Jɔɔn 17

1Yeezu ale biisi a ga nueri la, wa yaa zak wa zuk a nya wenŋmazuk a weeni ayen, <<M Koa, m kummu danni a moata kama. Sak zulaŋa ale fi nidoabinni ate nidoabinni mɛ a te fu zula. 2Fi te mu pagrim kama nurubiik meena zuk ayen m baga a pai nyuvuri dii ale kan ta kpeglimka la a te baai meena ate fi a te mu la. 3Fi ka wanyi dekki ale wensie Wen ale Yeezu ate fi tom la, wala nyiini ale ta nyuvuri dii ale kan ta kpeglimka la. 4Tuim ŋaai ate fi pai te mu ayen m tom la a basi ate tɛŋka meena demma a nya fi zulaŋa ale fi nalimu kama. Yɔgyɔgla de mi abe nueri tuimaŋa kama. 5M Koa, te mu zula fidek nimbie po, zula ŋaai ate mi ale fi a jam ta alege ate fi nye tɛŋka la.

6<<Nuru baai ate fi lueri ba tɛŋka po a te mi la, mi a basi ate ba seba fu kama. Fi ale soa ba a pai ba a te mi. Ba be va fi nɔi kama. 7Yɔgyɔgla de ba yaa seba ayen jaabuuri meena ate mi ta la a nyini ka fi jigi. 8Wie ŋaai ate fi a weeni mu la, m pai ŋa kama a sak ba, ate ba ta siaka ayen ka fi ale tom mu ba jigi. 9M kan puusi a te ka tɛŋka meena demma, alege mi a puusi a te ka baai ale ta siaka ale mi la. Fi ale soa ba ale lueri ba a te mi. 10Mi nuruba meena ka fi nuruba. Fi nuruba mɛ meena ka mi nuruba. Ba ale va mi diila a sak ka nuruba ayen mi ta zula ka nna yegayega. 11Yɔgyɔgla de mi cheena ka fi jigi, m kan ŋman bo tɛŋzuk de, alege bala dek ba nyiini ale ba bo tɛŋzuk de. M Ko Weleŋa a nya ba zuk nalimnyiini ale fi pagrimu ate ba chim bunyi ase mi ale fi ale ka bunyi diila. 12Ase mi ale diem a jam bo ale ba diila, mi pai ka fi pagrimu a nya ba zuk. Mi a nya ba zuk kama ate ba wanyi an bɛ ya, alege ka waai ale yeeri wadek ayen ba ale ŋmarisi wa wie dii Wen Gbaŋka po dipo la a jam chim wensie.

13<<Alege yɔgyɔgla de mi cheen ka fi jigi, wieŋa de abe le m biisi tɛŋzuk de, ayen m suipeentika a bo ale ba. 14Wie ŋaai meena ate fi weeni mu la m pai ŋa kama a sak ba. Tɛŋka demma a kisi ba kama, dii nyiŋla ba daa bunyi ale tɛŋzuk de demma ase mi ale tɛŋka demma mɛ ale kan daa bunyi diila. 15Mi a kan puusi a te fu ayen ka fi yeeri ba tɛŋka po a basi, alege mi a yaali kama ayen fi lik ba a tanla ate jabioku a kan paari ba. 16Ba le tɛŋzuk de demma a daa bunyi ase mi ale tɛŋka meena demma ale kan daa bunyi diila. 17Basi ate ba welema wensieŋa po, Fi wanni ka wensie. 18Mi ale a tom ba ayen ba cheŋ a ga sak tɛŋka meena demma fi wie ase fi ale tom mi mɛ ayen m jam a sak ba diila. 19Ba nyiŋ mi welema kama m dek, ate ba mɛ dek a baga a welema wensieŋa po.

20<<Mi kan puusi a te ka mi ŋaaŋviirɔma dek ba nyiini, alege ka baai meena ale ba ta siaka ale mi ba sinsaŋŋa nyiŋla, 21ayen ba meena a chim bunyi m Koa, ase fi ale bo mi po ate mi a bo fi mɛ po la, ayen ba mɛ a bo ti po, ate dila ale basi ate tɛŋzuk de meena a seba ayen ka fi ale tom mu.

22<<Fi zulaŋa ate fi a te mi la, mi pai a te ba kama ayen ba chim bunyi ase tama la. 23Mi a bo ale ba kama ate fi a bo ale mi ayen ba ta nɔiyeŋ ate tɛŋka demma a seba ayen fi ale tom mi alege a yaali ba ase fi ale a yaali mi diila. 24M Koa, mi a yaali ayen baai ate fi a te mi la mɛ, a bo ale mi juijui ate mi a cheŋ la, ate ba ta m zulaŋa, ŋaai ate fi a te mu a ta va fi yaalika a nyini tɛŋzuk de nyubini piilimka danni la.

25<<Wayɔrisima Koa, tɛŋzuk de demma a zɛ fu alege mi seba fu kama ate bade a seba ayen ka fi ale tom mu. 26Mi basi ate ba seba fi yuenni kama, m be le basi ate ba seba di, ate yaali kaai ate fi ta ale mi la a bo ba mɛ jigi, ate mi a bo ba po.>>

Currently Selected:

Jɔɔn 17: BWU

Highlight

Copy