Mako 16

Yesu alamukha khukhwaama mu bafu

(Matayo 28.1-8; Luka 24.1-12; Yokana 20.1-10)

1Shifukhu sha Sabato ni shaba nga shaweele, Malyamu Magadalena, Salume, ni Malyamu maayi uwa Yakobo, bakula bye khukhwihakha bibiwunya bulayi, bari batsye bawakhe kumulaambo kwa Yesu. 2Khu Sabiti kumutikhinyi, nga inyaanga yamalile khurura, baatsya khu ŋani. 3Ni baaba nga batsya bareebana bonyene bari, “Ne naanu ukane akhupilingisile libaale khukhwaama khu ŋani?” 4Bari balola bari, babona nga libaale lyamalile khupilingisibwa khukhwaama khu ŋani. Lyaba libaale liboofu naabi.

5Ni benjila mu ŋani, babona umusoleeli mutweela nga wakwaarire tsingubo tsiwaanga, nga wekhaale khu mukhono kumulayi. Shino shabareerera khuurya.

6Waabalomela ari, “Mukharya ta. Naamanyile indi mulikho muweentsa Yesu uwe i Nazareesi, isi baatsaangilila khu musalaba. Waalamukhile khukhwaama mu bafu, s'ali ano ta; ni mu bone shifwo sheesi baamusiikhamo. 7#Mat 26.32; Mako 14.28Ne ni mutsye muboolele baleekelwa beewe, ne khufuurisa Petero, muri Yesu waabenyooyile ibweeni waatsiile i Galilaaya. Nga n'abalomela amataayi, ibweene iyo niyo isi mulimubonela.”

8Bakhasi ni baama khu ŋani, baatsya butima, ilala abe khuurya ni khunikina byaabawaambile. Khulwe khuurya khukali, baalekha khuboolelakho umuundu yeesitsana ta.

Yesu abonekhela Malyamu Magadalena

(Matayo 28.9-10; Yokana 20.11-18)

9Yesu n'alamukha kumutikhinyi kumweene khu Sabiti, waanyoowa khubonekhela Malyamu Magadalena. Makiboole abe Yesu waanyoowa khuwoona kimisaambwa kimibi musaafu khukhwaama mu Malyamu yuno. 10Umweene uyu waatsya khuboolela abo babaabatsaka ni Yesu, baaba abe balikho balila naluundi nga bewunamiile. 11Ikhaba nga ni bawulila bari Yesu ari ali umulamu, naluundi bari wabonekheele Malyamu Magadalena, balekha khufukiilila ta.

Yesu abonekhela baleekelwa babili

(Luka 24.13-35)

12Lwanyuma lwa bino, Yesu waabonekhela babili khu baleekelwa beewe, musaambo ikiindi. Bano baaba balikho bakyeenda nga baama mu shiriimba batsya mu shaalo. 13Bano beelayo baboolela baleekelwa babaaramile, ne baalekha khufukiilila byeesi bababoolela ta.

Yesu abonekhela baleekelwa liikhumi na mutweela

(Matayo 28.16-20; Luka 24.36-49; Yokana 20.19-23; Buraambi 1.6-8)

14Lwanyuma Yesu waabonekhela baleekelwa beewe liikhumi na mutweela nga balikho balya biilyo. Kila ababiiyisa khulwe khulekha khufukiilila ta, ni khuuba ni kimyoyo kimihandalafu, isaambo isi bakhafukiilila byeesi abo bababona Yesu bababoolela ta. 15#Bur 1.8Waabalomela ari, “Ni mutsye mu shiibala shoosi, mukuukuule isi babaandu boosi Kamakhuuwa Kamalayi. 16Umuundu ukane afukiilile Kamakhuuwa kano abatisibwe, alifuna buwonesi; ne uyo ukhafukiilila ta, kumusaango kulimufuura. 17Abo babaafukiilila muusi ise, bakhaakholatsake bibiyaangisa. Ni baliraambisatsaka lisiina lyase, baliwoona kimisaambwa kimibi, naluundi balikanikha tsinimi tsimbya. 18Baliwaamba tsindemu mu makhono kaabwe, naluundi abe baakhalinywa shishiindu shishiira, seshilibakholakho buubi bwoosi ta. Ni baliloombela balwaale nga babarakho kamakhono, balwaale abo baliwona.”

Yesu aniina mwikulu

(Luka 24.50-53; Buraambi 1.9-11)

19 # Bur 1.9-11 Lwanyuma nga Yesu waamalile khukanikha ni baleekelwa beewe, waniinisibwa mwikulu, wekhala aasi khu lubeka lwe kumukhono kumulayi kwa Wele. 20Baleekelwa ni baama awo baatsya bakuukuula Kamakhuuwa Kamalayi buli andu osi. Umukasya waraambatsakila mu nibo, nga aŋaŋasa buurume bwaabwe khuubirira mu bubonelo bweesi bakholatsaka.

Currently Selected:

Mako 16: LPE

Highlight

Copy