Jɔɔn 12

1Ku le jam tali daa ŋayuebi ate Gaambasika Tigini a paari la, Yeezu yaa ŋman cheŋ Betani tɛŋka. Lazarus waai ate Yeezu a jam nak wa a yiti kumu po la yenni. 2Lazarus toama a jam nye ka ŋandiinta ayen ba dɛ ate Yeezu ale Lazarus a yaa jam kala ale chaab ate Marta a yaa ta ŋandiintaŋa a jam te ba. 3Mɛɛri yaa ta kpaam ate bu nyum a masa ate bu ligraŋa mɛ a pagra nna yegayega. Wa kpiiri a basi Yeezu naŋsaŋa nyiŋ a yaa le ge a yik wa zukku zuisaŋa a bili si. Yenni meena a jam sueri ale ka kpaamu nyummu. 4Yeezu ŋaaŋviirɔma po Judas Iskariot jam le waai ale wa ta Yeezu a ga bobri sak la. Wa le ga nya dii ate Mɛɛri a nye la, wa yaa weeni ba ayen, 5<<Ase nipowa de a dan poom a pai kpaamu de a da, wa ti le nya ligra yega a pai te ŋanjaksaŋa.>> 6Judas niŋ a jam karo ale ŋanjaksa maarika, dii nyiŋla wa jam ka zue. Wala ale jam a nya Yeezu ŋaaŋviirɔma ligraŋa zuk ale a pai ŋa gela a maari wadek. 7Yeezu yaa weeni wa ayen, <<Basi wa kan a daani wa, basi ate wa ta bu a magsi dai dii dai ate ba le gu mu la. 8Ŋanjaksa a kasim bo ale ni kama, alege mi a kan bo ale ni a beni.>>

9Nuruba yega ale jam wom ayen Yeezu a bo Betani tɛŋka la, ba yaa cheŋ ayen ba nya wa. Ba jam a yaali ayen ba nya Lazarus waai ate Yeezu a nak wa kum po a yiti la. 10Kaabteerɔ kpaŋŋa ale jam a gisi suik ayen ba ko Yeezu la, a jam a yaali ayen ba ko Lazarus kama mɛ. 11Dii nyiŋla Juuma yega a jam a basi ba kama ale ge a ta siaka ale Yeezu wa ale nak Lazarus a yiti kummu po la.

12Vari ale veenti la nuru boanni ale jam ayen ba maa dɛ Gaambasika Tigini la, a yaa wom ayen Yeezu a cheena Jerusalem. 13Ba yaa ŋasi kpinkparuk vaata a cheŋ ba tu wa ale kaari a weeni ayen, <<Naawen vari ti a basi. Niaka a bo waai ale cheena Naawen yuenni nyiŋ la. (Yiila 118:25-26) Naawen niak Izirali Naawa.>> 14Yeezu yaa nya boniŋ paalik a dɔ ka, ase ku le ŋmarisi dii ayen, 15<<Ni kan chali yɔgsummoa Zayon Liewa, ni nya, ni naawa a cheena, wa abe kala ka boniŋ paalik zuk.>> (Zakaria 9:9) 16Yeezu ŋaaŋviirɔma an jam a miŋ nya kude kiri ya alege, ka wa le jam a kpi a ŋman yiti kum po a jueli wenŋmazuk la, ale basi ate ba yaa teeri dii ate ba jam a ŋmarisi la kiri. 17Nuru baai ale jam boro a nya Yeezu ale nak Lazarus yiti kum po la, ale weeni dii ale nye la a sak nuruma. 18Ka dila ale soa ate nuruba yegayega a jam nyini a tu Yeezu la. Ba jam wom kama ayen wa ale tom wakperikaliika de. 19Farisiima yaa weeni chaab ayen, <<Wa a yaali ayen wa gaam ti kama. Ni nya nuruma de meena ale soa dii a va wa la.>>

20Va ŋala po baai ale kan daa Juuba la ale jam bo ba po ba maa dɛ Gaambasika Tigini. 21Ba yaa jam Yeezu ŋaaŋviirɔma wanyi Filip jigi. Wa jam nyini ka Beteseida ate ka bo Galili tɛŋka la. Ba yaa weeni wa ayen, <<Ti Nyɔnɔ, ti a yaali kama ayen ti nya Yeezu.>> 22Filip yaa ga weeni Andiru ate ba nɔi bayewa a yaa va chaab a ga weeni Yeezu. 23Yeezu yaa weeni ba ayen, <<Ku danni a paari kama ate Saalɔbiika ale nya zula ale nalim yegayega. 24Wensie ate mi a weeni ni, ka za biri a nin bori a poak, kan daa di di ka di dek di nyiini, ale ge fi dan bori di, di a poak kama ale ge a nyini a bɛ bie a piisi. 25Waai ale a yaali wa nyuvuri la a jɔk di kama, waai ale kisa wa nyuvuri tɛŋka de zuk la ale nya nyuvuri dii ale kan ta kpeglimka la. 26Baai ale a yaali ayen ba tom a te mi la a jam va mi ate ba bo juijui meena ate mi a boro la. Ba dan nye dila, m Kowa ale te ba zula.>>

27Wa yaa weeni ayen, <<M sui ale kaasi. Mi ale weeni ayen ka boa? M Koa vari mu danni de po a basi. Aaya, alege mi ale jam dii nyiŋla ale la. 28M Koa, basi ate fi yuenni a nya zula.>> Lueluk a nyini wenŋmazuk a weeni ayen, <<Mi poom nya zula kama, m le ŋman pilim nya ŋa.>> 29Nuru boanni ale jam za dula jigini a wom lueluku la a yaa weeni ayen, <<Ku a nye ase ka nanpansa la.>> Ba gela ayen, <<Ka Wen maarɔ ale biisi ale wa.>> 30Yeezu yaa tulisi ayen, <<Lueluku de a jam ka nama nyiŋ, daa mi nyiŋŋa 31yɔgyɔgla de ale tɛŋzuk de buusa boka, yɔgyɔgla de tɛŋzuk de niŋdeerɔwa Sitaana ba le yiak wa a basi. 32Ate m yaa dan kpi a yiti m le ta nuru meena a jam m dek jigi.>> 33Wa ale weeni kude la a jam a sak ka wa le wa nam dii a kpi la. 34Nuru boanni yaa weeni wa ayen, <<Ba ŋmarisi Wen Gbaŋka po ayen Kirisitawa ale boro kama taam wuu. Ka boa ale soa ate fi a weeni ayen nuruba ale yik Saalɔbiika a kpi jabarim nyiŋ ate wa kpi? Saalɔbiika de ka wana?>> 35Yeezu yaa weeni ba ayen, <<Bolimu a bo le ni ka maga dega. Ni a cheŋ ale bolimu a diem boro, ni kan bo legini po. Waai ale a cheŋ legini po la a zɛ wa ale a cheŋ juijui la. 36Ni le diem ta bolimu la, ni ta siaka ale bolimu, ate ni chim bolimu nidoabilisa.>> Yeezu ale biisi a nueri la, wa yaa cheŋ a ga suk. 37Yeezu a jam tom ka wakperikaliisa nna yegayega nuruma meena nimbie, alege ba jam ka siaka ale wa.

38Ka dila ale soa ate dii ate Wen biisiteerɔ Azaya a weeni la a chim wensie la. Wa weeni ayen, <<M Naawen yaa, ka wana ale ta siaka ale ti wanni? Naawen abe yeeri wa nisa a sak ka wana?>> (Azaya 53:1) 39Azaya a ŋman ŋmarisi baai ale jam kan ta siaka ale Yeezu la wie ayen, 40<<Naawen ale lik ba ninaŋa ale ba popolaŋa mɛ ate ba ninaŋa a kan nya, ate ba popolaŋa mɛ a kan miŋi, ate ba kan baga a tagri, ate m vɔŋ ba tuimbaataŋa a te ba.>> (Azaya 6:10) 41Azaya a jam weeni kude kama, dii nyiŋla wa nya ka Yeezu zulaŋa a biisi wa wie. 42Juuma kpaŋŋa yega a jam ta siaka ale Yeezu kama, alege ba an jam a biisi wa wie a lagri, dii nyiŋla Farisiima ale yiak ba ba tuka diinaŋa po, 43dii la, ba jam yaali nuruba pimpauk a gaam Wen pimpauk kama.

44Yeezu yaa basi ate wa lueluku a jueli ayen, <<Nuru waai ale ta siaka ale mi la, a ta siaka ale Wen dii ale tom mu la mɛ kama. 45Nuru waai ale nya mi la, a nya Naawen dii ale tom mu la mɛ kama. 46Mi a jam tɛŋka de zuk meena kama ase bolim la ayen baai meena ale ta siaka ale mi la a kan ŋman bo legi po. 47Mi a kan bo baai meena ale a wom mi wieŋa ale kan va ŋa la buusa. Mi an jam ayen m bo ka tɛŋka meena demma buusa, alege m jam ayen m vari ba ka ba tuimbaataŋa po a basi. 48Tɛŋzuk meena kpeglimka a dan jam paari, wie ŋaai ate mi a biisi la ale bo nuru baai meena ale a zɛri mi ale m wieŋa la buusa. 49Mi ale a sak nama wie ŋaai la an nyini daa mi dek jigiya, alege m Kowa waai ale tom mu la ale te mu wieŋa ayen m sak ni. 50Wie ŋaai meena ate wa pai te mu la mi pai ŋa a sak ni kama. Wa wieŋa a te ka nyuvuri dii ale kan ta kpeglimka la.>>

Currently Selected:

Jɔɔn 12: BWU

Highlight

Copy