Luuk 5

1Ase nuru boanni ale jam tusi va Yeezu ayen ba wom Wen wanni la, wa jam za ka Genesaret nyakpiemu nɔi. 2Yeezu yaa nya ale ŋaaruŋta tiye a za nyakpiemu nɔi. Jum yigrisaŋa jam pai ti zaani kama ale ga boro a sugri ba ŋmaasaŋa. 3Wa yaa jo kali ŋaaruŋ kuui ate Simon soa la po, a yaa weeni wa ayen wa dam ku ate ku siŋ nyiamu po maga. Simon yaa dam ku ate ku siŋ nyiamu po maga ate Yeezu yaa kali ku po ale a sak nuruma. 4Wa ale biisi nueri la, wa yaa weeni Simon ayen ba dam ba ŋaaruŋtaŋa a siŋ nyaliuŋku a yuk ni ŋmaasaŋa a basi du a yik juma. 5Simon yaa tulisi wa ayen, <<M Kpagi yaa, yokku meena tama kasim a yuk kama alege ti an yik jaaboa. Alege fi dan weeni dila, mi le yuk nya.>> 6Ba yaa yuk basi nyiamu po a yik juma nna yegayega, ase ba ŋmaasaŋa ale a cheeri la. 7Ba yaa kamsi wi ba vaanchaama ale bo ŋaaruŋ kunkula po la ayen ba jam a maa maari ba. Ba ale jam la, ba yaa maa chaab a vaari jumaŋa a sueri ŋaaruŋta tiyewa ate ti jam tali maga ate ti siŋ nyiamu tɛŋ. 8Simon Piita ale jam nya dii ale nye la, wa yaa kpi duna tɛŋ Yeezu niŋ a weeni wa ayen, <<Basi mu m dek nyiini, m Nyɔnɔ Yeezu Kirisita, dii nyiŋla, mi ka tuimbaata nyɔnɔ.>>

9Ku jam cha wa le wa vaanchaama meena kama dii nyiŋ la ba le yik jumaŋa a soa diila. 10Ku be jam ka dila Zebedi nidoabilisaŋa Jeemsi ale Jɔɔn jigi baai ale jam ka Simon vaanchaab la. Yeezu yaa weeni Simon ayen, <<Kan chali yɔgsummoa a nyini jinla fi ale ta ka nuruba jam mi jigi.>> 11Ba ale dam ba ŋaaruŋtaŋa a jueli kunkɔŋni la, ba yaa basi jaab meena alege va Yeezu.

12Ase wa ale diem jam bo tɛŋ kpieŋsaŋa kanyi po la, nuru yaa jam wa jigi ale gama tuem, wa ale nya Yeezu la, wa yaa kpi duna tɛŋ wa niŋ a saalim wa ayen, <<M dek nyɔnɔ, fi daa yaali, fi baga a tebi mu kama.>> 13Yeezu yaa teeri wa nisaŋa a tiri wa ale weeni ayen, <<M siak ya. Ta nyiŋyɔgsa.>> Wa ale weeni dila la, tuemu yaa deri basi wa ate wa nya nyiŋyɔgsa. 14Wa yaa weeni wa ayen, <<Kan weeni a sak waai fi ale nye dii a nya nyiŋyɔgsa la, alege cheŋ ga pai fidek a sak kaabteerɔwa a nye tiirim kaabka fi nyiŋyɔgsaŋa nyiŋ, ase Moosis ale jam weeni diila ate nuruma nya.>> 15Alege waai meena jam wom Yeezu wie ka nna yegayega ate nuru boari a yaa jam wa jigi ayen ba wom wa sinsaŋŋa abe wa tebi ba tuetaŋa. 16Alege Yeezu jam basi ba kama ale cheŋ sagni po ayen wa puusi Wen.

17Da ŋala po dinyi ase Yeezu ale jam boro a sak la, Farisiiba ale Sinsak sagrɔma ale jam kali moata, baai ale jam nyini Galili ale Judia ale Jerusalem tɛŋ kpaŋsaŋa po meena a jam la, ate Naawen pagrimu a jam bo ale wa ayen wa tebi. 18Wa ale jam boro a sak la, nuruba yaa jam ji nuru ale tiak. Wa nisa ale wa naŋsa ale jam kpi. Ba yaa pii nyiŋ ayen ba ta wa jo a dueni Yeezu niŋ, 19alege nuruma jam piisi ka nna yegayega ate ba an jam baga vuri ba po a paari Yeezu. Ba yaa pai nuruwa a ta jueli dɔkku zuk a vuri vɔrup gboŋku suŋsuŋ a yaa pai miisa a bobi tiaka a pai wa ta va vɔrumu po a siŋ dueni Yeezu niŋ. 20Yeezu ale jam seba ayen ba ta siaka yegayega ale wa la, wa yaa weeni nuruwa ate wa nisaŋa ale wa naŋsaŋa a kpi la ayen, <<Nidoa, M vɔŋ fi wabaataŋa a te fu kama.>>

21Sinsak sagrɔma ale Farisiima yaa piilim a bek ayen, <<Ka wana ale nna a biisi kisuk wanni de? Ka wana ale baga a voŋ wabaata a te? Ka Wen nyiini.>> 22Alege Yeezu a jam seba ba ale a poli diila kama, ate wa bek ba ayen, <<Ka boa ale soa ate ni ta bek ŋala chaab ni popola po? 23<Kun dek ale moali ate fi weeni? M vɔŋ fi wabaataŋa a te fu, yaa yiti a cheŋ?> >> 24Mi a yaali kama ayen ni seba ayen Mi Saalɔbiika a ta pagrim kama tɛŋzuk meena a baga vɔŋ nuruba wabaata a te ba.>> Wa yaa cheem weeni yɔgnyieŋka ayen, <<Yiti zaani ŋmai, abe fi pai fi tiaka a cheŋ kuli fi yenni.>> 25Nuruwa yaa deri yiri zaani ba meena niŋ, a pai wa tiaka a pak Wen a kuli. 26Ku yaa cha waai meena ale za dula jigini la. Ba yaa pak Wen ale a weeni ayen, <<Jinla, tama nya ka wachaŋ.>>

27Kude ŋaaŋnyiŋ Yeezu yaa nyini nya lampoo cheesirɔ wa yuei jam le Livai. Wa jam kala ka lampoo cheesika dɔk po a tuesi lampoo. Yeezu yaa weeni wa ayen, <<Yiti a jam va mi.>> 28Yeezu ale weeni dila la, Livai yaa basi wa tuimaŋa meena ale yiti va wa.

29Livai yaa ta Yeezu a kuli yeri a nye tigi kpienni a te wa. Lampoo cheesirɔba nna yegayega ale nuru ba chaab ale jam maa kala a dɛ ale ba. 30Farisiima ale ba Sinsak sagrɔma ale nya ale ba kala a dɛ la, ba yaa ŋuuni ale chaab a yaa bek Yeezu ŋaaŋviirɔma ayen, <<Ka boa ate nama a gum chaab ale lampoo cheesirɔba ale wabaata nyam a kala a dɛ ale a nyu?>> 31Yeezu yaa tulisi ba ayen, <<Baai ale ta nyiŋyɔgsa la kan yaali tebirɔ alege ka baai ale a yuak la. 32Mi an jam ayen m wi ka wayɔrisima nyama alege ka wabaata nyam ate ba laŋ nyeka.>>

33Ba yaa weeni Yeezu ayen, <<Jɔɔn Sokateerɔwa ŋaaŋviirɔma a nyiem kasim a bobi ka nɔi ale a puusi Wen mɛ. Farisiima ŋaaŋviirɔma mɛ a nyiem a bobi kama, alege, fi Yeezu, ŋaaŋviirɔma kan bobi nɔi alege goanti a dɛ.>> 34Yeezu yaa tulisi ba ayen, <<Fi baga a nye ate baai ale jam ba nya faarika la a bobi nɔi alege ate nipok fiaka nyɔnɔwa a boro ale ba? 35Alege ku cheena ate ba le yik nipok fiaka nyɔnɔwa a ta cheŋ, dila powa ba yaa le bobi nɔi.>> 36Wa yaa ŋman magsi wamagsini di choa ayen, <<Nuru kan cheeri garuk paaluk garuchiak a laŋ garuk kpaga. Ba dan nye dila ba a kaasi garuk paalukku kama. Garuchiak paalika mɛ abe kan magsi garuk kpakka.>> 37Wa ŋman pilim a magsi di choa ayen, <<Ba kan pai da paalik a su bunlɔk kpak po. Ba dan nye dila, bunlɔkku a na kama ate daamu a waaŋ. Ku dan nye dila, nuruwa a jɔk wa bunlɔkku ale wa daamu meena kama. 38Da paalik a magsi ka bunlɔk paaluk sukka.>>#5:37-38 Nya fotowa, Matiu 9:17. 39Wa yaa ŋman weeni mɛ ayen, <<Nuru abe karo a nyu da kpaga ale ŋman a yaali da paaliga, dii nyiŋla, wa le weeni ayen ka da kpakka ale nala.>>

Currently Selected:

Luuk 5: BWU

Highlight

Copy