Jɔɔn 14

1Yeezu yaa weeni ba ayen, <<Ni kan basi ate ni sue a kaasi, ni ta siaka ale Wen abe ni ta siaka ale mi mɛ. 2Mi Kowa yenni po ka diin bori. Mi abe pilim a cheŋ ku jigini kama, ayen m gomsi jigi a te ni. Ase ku dan kan daa dila, m te kan weeni ni. 3M dan gomsi ŋa a nueri, m le ŋman jam a ta ni a cheŋ ku jigini ate nama ale mi a maa chaab a bo jigi yeŋ. 4Ni seba mi ale a cheŋ juijui la kama ale suik kuui ale a cheŋ ku jigini la.>> 5Tomasi yaa weeni wa ayen, <<M Nyɔnɔ Yeezu Kirisita, tama a diem zɛ juijui dek ate fi a cheŋ la. Ti be ti nye ka sɛ a seba suik kuui ale a cheŋ dula jigini la?>> 6Yeezu yaa weeni wa ayen, <<Mi ale suiku ale wensieŋa ale nyuvunni, waai a kan baga a jam Kowa jigi ya alege ka wa nin va mi jigi.

7<<Nama ale seba mi ale ka waai yɔgyɔgla de la, kula le basi ate ni seba m Kowa ale ka waai la mɛ. A nyini jinla a ta a cheŋ ni yaa nya wa kama ale seba wa.>>

8Filip yaa weeni wa ayen, <<M Nyɔnɔ Yeezu Kirisita, tama ale a yaali dii nyiini la ale fi basi ate ti nya fi Kowa.>>

9Yeezu yaa weeni wa ayen, <<Tama a bo le chaab ate ku beni kama alege fi a zɛ mi? Waai meena ale nya mi la, a nya m Kowa kama. Ka boa ale soa ate fi weeni ayen m dak m Kowa a sak ni? 10Fi ka siaka ayen mi a bo ale m Kowa ate m Kowa mɛ a bo ale mu? Mi ale sak ni wie ŋaai meena la an nyini daa mi dek jigi ya. M Kowa waai ale bo ale mu la, ale a tom wa tuimaŋa.>> 11Yeezu yaa cheem a weeni wa ŋaaŋviirɔma meena ayen, <<Ni ta siaka ayen m Kowa a bo ale mu kama ate mi mɛ a bo ale wa. Be dan kan daa di ni be ta siaka ale m tuimkperikaliik sii ate ni nya ale maa tom la nyiŋ. 12Wensie ate mi a weeni ni, baai ale ta siaka ale mi la ale ba a tom dii ate mi a tom la. Bala dek ale tom tuimkperikaliisa a gaam dii ate mi a tom la, dii nyiŋla mi ale ŋmani a cheŋ m Kowa jigi la. 13Ni dan juisi jaabuuri meena mi yuenni nyiŋ m le nye a te ni, ate Kowa ale nya zula Nidoabinni nyiŋ. 14Jaabuuri meena ate ni a juisi mi yuenni nyiŋla, m le nye.

15<<Ni dan a yaali mu, ni le nye dii ate mi a weeni ni la.

16<<Mi le saalim m Kowa ate wa te ni Sagrɔ wa choa ate wa kasim a bo ale ni taam wuu. 17Wa ka wensie Chiik, waai ate tɛŋzuk de demma an tuesi wa la, dii nyiŋla ba an nya wa yaase ba seba wa, nama abe seba wa kama, diila wa bo ale ni kama, wa be le bo ni po.

18<<M kan basi ni, nidek ni nyiini ase kpinsa la. M le ŋman jam ni jigi. 19Dai dii danni ate tɛŋzuk de meena demma a kan ŋman nya mu la a moata kama, alege nama ale ŋman nya mu kama. Mi abe nin kasim a boro la nama mɛ ale kasim boro. 20Dai dila danni a dan paari, ni le seba ayen mi bo ale ka m Kowa ate nama a bo ale mi ale ge ate mi mɛ a bo ale nama. 21Baai ale a wom mi wieŋa ale a va ŋa la a sak kama ayen ba a yaali mu. Mi mɛ ale pai m dek a sak ba abe mi a yaali ba. Ba le a yaali mu la nyiŋ, m Kowa mɛ ale yaali ba.>> 22Judas wa choawa, daa Judas Iskariot waai ale ta Yeezu a ga bobri sak la, yaa weeni Yeezu ayen, <<M Nyɔnɔ Yeezu Kirisita, fi le nye ka sɛ a pai fidek a sak tama nyiini alege daa tɛŋka meena demma?>> 23Yeezu yaa tulisi wa ayen, <<Baai ale a yaali mi la a va ka m sinsaŋŋa. Bala mɛ ate m Kowa a yaali ate mi ale wa a jam bo ba suiniimaŋa po. 24Baai ale kan a yaali mi la a kan va m wieŋa. Mi ale a sak ni diila an nyini daa mi dek jigiya, alege ka m Kowa ale tom mu la jigi.

25<<Mi ale diem bo ale ni la, ale soa ate mi a weeni ni wieŋa de. 26Alege Sagrɔwa, Wen Chiika, waai ate Kowa ale tom mi yuenni nyiŋ la, wa le sak ni wie meena abe wa basi ate ni teeri dii meena ate m weeni ni la. 27Mi ale basi ate ni ta suiyɔgni. Suiyɔgni dii ate mi ayen m te ni la ka di tɔga ale tɛŋka meena demma suiyɔgni. Ni kan a yiili abe ni a chali yɔgsummoa. 28Mi poom a liŋ weeni ni kama ayen m le cheŋ m Kowa jigi abe m ŋman pilim jam. Ase ni dan sum a yaali mu, ni sue ale peenti, ale m ale a cheŋ m Kowa jigi la diila m Kowa a zuak kama a gaam mi. 29Mi a weeni ni wieŋa de kama alege ŋa an diem nye ya, ate ŋa dan jam a nye abe ni ta siaka ale mu. 30Mi kan yaali ayen m biisi wa boari ale ni, dii nyiŋla Sitaana waai ale soa tɛŋzuk de meena demma la, a cheena kama. Wa ka pagrim mi zuwa. 31Alege tɛŋka meena demma ale seba ayen mi a yaali m Kowa kama, dila mɛ abe ni soa ate mi a tom wa dii meena ate wa a weeni mu la. Ni basi ate ti yiti a cheŋ jigi yoŋ.

Currently Selected:

Jɔɔn 14: BWU

Highlight

Copy