Jɔɔn 16

1<<Mi a weeni nama wieŋa de kama, ate ni kan jɔk siaka ale mi. 2Juuma ale yiak ni ba tuka diinaŋa po a basi. Ku danni mɛ dek ale jam paari ate baai ale ba ko ni la a poli ayen ba a tom ka dii ate Wen a yaali la. 3Ba le nye ni nyaŋa de meena, dii nyiŋla ba zɛ mi yaase m Kowa. 4Mi a weeni ni wieŋa de kama ate da ŋala, dan paari ate ba boro a nye ni dila abe ni teeri mi ale weeni ni diila. Mi an weeni ni wieŋa de piilimka po, diila m le jam bo ale ni la.

5<<Yɔgyɔgla de m ŋmani a cheŋ ka Waai ale tom mu la jigi, alege ni waai an bek mi m le a cheŋ juijui la. 6Mi ale weeni ni wieŋa de meena la a nye kama ate ni sue a kaasi nna yegayega. 7Alege wensie ate mi a weeni ni, ku ale zunchoŋ ni jigi ase m nin cheŋ m Kowa jigi, dii nyiŋla m dan kan cheŋ ya, Sagrɔwa a kan jam ni jigi ya. Alege m dan cheŋ m le tom wa ate wa jam a maari ni. 8Ase wa dan jam wa le basi ate tɛŋka demma a seba wensieŋa a magsi chaab ale tuimbaata ale wayɔrisima ale buusa boka. 9A magsi chaab ale tuimbaata, dii nyiŋla ba ka siaka ale mi. 10A magsi chaab ale wayɔrisima, dii nyiŋla mi a cheŋ ka Kowa jigi ate ni kan ŋman nya mu. 11A magsi chaab ale buusa boka, dii nyiŋla waai ale soa tɛŋka a nya la ba bo wa buusa kama.

12<<Mi ta ka wie nna yegayega ayen m weeni a sak ni a gum du, alege ŋa zuak kama a gaam ni womka. 13Wen Chiika kaai ale ka wensie nyɔnɔ la, ale jam a bo ni suiniimaŋa po, ka le dɛ ni niŋ a sak ni wensie suiku. Ka le ka sak ni diila a kan nyini daa ka dek jigi ya. Wie ŋaai ate mi ale m Kowa a weeni ka la, ŋala ale ka pai a sak ni. Ka le sak ni mɛ wie ŋaai ale diem cheena ayen ŋa nye la wie. 14Ka le te mi zula yegayega, dii nyiŋla ka le wom mi wie ŋaai ate mi a weeni ka la abe ka pai a sak ni. 15Jaabuuri meena ate m Kowa a ta la ka mi ale soa. Ka dila ale soa ate mi a weeni ni ayen Wen Chiika ale wom dii ate mi a weeni ka la abe ka pai a sak ni.

16<<Mi a kan bo ale ni a beni abe m ge cheŋ m Kowa jigi ya. Mi a dan cheŋ wa jigi ku kan beni ate ni ŋman nya mu.>> 17Wa ŋaaŋviirɔma gela yaa weeni chaab ayen, <<Wa a weeni ka tama ayen wa kan bo ale ti a beni abe wa ge a cheŋ wa kowa jigi ya. Wa ŋman a weeni ti kama ayen wa dan cheŋ ku kan beni ate ti ŋman nya wa. Nya kude meena ate wa biisi la, kiri ale boa?>> 18Ba weeni ayen, <<Ku kan beni kiri ale boa? Tama zɛ wa le a weeni dii la kiriya?>> 19Yeezu a jam seba kama ayen ba a yaali ayen ba bek wa kama. Wa yaa weeni ba ayen, <<Ku kan beni ate ni kan ŋman nya mu, ku be kan beni ate ni ŋman nya mu. Ka kude ate ni a bek chaaba? 20Wensie ate mi a weeni ni le kum abe ni a fɔbili alege ate tɛŋzuk de demma sue peenti, niniga ale paari ni alege niniŋŋa ale tulim chim suipeentik. 21Nipok a dan boro a dom wa puuk, wa sui a nyiem kaasi kama. Wa dan biak nueri, wa a baŋ sui kaasuŋku kama, ale ta suipeentik wa biika nyiŋ. 22Nama sue a kaasi kama yɔgyɔgla de, alege m dan ŋman nya ni, ni sueŋa a peenti kama nna yegayega. Nuru karo a baga a tuesi suipeentika de ni jigi ya.

23<<Dai dila danni a dan jam paari ni kan bek mu jaaboa. Wensie ate mi a weeni ni ayen ni le baga a pai mi yuenni nyiŋ a juisi jaabuuri meena ate nama a yaali la m Kowa jigi ate wa te ni. 24A ta nyini dila po a jam paari jinla danni, nama an diem a juisi wa jaaboa mi yuenni nyiŋŋa. Ni be juisi wa ate wa te ni ate ni sueŋa a peenti a gaam taam.

25<<Mi pai ka wamagsima a biisi ale ni, di vanni a cheena ate m kan ŋman pai wamagsima a biisi ale ni alege m le weeni ni a lagri m Kowa le ka waai la. 26Dai dila danni, ni le bek mi yuenni nyiŋ, ate mi ale weeni ni ayen, m le puusi a weeni ni wie a te m Kowa. 27Mi Kowa ale te ni jabuui ate ni a yaali la, dii nyiŋla wa a yaali ni ka nna yegayega. Nama a yaali mu kama ale ta siaka ayen m nyini ka m Kowa Wen jigi. 28Mi a nyini ka wa jigi a jam tɛŋzuk de. Yɔgyɔgla de mi a basi tɛŋzuk kama ayen m ŋmani cheŋ wa jigi.>>

29Wa ŋaaŋviirɔma yaa weeni ayen, <<Yɔgyɔgla de fi biisi lagri kama, ŋman daa wamagsini. 30Ti seba ayen fi seba wie meena kama. Ku daa nuru ŋman bek fu bega. Kude a basi kama ate tama a ta siaka ayen fi nyini ka Wen jigi.>> 31Yeezu yaa weeni ba ayen, <<Ni sum ta siaka ale mu yɔgyɔgla de? 32Di danni a cheena, di poom jam kama, ate nama a waaŋ chaab ate nuru meena a kuli wa yeri abe ni ge mi nyiini, ale ge m kan boro m dek nyiini, m Kowa a bo le mu kama. 33Mi weeni ni ŋade kama ayen, mi jigi ni le nya suiyɔgni. Tɛŋka de zuk ni le nya daanika, alege ni basi ate ni sue peenti, mi nak de tɛŋzuk de kama.>>

Currently Selected:

Jɔɔn 16: BWU

Highlight

Copy