwe khukubyeengebwa khukhwabawo khu lwa Sitefano nga n'amala khukhwiribwa, baarume bakyeenda boola i Foyinisiya, Kupulo ni Antiyoki, nga baboolela shilomo isi Bayudaaya bonyene, ne nga si baboola isi babaandi ta. 20Ne abawo babaandi khu nibo bafukiilisi khukhwaama i Kupulo, ni Kurene, ni beetsa i Antiyoki, bakanikha isi be Kamanaambo kakandi nabo, nga bababoolela kamakhuuwa kamalayi kakawamba khu Mukasya Yezu. 21Kamaani k'Omukasya kaaba khu nibo, ni lituuli lye babaandu bakali bashuukha bekyela bafukiilisi mu Mukasya.

22Kamakhuuwa kakawamba khu bino ni kawulilikha isi bafukiilisi be mu Yerusalemu, baryo barumana Balunaba i Antiyoki. 23Naye nga woleleyo, wabona bye bubweela bwa Wele, wekhoya, wabakhupilisa ari bawandalalile ilala mu mwoyo, behaambile ilala khu Mukasya. 24Balunaba aba umusaani umulayi, uwetsula Umwoyo Umukhosefu ni khufukiilila. Baryo babaandu bakali bareerewa isi Umukasya.

25Lwanyuma Balunaba warurayo, watsya i Taruso khuweentsa Saulo. 26Ne n'amunyoola, wamureera i Antiyoki. Baryo khumala kumwiiko kumubuufu, Balunaba ni Saulo babusanatsaka ni bafukiilisi, baleekelatsaka babaandu bakali. Ne i Antiyoki iyo niyo isi baleekelwa banyoowa khulaangiwa bari Bakristu.

27Awo mu bifukhu ibyo, baŋoosi beetsa i Antiyoki, nga baama i Yerusalemu. 28#Bur 21.10Ne mutweela khu nibo uwaba alaangiwa Agabo, wimikha angaaki mu maani k'Omwoyo Umukhosefu, waboola nga intsala ingali n'itsya khubawo mu shiibala shoosi, (intsala iyi yakwawo mu bifukhu bya Kilawudiyo, nga niye Kayisaali). 29Baryo baleekelwa bakhalawo nga buli mutweela n'anyala, khukhwakaanisa buyeeti isi bafukiilisi babamenya mu Yuda. 30Shino baashikhola, baakaanisa biwaanwa byaawe isi basakhulu nga babirira mu Balunaba ni Saulo.

Currently Selected:

Buraambi 11: LCE

Highlight

Copy