Luka 7

Yesu awonesa umwakaanisi w'omusilikhale

(Matayo 8.5-13)

1Ulwo nga Yesu waamalile khukanikha bilomo bino byoosi isi babaandu, waatsya i Kaperunaumu. 2Bona, abawo umusilikhale umukhulu we liihe lye basilikhale umu Roma, uwaba n'umukulwa weewe isi aba akana naabi, ne nga mulwaale, nga ali aambi khuufwa. 3Umukhulu yuno n'awulila bibiwaamba khu Yesu, warumanayo batweela khu bakhulu be Bayudaaya is'ali, nga amwikontselela ari etse awonese umukulwa weewe. 4Bakhulu bano biitsa isi Yesu, bamwikontselela naabi bari, “Umusaani uyu akhila buyeeti bwoowo. 5Lwekhuuba akana naabi linaambo lyeefwe, naluundi niye uwakhwombakhila intsu iye khukhwisaayilamo.”

6Aryo Yesu waatsya ni nabo. Ne n'aba nga ali aambi khukhwoola khu ntsu, umukhulu we basilikhale tsana wamurumanila basaale beewe, nga amuloma ari, “Umukasya ukhetaambisa ta, lwekhuuba ise sishintsakhila iwe khukhwinjila mu ntsu yase ta; 7namwe nase samweene sinambaasa nga nakhila khukhwiitsa is'uli ta. Ne loma bulomi ilomo, n'umukulwa wase kane awone. 8Ni nase samweene ndi umuundu uwulibwa, luundi nase ndi ni basilikhale beesi imbila aasi aase. Ne ni noma mutweela ndi, ‘Tsya,’ atsya. Ne ni nomela ukuundi ndi, ‘Yiitsa,’ etsa. Ni noma umukulwa wase ndi, ‘Khola shino,’ ashikhola.”

9Yesu n'awulila bilomo bino, wamwiyaanga naabi, ne nga washukhiile lituuli lye babaandu babamuloondelela, waabaloma ari, “Abeele ishiili khubonakho khufukiilila nga khuno ta, akhaba ni mu Isiraeli ta!”

10Baryo basaani babarumaniwa belayo mu ntsu y'omusilikhale umukhulu, banyoola nga umukulwa weewe uwaba umulwaale wawonile.

Yesu enyusa umusoleeli wa namulekhwa

11Lwanyumakho lwe mbuka ndiini, Yesu ni baleekelwa beewe ni lituuli lye babaandu bamuloondakho, waatsya mu shiriimba shishilaangibwa Naini. 12Ne nga ali aambi khukhwoola khu shilibwa she shiriimba, bona, babaandu nga basutile umufu bamurusa; umufu uyu uwaba umwaana isi maayi weewe asaala mutweela yenyene, naluundi nga maayi weewe aba namulekhwa. Ni babaandu bakali be mu shiriimba nga bali ni naye. 13Umukasya n'abona namulekhwa yuno, wamusaasila naabi, wamuloma ari, “Ukhalila ta.”

14Aryo Yesu waatsya wawaamba khu sanduuku, ni naabo babaaba basutile beema. Yesu waaloma ari, “Musoleeli, ikhuloma ndi yinyukha!” 15Umusaani uwaba wafwiile, wenyukha wekhala, wananikha khukanikha, Yesu wamukoboselayo maayi weewe.

16Boosi buuri bwabawaamba, babuyila Wele, nga baloma bari, “Umuŋoosi we kamaani wenyukhiile musiifwe!” Luundi baloma bari, “Wele wetsile khuyeeta babaandu beewe.”

17Kamakhuuwa kano kasalanila mu Yuda mwoosi, ni mu bisiintsa bibibotokhelelewo.

Baarume babaama isi Yokana Umubatisa

(Matayo 11.2-19)

18Baleekelwa ba Yokana Umubatisa, bamuboolela bino byoosi bibiwaamba khu Yesu. Aryo kila Yokana alaangakho babili khu baleekelwa beene. 19Yokana Umubatisa wabarumana isi Umukasya, khumureeba bari, “Iwe niye uyo abe isi khuliindilila uli khukhwiitsa, namwe khuliindilileyo ukuundi?”

20Baleekelwa bano ni beetsa isi Yesu, bamuloma bari, “Yokana Umubatisa wakhurumanile is'uli, nga aloma ari, ‘Iwe niy'oyu abe isi khuliindilila uli khukhwiitsa namwe khuliindilileyo ukuundi?’ ”

21Ni mu mbuka nyeneyo, Yesu waawonesa babaandu babaaba balwaale, ni butsiina, ni kimisaambwa kimibi, naluundi waabimbula baabofu tsimoni tsaabwe. 22#Isay 35.5,6; Isay 61.1Aryo kila elamo baarume ba Yokana Umubatisa ari, “Ni mwiileyo muboolele Yokana bibiindu byoosi byeesi muboone luundi byeesi muwuliile: baabofu babona, babaalemala bakyeenda, abo babaali ni bulwaale bwe bikeenge bawonesebwa, bamiinyi bekukha mu maru bawulila, baafu balamusibwa, ni Kamakhuuwa Kamalayi ari kaboolelwa isi bataambi. 23Nashiryo ali ni khabi uyo ukhantsikanakana ise ta.”

24Lwanyuma nga baarume ba Yokana Umubatisa baatsiile, Yesu waananikha khuukanikha khu biwaamba khu Yokana isi lituuli lye babaandu ari, “Inywe ni mwatsya isi Yokana mu mubiimbi, shiina sheesi mwatsiililila khuubona? Lukholo luluuteengasibwa ni mbewo? 25Ne shiina sheesi mwatsiililila khuubona? Umuundu ukwaarire tsingubo tsinyenanyena? Taawe! abo babakwaara tsingubo tsinyenanyena naabi ni khuuba ni buyiindifu bukali, banyoolekhana muungo mw'omuyiinga. 26Ne shiina sheesi mwatsiililila khuubona? Umuŋoosi? E e, ilala mbaboolela ndi niye afuurira ilala n'umuŋoosi. 27#Mal 3.1Yokana oyu niye isi bibyaronebwa bilomakho biri, ‘Bona, indirumana umurume wase iburaangisi woowo, uliŋoonaŋoona intsila nga ushiili khukhwiitsa ta.’ 28Mbaboolela ndi, mu baandu boosi babasaalikha mu shiibala, mbaamo na mutweela ufuura Yokana Umubatisa bukhulu ta. Ne uyo ufuura bukyeekhe mu Buyiinga bwa Wele, niye umukhulu khufuura Yokana.”

29 # Mat 21.32; Luka 3.12 Babaandu boosi, atweela ni babuusanisi be kumusolo, ni bawulila bilomo bya Yesu, bafukiilila intsila ya Wele ikhosefu lwekhuuba nibo baaba babatisibwa ni khubatisibwa khwa Yokana. 30Ne Bafarisaayo ni baleekeli be kamakaambila ka Musa baloba shitsilililwa sha Wele isi nibo, nashiryo bekaana khubatisibwa ni Yokana.

31Yesu weloosela khuuboolela abo babaaba bamurekeeresa ari, “Shiina sheesi unyala khuufwaananisa ni kumuboolo kuno? Naluundi baliinga shiina? 32Bali nga babaana babekhala mu khatale, nga balaangana ni bashaawe, nga baloma bari, ‘Khwabakhupila kimilele, ne mwalekha khushina ta, khwabakhupila tsimuungu, ne mwalekha khwantsuwa ta.’ 33Yokana Umubatisa etsa, nga abuya intsala nga s'alya biilyo, naluundi nga s'anywa iviini ta, inywe mwaloma muri, ‘Umusaani uyu, alikho shisaambwa shiibi.’ 34Umwaana w'Omuundu n'etsa nga alya, naluundi nga anywa, inywe mwaloma muri, ‘Lola umusaani uyu uwe kumukhabyo, umumeeli, luundi musaale we babuusanisi be kumusolo, ni babonaki.’ 35Ne kamakyesi ka Wele kokyesanisibwa khuuba kelala isi baloondeleli baako babeene babakakaanila.”

Yesu nga ali muungo mwa Simoni Umufarisaayo

36Lulwoola mutweela khu Bafarisaayo waloomba Yesu khuulya biilyo ni naye. Aryo Yesu waatsya mu ntsu y'Omufarisaayo wikhala ashikabilo she biilyo alye. 37#Mat 26.7; Mako 14.3; Yok 12.3Aabawo umukhasi mutweela mu shiriimba isho uwaba waamenya mu bwoonaki, n'amanya ari Yesu alikhuulya mu ntsu y'Omufarisaayo, waareera i kyupa iye bifura bibiwunya bulayi, 38waamayo wiimikha imukoongo wa Yesu, aambi ni bikyele byeewe, nga alila. Waaronyesa kamasika keewe khu bikyele bya Yesu. Aryo waarakikha khuubikhuyakakho ni litsuune lyeewe, waakwa khu bikyele byeewe, waabihakhakho bifura tsana bibiwunya bulayi. 39Umufarisaayo uwaba walaangile Yesu n'abona aryo, waaloma mu mwoyo kweewe ari, “Ilala umusaani yuno aba Umuŋoosi, khali waamanyile umukhasi umuwaambakho oyu nga n'afwaana, naluundi khali waamanyile buulamu bweewe nga ni buli bwe bubwoonaki.”

40Yesu waamuloma ari, “Simoni, indikho ni lomo isi ingana khukhuboolela.” Simoni welamo ari, “Umuleekeli, imboolele khubone.”

41Yesu waaloma ari, “Aabawo umusaani mutweela uwaba ni babaandu babili beesi abaantsa. Mutweela nga amubaantsa dinari bitoondo biraano, n'ukuundi nga amubaantsa kamakhumi karaano. 42Ne khu boombi mbaawo uwanyala khumuwaanda likobi ta. Nashiryo umusaani uyo waabiyakhila boombi. Aso, khu boombi, naanu ukana amukane khufuurisakho?”

43Simoni welamo ari, “Nambaasa ndi uyo isi eyakhila likobi liboofu.”

Yesu waamuloma ari, “Waakhalilewo buulayi.”

44Nga Yesu waashukhiile umukhasi, waalomela Simoni ari, “Waaboone umukhasi yuno? Nga ni ninjiile mu ntsu yoowo, iwe s'umbeele kameetsi ke khusiinga bikyele byase ta, ne umukhasi yuno waatosile bikyele byase ni kamasika keewe, luundi waabikhuyakakho ni litsuune lyeewe. 45Iwe s'ungwilekho mu shifuba ta, ne umukhasi yuno khukhwaama nga ni enjiile ano, wakhwakama khukhuungwa khu bikyele byase ta. 46Iwe s'umbakhilekho bifura khu murwe kwase ta, ne umukhasi yuno waambakhile bikyele byase bifura bibiwunya bulayi. 47Ni nashiryo ikhuboolela ndi, lwe khuukana khweewe khukali, bibyoonako byeewe bikali byamwiyakhiilwe. Ni nooyo uwiyakhilwa khakyeekhe, khuukana khweewe nakhwo khuba khukyeekhe.”

48Ulwo Yesu waloma umukhasi ari, “Weyakhiilwe bibyoonako byoowo.”

49Ni babaandu babekhala ni naye nga balya barakikha khuloma bonyene na bonyene bari, “Naanu uyu, uwiyakhila bibyoonako?”

50Yesu waloma umukhasi ari, “Khufukiilila khwoowo khwakhuwonesele, n'utsye mu lukoosi.”

Currently Selected:

Luka 7: LPE

Highlight

Copy