Jɔɔn 10

1<<Wensie ate mi a weeni ni, waai ale kan va zɔŋku nɔnni a jo ale va jigi yoŋ a jo la, nuru wala ka zue ale varidɔ. 2Nuru waai ale kasim a va zɔŋku nɔnni a jo la, wala ale naapeerika dek. 3Zɔŋku nɔnni limisidɔwa a nyiem ale kasim a lak ku nɔnni a te naapeerika ate wa jo a wi wa piisaŋa yueŋa ate ŋa a va wa a nyini, dii nyiŋla ŋa seba wa lueluku kama. 4Ŋa meena a yaa dan nyini, wa nyiem a yaa dɛ ka ŋa niŋ ate ŋa a vi wa, dii nyiŋla ŋa seba wa kama. 5Ŋa kan va nuru. Nuru yoŋ a dan dɛ ŋa niŋ, ŋa chali kama a waaŋ chaab, dii nyiŋla ŋa zɛ wa.>> 6Yeezu ale magsi wamagsini a nueri la, baai ale jam wom wa la an jam miŋ di kiri ya.

7Nya kude nyiŋ, Yeezu yaa ŋman weeni ba ayen, <<Wensie ate mi a weeni ni. Mi ale piisaŋa zɔŋku nɔnni. 8Nuru baai ale liŋ jam ale ge mi la ka zueba, ate piisaŋa an miŋ ba luelutaŋa. 9Mi ale piisaŋa zɔŋku nɔnni la, baai meena ale basi ate mi a vari ba ba tuimbaata po a basi la, a nye se ka piisa ale kasim a jo ŋa zɔŋku po ale ŋman nyini a dɛ wuuk diila. 10Zue a nyiem jam kama ayen wa zu, abe wa ko, abe wa kaasi, alege mi a jam kama ayen ba nya nyuvuri abe ba bo bo maŋ.

11<<Mi ale naapeerik maŋka waai ale gomsi magsi a yaali ayen m kpi piisaŋa nyiŋla. 12Ase ba dan pai nuru ayen wa a nya piisaŋa zuk, abe ba a tuni wa, wa kan nya ŋa nalimnyiini. Piuk a dan jam jo ŋa po ayen ku yik ŋa, naapeerik kaai ate ba pai ate wa a nya ŋa zuk la, a chali kama, ale a ge ŋa, dii nyiŋla daa wadek ale soa ŋa. 13Ba ale a tuni wa ate wa a nya ŋa la nyiŋ ale soa ate wa kan zaani a vari ŋa a basi. 14Mi ale naapeerik maŋka. M seba ŋa kama ate ŋa mɛ a seba mu. 15Mi seba m Kowa kama ate m Kowa mɛ a seba mu. Mi a potim gomsi magsi kama ale m dek yaalika ayen m kpi a te m piisaŋa. 16Mi a soa piisa ŋa chaab kama, alege ate ŋa bo jigi yoŋ. Ku a fɛ ate m cheŋ dula jigini ate ŋa wom mi lueluku ate ŋa baga a va mu. Ŋa le jam a gum chaab ale nŋala ate ŋa meena a chim pa yena abe naapeerik yeŋ nyiini a nya ŋa zuk. 17M Kowa a yaali mu, dii nyiŋla m le kasim gomsi magsi ayen m kpi la. M dan kpi, m le yiti kum po. 18Nuru karo a baga a ko mu ka mi dek a nin siak ate ba ko mu. M ta suik a siak alege ta suik a zɛri alege m Kowa ale weeni ayen m nye dila.>>

19Poorika ale jam bo ba suŋsuŋ ŋmana ba le wom wieŋa de la. 20Ba yegayega yaa weeni ayen, <<Nuruwa de chichirik biok ale bo wa po. Wa a yesim kama. Ka boa ate ni a wom wa?>> 21Mbala mɛ a weeni ayen, <<Ase chichirik biok a dan bo nuruwa de po, wa kan baga a biisi nna la. Chichirik biok an baga a nye ate yeeba nina a lagri.>>

22Ŋoota wein, Juuma nyiem a dɛ ka tigi dii ate ba pai ba puusika yenni a nyo Wen dek nisima po la. 23Ku jam ka ŋoota wein ate Yeezu a bo Wen dɔkku po a cheŋ, wa jam bo ka Solomon Pɔsuku po. 24Yeezu yaa jam a cheŋ ate Juuma gela yaa ga tu wa a deri gilim wa a zaani ba suŋsuŋ a bek wa ayen, <<Ku ale paari ka dimpo ate fi ale weeni ti fi ale ka waai la? Ka fi ale Kirisitawa, weeni ti wensie.>> 25Yeezu yaa weeni ba ayen, <<Mi poom a liŋ weeni ni mi ale ka waai la kama, alege nama a ka siaka ale dii ate mi weeni la. Tuim ŋaai ate mi a tom m Kowa pagrimu nyiŋla, ale a sak ni ayen dii ate mi a weeni ni la ka wensie. 26Alege ni ka siaka ale mi, diila ni daa mi piisa. 27Mi seba m piisaŋa kama ate ŋa mɛ a seba m lueluku ale a va mu, 28ate mi a pai nyuvuri dii ale kan ta kpeglimka la a te ŋa, ate Wen a kan ŋman a te ŋa waalika abe wa basi ŋa ate ŋa kan ta kiriya. Nuru waai an baga a fɛ a chiak ŋa mi jigiya. 29Mi Kowa waai ale pagra a gaam jaabuuri meena la, ale pai ŋa a nyo mi nisima po. Wala dek mɛ abe kan basi ate waai a chiak ŋa mi jigiya. 30Mi ale m Kowa ka bunyi.>>

31Nuruma yaa pisi tintana ayen ba yuk wa. 32Yeezu yaa weeni ba ayen, <<Mi Kowa a basi kama ate mi tom tuimaŋsa nna yegayega ate nama nya. Be ka nyaŋa de di din dek nyiŋ ate nama a yaali ayen ni yuk mu a ko?>> 33Nuruma yaa weeni wa ayen, <<Tama a kan yaali ayen ti ko fu fi tuimaŋsa nyiŋŋa, alege ka fi ale a lɛ Wen la, fi mɛ ka nurubiik ale ge fi pai fidek a magsi chaab ale Wen. Ka dila ale soa ate ti a yaali ayen ti ko fu la.>> 34Yeezu yaa tulisi ba ayen, <<Ku an ŋmarisi ni sinsaŋŋa po ayen, <Mi weeni ayen ni ka wena?> (Yiila 82:6) 35Wa daa wi ni ayen wena baai ate Wen wanni a jam ba jigi, Wen wanni abe ka wensie, 36nama ale weeni waai ate Kowa a gomsi a tom wa tɛŋzuk de la ayen, <Fi a lɛ Wen dii la mi dek weeni ayen mi ka Wen Nidoabinni la nyiŋŋa?> 37Ni be kan ta siaka ale mu ase m nin kan a tom dii ate m Kowa a yaali la. 38Alege m dan a tom ka m Kowa ale a yaali diila, ni dan poom kan ta siak ale mu, ni ti ta siaka ale m tuimaŋa ate ni seba a chak ayen m Kowa a bo ale mu kama, ate mi mɛ a bo ale m Kowa.>> 39Juuma a jam a yaali ayen ba yik Yeezu kama, alege wa muriŋ bɛ.

40Wa le ga nyini la, wa yaa cheŋ a taam Jodan benni kunkɔŋni juijui ate Jɔɔn a jam a te nuruba soka la a bo dula. 41Nuruba yegayega a yaa jam wa jigi a weeni chaab ayen, <<Jɔɔn an jam tom wakperikaliisa, alege wie ŋaai meena ate wa biisi nuruwa de wie la, ka wensie,>> 42ate nuruba yega deri ta siaka ale Yeezu dula jigini.

Currently Selected:

Jɔɔn 10: BWU

Highlight

Copy