Luka 5

Yesu arobola baleekelwa baakiboole

(Matayo 4.18-22; Mako 1.16-20)

1 # Mat 13.1,2; Mako 3.9,10; 4.1 Shifukhu shitweela, Yesu aaba nga weemile khu ndulo khwe inyaantsa ye Genesareeti, babaandu bakali beetsa nga bayindana lwe khuukana khuuwuliilisa Ilomo ya Wele. 2Waabona kamakhoŋolo kabili khu ndulo khwe inyaantsa, nga baalobi be tsinyeeni baakalekhile awo, balikho basiinga butiimba bwaabwe. 3Yesu waaniina mu likhoŋolo litweela lilyaba lya Simoni, waamuloomba alisyendesekho khakyeekhe khu meetsi khurura khu lwoomu. Aryo waaliikhalamo, waaleekela babaandu.

4Nga waamalile khuukanikha isi babaandu, waaloma Simoni ari, “Syendesa likhoŋolo mu shisiba, mwikhise butiimba bweenywe, mulobe tsinyeeni.”

5 # Yok 21.3 Simoni waamwiilamo ari, “Umuleekeli, khwaraambile naabi shiilo shoosi, ne mbakhuwaambisakho shishiindu shoosi ta. Ne khukhwaama n'ulomele uryo, kane induumemo butiimba.” 6#Yok 21.6Ne ni baatuuma butiimba mu meetsi, bawaambisa tsinyeeni swa, waakila ni butiimba bwaabwe bwenga khukhalikha. 7Baryo baamesela bashaabwe babaaba mwikhoŋolo liliindi bari beetse babayeete. Beetsa betsusa kamakhoŋolo koombi, aambi kesiikhe mu meetsi.

8Ne nga Simoni Petero waaboone shino, waakwa aasi ebikyele bya Yesu, waamuloma ari, “Umukasya, n'undekhe, lwekhuuba ise ndi umuundu umwoonaki.” 9Lwekhuuba niye ni basheewe beesi aaba nabo, beyaanga naabi lwe tsinyeeni tsingali tseesi baawaambisa. 10Boosi akhaba Yakobo ni Yokana, babaana ba Zebedaayo, babaaba basheewe ba Simoni, beyaanga naabi. Ne Yesu waaloma Simoni ari, “Ukharya ta, lwekhuuba khukhwaama shaleelo, kane ube ureera babaandu isiindi.”

11Baryo bakhweesa kamakhoŋolo kaawe baakareera khu lwoomu, baalekha byoosi, baaloondelela Yesu.

Yesu awonesa umusaani

(Matayo 8.1-4; Mako 1.40-45)

12Ni lwoola, Yesu n'aba nga ali mu shiriimba shitweela, abawo umusaani uweetsa is'ali, nga wetsuule bulwaale bwe bikeenge. Ne niye n'etsa isi Yesu, wakwa aasi wefumalikha, wamwikontselela nga aloma ari, “Umukasya nga abeele wakanile, unyala khukhumpyeluusa.”

13Yesu wenyusa kumukhono kweewe wamutiilakho wamuloma ari, “Ee ingana, n'uwonesewe.” Lubaluba, bulwaale bwe bikeenge bwamururakho.

14 # Lev 14.1-32 Yesu wamukhonyakilila nga amuloma ari, “Ukhaboolelakho umuundu yeesi ta, ne n'utsye wiyokesane isi umusaayi akhwimenielese, uwaaneyo shiwaanwa lwe khuwonesebwa khwoowo nga Musa n'alakila. Shino shibe she khubonelakho isi babaandu shiri wawonisibwile.”

15Ne ndi khumanyikha khwa Yesu khweloosela busa osi, ni kamatuuli ke babaandu bakali, kabuusana khumuwulila ni khuwonesebwa tsindwaale tsaabwe. 16Ne Yesu niye nga anyala wabarurakho imbuka ikiindi, waatsya mu mubiimbi yenyene, waloomba.

Yesu awonesa umusaani uwakataala

(Matayo 9.1-8; Mako 2.1-12)

17Lutweela Yesu aba nga aleekela, mu baandu babaaba nga bekhaale awo bamurekeeresa, mwabamo Bafarisaayo ni baleekeli be Kamakaambila ka Musa babaaba bamile mu buli shiriimba she, Galilaaya, ni Yuda ni Yerusalemu. Ni kamaani k'Omukasya kaaba kali khu Yesu khuwonesa babaandu. 18Lola basaani beetsa nga basutile umusaani uwaba wakataala khu lusaamba, baweentsa kamakyesi ke khumwingisa mu ntsu bamure mu moni tsa Yesu. 19Ne ni bakhabona isaambo yoosi iye khumwingisilamo lwe babaandu bakali, baniina khu ntsu#5.19 Mu Palesitayini tsintsu tsaabwe tsaba tsabaambalikha busa khu ngaaki. khu ngaaki. Basambulako ahaandu bamubirisilamo nga ali khu lusaamba lweewe, bamura akari mu baandu mu moni tsa Yesu.

20Ne Yesu n'abona khufukiilila khwawe, waloma umusaani ari, “Mulebe, bibyoonako byoowo byakhwiyakhiilwe!”

21Bafarisaayo ni baleekeli be Kamakaambila ka Musa barakikha khuloma bonyene bari, “Uyu naanu, ufwotsola Wele? Naanu unyala khukhwiyakhila bibyoonako akhali Wele yenyene?”

22Ne Yesu n'amanya bibyambaaso byaabwe, wabeelamo ari, “Lwashiina mwaambaasa bibiindu nga bino mu myoyo kyeenywe? 23Shishaangu nisho shili ena? Khuloma ndi, ‘Bibyoonako byoowo byakhwiyakhiilwe’, namwe khuloma ndi, ‘Yinyukha ukyeende?’ 24Ne shili lwe khubokesanisa ndi Umwaana w'Omuundu ali ni bunyala khu shiibala khukhwiyakhila bibyoonako.”

Aryo waloma umusaani uwakataala ari, “Ikhuloma iwe ndi, yinyukha, usute lusaamba lwoowo, ukoboleyo ingo woowo.” 25Lubaluba, umusaani winyukha mu moni tsaabwe boosi nga babona, wasuta lusaamba lweewe, welayo ingo weewe, nga aruuya Wele. 26Boosi babaabawo, beyaanga lukali, baruuya Wele, luundi baarya nga baloma bari, “Ilala shaleelo khwaboone bye kamakaanga!”

Yesu alaanga Levi

(Matayo 9.9-13; Mako 2.13-17)

27Lwanyuma lwa bino, Yesu waarura ibulafu waatsya, ne waabona umubuusanisi we kumusolo, lisiina lyeewe bari Levi, nga wikhaale mu shifwo isi babuusanisila kumusolo. Yesu wamuloma ari, “Inondekho.” 28Levi wenyukha, walekha byoosi wamuloondakho.

29Lwanyuma Levi wateekhela Yesu kamayiiya kamaboofu mu ntsu yeewe, ne abaawo lituuli likali lye babuusanisi be kumusolo ni babaandu swa busa, beetsa bekhala baalya ni nabo. 30#Luka 15.1,2Ne Bafarisaayo ni baleekeli baabwe be Kamakaambila ka Musa, beŋuluŋuunyila baleekelwa ba Yesu bari, “Shiina kila muliila, luundi mwanyweela atweela ni babuusanisi be kumusolo ni babonaki?”

31Ne Yesu wabeelamo ari, “Babaandu balamu sibatsya isi umukaangi ta, ne njeeba balwaale nibo babaatsya. 32Ise shineetsa khulaanga bakhosefu khukhwibiiyisa ta, ne khurusakho babonaki bonyene.”

Yesu bamureeba khu bye khubuya intsala

(Matayo 9.14-17; Mako 2.18-22)

33Batweela khu nibo bareeba Yesu bari, “Lwashiina baleekelwa ba Yokana Umubatisa babuya intsala tsifuunda ngali, luundi baloomba, ni baleekelwa be Bafarisaayo nabo bakhola baryo, ne baboowo lwaawa balya luundi banywa?”

34Ne Yesu wabeelamo ari, “Munyala khubuyisa intsala bakyeni booyo ukhweele, nga umweene ashiiliwo ni nabo? 35Ne bifukhu kane biitse byoole, isi ukhweele alibarusibwakho, ni nabo balibuya intsala mu bifukhu ibyo.”

36Lwanyuma waabakanikhila lusimo luno ari: “Mbaawo umuundu uwinuula shishaapa khu ngubo imbya, waashinabila khu ngubo ingore ta. Umuundu uyo n'akhola aryo, aba wonakisile ingubo yeewe imbya, ni shishaapa shishamile khu ngubo imbya, sishinyala khulekhaana ni ngubo ingore ta. 37Namwe mbaawo umuundu utsukha iviini inyana mu kungutsi tsingore ta. Umuundu n'akhola aryo, iviini inyana inyala khukhwinuula tsikungutsi itsyo, ni viini yatsutsukha, ni tsikungutsi batsifiilwa. 38Ne iviini nyana yaakha yatsukhiwa mu kungutsi tsiimbya. 39Naluundi mbaawo umuundu yeesi uba waamalile khuunywa iviini indule, uwandikanile khuunywa iviini inyana ta, lwekhuuba aloma ari, ‘Indule niyo indayi khuminyisa.’ ”

Currently Selected:

Luka 5: LPE

Highlight

Copy