Jɔɔn 15

1<<Mi a nye se ka tiib la. Mi Kowa mɛ ale a nya tiimu zuk la. 2Wa nyiem a kasim a gebi naŋ sii ale kan a yɔni la a basi kama ale a gebi sii ale a yɔni la a magsi chaab ate si a yɔni yɔna yega. 3Wen a poom liŋ sugri ni suiniimaŋa kama ale wie ŋaai ate mi a sak ni la. 4Ni be kasim a bo ale mi ate mi mɛ a bo ale ni. Naŋ a kan baga yɔni yɔna ka dega, ka naŋka a nin bo kinni nyiŋ ale ka baga a yɔni. Ni dan kan bo ale mi ni kan baga a nye wari ya. 5Mi ale kinni alege nama a chim naŋsaŋa. Waai ale bo ale mi ate mi mɛ a bo ale wa la ale yɔni yɔna yega. Ni kan baga a nye wari ya ka mi nin bo ale ni. 6Waai ale kan bo ale mi la m Kowa ale gebi wa a basi ase tiib naŋsa la, naŋ sila a dan ko ba tigsi si kama a nyo bolim po a ju. 7Ni dan bo ale mi ate m wieŋa a bo ale ni, ni dan juisi jabuui ate ni a yaali la Wen ale te ni. 8Ni dan a yɔni yɔna kula ale sak ayen ni ka mi ŋaaŋviirɔba ate m Kowa a nya zula. 9Mi a yaali ni ase ka m Kowa ale a yaali mu diila. Ni kasim a ta yaalika ale mu. 10Ni dan ta m wieŋa, ni le bo m yaalika po ase m le ta m Kowa wieŋa abe m bo wa yaalika po. 11Wieŋa de meena mi a biisi ale ni kama ayen m suipeentika a bo ni po, ate ni suipeentika a zuak.

12<<Sinsak paali ate mi a yaali ayen ni va di. Ni a yaali chaab ase mi a ale yaali ni diila. 13Nuru ka yaali kpieŋ a gaam ka de, ate waai a zaani wa doaba naŋkula po a kpi a te ba. 14Ni dan a va dii ate mi a sak ni la, ni ka mi doaba. 15Wie ŋaai meena ate m Kowa a weeni mu la, ŋala ale mi a pai weeni ale ni. Ka dila ale soa ate mi a weeni ayen ni ka m doaba la. Mi kan yaali ayen m ŋman weeni ayen ni ka mi yɔm, dii nyiŋla yɔma a zɛ wa nyɔnɔ ale ta diila. 16Daa nama ale lueri mi, alege ka mi ale lueri nama ayen ni a yɔni yɔna ate yɔnaŋa a boro ate dii meena ate ni a bek Kowa mi yuenni nyiŋ la, wa le te ni. 17Dii ate mi a weeni ni la ale ni a yaali chaab nalimnyiini.

18<<Ase tɛŋka meena demma a dan kisi ni, ni be teeri ayen ka mi ate ba jam a liŋ kisa. 19Ase ni dan ka tɛŋzuk de dem, ka ti a yaali ni wari kama, alege ni ale kan daa tɛŋzuk de dem, alege ka mi ale lueri ni a nyini ka po la nyiŋ, dila ale soa ate ka kisi ni. 20Ni teeri dii ate m weeni ni ayen tomteerɔ an baga a zuak a gaam wa nyɔnɔ la. Ba jam a daani mi ka nna yegayega. Dila dek dek ate ba a yaali ayen ba daani nama mɛ. Ba dan wom mi wanni kama, ba te le wom nama wieŋa mɛ. 21Ba le daani ni dii nyiŋla ba zɛ waai ale tom mi la. Ba le ŋman a daani ni, ni ale a va mi la nyiŋ. 22M jam kama ayen m weeni ba ate ba basi ba wabaataŋa suiku vaka, alege ba zɛri. Dila nyiŋ Wen a dan bo ba buusa ayen ba lo ya, ba an ŋman baga a weeni wari ale wa. 23Waai ale kisi mi la, a kisi m Kowa mɛ kama. 24Mi tom ka tuimkperikaliik sii ate waai an baga a tom la, ba nimbie po. Dila nyiŋ Wen ale weeni ba ayen ba nye kaasiya. Badek a nya ŋaai meena ate mi a nye la kama ale ba nimbie alege ba diem kisi mi ale m Kowa. 25Ba kisi mu nna la kama ayen dii ate ba ŋmarisi Wen Gbaŋka po la a chim wensie. Ba ŋmarisi ayen, <Ba kisi mu kama kinla nyiŋ.> (Yiila 35:19)

26<<Mi poom a liŋ weeni ni kama ayen Sagrɔwa waai ale ka Wen Chiika la ale pai Wen wensie wieŋa a sak ni, wa abe le nyini ka m Kowa jigi. M le tom wa ate wa nyini m Kowa jigi a jam a biisi mi wie. 27Ate nama mɛ a baga a biisi mi wie dii nyiŋla ni bo ale mu kama a nyini piilimka.

Currently Selected:

Jɔɔn 15: BWU

Highlight

Copy