Jɔɔn 13

1Ku jam tali ka maga ate Gaambasika Tigini a paari. Yeezu a jam seba kama ayen ku paari ka diipo ate wa le basi tɛŋzuk de abe wa ŋmani cheŋ wa Kowa jigi la. Wa jam kasim a yaali baai ale bo tɛŋka po ate wa soa la kama a ga paari wa kum.#13:1 Kaabka 23:5 2Yeezu ale wa ŋaaŋviirɔma a yaa jam boro a dɛ junɔi ŋandiinta. Jabioku a poom basi ate Judas Iskariot, Simon nidoabinni a ta ka popola ayen wa bobri Yeezu a sak. 3Yeezu a jam seba ayen wa kowa waai ale tom wa ate wa jam tɛŋzuk de la, ale pai jaabuuri meena pagrim a te wa. Wa be jam seba mɛ ayen wa nyini ka Wen jigi a jam, alege ŋman pilim a cheŋ Wen jigi. 4Ba le diem boro a dɛ la, Yeezu yaa yiti ŋmai a yeeri wa garuk kuui ate wa jo a basi ŋmai la a dueni tɛŋ ale ge pai papa a bobi wa chiaka.

5Wa yaa ŋari nyiam a nyo chin kpien po a piilim a sugri wa ŋaaŋviirɔma naŋsaŋa a gilim ale a bili si ale papawa. 6Wa ale sugri a ga paari Simon Piita la Piita yaa weeni wa ayen, <<M Nyɔnɔ Yeezu Kirisita, fi ayen fi sugri mi naŋsaŋa kama?>> 7Yeezu yaa tulisi wa ayen, <<Fi zɛ dii ate mi a nye la, alege ku dan ga nye maga, fi le miŋ di kiri.>> 8Piita yaa weeni wa ayen, <<Mi a kan basi ate fi a sugri mi naŋsaŋa.>> Yeezu a yaa weeni wa ayen, <<Fi dan kan basi ate mi sugri si, fi kan ŋman maa chim mi ŋaaŋviirɔma po wanyi.>> 9Simon Piita yaa tulisi wa ayen, <<M Nyɔnɔ Yeezu Kirisita, kan sugri m naŋsaŋa nyiini, maa sugri m nisimaŋa ale m zukku meena mɛ.>> 10Yeezu yaa weeni wa ayen, <<Waai ale so la an ŋman magsi wa so, wa a sugri ka naŋsa nyiini, wa nyiŋka meena a nye cheri kama, fi abe nye cheri kama, alege daa ni meena.>> 11Yeezu a poom seba waai dek ale wa ta wa a ga bobri a sak la kama, dila ale soa ate wa weeni ayen daa ba meena ale nye cheri la.

12Yeezu ale sugri ba naŋsaŋa a nueri la, wa yaa pai wa garukku a ŋman jo ale pilim cheŋ wa kalika jigini a weeni ba ayen, <<Ni miŋ dii ate m nye a te ni la kiri ya? 13Nama a kasim a wi mi ayen ka Sagrɔ ale ni Nyɔnɔ. Kula a magsi kama, dii nyiŋla mi sum ka ni Sagrɔ ale ni Nyɔnɔ. 14Mi waai ale ka ni Nyɔnɔ ale ni Sagrɔ la, ale sugri ni naŋsaŋa. Nama mɛ a sugri chaab naŋsa. 15Mi a nye ka magsa a sak ni ayen ni a va. 16Wensie ate mi a weeni ni. Yɔma a kan zuak a gaam wa nyɔnɔ. Tomteerɔ mɛ an baga a zuak a gaam waai ale tom wa la. 17Yɔgyɔgla de ate ni seba wensieŋa la ni ale nya niauŋ ase ni nin a nye dila. 18Daa ni meena ate mi a weeni, alege ka baai nyiini ate m lueri a te m dek la. Ba ŋmarisi Wen Gbaŋka po ayen, <Waai ale wa ta mu a ga bobri sak la, wala ate mi ale wa a dɛ ŋandiintaŋa ale chaab.> (Yiila 41:9) Ba le ŋmarisi wieŋa de diila, ale jam a chim ka wensie. 19Dila nyiŋla, m liŋ a weeni ni kama, ayen ku dan jam boro a nye, ni ta siaka ale mi ale weeni ayen m ka waai la. 20Wensie ate mi a weeni ni. Baai meena ale a te waai ate mi a tom la, tia la, a te ka mi tia dila. Baai meena ale a te mi tia mɛ la, ba a te ka waai ale tom mu la tia dila.>>

21Yeezu ale biisi a nueri la, ku yaa daani wa, wa suinum po nna yegayega. Wa yaa weeni wa ŋaaŋviirɔma ayen, <<Wensie ate mi a weeni ni, ni po wanyi ale wa ta mu a ga bobri sak.>> 22Ba yaa deri gisi nya chaab ale a poli le ka waai dek la. 23Waai ate Yeezu a jam a yaali ba po nna yegayega la a jam kala kama a moata wa. 24Simon Piita yaa magsi a weeni wa ayen wa bek Yeezu a miŋ waai dek ale wa nye wa dila la. 25Waai ate Yeezu a jam a yaali nna yegayega la, a yaa forisi paari a bek wa ayen, <<M Nyɔnɔ Yeezu Kirisita, ka wana dega?>> 26Yeezu a yaa weeni wa ayen, <<Waai ate mi a pai boroboroku a suiik jentaŋa a te wa la, wa le la.>> Wa yaa deri pai boroborok a suiik jentaŋa a te Judas Iskariot, Simon nidoabinni. 27Judas ale ga tuesi boroboroku la, Sitaana yaa deri jam jo wa popola po ate ŋa tagri. Yeezu yaa weeni wa ayen, <<Cheŋ nwuli a ga nye dii ate fi ta la.>> 28Baai ale jam tigsi ale wa a boro a dɛ ŋandiintaŋa la, an jam miŋ wa le weeni diila kiriya.#13:21-30 Nya fotowa, Matiu 26:20-29. 29Judas a jam ale waai ale a nya ba ligraŋa zuk la. Dila nyiŋla, ba jam a poli kama ayen Yeezu a tom wa kama ayen wa cheŋ a ga da ŋanta a magsi tigini, yaase wa te niwomma ligra. 30Judas ale ga tuesi boroboroku la, wa yaa deri yiti a nyini a cheŋ. Ku jam ka yok ate wa nyini la.

31Judas ale cheŋ la, Yeezu yaa weeni ayen, <<Yɔgyɔgla de Saalɔbiika ale nya pimpauk ate Wen mɛ a nya pimpauk Nidoabinni nyiŋ. 32Ase Wen a dan nya pimpauk, Wen mɛ ale pak wa wadek nyiŋ. 33M bisa, mi a kan bo ale ni ate ku beni. M dan cheŋ, ni le nyiem a gisi m boka jigini. Ni teeri diipo ate m weeni Juuma kpaŋŋa ayen ba kan baga a va mu a cheŋ juijui ate mi a cheŋ la. Dila nama mɛ a kan baga a cheŋ juijui ate mi a cheŋ la. 34Sinsak paali ate mi a yaali ayen ni va. Ni a yaali chaab nalimnyiini. Mi ale yaali ni a soa diila ni a yaali chaab dila. 35Ni daa yaali chaab dila, waai meena ale seba ayen ni ka mi ŋaaŋviirɔba.>>

36Simon Piita yaa bek wa ayen, <<M Nyɔnɔ Yeezu Kirisita, fi a cheŋ ka be?>> Yeezu a yaa weeni wa ayen, <<Fi kan baga a va mu a cheŋ yɔgyɔgla de, alege ku dan ga nye maga, fi le baga a va mu.>> 37Piita a ŋman bek wa ayen, <<M Nyɔnɔ Yeezu Kirisita, ka boa ale soa ate mi an baga a va fu yɔgyɔgla de? Mi a gomsi a magsi kama ayen m kpi fi nyiŋ.>> 38Yeezu yaa bek wa ayen, <<Fi sum gomsi a magsi ayen fi kpi mi nyiŋŋa? Wensie ate mi a weeni fu. Fi le weeni nuruba ku nɔi buta yokku de ayen fi zɛ mi abe vari kpadiaka a kum.>>

Currently Selected:

Jɔɔn 13: BWU

Highlight

Copy