Luuk 8

1Ku ŋaaŋnyiŋ ate Yeezu yaa nyiem gilim a cheŋ tɛŋ kpieŋsa ale tɛŋ fiisa a mooli ale a sak nuruba wamaŋsaŋa wie a magsi chaab ale Wen naamu. Wa ŋaaŋviirɔma pi ale bayewa a jam maa bo ale wa kama. 2Nipooba gela mɛ baai ate wa jam yiak chichirik baata ba zuima po a basi ale ba gela mɛ baai ate wa jam tebi ba tueta la a jam maa va wa kama. Nipooma de jam ale Mɛɛri ate ba a wi ayen Magdalene ate Yeezu yiak chichirik baata tiyopɔi wa zukku po a basi la ale 3Chuuza ale jam ka Naawa Ayerod tomteerɔma kpagi la, powa Joana ale Suzana ale nipooba ba chaab nna yegayega. Nyaba de meena ale jam pai badek ŋanta a nya Yeezu ale wa ŋaaŋviirɔma zuk.

4Nuru boari a yaa nyini tɛŋsa tɔgatɔga a jam wa jigi ase wa ale va si po a taam la. Ba ale jan jam wa jigi a piisi nna yegayega la wa yaa piilim sakka ale wamagsini ayen, 5<<Nuru wanyi ale jam nyini a cheŋ wa yuk ŋanbie, bieŋa gela a yaa lo suiku niŋ ate nuruba a yaa tabi ŋa zuk taam ate nuinsa a deri jam pisi ŋa meena. 6Ŋa gela mɛ a lɔ tintana po. Ŋa yaa nyini nna nwuli, dii nyiŋla tantaŋa an jam soa diiya dula jigini ate nyiam a duagi. 7Ŋa gela mɛ a lo munsa po a yaa nyini a geri ŋa. 8Ŋa gela mɛ a lo tɛŋ naluŋ po a nyini a chim biak a bɛ bie kook dinyi dinyi nyiŋ.>> Yeezu yaa weeni ba ayen, <<Waai ale ta tue a wom la, a wom mi nalimnyiini.>>

9Wa ŋaaŋviirɔma ale bek wa wamagsini de kiri la, 10wa yaa tulisi ba ayen, <<Wen basi kama ate nama seba wa naamu wasusuŋŋa alege nuruba gela jigi, ŋa chim ka wamagsima, ate ba a nya ale a nya alege ba kan miŋ, ba a wom ale a wom alege ba kan miŋ ŋa.>>#8:10 Azaya 6:9 11Wamagsini kiri ale nna: Bieŋa ka Wen wieŋa. 12Be ŋaai ale lo suiku po la ka nuru baai ale wom Wen wieŋa la, ate jabiok a yaa jam jo ba suiniimaŋa po a pai ŋa ta nyini ate ba kan nya suik a siak a te ŋa a nya varibasika. 13Be ŋaai mɛ ale lo tintanaŋa po la, a nye se ka baai ale wom ŋa ate ba sue peenti alege ŋa kan jo ba suiniimaŋa po nalimnyiini la. Ba yaa va ŋa maga dega, alege nyenyaka a dan jam ba jigi Wen wieŋa vaka nyiŋ, ba nyiem deri pai ŋa vaka a basi. 14Be ŋaai ale lo munsaŋa po la, a nye ase ka baai ale wom ŋa alege tɛŋka po wieŋa popolaŋa ale ba ligra yaalika yegayega ale ba ŋanyaalika, ŋala meena a dɛ ka Wen wieŋa ate wamaŋ an baga nyini ŋa po a nyini. 15Be ŋaai ale lo tɛŋ naluŋku po la, a nye ase ka baai ale wom ŋa ale ta ŋa ba suiniima po a va ŋa nalimnyiini ale a zuli wa ale a tom tuimaŋsa la.

16<<Nuru karo a toati wa bolim zeuŋ ale ŋman pai jaab a lik ku yaase wa pai ku a zaani gaduok tɛŋŋa. Alege wa dan toati, wa a pai ku a zaani ka jaab zuk ate ku a nya, ate baai ale a jo dɔkku po la a nya bolimu. 17Wari karo a suk ate di kan nyini peelim ate nuruba a nya, yaase wari karo a chim wasusugi ate di kan nyini peelim ate waai meena a seba. 18Kpesi fidek ale fi ale a wom diila, waai ale ta ŋanta yega la ale nya ŋanta a gum du, alege waai ale kan ta la, wa ale a poli ayen wa ta jabuui la, wa le jɔk jabula.>>

19Yeezu mawa ale wa suataŋa a yaa jam wa jigi. Alege ba an baga a nya wa dii nyiŋla, nuruma a jam piisi kama. 20Nuruma yaa weeni Yeezu ayen, <<Fi mawa ale fi suataŋa a za peelim a yaali ayen ba nya fu.>> 21Yeezu yaa weeni nuruma ayen, <<Mi ma ale mi suata ale baai ale a wom Wen wanni ale a nye di ni a weeni diila.>>

22Dai yeŋ ate Yeezu ale wa ŋaaŋviirɔma a yaa jo ŋaaruŋ po ate wa weeni ba ayen, <<Ni te ti taam nyakpiemu kauk kunkula.>> Ba yaa siak ate ba a taam. 23Ba ale bo nyiamu po a cheŋ la, goom yaa deri yik Yeezu. Va kpioŋ a yaa yiti ale ba diem bo nyiamu po. Ba ŋaaruŋku a yaa jam sueri ale nyiam ate ba poli ayen ba bo ka kum po. 24Ba yaa nak Yeezu a yiri a weeni wa ayen, <<Ti Kpagi yaa, ti Kpagi yaa, ti boro a kpi kama.>> Yeezu yaa yiti a weeni vioku ayen ku basi abe nyiamu a nye balaa. Vioku a yaa deri basi ate nyiamu mɛ a baliŋ. 25Yeezu yaa bek wa ŋaaŋviirɔma ayen, <<Ni siaka a bo ka bɛ?>> Ku yaa cha ba ate ba kpaziim a nak ate ba yaa weeni chaab ayen, <<Nuruwa de, ka wana ate wa baga a biisi ale vioku ale nyiamu ate ba a wom wa nɔiya?>>

26Ba yaa jam paari Gerasa tɛŋka. Kaai ale tuk Galili tɛŋka la. 27Wa ale ga nyini ŋaaruŋku po a siŋ tɛŋ la, Gerasa denɔ ate chichirik baata a jam bo wa zuk po a yaa jam Yeezu jigi. Ku jam beni ka nna yegayega, wa an jam a jo gatta, wa abe ka yeri po, wa jam bo ka boosuta po. 28Wa ale nya Yeezu la, wa yaa lo tɛŋ wa niŋ a kaari ate ku jueli ayen, <<Fi a yaali ka boa m jigiya, fi Yeezu Wen Dii Ale Bo Wenŋmazuk La Nidoabinni? Mi a saalim, kan namsi mu.>> 29Dii nyiŋla, Yeezu a na chichirik bioku kama ayen ku nyini wa zukku po a nyini. Wa jam ka chichirik biok kuui ale kasim a daani wa nna yegayega la. Ba jam yik wa kama a pai chɔrima a bobi wa nisa ale wa naŋsa alege wa nyiem diem gebi ŋa alege ate chichirik bioku a ta wa cheŋ ga bo sagni po. 30Yeezu yaa bek wa ayen, <<Fi yuei ale boa?>> Wa yaa weeni ayen, <<Anuruboari,>> dii nyiŋla, chichirik baataŋa a jam piisi kama a jo wa. 31Chichirik baataŋa a yaa saalim Yeezu ayen wa kan na ti ate ti cheŋ ninam jigiya.

32Die ale jam piisi a za guuk zuk dula jigini a dɛ. Chichirik baataŋa yaa saalim Yeezu ayen wa basi ate ti nyini a ga jo dieŋa po, ate wa te ŋa suik. 33Chichirik baataŋa yaa nyini nuruwa po a ga jo dieŋa, ate ŋa meena chali siŋ nyakpiemu po a kpi.

34Ase baai ale jam a nya dieŋa zuk la ale nya dii ale nye la, ba yaa chali cheŋ tɛŋ kpieŋka ale tɛŋ kpaŋsaŋa po, a weeni sak ba. 35Nuruma yaa nyini cheŋ Yeezu jigi ayen ba nya dii ale nye la. Ba yaa nya nuru waai ate chichirik baataŋa a poom ta wa la ale wa kala Yeezu tɛŋ a jo gatta. Wa an ŋman a yesimu. Ate yɔgsum yik ba. 36Baai ale nya dii meena ale nye la, a yaa weeni sak nuruba ba chaab ayen nuru waai ate chichirik baataŋa a jam ta wa la a yaa ta ka nyiŋyɔgsa. 37Gerasa demma meena yaa weeni Yeezu ayen wa nyini ba tɛŋka po a nyini, dii nyiŋla yɔgsum nna yegayega ale jam yik ba. Yeezu yaa cheŋ ga jo ŋaaruŋku po a pilim ŋmani. 38Nuru waai ate chichirik baataŋa ta wa la, a yaa saalim Yeezu ayen wa basi ate wa maa va wa a cheŋ. 39<<Pilim kuli fi yenni a ga weeni sak waai meena Wen ale nye wakpiema ŋaai a te fu la.>> Nuruwa yaa cheŋ ga jo tɛŋka meena po a weeni Yeezu ale tom dii a te wa la.

40Yeezu ale pilim ŋmani la, nuru boari yaa te wa tia, dii nyiŋla, ba kasim jam a limisi wa kama. 41Nuru wanyi yaa deri jam lo Yeezu naŋsa tɛŋ a saalim wa ayen wa maa va wa ate ba kuli wa yenni. Nuruwa yuei jam ale Jairus. Wa jam ka ba tuka diinaŋa kunyi kpagi. 42Wa jam ta ka wa lie yeŋ ate wa a yuak a moata kum. Nipokbinni a jam ka bena pi ale ŋaye. Yeezu ale jam siak ate ba cheŋ la, nuruma jam piisi ka nna yegayega a yaa jam a tusi wa.

43Nipok ale jam maa bo ba po a yuak ate ku paari bena pi ale ŋaye. Wa jam a lo ka chiak. Nuru a jam karo a baga a tebi wa. 44Nuruma ale jam gilim Yeezu dila la, wa yaa va Yeezu ŋaaŋnyiŋ a tiri wa garukku nɔnni. Wa ale tiri la, wa chiaka loka yaa deri basi wa. 45Yeezu yaa bek ayen, <<Ka wana ale tiri mi la?>> Ba meena yaa pagsi ayen daa ba. Piita yaa weeni ayen, <<M Kpagi yaa, ka nuru boanni ale gilim fu la ale tusi fu.>> 46Alege Yeezu tulisi wa ayen, <<Ka nuru ale tiri mu dii nyiŋla, m seba kama ayen pagrim ale nyini m jigi a nyini.>> 47Nipowa ale miŋ ayen Yeezu miŋ kama la, wa yaa nyini ate wa nyiŋka a gɔk a lo Yeezu niŋ a weeni ate waai meena wom dii nyiŋ ale soa ate wa tiri Yeezu a deri nya nyiŋyɔgsa la. 48Yeezu yaa weeni wa ayen, <<M lie, fi siaka a basi kama ate fi nya nyiŋyɔgsa, be cheŋ ale suiyɔgni.>>

49Yeezu ale diem jam boro a biisi la, nidoa wanyi a yaa nyini Jairus yenni a jam weeni Jairus ayen, <<Fi liewa kpi kama, kan ŋman daani sagrɔwa.>> 50Yeezu ale wom nna la, wa yaa weeni Jairus ayen, <<Kan chali yɔgsum, ta siaka nyiini ale wa le nya nyiŋyɔgsa.>> 51Yeezu ale paari Jairus yenni la, wa an siak ate nuruba a maa va wa jo ya, ka Piita ale Jɔɔn ale Jeemsi ale biika kowa ale wa mawa ale jam maa va jo. 52Nuruma jam a kum kama ale a kaari, Yeezu yaa weeni ba ayen, <<Ni kaa kum, wa an kpiya, wa a goa kama.>> 53Ba yaa a la wa alege seba chak ayen nipokbinni kpi kama. 54Alege Yeezu yaa zak nipokbinni nisa ale weeni wa ayen, <<Biiga, yiri ŋmai.>> 55Nipokbinni chiika yaa pilim jam ate wa deri yiri bunyi dekki. Yeezu yaa weeni ba ayen ba nye ŋandiinta a te wa ate wa dɛ. 56Ku yaa cha wa nyama alege Yeezu yaa kaam ba ayen ba kan weeni a sak waai ya dii meena ale nye la.

Currently Selected:

Luuk 8: BWU

Highlight

Copy