Luka 6

Yesu bamureeba khu biwaamba khu Sabato

(Matayo 12.1-8; Mako 2.23-28)

1 # Maka 23.25 Lutweela khu shifukhu sha Sabato, Yesu n'aba nga akyeenda mu mukuunda kwe iŋaano, baleekelwa beewe bakusa bikala bye iŋaano, babifuungila mu bikalabo byaabwe, baalya. 2Batweela khu Bafarisaayo baabareeba bari, “Lwashiina mukhola sheesi likaambila lyeefwe likhafukiilila khuukhola khu Sabato?”

3Yesu waabeelamo ari, “Simwasomatsakakho byeesi Dawudi aakhola ta? Nga niye ni babaandu beewe, intsala ni yabalya? 4#Lev 24.9#1 Sam 21.1-6Niye enjila mu ntsu ya Wele, waabukula kumukaati kukwawaanibwayo isi Wele, niye umweene waalya, waawakho ni babaandu beesi aaba nabo, ate nga shaba she kumusilo khuulya kumukaati kuno, khuurusakho basaayi bonyene?”

5Aryo waabaloma luundi ari, “Umwaana w'Omuundu niye Umukasya uwa Sabato.”

Yesu awonesa umusaani we kumukhono kumuleme

(Matayo 12.9-14; Mako 3.1-6)

6Khu shifukhu sha Sabato shishiindi, Yesu waatsya mu ntsu iye khukhwisaayilamo waleekela. Ne mwabamo umusaani uwaba ni kumukhono kweewe kumulayi nga kumuleme. 7Baleekeli be kamakaambila ka Musa, ni Bafarisaayo bamulolelela ni khukhwimenielesa khukali nga bakana babone oba nga kane awonesele khu Sabato, nio bamisilekho bamutsuntsumilise. 8Ne Yesu wamanya byeesi baaba bambaasa, waloma umusaani uwe kumukhono kumuleme ari, “Yinyukha wiime akari awo.” Aryo umusaani wenyukha weema akari. 9Lwanyuma Yesu waabaloma ari, “Imbareeba shireebo; shifukiilisibwa ni likaambila lyeenywe khukhola buulayi khu Sabato namwe khukhola buubi? Khuwonesa buulamu namwe khubuhesa?” 10Wabebotokhelesamo tsimoni boosi, lwanyuma waloma umusaani ari, “Tsalaasa kumukhono kwoowo.” Umusaani naye wakhola aryo, ni kumukhono kweewe kwaba kwakhile. 11Ne boosi bakhalala naabi, barakikha khukanikhanamo bonyene na bonyene, shiina sheesi banyala khukhola Yesu.

Yesu arobola baarume liikhumi na babili

(Matayo 10.1-4; Mako 3.13-19)

12Mu bifukhu ibyo, Yesu waatsya khu lukiingi khuloomba. Ibweene iyo wabuyayo shiilo shoosi nga aloomba Wele. 13Ne antsye ni bwasha kumutikhinyi, walaanga baleekelwa beewe, mu nibo warobolamo liikhumi na babili, beesi alaanga ari baarume. 14Nibo bano: Simoni isi atwiikha ari Petero, ni Andereya wandaaye uwa Petero oyo, Yakobo ni Yokana, Filipo ni Batolomayo, 15Matayo ni Tomasi, Yakobo umwaana wa Alufayo, ni Simoni uwaba mutweela khuba Zelote, 16Yuda umwaana wa Yakobo, ni Yuda Isikalyoti uwamulyamo luwomelo.

Yesu aleekela luundi awonesa

(Matayo 4.23-25)

17Yesu weekha ni baarume nga ama khu lukiingi, weema mu shiifwo shishakwalaala. Lituuli likali lye baleekelwa beewe, ni babaandu bakali babaabawo nga baama mu Yuda mwoosi, ni Yerusalemu, ni babaandi babaama i Tuulo ni Sidoni, bisiintsa bibibotokhelele inyaantsa. 18Babaandu bano boosi beetsa khumurekeeresa ni khuwonesebwa tsindwaale tsaabwe. Ni naabo boosi babataambisibwa ni kimisaambwa kimibi, boosi bawonesebwa. 19Babaandu boosi bakhakakho bari bamutiilekho lwekhuuba abe kamaani kaaba karura khukhwaama mu niye kabawonesa boosi.

Kumwikhoyo ni Kumutaambo

(Matayo 5.1-12)

20Yesu wenyusa tsimoni isi baleekelwa beewe waaloma ari: “Muli ni ikhabi inywe bataambi, lwekhuuba Buyiinga bwa Wele buli bubweenywe.

21“Muli ni ikhabi inywe babaali intsala ana ari, lwekhuuba mulikura. Muli ni khabi inywe babaalila ari, lwekhuuba mulitsekha.

22 # 1 Pet 4.14 “Muli ni khabi inywe noola babaandu bababiiyila luundi babekaana baabatyaabila, baabakhoma khulw'Omwaana w'Omuundu.

23 # 2 Kim 36.16; Bur 7.52 “Nimwikhoyele shifukhu isho, mwisutake lwe kumwikhoyo, lwekhuuba kumukheemba kweenywe mwikulu kuliba mukali, lwekhuuba bakuuka baabwe bakholatsaka baryo baŋoosi.

24“N'enga she kumutaambo isi inywe bayindifu ana ari, lwekhuuba inywe mwafuna khaale kumwikhoyo kweenywe.

25“Nga she kumutaambo inywe babekurire ana ari, lwekhuuba intsala ilibalya. Nga she kumutaambo inywe babatsekha ana ari, lwekhuuba muli wunamila luundi mulile.

26“Nga she kumutaambo inywe beesi babaandu babuyila, lwekhuuba bakuuka baabwe baloma bibiindu nibyo bitweela isi baŋoosi be bubeeyi.

Khukana basiku

(Matayo 5.38-48; 7.12a)

27“Ne imbaboolela inywe babaali khukhundekeeresa ndi, ni mukanaatsake basiku beenywe, mukholatsake bulayi ibo babababiiyiila. 28Muwe tsiikhabi abo babaakholakho bibiindu biibi, muloombele abo babaabaraangana inywe. 29Isi uyo ukhukhupa luuyi khu lusaya, muyusile lusaya lwe khu lubeka luluundi nalwo. Ni n'oyo unyala wakhurusakho ikooti yoowo, lekha ayile ni isaati nayo. 30Buli muundu yeesi ukhuloomba shishiindu, n'umuwaatsake, ni nooyo ukhunuulakho shishiindu shoowo, ukhamuloomba khu shikhukobosela ta. 31#Mat 7.12Ne ni mukholatsake khu baandu babaandi muryo nga nanywe ni mukana nibo babaakhole khuusi inywe.

32“Inywe ni mukana ibo babakana bonyene, ikhabi shiina yeesi muli nayo? Mbo ni baboonaki nabo bakhola baryo nga bakana abo babaabakana. 33Ne ni mukholela buulayi isi ibo babaakholela inywe buulayi bonyene, ikhabi shiina yeesi muli nayo? Mbo ni babonaki nabo bakhola baryo. 34Ne inywe ni mwikhopesa bibiindu byeenywe isi ibo beesi musuubila khubakobosela bonyene, ikhabi shiina yeesi muli nayo? Mbo ni babonaki nabo bakhola baryo, bekhopesa babonaki bashaawe beesi bambaasa bari kane babakobosele mu bwitsufu. 35Ne ni mukanaatsake basiku beenywe, naluundi mubakholatsake buulayi, mubekhopatsake nga simwiyikina muri, kane babakobosele shishiindu shoosi ta. Ni nashiryo, kumukheemba kweenywe kuliba mukali, luundi muliba babaana booyo, Wele Uuli Angaaki Lukali. Lwekhuuba Wele ali umulayi isi babaakhasiima ni baabi beene. 36Nimube be shiisa nga Paapa weenywe n'ali ni shiisa.

Khukhalila babaandi kumusaango

(Matayo 7.1-5)

37“Mukhakhalila babaandi kumusaango ta, ni nanywe Wele s'alibakhalila kumusaango ta. Mukhekiitsatsaka babaandi muri kwabafuurire ta, ni nanywe Wele alekhe khubekiitsa ari kwabafuurire ta. Ni mwiyakhile basheenywe, ni nanywe Wele alibeyakhila. 38Ni muwaane isi babaandi, ni nanywe Wele alibawa. Ilala muliweebwa shipimo shibakhila shilayi, sheesi bamiinile, shishisisikhiwile bulayi, luundi nga shitsutsukhaka aasi, nisho shilitsukhiwa mu makhono keenywe. Lwekhuuba shipimo sheesi muraambisa khupimilamo babaandi nisho sheesi Wele aliraambisa khubapimilamo nanywe.”

39 # Mat 15.14 Kila Yesu ababoolela lusimo luno ari, “Umuundu umubofu anyala khuraangilila umubofu washeewe? N'akhola aryo, boombi sibanyala baakwa mwilowo? 40#Mat 10.24,25; Yok 13.16; 15.20Mbaawo umuleekelwa ufuura umuleekeli weewe ta, ne n'aba nga waleekiwiile mu bwitsufu, naye kane abe nga umuleekeli weewe.”

41“Iwe shiina shikila walolelela khasosono khakhaali mu moni ya wandaayo, ne walekha khumanya kukyeenga kukuuli mu moni yoowo wamweene? 42Unyala uryeena waloma wandaayo uri, ‘Wandaayase khayo ikhurusemo khasosono khakhaali mu moni yoowo,’ n'enga wamweene s'unyala khubona kukyeenga kukuuli mu moni yoowo wamweene ta? Uba wiwombesa busa. Iwe umubeeyi nyoowa urusemo kukyeenga kukuuli mu moni yoowo wamweene, nio unyalise khubona bulayi khukhwinyusamo khasosono khakhaali mu moni ya wandaayo.”

Kusaala ni bibyaamo byakwo

(Matayo 7.16-20; Mako 12.33-35)

43“Mbaawo kusaala kulayi kukwaana bibyaamo biibi ta, namwe mbaawo kusaala kuubi kukwaana bibyaamo bilayi ta. 44#Mat 12.33Buli kusaala bakumanyila khu byaamo byakwo byeesi kwama. S'unyala wabuta tsisabibu khukhwaama khu mawa ta, namwe sibabuta kamakhuyu khukhwaama khu marakalu ta. 45#Mat 12.34Umuundu umulayi arusa bilayi nga abyaamisa mwibiikhilo lyeewe lilayi lye mu mwoyo kweewe. Ne umuundu umubi naye arusa biibi byeewe nga abyaamisa mwibiikhilo lyeewe liibi. Lwekhuuba kumunwa kw'omuundu kuloma ibyo bibitsuule mu mwoyo kweewe.”

Umwombakhi umukyesi n'umusilu

(Matayo 7.24-27)

46“Lwashiina munangilisa muri, ‘Umukasya, Umukasya’, ne nga simukhola byeesi mbalomela khukhola ta? 47Buli muundu yeesi uwiitsa isiindi, wawulila bilomo byase, ne wakhola nga ni biloma, kane imbokesanise umuundu uyo nga nafwaana: 48afwaana nga umuundu uwayaba kumusiinji kumuleeyi naabi, wombekha intsu yeewe, warakikhila kumusiinji khu lwaanda. Ne kameetsi ni ketsula kasalasala, kumukhuura kwakhupa intsu iyo ni kamaani, ne yalekha khutengaala ta, lwekhuuba intsu iyo yombakhiwa khu lwaanda. 49Ne umuundu uwulila bilomo byase bino, ne walekha khubikholelakho ta, ali nga umuundu uwombekha intsu yeewe khwiloba nga mbakhulima kumusiinji ta, ne kameetsi ni ketsula, kumukhuura kwakikhupa, intsu iyo yakwa, ni kumuwuulo kwayo kwaba kwe kamaani!”

Currently Selected:

Luka 6: LPE

Highlight

Copy