Jɔɔn 9

1Ase wa le a taam la, wa yaa jam nya nidoa, ba biak wa ale ka yiisa. 2Yeezu ŋaaŋviirɔma a yaa bek wa ayen, <<Ti Sagrɔ, ka boa ale soa ate ba biak wa ale yiisaŋa? Ka wadek tuimbaata nyiŋ yaa ka wa nyama tuimbaata nyiŋ ale soa ate wa yi?>> 3Yeezu yaa weeni ba ayen, <<Wa yiisaŋa a ka wari a nye ale wadek biem yaase wa nyama biemmoa. Wa yi kama ayen ku sak nuruba Wen pagrimu ale bu tom diila. 4Ku a fɛ ate ti tom waai ale tom mu la tuimaŋa ale ku diem ka wentueŋ, yok a cheena, waai a kan baga a tom tuini. 5Mi ale diem bo tɛŋzuk de la, mi ka Bolim ate ba toati a zaani ate bu a nyaksi a te tɛŋka meena demma.>> 6Yeezu ale biisi a nueri la, wa yaa chesi tintueta a basi tɛŋ a pai wa nandummu a yik tintuetaŋa ale tantaŋa a dam chaab a pai sa nuruwa ninaŋa. 7A yaa weeni wa ayen, <<Cheŋ a ga puuri fi ninaŋa Sailom beli gilini po.>> Sailom kiri ale tomka. Nuruwa yaa ga puuri wa ninaŋa ate ŋa deri lagri ate wa a nya. 8Nuru baai yeeŋa ale za moata wa yenni ale baai ale jam a nya la, a yaa bek chaab ayen, <<Daa nuruwa de nyiem ale kasim kala denna a juisi la?>> 9Ba gela a weeni ayen, <<Ka wa ale la.>> Mbala mɛ a weeni ayen, <<Daa wa ale la, alege wa a neensi wa kama.>> Nuruwa dek a yaa weeni ba ayen, <<Ka mi ale la.>> 10Ba yaa bek wa ayen, <<Fi ninaŋa a nye ka se a lagri?>> 11Wa yaa weeni ba ayen, <<Nuru waai ate ba a wi wa ayen Yeezu la, ale tu mu a yaa chesi tintueta a dam ale tanta a pai sa mi ninaŋa ale ge weeni ayen m cheŋ a ga puuri ŋa Sailom beli gilini po. Mi ale ga puuri ŋa la ŋa yaa deri a nya.>> 12Ba yaa ŋman bek wa ayen, <<Wa bo ka be?>> Wa yaa weeni ba ayen, <<M zɛ.>>

13Ba yaa yik nuru waai ale jam yi la a ta wa a cheŋ Farisiima jigi. 14Dai dii danni dek ate Yeezu a pai tantaŋa a sa nuruwa ninaŋa ate ŋa lagri la, a jam ka Juuma Vuusum Dai. 15Farisiima yaa bek wa ayen, <<Fi ninaŋa a nye ka sɛ a lagri?>> Wa yaa weeni ba ayen, <<Wa pai ka tanta a sa mi ninaŋa. Mi ale cheŋ a ga puuri ŋa la, ŋa yaa deri a nya.>> 16Farisiima gela a yaa weeni chaab ayen, <<Waai ale nye dila la an baga a nyini Wen jigi ya, dii nyiŋla wa nye ku ka ti Vuusumu Danni.>> Mbala mɛ a weeni chaab ayen, <<Ase nuruwa de a dan ka biem nyɔnɔ, wa ti wa nye se a tom tuimkperikaliika de?>> Ate ba ta noa tɔgatɔga. 17Ba yaa ŋman bek nuruwa ayen, <<Nuru waai ate fi a weeni ayen wa lagri fi ninaŋa la, fi ti a poli ayen wa ka wana?>> Wa yaa weeni ba ayen, <<Wa ka Wen biisiteerɔ.>>

18Farisiima a kan jam a siak ayen nuruwa de a liŋ yi kama ale ge ŋman a nya. Ba yaa wi wa nyama. 19A bek ba ayen, <<Ka nama biik ale nna? Nama a biak wa ale yiisa, wa nye ka sɛ a ŋman baga a nya?>> 20Ba yaa weeni ba ayen, <<Wa ka tama biik ate ti biak wa ale yiisaŋa. 21Alege tama an baga a miŋi wa le nye dii a nya la yaase waai ale lak wa ninaŋa a te wa la. Nama dek a bek wa, wa ninaŋa ale nye dii a lak la, dii nyiŋla wa pak kama ale ta yam a baga a weeni a sak ni.>> 22Nuruwa nyama a jam a chali ka yɔgsum ale Farisiima ate ba yaa tulisi ba dila. Farisiima a jam liŋ weeni kama ayen nuru waai a dan weeni ayen wa ta siaka ayen Yeezu ale Kirisitawa, ba ale yeeri kula nyɔnɔ ba tuka dɔkku po. 23Ka dila nyiŋ ate wa nyama a weeni ayen ba bek wadek ale wa pak kama ale ta yam a baga a weeni ba dii ale nye la.

24Ba jam wi nuru waai ale yi la a paari ka buye, a weeni wa ayen, <<Te Wen jiam, tama a seba kama ayen nuruwa de ka wabanyeerik.>> 25Nuruwa yaa weeni ba ayen, <<Mi zɛ ase wa ka wabanyeerik yaa wa daa waba nyeeriga. Mi ale seba diila, mi jam yi kama, alege yɔgyɔgla de m ŋman pilim a nya kama.>> 26Ba yaa ŋman bek wa ayen, <<Fi ninaŋa a nye ka sɛ a lagri?>> 27Wa ŋman weeni ba ayen, <<Mi poom a liŋ weeni ni kama, alege ni an wom ya. Ka boa ate nama a yaali ayen ni ŋman wom? Nama mɛ a yaali kama ayen ni chim wa ŋaaŋviirɔba?>> 28Ba yaa toariŋ wa ayen, <<Fi ka wala ŋaaŋviirɔma po wanyi, alege tama ka Moosis ŋaaŋviirɔba. 29Tama seba ayen Wen a jam a biisi ale Moosis kama, alege nuru waai ale lak fi ninaŋa la, tama zɛ Wa le nyini juijui la.>> 30Nuruwa yaa weeni ba ayen, <<Nya kude ka wakperikaliik mi jigi, nama a zɛ wa ale nyini juijui la ale ge Wa lak mi ninaŋa. 31Ti seba kama ayen Wen a kan wom wabaata nyama. Wa a wom ka baai ale a te wa zula ale a tom wa yaalika la. 32A nyini diipo ate Wen a nye tɛŋzuk meena la a ta jam paari jinla, nuru waai an diem a lak nuru ate ba biak wa ale yiisa la nina. 33Nuruwa de a dan kan nyini Wen jigiya wa ti an kan baga a nye wari ya.>> 34Ba yaa weeni wa ayen, <<Fi nyama a biak fu kama ate fi pak ale tuimbaata. Fi a poli ayen fi ale ta zupagruk a baga a sak tama?>> Ba yaa yiak ate wa nyini ba tuka dɔkku po a nyini.

35Yeezu ale wom dii ale nye la, wa yaa gisi a yik nuru waai ate wa tebi la a bek wa ayen, <<Fi ta siaka ale Saalɔbiika?>> 36Nuruwa yaa weeni wa ayen, <<M Nyɔnɔ, wa la ka wana a ate mi ale ta siaka ale wa?>> 37Yeezu yaa weeni wa ayen, <<Fi poom nya wa kama, wala ale a biisi ale fu la.>> 38Nuruwa yaa domsi kali Yeezu niŋ a weeni ayen, <<M Nyɔnɔ Yeezu Kirisita, m ta siaka ale fu.>> 39Yeezu yaa weeni wa ayen, <<Mi jam tɛŋka de zuk kama ayen m basi ate baai nina ale kan lagri la, a lagri abe baai nina ale lagri la a yi.>> 40Farisiima ale jam moata dula jigini la gela yaa wom wa le weeni diila. Ba yaa weeni wa ayen, <<Tama mɛ ka yeoba?>> 41Yeezu a yaa weeni ba ayen, <<Ase nama ninaŋa a dan yi kama, mi ate kan weeni ayen ni nye a kaasi ya, alege nama ale a weeni ayen ni ninaŋa a lagri alege ŋa an lagri la, ale soa ate mi a weeni ayen ni nye kaasi la.

Currently Selected:

Jɔɔn 9: BWU

Highlight

Copy