Buraambi 10

Petero ni Koruneliyo

1Abawo umuundu ulaangiwa Koruneliyo abe umenya i Kayisaliya, uwaba umuraangilisi uwe liye lililaangibwa lye ba Itali. 2Umusaani yuno aba umuundu umwilama nga niye ni be mu ntsu yeewe boosi baaba besaaya Wele. Aba nga ayeeta Bayudaaya nga abakabila bibiindu bya busa, nalundi abe abuya nga aloomba Wele. 3Lutweela khu nyaanga nga syeenda tse angoloobe, wabonela ilala bulayi bubweene shifwani sha malayika wa Wele nga enjila mu ntsu nalundi nga amulaanga lisiina ari, “Koruneliyo.” 4Koruneliyo walolelela malayika ni khuurya khukali, kila amureeba ari “Umukasya, shiina?” Malayika naye wamwiilamo ari, “Khuloomba khwoowo ni buyeeti bwoowo bweesi uwaanayo isi babaandu byaniinile nalundi byafukiilisibwile ni Wele. 5Ni aluno ari rumana babaandu batsye i Yopa, batsye balaange Simoni ulaangiwa Petero, 6umenya wa Simoni, uwala kamahaafu, intsu yeewe ili ambi ni nyaantsa.” 7Ne malayika uwamukanikhayo n'amala khuutsya, Koruneliyo walaanga babili khu baraambi beewe, n'umusilikhale umwiyikinwa uwisaaya Wele uli mutweela yenyene khukhwaama muubo abe babamuraambila. 8Aryo wababoolela byoosi bibyaba byabeelewo, wabarumana i Yopa.

9 # Yuds 8.5 Khu shifukhu shishelakho, ni baaba nga bali khu lukyeendo lwawe nga bembiiyisile shiriimba isho, Petero waniina khu ntsu khu ngaaki khuutsya khuloomba. Tsisaawa tsaba nga tsisesaba tse kumuusi. 10Nga ali khubweenekhwo intsala yamulya, wewotooma ari khali aliilekho khakhaandu. Ne ni baaba nga bashirengakharengekha she khuulya, wafwaana nga uroora. 11Wabona likulu nga lyabimbukhile, ni shishiindu shamamo nga shiikha is'ali nga shifwaana nga isuukha ingali, yaba yikhisibwa khu shiibala nga yawaambibwiile khu mbeka tsoosi tsine. 12Mu suukha yino mwabamo bisolo bya buli shikuuka shoosi, ni n'ebyo bibyalaamila asi, ni binywiinywi bye mu ngaaki. 13Kila awulila likono limuloma liri, “Petero, yinyukha usale, ulye.”

14Ne Petero waloma ari, “Umukasya, senyala nashikhola taawe. Lwekhuba ise ishiili khulyatsakakho shishiindu shoosi she kumusilo namwe shikhali shipyeluuse ta.” 15Petero wawulila likono ifuunda ye khabili nga limuloma liri, “Byeesi Wele amala khuŋoonaŋoona, iwe ukhabilaanga khuuba bye kumusilo ta.” 16Shishiindu she suukha shino sheyokyesanisa kimilundi nga kitaru, lwanyuma shenyusibwa khaangu shelayo mwikulu.

17Aryo Petero n'aba nga ashikanakana mu mwoyo kweewe khulwe shifwani ari manya makhulu shiina kakashiilimo, khaangukho babaandu beesi Koruneliyo arumana boola, beema khu mulyaango. Abe bamalile khaale khureebelesa babokesele intsu ya Simoni. 18Balaanga babaaliyo nga bakana bamanye oba nga Simoni Petero abe amenya abweene awo.

19Ne Petero aba nga ashambaasa khu biindu bibibonekhele, Umwoyo wamuloma ari, “Bona iliwo babaandu bataru babaali khukhuweentsa. 20Yinyukha wiikhe asi, nalundi utsye ni nabo, akhali khumala imbuka ta, lwekhuba ise niye ubarumanile.”

21Petero weekha asi isi babaandu bano babaama isi Koruneliyo wabaloma ari, “Iseese niyooyu isi mulikho mukana. Lomo shiina ibareerire?”

22Nabo baloma bari, “Koruneliyo umuraangilisi we basilikhale, niye ali umuundu umulayi nalundi ali umuundu urya Wele, isi babaandu be linaambo lye Bayudaaya basiima. Malayika Umukhosefu amuboolele ari akhurumanise iwe utsye mu ntsu yeewe, umuboolele byeesi uli ni nabyo.” 23Aryo Petero wabakaanila wabenjisa mu ntsu, wabawa bukono antsye bushe nio batsye.

Shifukhu shishelakho, Petero wenyukha watsya ni nabo, atweela ni be buulebe babaandi babaama i Yopa nabo batsya ni naye. 24Ni khu shifukhu shishelakho, boola mu shiriimba Kayisaliya. Abe Koruneliyo wabaliindiliile khukhwoola, nalundi aba wabusanisile balebe ni basaale beewe atweela. 25Petero n'enjila mu ntsu, Koruneliyo wamwakaanila wakwa asi mu bikyele byeewe nga amwisaaya. 26Ne Petero wamwinyusa khu ngaaki nga aloma ari, “Yinyukha khu ngaaki, akhaba nase indi umuundu busa nga iwe.” 27Baryo Petero ni Koruneliyo baatsya nga bakanikha, ne ni benjila mu ntsu, banyoola babaandu bakali babusaane. 28Petero wabaloma ari, “Inywe mweesi mwamanyila ilala muri, shifuniaka likaambila singa Umuyudaaya akholakana namwe wakyeniyila umuundu yeesi uli umunaambo. Ne Wele wantsokesanisile ari, sinandyakhiile khuloma umuundu yeesi ndi ali uwe mbikho namwe umubi ta. 29Nashiryo nga ni munangile, ise sindobile khukhwiitsa ta. Ari imbareeba ndi shiina shishikilile mwanaanga?”

30Koruneliyo waloma ari, “Bifukhu byabirire bine khukhwaama nga bino nibyakholikha: tsaba tsinyaanga nga syeenda tse angoloobe nga ndi mu ntsu yase indi mu khuloomba, khaangukho nabona umuundu nga ali mu bikwaaro bibimelamela nga wantsimile ibweeni. 31Wanoma ari, ‘Koruneliyo, Wele wawuliile khuloomba khwoowo ni bubweela bwoowo isi babaandu, lweesho Wele wakhukhebuliile. 32Nashiryo rumanisa i Yopa, bakhulaangile Simoni ulaangiwa Petero etse. Amenya mu ntsu ya Simoni uli ambi ni nyaantsa, nga ali uwala kamahaafu.’ 33Nase lubaluba nakhurumanisa, ni nawe wakholile bulayi khukhwiitsa. Nashiryo fweesi khuli ano mu moni tsa Wele khurekeerese byoosi byeesi Umukasya akhulakiile iwe khuloma.”

Inganikha ya Petero

34 # Maka 10.17 Petero warakikha khukanikha nga aloma ari, “Mu ŋali ari ise naboone ndi Wele s'aromboosa mu baandu ta. 35Ne mu buli linaambo lyoosi ibo boosi babamurya nalundi babakhola bilayi, Wele abafukiilila. 36Wele asiindikha shilomo sheewe isi babaandu ba Isiraeli nga abakaanisa kamakhuuwa kamalayi ke lukoosi khubirira mu Yezu Kristu uli Umukasya wa boosi. 37Ise sinaakha khubakhebusa bilomo bibyakholikhile mu Yuda mwoosi khurakikhila i Galilaaya, lwanyuma lwe khubatisibwa khweesi Yohana alaangilila ta. 38Mwamanya isaambo yeesi Wele arobolamo Yezu uwe Nazareti n'Umwoyo Umukhosefu atweela ni kamaani. Isaambo isi akyeenda nga akhola bilayi, nalundi nga awonisa abo boosi abe beesi Sitaani aminilisa, lwekhuba abe Wele ali ni naye. 39Ifwe khuli bajulisi be bibiindu ibyo byoosi byeesi akhola mu shibala she Bayudaaya ni mu Yerusalemu. Bamwiira nga bamutsaangilila khu musalaba kwe kusaala. 40Ne Wele wamulamusa khukhwaama mu bafu khu shifukhu she khataru, nalundi wamwokesanisa mu lubuula. 41Ne sishaba isi babaandu boosi ta, ne isi ifwe beesi Wele arobola khaale khuuba bajulisi. Ifwe khwalya nalundi khwanywa ni naye nga wamalile khulamukha khukhwaama mu bafu. 42Niye uwakhulakila ifwe khuutsya khuboole Kamakhuuwa Kamalayi isi babaandu, ni khuwayo bujulisi khuri uyo niye isi Wele arobola khuuba umukayi we balamu ni baafu. 43Uyo niye isi baŋoosi boosi baweelakho bujulisi bari, khubirira mu lisiina lyeewe, buli mutweela umufukiilila alifuna shishiyakhilo she bibyonako.”

Banaambo bafuna Umwoyo Umukhosefu

44Aryo Petero n'aba nga ashikanikha, Umwoyo Umukhosefu weekha khu boosi babaaba bamurekeeresa. 45Bafukiilisi mu Kristu babaaba Bayudaaya babeetsa ni Petero ni baabona shino beyaanga, khubona bari shiwaanwa sh'Omwoyo Umukhosefu shaweebwile akhaba isi Banaambo nabo. 46Lwekhuba bawulila Banaambo bano nga bakanikha mu nimi tsitsiindi, nalundi nga baruuya shiriifwa sha Wele. Kila Petero abareeba ari, 47“Iliyo umuundu yeesi unyala khukhwimana khubatisibwa khwe kameetsi isi babaandu bano babamalile khufuna Umwoyo Umukhosefu nga ifwe ni khwafuna?” 48Aryo Petero walakila ari babatisiwe mu lisiina lya Yezu Kristu. Lwanyuma bamuloomba bari amenyekho ni nabo bifukhu bikyeekhe biri.

Currently Selected:

Buraambi 10: LCE

Highlight

Copy