Mako 14

Luwomelo lwe khukhwiira Yesu

(Matayo 26.1-5; Luka 22.1-2; Yokana 11.45-53)

1 # Luky 12.1-27 Khu mbuka yino yaba nga itaambayo bifukhu bibili khukhwoola khu Mayiiya ke Khuubirakho, ni Kamayiiya ke Kimikaati kikikhalimo kamamela ta. Abe basaayi bakhulu ni baleekeli be Kamakaambila ka Musa balikho baweentsa kumukhoosi kwe khuwaamba Yesu mu shimoonyo busa, bamwiire. 2Khulwekhuuba abe bakhalilewo nga baloma bari, “Khukhashikhola mu bifukhu bye kamayiiya ta, khulwekhuuba babaandu banyala khurakikhisawo shisaayumba.”

Yesu bamuwakha kamafura i Besaniya

(Matayo 26.6-13; Yokana 12.1-8)

3 # Luka 7.37,38 Imbuka ni yoola nga Yesu ali i Besaniya mu ntsu iya Simoni, uwabakho ni bikeenge. Nga alikho alya, abawo umukhasi uwetsa ni kamafura ke khukhwihakha kakawunya bulayi nga kali mu kyupa. Kamafura kano kaaba ke bukusi bwe angaaki naabi. Umukhasi uyo wekula ikyupa iyo, watsukha kamafura khu murwe kwa Yesu. 4Shino shakila batweela khu bakyeni babaabawo bakhalala, kila baloma bari, “Khulwa shiina kila kamafura kano konakisibwile karyo? 5Khulwekhuuba khali bakakulisilemo tsi dinari#14.5 Idinari indweela abe ili nga kumukheemba kweesi umuundu afuna nga waraambile kimilimo shifukhu shibuufu. tsitsifuurisa bitoondo bitaru, batsikabila bataambi.” Kila bekiitsa umukhasi uwakhola shino.

6Ne Yesu waabaloma ari, “Ni mumulekhe abe; shiina kila mumutaambisa? Waakholeele ise shishiindu shilayi naabi. 7#Maka 15.11Khulwekhuuba bataambi busheele bali ni nanywe. Na buli lweesi mukanila khuubayeeta, munyala mwabayeeta. Ne ise busheele singene imbatsaka ni nanywe ta. 8Waakholile sheesi abe akhiile khuukhola; nga atsukha kamafura kano kakaawunya buulayi khu mubili kwase nga bakurekekhela khu kusiikha. 9Ilala imbaboolela ndi, buli oosi isi bakhalaangilile Kamakhuuwa Kamalayi mu shiibala shoosi, sheesi akholile balishikuukuula, nga shili she khuumushebulila.”

Yuda afukiilisana ni basaayi bakhulu

(Matayo 26.14-16; Luka 22.3-6)

10Yuda Isikalyoti, uwaba mutweela khu baarume liikhumi na babili, waatsya isi basaayi bakhulu nga aweentsa isaambo iye khulyamo Yesu luwomelo. 11Ni baawulila byeesi Yuda aabaloma, bekhoya, baamulomela khuumuwa tsinusu. Ni khukhwaaamila abweene awo, Yuda waananikha khuweentsa kumukhoosi kwe khulyamo Yesu luwomelo.

Yesu alya ni baleekelwa beewe

(Matayo 26.17-25; Luka 22.7-14,21-23; Yokana 13.21-30)

12Shaba shifukhu shishinyoowa she Kamayiiya ke Kimikaati kikiikhalimo kamamela ta, lweesi beerira kamasheese, khushebulilakho Kamayiiya ke Khuubirakho kakanyoowa. Kila baleekelwa ba Yesu bamureeba bari, “Ukana khutsye khurengekharengekhele waheena isi ukana khuliila Kamayiiya ke Khuubirakho?”

13Waarumana babili khu baleekelwa beewe nga abaloma ari, “Ni mutsye mu shiriimba, kane mwakanane umusaani nga wasutile isoongwe iye kameetsi. Ni mumuloondekho. 14Muntsu yoosi isi kane engilemo, mulome umweene uwe mu ntsu iyo muri, ‘Umuleekeli weefwe wakhurumanile ari ukhwokese shiseenge sheesi bakyeni baliilamo kamayiiya, khushiŋoone, etse aliilemo Kamayiiya ke Khuubirakho ni baleekelwa beewe.’ 15Kane abokese shiseenge she khungaaki shikali, shishiilimo bibikanibwa byoosi. Ni murengekharengekhe mu bweene umwo.”

16Baleekelwa baatsya mu shiriimba, banyoola buli shitweela shili nga Yesu n'abalomela. Baryo barengekharengekha Kamayiiya ke Khuubirakho.

17Antsye ni bwelabula, Yesu weetsa ni baleekelwa beewe liikhumi na babili. 18#Zab 41.9Ni baaba nga bali khu shikabilo she biilyo balikho balya, Yesu waaloma ari, “Ilala, imbaboolela indi mutweela khusi inywe, uli khulya ni nase ali khuutsya khukhundyamo luwomelo.”

19Kumutaambo kwaananikha khuubawaamba. Kila buli mutweela tweela bareeba Yesu bari, “Manya ulikho umanyisa uri ise?”

20Yesu wabeelamo ari, “Ali mutweela khusiinywe liikhumi na babili, uyo uuli khuusiikha mu sowaani iye tsinyenyi atweela ni nase. 21Khulwekhuuba Umwaana w'Omuundu alikho atsya khufwa nga bibyaronebwa bikhosefu ni biloma. Ne shili she kumutaambo isi uyo utsya khumulyamo luwomelo. Manya shandibeele shilayi umuundu uyo alekha khuba nga wasaalikha ta.”

She shiilo sh'Omukasya

(Matayo 26.26-30; Luka 22.14-20; 1 Bakorinso 11.23-25)

22Ni baaba nga balikho balya, Yesu waabukula kumukaati, waakuloombela tsikhabi, waakumenyulamo, waakubawa, nga aloma ari, “Amba; kuno kuli kumubili kwase.”

23Lwanyuma waabukula shikopo shishiilimo iviini, nga waamalile khu kiloombela ikhabi, waabawa boosi bashinywakho. 24#Luky 24.8; Yer 31.31-34Waabaloma ari, “Kano niko kamafuki kaase, ke indakaano imbya, kakaatsutsukha khulwe babaandu baakali. 25Ilala, mbaboolela nywe ndi s'indinywakho iviini iye kumusabibu luundi ta, khukhwoolisa shifukhu sheesi ndikinywa nga ili mbya mu Buyiinga bwa Wele.”

26Ni baamala khukhwiimba kumweenya kumukhosefu, barura baatsya khu lukiingi lwa Zeyituni.

Yesu akanikha khu khwikaana khwa Petero

(Matayo 26.31-35; Luka 22.31-34; Yokana 13.36-38)

27 # Zek 13.7 Yesu waalomela baleekelwa beewe ari, “Inywe mweesi kane muntsilukhe. Khulwekhuuba bibyaronebwa bikhosefu biloma biri, ‘Indiira umwaayi uwe kamasheese, shino shikile kamasheese kasalanile.’ 28#Mat 28.16Ne ni ndilamusibwa khukhwaama mu bafu, indi benyoowa inywe khutsya i Galilaaya.”

29Petero waamuloma ari, “Abe boosi bakhelukha bakhulekhawo, ise s'ingane nilukhe ikhulekhewo ta.”

30Yesu wamuloma ari, “Ilala, ikhuboolela ndi mu shilo sha luno, nga ingokho ishiili khukholyookha khabili ta, kane ube wantsikaanile tsifuunda tsitaru.”

31Ne Petero welamo nga ashikumisa ari, “Abe akhaba noola khufwa ni nawe, kane ifwe, ne singane ikhwikaane ta.” Ni baleekelwa babaramile nabo buli mutweela waloma shitweela sheene isho.

Yesu nga aloomba i Getisemane

(Matayo 26.36-46; Luka 22.39-46)

32Lwanyuma Yesu ni baleekelwa beewe baatsya mu shifwo shishilaangibwa shiri Getisemane. Yesu waabalomela ari, “Ise indi khuutsya khuloomba, inywe ni mwikhale ano.”

33Walaanga Petero, Yakobo ni Yokana, waatsya ni nabo. Waarakikha khuuba ni khukhwiyembelela, nga ali ni kumutaambo kumukali. 34Kila abalomela ari, “Kumwoyo kwase kwetsuule bibyambaaso bye kumutaambo, kukuunyala kwaantsira nakhuntsira. Ni murame ano, nga muli meeso.”

35Yesu wakyeenda welooselayo ibweeni khakyeekhe, waafukhama aasi khu meesikamo, waaloomba ari, noola abe shinyalikha khali bibiindu bino sibimukholikhilekho ta. 36Waaloma ari, “Abba, Paapa, mbaawo shishiindu shishinyala shaakhukhaasa iwe ta; n'undusekho shikopo shino. Ne shikhaba nga ise ni naandikanile ta, akhali khashibe nga iwe n'ukana.”

37Yesu n'akobola waanyoola nga baleekelwa balikho bakona. Waareeba Petero ali, “Simoni, ulikho ukona? S'unyala wekhala meeso khuumala akhaba inyaanga indweela yonyene ta? 38Ni murame meeso nga muloomba muri ilekhe khubawo shoosi shishibakhakilisa ta; khulwekhuuba akhaba nga ilala kumwoyo kukana, ne kumubili kuli kumutoro.”

39Yesu welayo luundi waatsya waaloomba, nga araambisa bilomo nibyo bitweela. 40Waakobola luundi, waanyoola nga balikho bakona, khulwekhuuba abe liilo lyaabaminyile; kwaluno baalekha ni khuumanya she khuumwiilamo ta.

41Yesu n'akobola kumuluundi kukuukhola khataru, waabareeba ari, “Inywe mushikona naluundi mushiwumula? Lyeesi mukonilekho limala; inyaanga yoolile isi Umwaana w'Omuundu batsya khumuwaanayo mu makhono ke baboonaki. 42Ni mwinyukhe, mwiitse khutsye, uyo uwundilemo luwomelo ali aambi akana khwoola ano.”

Yesu bamuwaamba

(Matayo 26.47-56; Luka 22.47-53; Yokana 18.3-12)

43Khaangukho, Yesu n'aba nga ashikanikha, Yuda uwaba mutweela khu baleekelwa liikhumi na babili, woola. Aba nga ali ni lituuli lye babaandu nga bali ni bibyooki, ni tsiluungu. Bano baaba nga baama isi basaayi bakhulu, ni baleekeli be kamakaambila ka Musa nga bali atweela ni basakhulu. 44Yuda yaba wabaweele khabonelo nga aloma ari, “Umuundu yeesi ise kane ingwe mu shifuba aba niye umweene uyo; ni mumuwambe mumuyile nga mwamuliindile bulayi.”

45Yuda n'ola waatsya burereefu isi Yesu, wamuloma ari, “Umuleekeli!” Wakwa Yesu mu shifuba. 46Babaandu beesi Yuda eetsa ni nabo baakwa khu Yesu, baamuwaamba, baamuyila nga umubowe.

47Ne mutweela khuubo babaaba beemikhile awo, waatsowolayo lurima, waakhalakho khukhuru khw'omwakaanisi w'omusaayi ufuura bukhulu.

48Yesu wareeba lituuli lilyabawo ilyo ari, “Shiina kila mwiitsa ni bibyooki ni tsiluungu khukhumaamba ise, mwafwaana nga babaatsya khuwaamba umwiifwi? 49#Luka 19.47; 21.37Bifukhu byoositsana nabatsaka ni nanywe nga indeekela mu Lisaayilo Likhulu, ne simwamaamba ta. Ne lekha bino bikholikhe nio bibyaronebwa bikhosefu byoolelesebwe.”

50Abweene awo baleekelwa ba Yesu bamwantsukha, batima baatsya.

51Aabawo umusoleeli mutweela uwabaloondakho nga bayila Yesu. Abe umusoleeli yuno webowele busa ingubo iyareremukha. Bari bakhakakho khuumuwaamba, 52waatima bukhuna waatsya, waabalekhela ingubo.

Lukhobo luwotsisa Yesu

(Matayo 26.57-68; Luka 22.54-55,63-71; Yokana 18.13-14,19-24)

53Bawaamba Yesu baamuyila w'omusaayi ufuura bukhulu, abe isi basaayi bakhulu boosi, ni basakhulu ni baleekeli be Kamakaambila ka Musa babusaane. 54Petero aba wabaloondilekho nga ali aleeyikho, khukhwoolisa mu lwaanyi lw'omusaayi ufuura bukhulu. Watsya wekhala ni baliindi, nga alikho oora kumulilo.

55Ari basaayi bakhulu ni be mu lukhobo boosi, baweentsa bujulisi bubutsuntsumilisa Yesu, bari nio bamukhalile kwe khufwa, ne baalekha khu bunyoola ta. 56Khulwekhuuba iliwo babaandu bakali babaawayo bujulisi, ne abe bujulisi bwaabwe sibuwaambakana ta.

57Aabawo batweela babaawayo bujulisi bwe bubeeyi nga bamukanikhakho bari, 58#Yok 2.19“Khwawulila nga umusaani yuno aloma ari, ‘Ise ikhafuniake Lisaayilo Likhulu ilyo lilyombakhibwa ni kamakhono ke babaandu, nio nga abirirewo bifukhu bitaru, nombakhe liliindi, lilikhombekhebwa ni kamakhono ke babaandu ta.’ ” 59Ne shitweela busa, abe bujulisi bwaabwe sibuwaambakana ta.

60Umusaayi ufuura bukhulu wenyukha wema akari abwe, kila areeba Yesu ari, “Ne iwe wamweene uloma uri shiina? S'unyala welamo khwibyo byeesi balikho bakhuwabila ta?” 61Ne Yesu warama nga wasilile busa, walekha khukhwilamo ta. Umusaayi ufuura bukhulu wamureeba shireebo shishindi ari, “Iwe uli niye Kristo, Umwaana wa Wele uwe Shiriifwa?” 62#Dan 7.13Yesu welamo ari,

“Ise indi Kristo;

naluundi mulibona Umwaana w'Omuundu

nga wekhaale khu mukhono kumulayi kwe Bunyala,

naluundi nga etsila mu mafuumbi ke mu ngaaki.”

63Abweene awo, umusaayi ufuura bukhulu wonuula tsingubo tseewe, nga aloma ari, “Bujulisi shiina bubuundi bweesi khushiweentsa? 64#Lev 24.16Mwabeene mwawuliile khufwotsola khweewe, khweesi elanjilamo umweene khuuba Wele. Inywe mukhalawo muri shiina?” Boosi bamukhalila kumusaango bari akhiile khufwa. 65Aabawo batweela babarakikha khumufuutsakho kamare, babaandi baamubiimbilila mu moni, baamukhupa, nga bamuloma bari, “Khola buŋoosi uboole ukhupile.” Basilikhale baamuwaamba baamukhupa bifuusi.

Petero ekaana Yesu

(Matayo 26.69-75; Luka 22.56-62; Yokana 18.15-18,25-27)

66Ne Petero n'aba nga ashiili mu lwaanyi, mutweela khu bakhaana nga ali umwakaanisi uw'omusaayi ufuura bukhulu, wetsa. 67N'abona Petero nga oora kumulilo, wamulolelela, kila amuloma ari, “Akhaba ni nawe ubeele ni Yesu uwama i Nazareesi.”

68Ne Petero wekaana nga aloma ari, “Byeesi ulikho uloma, ise s'imbimanya namwe s'imbitekela ta.” Kila Petero akyeenda arurawo atsya aambi ni shilibwa. Ingokho yakholookha.

69Umukhaana umwakaanisi tsana waabona Petero luundi, kila arakikha khuulomela abo abe babeemikhile ambi ari, “Umusaani yuno ali mutweela khu baandu abo.”

70Indi luundi Petero wekaana.

Nga abirirewo imbuka ifwiiti iri, batweela khu baandu babaaba bemikhile awo, baloma Petero bari, “Ilala nawe uli ni khuuba nga uli mutweela khu baandu abo; khulwekhuuba uli umu Galilaaya.”

71Kumuluundi kuno Petero warakikha khukhwikaana ni khukhwitsuba, nga aloma ari, “Ise simanya umusaani isi mulikho mukanikhakho uyuno ta.”

72Khaangukho, ingokho yakholookha kumuluundi kukukhola khabili. Petero washebulila nga Yesu n'amulomela ari, “Nga ingokho ishiili khukholyookha khabili, iwe kane ube wantsikaanile kimiluundi kitaru.” Petero warundukha walila kamasika.

Currently Selected:

Mako 14: LPE

Highlight

Copy