Jɔɔn 11

1Nuru wanyi ale jam a yuak a bo Betani tɛŋka. Wa yuei jam le Lazarus. Wa jam ta ka toaba baye, ba yue ale Mɛɛri ale Marta. Ba mɛ a jam bo ka Betani tɛŋka. 2Ba wanyiwa Mɛɛri ale waai ale jam pai kpa buui ate bu nyummu a masa la, a kpiiri a basi ti Nyɔnɔ Yeezu Kirisita naŋsaŋa nyiŋ ale ge a yik wa zukku zuisaŋa a bili si la. Lazarus a yaa jam a yuak. 3Wa toama a yaa tom weeni Yeezu ayen, <<Ti Nyɔnɔ Yeezu Kirisita, fidek doawa Lazarus ale a yuak.>> 4Yeezu ale wom kude la, wa yaa weeni ayen, <<Ku le te Wen ka zula.>> 5Yeezu jam a yaali Marta ale wa suoku ale Lazarus ka nna yegayega, 6alege wa ale wom Lazarus yuammu la wa jam bo juijui ate wa boro la ka daa ŋaye. 7Daa ŋayewa ale jam taam la, wa yaa weeni wa ŋaaŋviirɔma ayen, <<Ni basi ate ti ŋman cheŋ Judia tɛŋka.>> 8Wa ŋaaŋviirɔma yaa weeni wa ayen, <<Ti Sagrɔ, dula jigini ate nuruma a jam a yaali ayen ba yuk fu ale tintanaŋa la. Ku an diem beni ya ate fi a yaali ayen ti ŋman cheŋ dula?>> 9Yeezu yaa tulisi ba ayen, <<Daa saluik a ga paari junɔi a le chim dai ya? Nuru a daa cheŋ danni po wa kan nak naŋŋa dii la wa nya tɛŋzuk de wentueŋka kama. 10Alege wa daa cheŋ yok wa a nak ka naŋ a lo dii nyiŋla wa kan nya.>> 11Yeezu yaa ŋman weeni ba ayen, <<Ti doawa Lazarus a goa kama. M le cheŋ a ga nak wa a yiti.>> 12Wa ŋaaŋviirɔma yaa weeni wa ayen, <<Ti Nyɔnɔ Yeezu Kirisita, wa be dan a goa kama, wa le nya nyiŋyɔgsa.>> 13Ba jam a poli ayen Lazarus a sum doa a goa kama, alege ba jam zɛ ayen Yeezu ale weeni diila kiri ale wa kpi kama.

14Yeezu yaa biisi ku meena a lagri sak ba ayen, <<Lazarus a kpi kama. 15Nama nyiŋ mi sui a peenti kama ale mi ale kan bo dula jigini ale wa la, kula ale basi ate ni ta siaka ale mu. Ni te ti cheŋ wa jigi.>> 16Yeezu ŋaaŋviirɔma po wanyiwa Tomasi ate ba a wi wa mɛ ayen yibika la yaa weeni wa ŋaaŋviirɔ chaama ayen, <<Ni basi ate ti va ti sagrɔwa cheŋ, ate tama ale wa meena a maa chaab a kpi.>>

17Yeezu ale wa ŋaaŋviirɔma ale ga paari Betani tɛŋka la, baai ale jam bo dula la a yaa weeni wa ayen ba le gu Lazarus la jinla ka daa ŋanaansi. 18Betani tɛŋka ale Jerusalem tɛŋka a jam a nye ase ka mɛɛla ŋaye la, 19ate Juuma yega a jam ba bani Marta ale Mɛɛri ba suoku kummu nyiŋ. 20Marta ale ga wom ayen Yeezu a bo suik cheena la, wa yaa yiti nyini ayen wa ga tu wa. Mɛɛri ale jam a wari kala yenni po. 21Marta yaa ga tu Yeezu a weeni wa ayen, <<M Nyɔnɔ Yeezu Kirisita, fi dan poom bo dela, m suoku ate an kpiya. 22M seba ayen jaabuuri meena ate fi a bek Wen jigi la, wa le nye te fu.>> 23Yeezu yaa weeni wa ayen, <<Fi suoku ale yiti kum po.>> 24Marta yaa weeni wa ayen, <<M seba ayen tɛŋka meena kpeglimka a dan jam paari, wa le yiti kum po.>> 25Yeezu yaa weeni wa ayen, <<Mi ale waai ale baga a nak nuruba kum po a yiti ale ŋman a basi ate ba a nya nyuvuri la. Nuru waai a dan ta siaka ale mi ale ge kpi, m le basi ate wa yiti a nya nyuvuri. 26Waai ale bo bo kaai choa ate Wen a yaali la ale ta siaka ale mi la a kan kpi alege wa ale nya nyuvuri dii ale kan ta kpeglimka la. Fi ta siaka ale nya kude?>> 27Wa yaa weeni wa ayen, <<M Nyɔnɔ Yeezu Kirisita, m ta siaka. M be ŋman ta siaka ayen fi ale Kirisitawa, Wen Nidoabinni waai ate Wen a weeni ayen wa le tom wa ate wa jam la.>>

28Marta ale biisi a ga nueri la, wa yaa ŋman jo yenni po a ga wi Mɛɛri a ta taam nakpiak badek ba nyiini a weeni wa ayen, <<Sagrɔwa a jam kama ale a yaali ayen wa nya fu.>> 29Mɛɛri yaa yiti cheŋ Yeezu jigi.

30Yeezu an diem jam jo tɛŋka po. Wa diem a jam za ka juijui ate Marta a tu wa la. 31Nuru baai ale jam ayen ba puusi Mɛɛri la, ale ga nya wa le yiti nna nwuli a nyini la, ba mɛ yaa yiti va wa, dii nyiŋla ba a poli ayen wa a cheŋ ka juijui ate ba gu wa toawa la ayen wa kum. 32Mɛɛri yaa cheŋ a ga tu Yeezu a domsi kali wa niŋ a weeni wa ayen, <<M Nyɔnɔ Yeezu Kirisita, fi dan poom bo dela, m suoku ate an kpiya.>> 33Yeezu ale ga nya ale Mɛɛri ale nuru baai ale jam va wa la, a kum la, ku yaa daani wa sui nna yegayega. 34Wa yaa bek ba ayen, <<Ka be ate ni gu wa?>> Ba yaa weeni wa ayen, <<Ti Nyɔnɔ, jam nya.>> 35Yeezu mɛ yaa kum. 36Nuruma ale jam nya wa kumsaŋa la, ba gela a yaa weeni chaab ayen, <<Wensie wa sum a yaali wa ka nna yegayega.>> 37Alege ba gela weeni ayen, <<Daa nuruwa de ale jam a lagri nuruwa ninaŋa la, ku be nye ka sɛ ate wa an tebi Lazarus ale ge basi ate wa kpi?>>

38Ku jam daani Yeezu ka nna yegayega, ate wa cheŋ boosuku jigini, ku jam ka piuŋ vɔrup ate ba pai tintain a lik. 39Ate wa yaa weeni ba ayen, <<Ni lak tintanni a basi nakpiak.>> Lazarus toawa Marta yaa weeni wa ayen, <<M Yeezu Kirisita, ti le gu wa la ka daa ŋanaansi jinla. Nna po de wa a nyuŋ kama.>> 40Yeezu yaa weeni wa ayen, <<Mi an poom liŋ weeni fu ayen fi dan ta siaka ale mi, fi le nya Wen pagrimu ale ka diila?>> 41Ba yaa bilim tintanni vɔrumu nɔi a basi ate Yeezu yaa zak wa zukku a nya wenŋmazuk ale weeni ayen, <<M Koa, mi a te fi jiam fi le kasim a wom mu la. 42Mi dek a seba ayen fi a wom mu kama, alege mi a biisi ale fu kama ate baai ale za dela ale mu la a nya ate ba baga a ta siaka ale mu ayen ka fi ale sum tom mu.>> 43Wa ale weeni dila la, wa yaa deri kaari a wi ayen, <<Lazarus, yiti a nyini peelim.>> 44Kpiewa yaa deri yiti a nyini peelim. Wa jam yiti nyini ale ka garuk guuŋku ate ku vili gilim wa nisaŋa ale wa nimbidiaka ale wa naŋsaŋa meena. Yeezu yaa weeni ba ayen, <<Ni foli garukku abe ni ge wa ate wa cheŋ.>>

45Nuru baai ale jam ayen ba puusi Mɛɛri ale Marta la, yega a jam nya dii ate Yeezu a tom la kama a yaa ta siaka ale wa. 46Alege ba gela a cheŋ Farisiima jigi a weeni ba Yeezu ale nye diila.

47Dila kaabteerɔ kpaŋŋa ale Farisiima yaa tigsi tigsuŋku ayen, <<Ti ale nye ka se? Nuruwa de a nye ka wakinkagla nna yegayega. 48Ti dan basi ayen wa a tom wa le ta diila, waai meena ale va wa kama. Ba dan va wa dila Aroom demma baai ale soa ti la, ale jam a kaasi ti Wen yenni abe ba ko ti meena.>> 49Alege ba wanyi, Kayafas waai ale jam ka kaabteerɔ kpioŋku bein dila la yaa weeni ba ayen, <<Nama waai a ka yammoa. 50Nama a zɛ ayen ni dan basi ate nuruwa de a kpi te ti meena ku ale zunchoŋ ale ti meena ale kpi ya.>> 51Wa an jam weeni kude ale ka wadek yaalika, alege wa le jam ka kaabteerɔ kpioŋku bein dila la, wa a nye ase ka Wen biisiteerɔ la a weeni ayen Yeezu a kpi a te tɛŋka meena. 52Daa dila nyiini alege Yeezu a dan kpi, Wen nuru baai meena ale waaŋ a bo tɛŋka meena zuk la, ale jam a tigsi chaab a chim bunyi. 53A nyini dai dila danni a cheŋ ba jam a gisi ka suik ayen ba ko Yeezu.

54Yeezu ale ga wom dii ate ba a yaali ayen ba nye la, wa an ŋman a nyiem Judia tɛŋka po. Wa ale wa ŋaaŋviirɔma yaa basi dula jigini ale cheŋ ga bo Ɛfraim tɛŋka ate ka moata gɔnni la.

55Gaambasika Tigini ale jam moata la, nuruba yegayega yaa basi ba tɛŋsa ale ge a cheŋ Jerusalem tɛŋka ayen ba liŋ gomsi ba dek a nye cheri ale ge ate daaŋa a paari. 56Dila ba yaa gisi Yeezu, ale jam a weeni chaab ase ba le jam za Wen yenni po la ayen, <<Nama a poli ka sɛ, wa le jam tigini yaa wa kan jamu? 57Farisiima ale kaabteerɔ kpaŋŋa a weeni kama ate ku paari waai meena ayen waai a dan seba Yeezu boka jigi, kula nyɔnɔ a jam a weeni ba ate ba cheŋ a ga yik wa.

Currently Selected:

Jɔɔn 11: BWU

Highlight

Copy