Luuk 7

1Yeezu ale biisi ate nuruma a wom nueri la ŋaaŋnyiŋ wa yaa cheŋ Kapernaum tɛŋka.

2Aroom tɛŋka tugurik tɔŋdɔ kpagi dinyi ale jam ta wa tomteerɔ. Kpagni jam a yaali wa ka nna yegayega. Wa tomteerɔwa yaa jam a yuak a moata kum. 3Kpagni ale wom Yeezu wie la, wa yaa tom Juuma nisɔmma ba gela ayen ba cheŋ a ga wi Yeezu ate wa jam tebi wa tomteerɔwa. 4Ba ale jam Yeezu jigi la ba yaa saalim wa ayen, <<Kpagni de ka waai ale magsi ayen fi maari wa la, 5Wa a yaali ti nuruma ka nna yegayega ate wa sɛ tuka dɔk a te ti.>> 6Yeezu yaa va ba a cheŋ kpagni yenni. Wa ale jam tali maga ate wa paari yenni la, kpagni yaa tom wa doaba ayen ba ga weeni wa ayen, <<M dek nyɔnɔ, kan daani fidek ayen fi jam m yenni. Mi an welema ale fi nin jam jo m yenni po. 7Be ka dila ale soa ate m dek an jam fi jigiya. Biisi biik nyiini ale m tomteerɔwa ale nya nyiŋyɔgsa kama. 8Mi mɛ ka nuru waai ale a tom a te kpaga ŋa chaab la. Alege m ta tugurik tɔŋdɔba kama a nya ba zuk. M dan weeni ba wanyi ayen wa cheŋ dela, wa a cheŋ kama, m dan weeni wanyi mɛ ayen wa jam de, wa a jam kama, m dan weeni m tomteerɔwa ayen, <Nye nna,> wa a nye kama.>> 9Wa ale weeni diila, yaa deri cha Yeezu nna yegayega. Wa yaa cheem weeni nuru boanni meena ale va wa la ayen, <<Mi a weeni ni ka wensie, mi an nya nuru Izirali ate wa ta siaka ase nuruwa dɛ la.>> 10Kpagni ale tom nuru baai la, a yaa pilim kuli kpagni yenni a ga a paari a nya ale tomteerɔwa a ta nyiŋyɔgsa.

11Ku ŋaaŋnyiŋ ate Yeezu cheŋ tɛŋ kanyi ate ba a wi ayen Neen. Wa ŋaaŋviirɔma ale nuru boari nna yegayega ale jam maa va wa. 12Ba ale ga boro a moata nɔi dii ale a jo tɛŋka po la, Yeezu yaa nya ale nuru wanyi a kpi ate ba ji a ta a nyini. Wa mawa nidoabili meena a jam le la. Nipowa jam ka pukɔgi. Nuru boari yaa jam maa nyini tɛŋka po a va wa. 13Nyɔnɔwa Yeezu Kirisita ale nya pukɔgini la, jiirim yaa yik Nyɔnɔwa ate wa weeni pukɔgini ayen, <<Kan a kum.>> 14Yeezu yaa cheŋ a ga tiri tiaka ate nuru baai ale ji kpiewa la, yaa deri zaani. Yeezu yaa weeni kpiewa ayen, <<M biiga, mi ale a weeni fu ayen fi yiri.>> 15Kpiewa yaa deri yiri a biisi ate Yeezu yaa pai wa a te wa mawa. 16Yɔgsum yaa jam yik ba meena ate ba a te Wen pimpauk ale weeni ayen, <<Biisiteerɔ kpioŋ ale yiti tama po. Wen abe le jam wa nuruma jigi.>> 17Wanni de ate Yeezu nye la, yaa jam tagli Judia tɛŋka meena ale tɛŋ sii meena ale jam kala a gilim ka la.

18Jɔɔn Sokateerɔwa ŋaaŋviirɔma ale wom wieŋa de meena la, ba yaa weeni sak wa. Wa yaa wi ba baye a tom ba 19ayen ba cheŋ Nyɔnɔwa Yeezu Kirisita jigi a ga bek wa ayen, <<Ka fi ale waai ate Wen weeni ayen wa le tom ate wa jam la, yaa ti a yiili nuru yoŋŋoa?>> 20Ba ale jam paari Yeezu la, ba yaa weeni ayen, <<Jɔɔn Sokateerɔwa ale tom ti fi jigi ayen ti bek fu ayen, <Ka fi ale waai ate Wen weeni ayen wa le tom ate wa jam la, yaa ti a yiili nuru yoŋŋoa?> >> 21Va ŋala po, Yeezu jam tebi ka nuruba nna yegayega tueta ale yiak chichirik baata nuruba zuima po a basi, ale lak yeeba yegayega nina. 22Yeezu yaa tulisi ba ayen, <<Ni ŋman pilim cheŋ a ga weeni Jɔɔn dii ate nama a wom ale nya la. Yeeba a nya, gbansa mɛ a baga a cheŋ, gama mɛ a nya nyiŋyɔgsa. Tukpara nyam a wom, ale nak kpieba a yiti. M be sak ŋanjaksa mɛ Wen wamaŋsaŋa wie.#7:22 Azaya 35:5-6, 26:19, 29:18-19, 61:1 23Nuru waai ale kaa jɔk wa siaka mi nyiŋ la, sui a peenti kama.>>

24Jɔɔn ŋaaŋviirɔma ale basi Yeezu ale a kuli la, Yeezu yaa deri piilim a biisi Jɔɔn wie ale nuru boanni, a bek ba ayen, <<Nama ale jam nyini cheŋ sagni po la nama poli ayen ni nya ka boa? Nama a poli ayen ni nya ka nuru ate wa a nye ase wuuk ate viok a fuk la? 25Nama nyini ayen ni nya ka nuru ate wa jo garuk naliŋsa? Aaya, nuru baai ale a jo garuk naliŋsa ale a dɛ masim la, a bo ka nalima yie. 26Ka boa ate nama a nyini ni nya? Ka biisiteerɔ? Mm, mi a weeni ni kama wa gaam biisiteerɔ. 27Ka waai ate ba ŋmarisi wa wie Wen Gbaŋka po ayen, <<<Nya, m tom ka tintomdɔ waai ale wa gomsi suiku la ayen wa dɛ fi niŋ.>> (Malakai 3:1) 28Mi a weeni ni kama ayen Jɔɔn a gaam ka waai meena ate nipok a biak la. Alege waai ate ba a zaab Wen naamu po la, a poom gaam Jɔɔn kama.>> 29Nuruma meena a jam wom wa kama. Ba ale lampoo cheesirɔma a jam siak kama a va wie ŋaai meena ate Wen a yaali la ate Jɔɔn a te ba soka. 30Alege Farisiima ale Sinsak sagrɔma a jam zɛri Wen ale a yaali ayen wa nye dii a te ba la kama ale zɛri ayen Jɔɔn kan te ba soka.

31Yeezu yaa ŋman weeni ayen, <<Ka boan jaab ate mi le pai a magsi chaab ale gaŋka de? Ba a nye ase ka boan la? 32Ba a nye ase ka bimbaansa ale kala yaba peelim po a wi chaab a weeni ayen, <Tama peeri wiisa kama alege fi kan gɔgi? Tama be ŋman yi ka kuun yiila alege fi kan kumu?> 33Jɔɔn Sokateerɔwa ale jan jam la, wa kan dɛ ŋandiinta yaase wa a nyu daam, ate ni jam a weeni ayen, <Wa ta ka chichirik biok wa zuk po.> 34Mi Saalɔbiika ale jam, a dɛ ale a nyu ale nuruba la, ate ba jam a weeni ayen, <Ni nya nuruwa de. Wa ka puuk nyɔnɔ ale a nyu daam mɛ nna yegayega. Wa ka lampoo cheesirɔba ale wabanyeerisa doa.> 35Wen yammu a sak nuruba ka wa wensie suitaŋa tii ale ka tɔgatɔga la.>>

36Farisii wanyi ale jam wi Yeezu ayen wa jam dɛ ŋandiinta ale wa ate Yeezu yaa cheŋ ate ba kala a dɛ. 37Tɛŋ kala po nipok ale jam boro. Wa jam ka wabanyeerik. Wa ale wom ayen Yeezu a bo Farisiiwa yeri a dɛ ŋandiinta la, wa yaa ta kpa buui nyum ale masa la jam Yeezu jigi, kpaamu jam sueri ka kpaam leŋ. 38Wa yaa zaani Yeezu ŋaaŋ a kum ale pai wa ninyiamu a sugri Yeezu naŋsaŋa alege domsi kali tɛŋ a pai wa zuisaŋa a bili wa naŋsaŋa ate si ko, ale puusi, yaa pai kpaamu a kpiiri si zuk. 39Farisiiwa ale nya dila la, wa yaa weeni wadek wa popola po ayen, <<Nuruwa de a daam dan sum ka Wen biisiteerɔ, wa ti seba nipowa de ale ka waai choa a tiri wa la kama, dii nyiŋla, nipowa ka wabanyeerik.>>

40Yeezu yaa tulisi wa ayen Simon, <<M ta ka wari ayen m weeni a sak fu.>> Simon a yaa bek wa ayen, <<Ka boan wari yaa, sagrɔ?>> 41Yeezu yaa weeni wa ayen, <<Nuru ale jam boro a yaa piem wa ligra a te nuruba baye. Nuruma de wanyi a jam piem ka ligbie kobsinu, wanyi mɛ piem ligbie pisinu. 42Ba nɔi bayewa ale kan ŋman jam baga a tuni nuruwa ligraŋa la, nuruwa yaa vɔŋ te ba meena ayen ba basi ba pamaŋa tunika. Ka ba wana dek ale ta yaalika yegayega yɔgyɔgla de ale nuruwa de?>> 43Simon yaa tulisi Yeezu ayen, <<Mi a poli ayen ka waai ale ta nuruwa ligra yegayega ate wa vɔŋ te wa la.>> Yeezu yaa tulisi wa ayen, <<Fi biisi ka wensie,>> 44Wa yaa viriŋ tuk nipowa a bek Simon ayen, <<Fi nya nipowa de? Mi ale jo fi yenni po la fi an te mu nyiam ayen m ŋoa sugri m naŋsaŋa alege nya wade sugri ka mi naŋsaŋa ale wa ninyiam ale ŋman pai wa zuisaŋa a bili si ate si ko. 45Fi an te mi tia, alege diipo ate mi ga jo yenni de po la, wa an diem basi mi puusa. 46Fi an pai kpaam a kpiiri m zuwa, alege wa pai ka kpa masik a kpiiri basi m naŋsaŋa zuk. 47Wa ta yaalika ka nna yegayega dii nyiŋla, wa nya vɔŋ teka kama wa wabaataŋa nyiŋ. Alege waai ale nya vɔŋteka maga, a ta ka yaalika maga mɛ.>> 48Yeezu yaa weeni nipowa ayen, <<Fi nya vɔŋteka kama.>> 49Baai meena ale jam maa boro a dɛ la, a yaa jam a bek chaab ayen, <<Ka wana ale nna, a vɔŋ nuruba wabaata a te ba?>> 50Alege Yeezu yaa weeni nipowa ayen, <<Fi siaka vari fu basi kama, cheŋ ale suiyɔgni.>>

Currently Selected:

Luuk 7: BWU

Highlight

Copy