Luuk 6

1Vuusum Danni po ate Yeezu ale wa ŋaaŋviirɔma a yaa ga jo nuru wanyi talim po. Wa ŋaaŋviirɔma yaa wɛ ŋanbie a piak a ŋɔbi. 2Farisiima gela ale jam nya dila la, ba yaa bek ba ayen, <<Nya, ka boa ate ni a kaasi tama Vuusum Danni kisiku?>> 3Yeezu yaa tulisi ba ayen, <<Nama an diem karim Deevid wie diipo ate kom a jam ta wa ale wa doama ate wa nye dii la? 4Wa le jo Wen yenni po a pai boroboroku a wɛ a ŋɔbi ale ge a wie a te wa doama ate ba mɛ a ŋɔbi la. Ba kan te nuru yoŋ a ŋɔbi boroboroku de ka Wen yenni kaabteerɔma nyiini ale a ŋɔbi ku.#6:4 1 Samuel 21:1-6 5Yeezu yaa weeni ba ayen, <<Mi Saalɔbiika ale soa Vuusum Danni.>>

6Vuusum Danni di choa ale ŋman jam paari la, Yeezu yaa ga jo ba tuka dɔkku po a boro a sak. Nuru wanyi ale jam maa boro ate wa juga nisa kpi. 7Sinsak sagrɔma ale Farisiima ale jam maa bo dula la, yaa jam a limisi ayen ba nya ase Yeezu le tebi nuruwa yaase wa kan tebi, ku ale jam ka ba Vuusum Dai la ate ba nya suik a ŋma wa. 8Alege Yeezu jam miŋ ba ale a poli diila kama ate wa yaa weeni nuru waai ate wa nisaŋa a kpi la ayen, <<Jam zaani dela.>> Nuruwa yaa yiti a ga zaani dula, 9ate Yeezu yaa weeni nuruma ayen, <<Mi a yaali ayen m bek ni ka wari ayen, Vuusum Danni a weeni ti kama ayen ti a tom tuimaŋsa a te nuruba yaa di a weeni ti kama ayen ti tom tuimbaata a te nuruba? Ku be a weeni ti kama mɛ ayen ti te nuruba nyuvuri yaa ti ko ba?>> 10Wa yaa gisi nya ba meena a yaa weeni wa ayen, <<Teeri fi nisaŋa,>> ate nuruwa yaa teeri wa nisaŋa a deri ta nyiŋyɔgsa. 11Alege ku yaa deri te Farisiima suipuurum nna yegayega ate ba yaa zɔk ale chaab ba le ba nye Yeezu diila.

12Da ŋala po dek ate Yeezu a ga jueli guuk kunyi zuk ayen wa puusi Wen. Dila danni wa jam puusi ka Wen kantueŋka ale yokku meena. 13Vari ale veenti la, wa yaa wi wa ŋaaŋviirɔma a yaa lueri a ta nyini ba meena po nuruba pi ale baye a te ba yuei ayen tuimtomdɔba. Tuimtomdɔma de jam ale: 14Simon ate wa jam a wi wa ayen Piita la ale Andiru wa suok a jam le la ale Jeemsi ale Jɔɔn ale Filip ale Batolomiu 15ale Matiu ale Tomasi ale Alfiyus nidoabinni Jeemsi ale Simon ale jam a nye ayen Juuma a nya ba dek zuk la 16ale Jeemsi nidoabinni Judas ale Judas Iskariot bumbobrɔwa.

17Yeezu yaa nyini guuku zuk a siŋ ale wa ŋaaŋviirɔma a ga zaani juijui ate tɛŋka a dua magsi chaab la. Wa ŋaaŋviirɔma yegayega ale nuru boari mɛ nna yegayega a jam nyini Judia tɛŋka meena ale Jerusalem ale Taaya ale Saidon tɛŋsaŋa ale kali nyakpiemu nɔi la ayen ba wom wa sinsaŋŋa abe wa tebi ba tuetaŋa mɛ. 18Baai ale jam ta chichirik baata ba zuima po ate ti a daani ba la a jam maa nya nyiŋyɔgsa kama. 19Nuru boanni a kasim jam a tusi chaab ayen ba tiri wa, dii nyiŋla, pagrim ale jam nyini wa jigi a jam a te ba meena nyiŋyɔgsa.

20Wa yaa zak wa zuk a nya wa ŋaaŋviirɔma ale deri piilim sakka ayen, <<Nama, mi ŋaaŋviirɔma, baai ale ka ŋanjaksa la ta suipeentik kama, dii nyiŋ la, nama le dɛ Wen naamu. 21Nama baai ate kom ta ni yɔgyɔgla la, ta suipeentik kama, dii nyiŋ la, ni chum le chak. Nama baai ale a kum yɔgyɔgla la, ta suipeentik kama, dii nyiŋ la, ni chum le la. 22Nama baai ate nuruba kisi ni la, ale a zɛri ni ale a le ni ale a weeni ayen ni ka nuru baata la, nyaŋa de meena ni ale a va Mi Saalɔbiika nyiŋ la ta suipeentik kama. 23Ni ta suipeentik dai dila danni, abe ni ta mariŋka ale ni tiirimu a zuak kama wenŋmazuk, ka dila ate ba koma a jam nye Wen biisiteerɔma. 24Alege nama baai ale jigsi la ku ale bie ni jigi kama dii nyiŋla, nama poom deri nya ni masimu kama. 25Nama baai ale chak yɔgyɔgla la, ku ale bie ni jigi dii nyiŋla, kom le yik ni chum diipo. Nama baai mɛ ale a la yɔgyɔgla la, ku ale bie ni jigi dii nyiŋla, ni le kum chum diipo. 26Nama baai ate nuru meena a te ni pimpauk la, ku ale bie ni jigi dii nyiŋla, ba kokpieŋsaŋa a jam biisi ka dila dekdega a magsi chaab ale biisiteerɔ baai ale jam a velim dipo ayen ba ka Wen biisiteerɔba la.

27<<Alege mi a weeni ka mama ayen ni wom, ni a yaali ni dachaasa abe ni a tom tuimaŋsa a te baai ale kisi ni la 28abe ni a niak baai ale a ka a te ni la, abe ni a puusi Wen a te baai ale a lɛ ni la. 29Waai a dan fɔbi fi tapiak, virim ka choawa mɛ a te wa ate wa fɔbi. Waai mɛ abe dan yeeri fi garuk geli ale pagrim, yeeri garuk kuui mɛ ate fi jo garuk genni a vi ku zuk la a te wa. 30Waai a dan juisi ni jaab, ni te wa. Waai abe dan pai ni jaab mɛ ni kan bek wa ate wa te ni. 31Ase fi ale a yaali nuruba nye dii a te fu la, fi mɛ nye dila. 32Fi daa yaali baai ale a yaali fu la, ka boan jaab nyuenta ate fi a nya? Biem nyam a yaali baai ale a yaali ba la kama. 33Ni be daa a tom tuimaŋsa a te baai ale a tom tuimaŋsa a te nama la, ka boan nyuenta ate fi le nya? Tuim baata nyam a nye ka dila dekdega mɛ. 34Ni be dan te nuru maarika alege ta yiila ayen wa mɛ ale te ni maarika, ka boan nyuenta ate fi le nya? Tuim baata nyam mɛ a te maarika ka tuimbaata nyam ale a yiili ayen bala mɛ le te ba maarika. 35Alege ku a fɛ kama ate ni ta yaalika ale ni dachaasa abe ni a tom tuimaŋsa a te nuruba, abe ni kan a yiili ayen ba mɛ le tom tuimaŋsa a te nama mɛ, abe ni a te nuruba maarika, abe ni ka a yiili ayen nuru bala mɛ ale maari nama mɛ. Ni dan nye nyaŋa de meena ni tutuna kpiema ŋaai ale bo ŋaaŋ la, le zuak ka nna yegayega ate ku sak ayen ni ka Wen Kpienni nidoabilisa, dii nyiŋla, wa diem ta jiirim kama ale baai ale kan a nye nuru jiam ase ba nin nye wari a te ba la. Wa ta jiirim mɛ kama ale gaasa nyam. 36Ni ta jiirim ase ni Kowa Wen ale ta jiirim diila.

37<<Ni dan a bo nuruba buusa, nama dek mɛ le nya ka buusa boka. Dila nyiŋla, ni kan a bo nuruba buusa. Ni vɔŋ a te nuruba ate nama mɛ nya vɔŋteka. 38Te, ate ba le te fu, a magsi nalimnyiini, a duŋ, a choa, ate ku sueri a nyini a doa fi naŋsa zuk. Jabuui ate fi pai magsi a te la, dila dek ate fi le nya.>>

39Wa ŋman pilim magsi wamagsini di choa ayen, <<Yio a baga a dari yio? Ba kan lo goluk po? 40Ŋaaŋviirɔ a kan gaam wa sagrɔ alege waai ate ba sak wa nalimnyiini la a nye ase ka wa sagrɔwa la. 41Ka boa ate fi a nya yeoku ale bo fi vaanchoa nummu po la ale kan nya dakoluku ale bo fidek nummu po la? 42Yaase fi ale nye ka sɛ a weeni fi suok ayen, <M suok, basi ate m yeeri yeoku fi nummu po, alege fidek an nya dakoluku ale bo fi nummu po la? Sakpaŋ zula nyɔnɔ, dɛ niŋ a yeeri dakoluku fidek nummu po, ate fi ale baga nya nalimnyiini a yeeri yeoku fi suoku nummu po. 43Tiib maŋ a kan yɔni yɔn baata yaase tiib biok a yɔni yɔn maŋsa. 44Tiib meena ba seba bu ka bu yɔnaŋa nyiŋ, ba gbesi chicheba kangbegi zuwa? Yaase fi nya kinkama zauŋ zuwa. 45Nuru maŋ a tom ka tuimaŋsa a ta a nyini wa suinum po. Nuru biok mɛ a tom ka tuimbaata a ta a nyini wa suinum bioku po. Dii nyiŋla, wa dii ale bo nuru suinum po la, ka dila dekdega ate wa a biisi.

46<<Ka boan nyiŋ ale soa ate ni a wi mu ayen, <M Nyɔnɔ Yeezu Kirisita, M Nyɔnɔ Yeezu Kirisita,> ale kan nye dii ate mi a weeni ni la? 47Nuru waai a dan jam mi jigi a wom m wieŋa ale va ŋa m le weeni a sak ni wa ale ka nuru waai choa la. 48Wa a nye ase ka nuru ale boro a sɛ yeri la. Wa tu ka goluk a yaa nyubi nyubini piuŋ zuk, ate ŋmoruk a dan ni a sueri tɛŋka meena, beli yaa sueri a nyini ate nyiamu a chali ga a nak yenni alege bu an baga viti yenni a lɔnsi, dii nyiŋla, wa sɛ di kama nalimnyiini ate di pagra. 49Alege waai ale wom ale an va ŋa la a nye ase ka nuru ale sɛ yeri tɛŋka zuk ate di an za nyubi dek zuk la, buboalika a dan sueri nyini a ga tagli yenni di a lo kama.>>

Currently Selected:

Luuk 6: BWU

Highlight

Copy